និស្សិតកំពុងបន្តការសិក្សា និស្សិតបញ្ចប់ការសិក្សា និងអ្នកស្វែងរកការងារកម្ពុជា បាននាំគ្នាចូលទស្សនាពេញនៅក្នុងសាលធំនៃមជ្ឈមណ្ឌលកិច្ចសហប្រតិបត្តិការកម្ពុជា-ជប៉ុន កាលពីម្សិលមិញ ដើម្បីស្វែងរកឱកាសការងារនៅក្រុមហ៊ុនធំៗបំផុតមួយចំនួនរបស់ប្រទេសជប៉ុន។
អ្នករៀបចំពិធីពិព័រណ៍នេះបានលើកឡើងថា ព្រឹត្តិការណ៍នេះធ្វើឡើងក្នុងគោលបំណងកាត់បន្ថយគម្លាតរវាងអ្នកស្វែងរកការងារកម្ពុជា ដែលមានជំនាញ និងក្រុមហ៊ុននានាមកពីប្រទេសសេដ្ឋកិច្ចធំបំផុតទី៣របស់ពិភពលោកមួយនេះ ដែលនៅក្នុងរយៈពេលប៉ុន្មានឆ្នាំថ្មីៗនេះបានបង្ហាញចំណាប់អារម្មណ៍មកលើទីផ្សារកម្ពុជា។
ក្នុងចំណោមក្រុមហ៊ុន ដែលមានវត្តមាននៅក្នុងពិធីពិព័រណ៍ការងារនេះមានដូចជា ក្រុមហ៊ុនអ៊ីអន (Aeon) ជាក្រុមហ៊ុនលក់រាយដ៏ធំដែលកំពុងសាងសង់ផ្សារទំនើបមួយតាមបណ្ដោយមហាវិថីសុធារស ក្រុមហ៊ុនផលិតរថយន្តតូយ៉ូតា ក្រុមហ៊ុនផលិតម៉ូតូយ៉ាម៉ាហា និងក្រុមហ៊ុនផ្គត់ផ្គង់គ្រឿងបន្លាស់រថយន្តយ៉ាហ្សាគី (Yazaki)។
លោកស្រី ម៉ូម៉ូ អូឈីណុ (Momo Ochino) នាយិកាក្រុមហ៊ុនណូជីម៉ា ខបផូរ៉េសិន (Nojima Corporation) ជាក្រុមហ៊ុនលក់រាយផ្គត់ផ្គង់បរិក្ខារប្រើប្រាស់ក្នុងផ្ទះ និងគ្រឿងអេឡិចត្រូនិក ដែលសង្ឃឹមថា នឹងបើកហាងមួយនៅក្នុងរាជធានីភ្នំពេញនោះ បានមានប្រសាសន៍ថា ព្រឹត្តិការណ៍ដូចនេះមានសារៈសំខាន់ណាស់ នៅពេលកំពុងស្ទាបស្ទង់ទីផ្សារការងារក្នុងប្រទេសកម្ពុជា។លោកស្រីថ្លែងថា “ យើងមិនទាន់មានក្រុមហ៊ុនមួយនៅកម្ពុជា នៅឡើយទេ ដូច្នេះហើយយើងពិបាកនឹងស្វែងរកកម្មករកម្ពុជា មកពីប្រទេសជប៉ុនណាស់។ នេះជាឱកាសល្អក្នុងការទំនាក់ទំនងជាមួយប្រជាជនកម្ពុជា”។
បណ្តាក្រុមហ៊ុនជប៉ុន ដែលបានមកបោះទុនវិនិយោគនៅក្នុងប្រទេសកម្ពុជា រហូតមកទល់ពេលនេះ ដូចជា ក្រុមហ៊ុនមីនីប៊ី (Minebea) ដែលផលិតម៉ាស៊ីនរថយន្តជាដើមនោះ បានត្អូញត្អែរអំពីកង្វះកម្មករជំនាញនៅក្នុងប្រទេសកម្ពុជា។
តែទោះជាយ៉ាងណា លោក តូស៊ីអុ បាន ទីប្រឹក្សាជាន់ខ្ពស់នៅមជ្ឈមណ្ឌលកិច្ចសហប្រតិបត្តិការកម្ពុជា-ជប៉ុន ដែលបានជួយរៀបចំពិធីពិព័រណ៍ការងារនេះឡើង បានមានប្រសាសន៍ថា កម្មករកម្ពុជាចាប់អារម្មណ៍លើក្រុមហ៊ុនជប៉ុន ជាងក្រុមហ៊ុនមកពីបណ្តាប្រទេសផ្សេងៗទៀត ពីព្រោះជាញឹកញាប់ ក្រុមហ៊ុនទាំងនេះបោះទុនលើការបណ្តុះបណ្តាលកម្មករនិយោជិតរបស់ខ្លួន។
លោកមានប្រសាសន៍ថា ក្រុមហ៊ុនជប៉ុន “ មិនត្រឹមតែទទួលយកកម្មករគ្មានជំនាញដែលទទួលបានប្រាក់ឈ្នួលទាបប៉ុណ្ណោះទេ ប៉ុន្តែ ថែមទាំងជួយបណ្តុះបណ្តាលពួកគេ និងសិក្សាពីគ្នាទៅវិញទៅមកទៀតផង។ពួកគេមានគំនិតបែបនេះ”។
វិនិយោគទុនរបស់ជប៉ុន នៅក្នុងប្រទេសកម្ពុជា កាលពីឆ្នាំមុនមានទំហំទឹកប្រាក់៧៥លានដុល្លារ ហើយតាមការរំពឹងទុកថា វានឹងកើនឡើងដល់៣០០លានដុល្លារនៅឆ្នាំនេះ ដោយសារតែគម្រោងវិនិយោគសាងសង់ផ្សារទំនើបអីុអនម៉ល (Aeon Mall) ដែលចំណាយអស់ទឹកប្រាក់២០៥លានដុល្លារនៅក្នុងរាជធានីភ្នំពេញ៕
ប្រែសម្រួលដោយ តែម សុខុម