ក្រុមហ៊ុនអាកាសចរណ៍អ៊ែរអេស៊ា (Air Asia) ជាក្រុមហ៊ុនដឹកអ្នកដំណើរក្នុងតម្លៃទាប ដែលមានមូលដ្ឋាននៅប្រទេសម៉ាឡេស៊ី បានប្រកាសថា ខ្លួននឹងចាប់ផ្ដើមជើងហោះហើរផ្ទាល់ប្រចាំថ្ងៃរវាងទីក្រុងសៀមរាប និងទីក្រុងបាងកក ចាប់ពីខែតុលា ឆ្នាំនេះទៅ។
នៅក្នុងសេចក្ដីថ្លែងការណ៍មួយចេញកាលពីម្សិលមិញ ក្រុមហ៊ុនអាកាសចរណ៍ថៃ អ៊ែរអេស៊ា(Thai Air Asia) ដែលជាបុត្រសម្ព័ន្ធរបស់ក្រុមហ៊ុនអ៊ែរអេស៊ា បានលើកឡើងថា ខ្លួនផ្ដល់ការហោះហើរក្នុងតម្លៃមុនបង់ពន្ធទាបត្រឹម២ដុល្លារ ប្រសិនបើអ្នកធ្វើដំណើរកក់តាមអ៊ីនធើណិត។
នៅក្នុងសេចក្ដីថ្លែងការណ៍នេះ លោក តាសាពន់ ប៊ីជ្លេវ៉េល (Tassapon Bijleveld) អគ្គនាយកក្រុមហ៊ុនអាកាសចរណ៍ថៃ អ៊ែរអេស៊ា បានលើកឡើងថា ជើងហោះហើរពីក្រុងសៀមរាបទៅកាន់អាកាសយានដ្ឋាន ដន មឿង គឺជាផ្នែកមួយនៃយុទ្ធសាស្ត្រពង្រីកជើងហោះហើរផ្ទាល់របស់ខ្លួន។ លោកត្រូវបានដកស្រង់សម្ដីថា “ យើងរីករាយនៅក្នុងការពង្រីកប្រតិបត្តិការជើងហោះហើររបស់យើងពីទីក្រុងបាងកកទៅតំបន់ផ្សេងៗទៀតក្នុងតំបន់ ហើយយើងនឹងផ្ដោតសំខាន់លើតំបន់ឥណ្ឌូចិនក្នុងឆ្នាំនេះ”។
សេចក្ដីថ្លែងការណ៍នេះបានលើកឡើងថា ក្រុងសៀមរាបនឹងក្លាយជាគោលដៅទី៦ក្នុងតំបន់របស់អាកាសចរណ៍ថៃអ៊ែរអេស៊ា ជាមួយជើងហោះហើរពីទីក្រុងបាងកកទៅកាន់ទីក្រុងរ៉ង់ហ្គូន និងទីក្រុងម៉ានដាឡៃ ក្នុងប្រទេសភូមា ទីក្រុងហាណូយ និងទីក្រុងហូជីមិញ ក្នុងប្រទេសវៀតណាម និងរាជធានីភ្នំពេញ។
ចំនួនជើងហោះហើរដែលឆ្លងកាត់អាកាសយានដ្ឋានអន្តរជាតិសៀមរាប មានការកើនឡើងដោយសារតែចំនួនភ្ញៀវទេសចរមកទស្សនាប្រាសាទអង្គរវត្តមានការកើនឡើងនៅក្នុងប៉ុន្មានឆ្នាំថ្មីៗនេះ។
យោងតាមតួលេខចុងក្រោយលើគេហទំព័រក្រុមហ៊ុនអាកាសចរណ៍កម្ពុជាបង្ហាញថា មានអ្នកដំណើរចំនួន៩២២.១៩៤នាក់បានធ្វើដំណើរឆ្លងកាត់អាកាសយានដ្ឋានអន្តរជាតិសៀមរាប នៅក្នុងត្រីមាសដំបូងក្នុងឆ្នាំ២០១៣ នេះ ដោយមានការកើនឡើងជាង១ភាគ៤ អំឡុងពេលដូចគ្នាកាលពីឆ្នាំ២០១២៕
ប្រែសម្រួលដោយ ស៊ា ស៊ុយឈាង