នៅពេលរដ្ឋសភាបង្កើតឡើងបន្ទាប់ពីការបោះឆ្នោតនៅខែនេះនោះ លោក ប៉ែន សុវណ្ណ អតីតនាយករដ្ឋមន្ត្រីដំបូងនៅប្រទេសកម្ពុជា បន្ទាប់ពីការដួលរលំរបបខ្មែរក្រហមក្នុងឆ្នាំ១៩៧៩ ហើយត្រូវគេចាប់ដាក់គុកនៅក្នុងទីក្រុងហាណូយចាប់ពីឆ្នាំ១៩៨១ដល់ឆ្នាំ១៩៩១ អាចអង្គុយធ្វើការជិតបុរសម្នាក់ដែលលោកជឿថា បានក្បត់លោកកាលពីបីទសវត្សរ៍មុន។
លោក ប៉ែន សុវណ្ណ ដែលជីវិតរបស់លោកបានតាមដានប្រវត្តិសាស្ត្រកម្ពុជាសម័យទំនើបពីចលនាឥស្សរៈប្រឆាំងអាណានិគមក្នុងទសវត្សរ៍ឆ្នាំ១៩៥០រហូតដល់រណសិរ្សសង្គ្រោះជាតិដែលបានផ្តួលរំលំខ្មែរក្រហម ក្នុងឆ្នាំ១៩៧៩ កំពុងឈរឈ្មោះជាបេក្ខជនស្ថិតនៅលើគេរបស់គណបក្សសង្គ្រោះជាតិជាគណបក្សប្រឆាំងនៅមណ្ឌលកំពង់ស្ពឺ។
ហើយលោករំពឹងថា នឹងទទួលបានជ័យជម្នះ។ លោកបានមានប្រសាសន៍កាលពីម្សិលមិញថា “មានអាសនៈចំនួនប្រាំបី ហើយមានតែរូបខ្ញុំម្នាក់ប៉ុណ្ណោះ។ តើខ្ញុំមិនអាចឈ្នះដូចម្តេចកើត?”។ លោក ប៉ែន សុវណ្ណ បានមានប្រសាសន៍ថា ចំណាត់ការរបស់លោកគ្រាន់តែជាការបន្តអាជីពនយោបាយដែលលោកធ្លាប់ប្រឡូករួចមកហើយ ហើយថា លោកផ្តោតលើការកាត់បន្ថយអំពើពុករលួយ និងបញ្ចប់ការធ្វើអន្តោប្រវេសន៍ជនជាតិវៀតណាមខុសច្បាប់មកកាន់ប្រទេសកម្ពុជា។
លោកបានមានប្រសាសន៍ ដោយសំដៅដល់ការនិរទេសខ្លួនរបស់លោកក្នុងឆ្នាំ១៩៨១ ដែលលោកបានអំពាវនាវឲ្យដកកងទ័ពវៀតណាមចេញ បន្ទាប់ពីរណសិរ្សសង្គ្រោះជាតិបានបង្កើតរដ្ឋាភិបាលមួយនៅក្នុងក្រុងភ្នំពេញក្នុងឆ្នាំ១៩៨១ថា “ក្នុងនាមខ្ញុំជាអ្នកស្នេហាជាតិ ហើយចង់ការពារទឹកដី ពួកគេបានចាប់ខ្ញុំដាក់គុក”។ លោកបានមានប្រសាសន៍ថា “ឲ្យតែខ្ញុំនិយាយអំពីប្រវត្តិនេះ ប្រជាពលរដ្ឋសម្រក់ទឹកភ្នែក”។
លោកបានមានប្រសាសន៍បន្ថែមថា “[សព្វថ្ងៃនេះ រដ្ឋាភិបាលវៀតណាម]ធ្វើឲ្យរដ្ឋាភិបាលផ្តល់សម្បទានដីទៅឲ្យវៀតណាម ហើយពួកគេមិនបានប្រើប្រាស់ប្រជាពលរដ្ឋខ្មែរឲ្យធ្វើការនៅលើដីសម្បទាននោះឡើយ”។
ចំណែកលោក ហ៊ុន សែន ដែលកូនប្រុសពៅរបស់លោក គឺលោក ហ៊ុន ម៉ានី ឈរឈ្មោះ ជាបេក្ខជនតំណាងរាស្ត្រមណ្ឌលកំពង់ស្ពឺដែរ បានធ្វើយុទ្ធនាការជាយូរមកហើយថា បានផ្តួលរំលំរបបខ្មែរក្រហមនោះ លោក ប៉ែន សុវណ្ណ បានមានប្រសាសន៍កាលពីម្សិលមិញថា លោកគឺជាស្ថាបនិកពិតប្រាកដនៃចលនាប្រឆាំង ប៉ុល ពត នេះ ហើយមានទំនាក់ទំនងគ្នារវាងពេលនោះនិងស្ថានភាពសព្វថ្ងៃនេះ។
លោកបានមានប្រសាសន៍ថា “នៅពេលគណបក្សសង្គ្រោះជាតិបង្កើតឡើង ខ្ញុំបានចូលរួមជាមួយគណបក្សនេះ ដើម្បី សង្គ្រោះជាតិម្តងទៀត។ គណបក្សសង្គ្រោះជាតិកំពុងជួយសង្គ្រោះប្រទេសជាតិឲ្យរួចផុតពីរបបផ្តាច់ការ ពីកណ្តាប់ដៃវៀតណាម និងពីអំពើពុករលួយ”។
លោក ប៉ែន សុវណ្ណ បានមានប្រសាសន៍ថា លោកទន្ទឹងរង់ចាំធ្វើជាតំណាងរាស្ត្រឬជាអភិបាលខេត្តកំពង់ស្ពឺ ក្រោមការដឹកនាំរបស់រដ្ឋាភិបាលគណបក្សសង្គ្រោះជាតិ។ លោកក៏បានអះអាងផងដែរថា ពេលលោកត្រឡប់មកប្រទេសកម្ពុជាវិញក្នុងឆ្នាំ១៩៩២ បន្ទាប់ពីត្រូវឃុំខ្លួនក្នុងផ្ទះក្នុងទីក្រុងហាណូយរយៈពេលមួយទសវត្សរ៍មក លោកស្ទើរតែចូលរួមឡើងវិញជាមួយគណបក្សប្រជាជនទៅហើយ បន្ទាប់ពីចំណុចដែលគួរឲ្យចាប់អារម្មណ៍ចំពោះប្រជាប្រិយភាពរបស់លោក បានទាក់ទងលោកឲ្យចូលរួម។
លោក ប៉ែន សុវណ្ណ បានមានប្រសាសន៍ថា “នៅពេលខ្ញុំមកដល់ដំបូង[លោក ជា ស៊ីម ប្រធានព្រឹទ្ធសភា មកពីគណបក្សប្រជាជនកម្ពុជា] បានទាក់ទងខ្ញុំមុនគេ។ លោកបានមានប្រសាសន៍ថា ខ្ញុំសូមអរគុណលោក ដែលបានផ្តល់តួនាទីជាអ្នកដឹកនាំដល់រូបខ្ញុំនៅក្នុងរដ្ឋាភិបាល…ដោយសារលោកបានចេញពីគុកហើយ ខ្ញុំចង់ឲ្យលោកចូលរួមជាមួយគណបក្សប្រជាជនកម្ពុជា”។
លោកបានមានប្រសាសន៍ថា “ពួកគេបានរៀបចំកិច្ចប្រជុំសមាជិកអចិន្ត្រៃយ៍ ហើយ [លោក ហ៊ុន សែន] បានបដិសេធ ពីព្រោះបើសិនពួកគេអនុញ្ញាតឲ្យខ្ញុំចូលរួមជាមួយ ខ្ញុំនឹងតស៊ូប្រឆាំងវៀតណាមម្តងទៀត”។
កាលពីឆ្នាំ២០០៨ លោក ហេង សំរិន ប្រធានរដ្ឋសភា មកពីគណបក្សប្រជាជនកម្ពុជា ដែលជាប្រមុខរដ្ឋ អំឡុងការធ្វើជានាយករដ្ឋមន្ត្រីរយៈពេលខ្លីរបស់ លោក ប៉ែន សុវណ្ណ នៅដើមទសវត្សរ៍ឆ្នាំ១៩៨០នោះ បានមានប្រសាសន៍ថា គណបក្សប្រជាជនកម្ពុជាមិនសូវចាប់អារម្មណ៍លើលោក ប៉ែន សុវណ្ណ ទេ។
លោក ហេង សំរិន បានមានប្រសាសន៍នៅពេលនោះដោយសំដៅដល់តួនាទីលោកជាអតីតសហសេវិកនៅក្នុងគណបក្សសិទ្ធិមនុស្សថា “គ្មានប្រយោជន៍ក្នុងការចូលរួមជាមួយគណបក្សប្រជាជនកម្ពុជាទេ ប្រសិនបើលោកផ្តាច់ខ្លួននោះ”។
លោក ប៉ែន សុវណ្ណ បានអះអាងកាលពីម្សិលមិញថា ការសន្និដ្ឋានរបស់លោក ហ៊ុន សែន ដែលថា លោកនឹងងាកទៅបណ្តេញជនជាតិវៀតណាមនោះ គឺត្រឹមត្រូវហើយ ហើយបានបន្ថែមថា លោកក៏នឹងរៀបចំរចនាសម្ព័ន្ធមេដឹកនាំគណបក្ស និងគោលនយោបាយសេដ្ឋកិច្ចឡើងវិញផងដែរ។
ប៉ុន្តែ លោកក៏បានសង្កត់ធ្ងន់ផងដែរកាលពីម្សិលមិញថា បន្ទាប់ពីបានរៀបការជាមួយស្ត្រីវៀតណាម ពេលលោករស់នៅក្នុងភាពនិរទេសខ្លួនក្នុងទីក្រុងហាណូយនោះ លោកមានការប្រុងប្រយ័ត្នមិនឲ្យឡូកឡំរឿងនយោបាយ និងជីវិតផ្ទាល់ខ្លួនឡើយ។
លោកបានមានប្រសាសន៍ថា “ខ្ញុំបានបែងចែកច្បាស់លាស់។ ប្រទេសជាតិ និងជីវិតឯកជនរបស់ខ្ញុំច្បាស់លាស់ណាស់។ និយាយដោយខ្លីទៅ…[ជនជាតិវៀតណាម] ធ្វើម្ហូបឆ្ងាញ់ណាស់ ដូច្នេះខ្ញុំសរសើរជនជាតិវៀតណាម។ ខ្ញុំមិនចូលចិត្តជនជាតិវៀតណាម ប៉ុន្តែ ខ្ញុំចូលចិត្តម្ហូប”។ លោកបានបន្ថែមថា “ទោះជាយ៉ាងណា ប្រសិនបើអ្នកនិយាយអំពីការមកដល់របស់ជនជាតិវៀតណាមក្នុងប្រទេសយើង នោះជារឿងផ្សេង”៕
ប្រែសម្រួលដោយ សោម សារុន