ក្រសួងមហាផ្ទៃបានចាត់ទុកការភ្នាល់លទ្ធផលនៃការបោះឆ្នោតជាតិនៅថ្ងៃទី២៨ ខែកក្កដាខាងមុខនេះ ជាការខុសច្បាប់ ដោយលើកឡើងថា វិធានការនេះ គឺជាការចាំបាច់ក្នុងការទប់ស្កាត់អសន្តិសុខសង្គម។
បំរាមដែលត្រូវបានផ្សព្វផ្សាយនៅលើគេហទំព័ររបស់ក្រសួងមហាផ្ទៃនេះឲ្យដឹងថា វិធានការនេះ គឺជាការចាំបាច់ដើម្បីធានាសុវត្ថិភាពសាធារណៈ និងសន្តិសុខ ព្រមទាំងការពារជីវភាពរស់នៅរបស់ប្រជាពលរដ្ឋ ដែលអាចរងការគំរាមកំហែងដោយសារមនុស្សមួយចំនួនបានភ្នាល់គ្នាផ្អែកលើព័ត៌មានមិនត្រឹមត្រូវ។
ក្រសួងមហាផ្ទៃបានលើឡើងនៅក្នុងបំរាមនេះថា “ ក្រសួងមហាផ្ទៃសូមអំពាវនាវទៅគ្រប់គណបក្សនយោបាយទាំងអស់ អង្គការក្រៅរដ្ឋាភិបាលនានា និងប្រជាពលរដ្ឋទាំងអស់ឲ្យអនុវត្តបទបញ្ជានេះ ដើម្បីទប់ស្កាត់ និងវែកមុខទង្វើខុសច្បាប់ទាំងអស់ ដែលធ្វើឲ្យប៉ះពាល់ដល់ដំណើរការនៃការបោះឆ្នោតនេះ”។
យោងតាមក្រសួងមហាផ្ទៃឲ្យដឹងថា ប្រជាពលរដ្ឋនៅក្នុងរាជធានីភ្នំពេញ និងនៅខេត្តព្រៃវែង បាននិងកំពុងភ្នាល់គ្នាថា តើ គណបក្សនីមួយអាចទទួលបានជោគជ័យយ៉ាងណានៅថ្ងៃទី២៨ខែកក្កដានេះ។
លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានសួរថា ហេតុអ្វីបានជាក្រសួងមហាផ្ទៃចេញបំរាមបែបនេះ ខណៈដែលការលេងល្បែង គឺជាការខុសច្បាប់ទៅហើយនៅខាងក្រៅកាស៊ីណូ។ លោកបានថ្លែងបន្តទៀតថា “ ក្រសួងមហាផ្ទៃគួរតែយកចិត្តទុកដាក់អំពីបញ្ហាសន្តិសុខជាតិបានហើយ”។
ទោះបីជាមានបំរាមមិនឲ្យចូលលេងល្បែងនៅកាស៊ីណូនៅប្រទេសកម្ពុជាក៏ដោយ ក៏ប្រជាពលរដ្ឋមួយចំនួននៅតែលេងល្បែងដដែល ហើយជារឿយៗអាចឃើញពួកគេភ្នាល់គ្នានៅតាមហាងកាហ្វេលើអ្វីៗជាច្រើនចាប់ពីកីឡាបាត់ទាត់រហូតដល់ភ្នាល់ទឹកភ្លៀង។
កាលពីឆ្នាំ២០០៦ ប្រទេសកម្ពុជាបានផ្តល់អាជ្ញាប័ណ្ណឲ្យក្រុមហ៊ុនភ្នាល់បាល់តែមួយគាត់ គឺក្រុមហ៊ុនកាំបូស៊ីកដែលត្រូវបង្ខំឲ្យបិទប្រតិបត្តិការរបស់ខ្លួននៅរាជធានីដោយទុកតែកាស៊ីណូ ណាហ្គាវើល ជាកន្លែងភ្នាល់ស្របច្បាប់តែមួយគាត់នៅក្នុងរាជធានី។
អ្នកលេងល្បែងម្នាក់ដែលស្នើសុំមិនឲ្យបញ្ចេញឈ្មោះបាននិយាយថា គាត់មានការភ្ញាក់ផ្អើលដោយបានឮថា រដ្ឋាភិបាលបានហាមមិនឲ្យភ្នាល់គ្នាលើលទ្ធផលនៃការបោះឆ្នោតបែបនេះ។ គាត់បាននិយាយបន្តទៀតថា “ នេះជាលើកទី១ហើយ ដែលក្រសួងមហាផ្ទៃបានហាមមិនឲ្យភ្នាល់គ្នាពីលទ្ធផលរបស់គណបក្សនីមួយៗ”។
គាត់និយាយទៀតថា ការភ្នាល់គ្នារវាងរូបគាត់ និងមិត្តភ័គ្ររបស់គាត់ជារឿងធម្មតាដោយគ្រាន់តែដាក់ស្រាបៀរតែពីរបីកំប៉ុងប៉ុណ្ណោះនៅពេលបោះឆ្នោត ដូច្នេះគាត់យល់ថា មិនចាំបាច់ធ្វើការហាមឃាត់ពីរឿងនោះឡើយ។ គាត់បាននិយាយថា “ យើងភ្នាល់គ្នាដាក់ស្រាបៀរមួយកំប៉ុងឬមួយកេះនៅក្នុងរយៈពេលប្រាំឆ្នាំម្ដង។ ខ្ញុំគិតថា ក្រសួងមហាផ្ទៃគួរតែអនុញ្ញាត”៕
ប្រែសម្រួលដោយ ឃិន ណៃ