ការធ្វើចរាចរណ៍យ៉ាងកកកុញរយៈពេលរាប់ម៉ោងតាមបណ្ដោយមហាវិថីសហព័ន្ធរុស្ស៊ី ការធ្វើមាតុភូមិនិវត្តរបស់លោក សម រង្ស៊ី ក្រោយការនិរទេសខ្លួនអស់រយៈពេលបួនឆ្នាំ និងចំនួនមនុស្សប្រហែល១០ម៉ឺននាក់ដែលបានប្រមូលផ្ដុំគ្នានៅក្នុងរាជធានីភ្នំពេញកាលពីថ្ងៃសុក្រ មិនត្រូវបានចាក់ផ្សាយតាមទូរទស្សន៍ក្នុងប្រទេសនេះទេ។
ខណៈប្រជាជនវ័យក្មេងរាប់ម៉ឺននាក់បានហ៊ោកញ្ជ្រៀវដោយទឹកចិត្តរំភើបរីករាយនៅពេលអមដំណើរលោក សម រង្ស៊ី ពីអាកាសយានដ្ឋានឆ្ពោះទៅសួនសេរីភាព ដែលជាកន្លែងលោក សម រង្ស៊ី គ្រោងថ្លែងសុន្ទរកថាជាលើកដំបូងនោះ ទូរទស្សន៍ជាតិកម្ពុជា រួមជាមួយនឹងទូរទស្សន៍ឯកជនដែលគាំទ្ររដ្ឋាភិបាល ដូចជា ស៊ីធីអិន ស៊ីអិនស៊ី ប៉ុស្តិ៍លេខ៣ ប៉ុស្តិ៍លេខ៩ ប៉ុស្តិ៍បាយ័ន និងអប្សរា មិនបានចាក់ផ្សាយព័ត៌មានដែលជាព្រឹត្តការណ៍ធំបំផុតប្រចាំសប្ដាហ៍នេះទេ។
ផ្ទុយទៅវិញ ស្ថានីយទូរទស្សន៍នានានៅក្នុងប្រទេសនេះបានចាក់ផ្សាយតែចម្រៀងខារ៉ាអូខេ ភាពយន្តភាគចិន កីឡា និងយុទ្ធនាការឃោសនារបស់គណបក្សប្រជាជននៅទូទាំងប្រទេសប៉ុណ្ណោះ។ ប៉ុស្តិ៍អប្សរា ដែលស្ថិតនៅក្រោមការគ្រប់គ្រងរបស់មន្ត្រីជាន់ខ្ពស់ក្នុងជួរគណបក្សកាន់អំណាចរបស់លោក នាយករដ្ឋមន្ត្រី ហ៊ុន សែន បានចាក់ផ្សាយនូវព្រឹត្តិការណ៍បច្ចុប្បន្នដែលមានរូបភាពមនុស្សប្រហែលជា១២នាក់ប្រមូលផ្ដុំគ្នាដោះអាវគណបក្សសង្គ្រោះជាតិ រួចពាក់អាវគណបក្សប្រជាជនកម្ពុជាជំនួសវិញ។
គេហទំព័រព័ត៌មានក្នុងស្រុកដែលជំនាញខាងធ្វើសេចក្ដីរាយការណ៍ពីព្រឹត្តិការណ៍ពុំមានសារៈសំខាន់សោះ ដូចជាហេតុការណ៍គ្រោះថ្នាក់ចរាចរណ៍ និងការឆក់កាបូបនៅតាមបណ្ដាខេត្តដាច់ស្រយាលជាដើម ក៏មិនបានបង្ហោះព័ត៌មានអំពីការធ្វើមាតុភូមិនិវត្តនេះដែរ។ កាសែតរស្មីកម្ពុជា និងកម្ពុជាថ្មី បានព្រងើយនឹងព្រឹត្តិការណ៍នេះទាំងស្រុងតែម្ដង ខណៈកាសែតកោះសន្តិភាពបង្ហោះព័ត៌មានសង្ខេបអំពីការវិលត្រឡប់របស់លោក សម រង្ស៊ី នេះ។
ចំណែកគេហទំព័រព័ត៌មានដើមអំពិលវិញបានបង្ហោះអត្ថបទបញ្ចេញមតិពាក់ព័ន្ធនឹងទំនាក់ទំនងរវាងលោក កឹម សុខា និងលោក សម រង្ស៊ី ដោយមានការគូសបញ្ជាក់ថា លោក កឹម សុខា បានបញ្ចេញស្នាមញញឹមបង្កប់ទុក្ខព្រួយលើផ្ទៃមុខក្រោយការវិលត្រឡប់របស់លោក សម រង្ស៊ី។
CEN គឺជាគេហទំព័រព័ត៌មានក្នុងស្រុកតែមួយគត់ដែលបានបង្ហោះព័ត៌មានជាបន្តបន្ទាប់ ក្នុងនោះរួមមានទាំងការវិភាគដែលព្យាករណ៍ថាតើលោក សម រង្ស៊ី នឹងបដិសេធមិនទទួលស្គាល់លទ្ធផលនៃការបោះឆ្នោតថ្ងៃទី២៨ កក្កដា ឬអត់ផងដែរ។ ក្រុមអ្នកសង្កេតការណ៍បោះឆ្នោតឯករាជ្យអះអាងជាយូរមកហើយថា ការបោះឆ្នោតនេះនឹងក្លាយជាការបោះឆ្នោតមានយុត្តិធម៌ក្នុងកម្រិតទាបបំផុតក្នុងរយៈពេល២០ឆ្នាំនេះ៕
ប្រែសម្រួលដោយ ភួន ច័ន្ទសេរីវុធ