នគរបាលបានឲ្យដឹងកាលពីថ្ងៃព្រហស្បតិ៍ថា ស្រ្តីជនជាតិឥណ្ឌូណេស៊ីម្នាក់ត្រូវបានចាប់ខ្លួនកាលពីថ្ងៃព្រហស្បតិ៍ នៅឯអាកាសយានដ្ឋានអន្តរជាតិសៀមរាប ជាមួយនឹងថ្នាំញៀនប្រភេទកូកាអីុនជិត២,៥គីឡូក្រាម ខណៈនាងកំពុងតែប៉ុនប៉ងឡើងជិះយន្តហោះទៅកាន់ប្រទេសថៃ។
លោក អ៊ុំ អមរា ស្នងការរងនគរបាលខេត្តសៀមរាបបានមានប្រសាសន៍ថា ភ្នាក់ងារគយបានសហការជាមួយនគរបាល ដើម្បីចាប់ខ្លួនស្ត្រីជនជាតិឥណ្ឌូណេស៊ីរូបនេះ នៅម៉ោងប្រហែល១០យប់ បន្ទាប់ពីជើង ហោះហើររបស់នាងពីប្រទេសហ្វីលីពីនបានចុះចត។ លោកបានមានប្រសាសន៍បន្ថែមថា ស្រ្តីឈ្មោះ អីុតា អាម៉ាការា វ៉ាតា (Ita Amacara Wata) អាយុ២៧ឆ្នាំ រូបនេះមានថ្នាំញៀនប្រភេទកូកាអីុនចំនួន២.៤៩គីឡូក្រាម ក្នុងវ៉ាលិសរបស់នាង ហើយនាងបានមកដល់តាមជើងយន្តហោះ HJ២៥៧។
លោក អមរា បានមានប្រសាសន៍ថា “ នាងបានលាក់ថ្នាំញៀននៅក្នុងឧបករណ៍បំពងសំឡេង”។ លោកមានប្រសាសន៍បន្តថា ថ្នាំកូកាអីុននេះត្រូវបានច្រកក្នុងថង់ប្លាស្ទិកចំនួនបី។
លោកបានថ្លែងថា “ យើងបានកំណត់អត្តសញ្ញាណជនសង្ស័យគ្រឿងញៀនម្នាក់រួចហើយ មុនពេលចាប់ខ្លួននាង ប៉ុន្តែជនសង្ស័យទី២នៅមិនទាន់ចាប់ខ្លួនបាននៅឡើយទេ។ លោកបានបន្តថា នាង វ៉ាតា ឥឡូវនេះកំពុងត្រូវឃុំខ្លួននៅស្នាក់ការនគរបាលសៀមរាបដើម្បីរង់ចាំការសាកសួរ។
លោក អុិន សុង នាយរងការិយាល័យរដ្ឋបាល នៅនាយកដ្ឋានប្រឆាំងគ្រឿងញៀននៃក្រសួងមហាផ្ទៃបានបញ្ជាក់ថា ស្ត្រីរូបនេះ កំពុងស្ថិតក្រោមការស៊ើបអង្កេតពីបទជួញដូរគ្រឿងញៀនអន្តរជាតិ៕
ប្រែសម្រួលដោយ ស៊ា ស៊ុយឈាង