ស្ថានីយទូរទស្សន៍គ្រប់គ្រងដោយរដ្ឋបានឲ្យដឹងកាលពីម្សិលមិញថា មូលហេតុដែលពួកគេមិនធ្វើការផ្សព្វផ្សាយព័ត៌មានអំពីការវិលត្រឡប់មកប្រទេសកម្ពុជាវិញរបស់មេដឹកនាំគណបក្សប្រឆាំងលោក សម រង្ស៊ី កាលពីថ្ងៃសុក្រនោះ គឺដោយសារការផ្សព្វផ្សាយព័ត៌មាននេះ គឺជាការបំពានច្បាប់បោះឆ្នោត។
លោក គឹម គុណវឌ្ឍ អគ្គនាយករងស្ថានីយទូរទស្សន៍ជាតិបានមានប្រសាសន៍ថា “ យោងតាមច្បាប់បោះឆ្នោត យើងត្រូវបានហាមមិនឲ្យធ្វើការផ្សព្វផ្សាយសម្រាប់គណបក្សណាមួយដែលបំរើផលប្រយោជន៍របស់ពួកគេអំឡុងពេលឃោសនារកសម្លេងឆ្នោតទេ”។
លោក យិន សូវៃ ប្រធានផ្នែកព័ត៌មានប្រចាំស្ថានីយទូរទស្សន៍ប៉ុស្តិ៍លេខ៣ បានឲ្យដឹងថា នាយករបស់លោកបានហាមឃាត់មិនឲ្យផ្សាយព័ត៌មានបែបនេះទេ។ លោក សូវៃ មានប្រសាសន៍ថា “ការផ្សាយរបស់យើង គឺស្ថិតក្រោមការគ្រប់គ្រងរបស់រដ្ឋាភិបាលលោកនាយករដ្ឋមន្ត្រី ហ៊ុន សែន ហើយយើងមិនចង់ឲ្យមានបញ្ហាទេ។យើងមិនអាចធ្វើការផ្សព្វផ្សាយដោយលើកឡើងអំពីគណបក្សនយោបាយតែមួយដោយមិនមានគណបក្សនយោបាយដទៃទៀតបានឡើយ ពីព្រោះនេះ គឺជាច្បាប់របស់ គ.ជ.ប. ដែលតម្រូវឲ្យមានតម្លាភាពក្នុងការផ្សព្វផ្សាយ”។
លោក ហួត ឃាងវេង ប្រធានផ្នែកព័ត៌មានប្រចាំស្ថានីយទូរទស្សន៍បាយ័នបានមានប្រសាសន៍ថាខណៈដែលស្ថានីយទូរទស្សន៍បាយ័នបានបញ្ជូនអ្នកយកព័ត៌មានទៅយកព័ត៌មានអំពីព្រឹត្តិការណ៍នេះ ការយកព័ត៌មាននេះត្រូវបានកាត់ផ្តាច់ នៅពេលដែលស្ថានភាពចរាចរណ៍នៅអំឡុងពេលនៃការវិលត្រឡប់របស់លោក សម រង្ស៊ី “ មានភាពអនាធិបតេយ្យ”។ លោកបន្ថែមថា រឿងបែបនេះបានធ្វើឲ្យប៉ះពាល់ដល់មុខមាត់របស់នគរបាល។
លោកបានអះអាងថា “ ប្រជាពលរដ្ឋនឹងធ្វើការរិះគន់នគរបាលចរាចរនៅពេលពួកគេដឹងថា ផ្លូវត្រូវបានបិទដោយសារការវិលត្រឡប់របស់លោក សម រង្ស៊ី”។ កាសែតនានាដូចជា កាសែតរស្មីកម្ពុជា កម្ពុជាថ្មី និងកោះសន្តិភាព ក៏មិនបានផ្សព្វផ្សាយព័ត៌មានពាក់ព័ន្ធនឹងការវិលត្រឡប់របស់លោក សម រង្ស៊ី ដែរ ហើយនិពន្ធនាយកកាសែតទាំងបីនេះ កាលពីម្សិលមិញបានបដិសេធមិនធ្វើអត្ថាធិប្បាយអំពីសេចក្ដីសម្រេចក្នុងការមិនផ្សាយព័ត៌មាននេះទេ។
លោក ទេព នីថា អគ្គលេខាធិការនៃគណៈកម្មាធិការជាតិរបៀបចំការបោះឆ្នោតមានប្រសាសន៍ថា លោកគ្មានយោបល់អំពីការខកខានមិនបានផ្សាយព័ត៌មានទាក់ទងការវិលត្រឡប់របស់លោក សម រង្ស៊ី របស់ស្ថានីយទូរទស្សន៍ទាំងនេះទេ។ លោកបានថ្លែងបន្តថា “ ខ្ញុំមិនដឹងថា ត្រូវនិយាយយ៉ាងដូចម្តេចទេ អំពីបញ្ហានេះ ពីព្រោះនេះជាសិទ្ធិរបស់ក្រុមហ៊ុនស្ថានីយទូរទស្សន៍ទាំងនោះ”៕
ប្រែសម្រួលដោយ ឃិន ណៃ