32 C
Phnom Penh

លោក សម រង្ស៊ី ស្នើ​ឲ្យ​ គ.ជ.ប.​អនុញ្ញាត​រូប​គាត់​ឈរ​ឈ្មោះ​បោះ​ឆ្នោត​

ដោយ ឌឹ ខេមបូឌា ដេលី

បទវិភាគ

លោក សម រង្ស៊ី ​មេ​ដឹក​នាំ​គណបក្ស​ប្រឆាំង​​​​កាល​ពី​ម្សិល​មិញ ​បាន​ផ្ញើ​លិខិត​មួយ​ច្បាប់​ទៅ​ប្រធាន​គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ដោយ​ស្នើ​សុំ​ឲ្យ​អនុញ្ញាត​រូប​គាត់​បោះ​ឆ្នោត​ និង​ឈរ​ឈ្មោះ​ជា​បេក្ខជន​ក្នុង​ការ​បោះ​​​​ឆ្នោត​នៅ​ថ្ងៃ​អាទិត្យ​។

លិខិត​ដែល​ចុះ​កាល​បរិច្ឆេទ​ថៃ្ង​ទី​២១​ ខែ​កក្កដា​ ផ្ញើ​ជូន​លោក​ អឹុម សួស្ដី និង​ដែល​ចុះ​ហត្ថលេខា​ដោយ​លោក សម រង្ស៊ី នោះ បាន​ស្នើ​សុំ​ឲ្យ​បញ្ចូល​ឈ្មោះ​របស់​គាត់​ក្នុង​បញ្ជី​ និង​​​​​អនុញ្ញាត​ឲ្យរូប​គាត់​ឈរ​ឈ្មោះ​ជា​បេក្ខ​​​ជន​តំណាង​រាស្ត្រ​នៅ​មណ្ឌល​​ខេត្ត​កណ្ដាល។

លិខិត​នោះ​មាន​សេចក្ដី​ថា “ ខ្ញុំ​សូមស្នើឲ្យ​​ ឯកឧត្ដម [អឹុម សួស្ដី ]ពិចារណា​ក្នុង​ការ​បញ្ចូល​ឈ្មោះ​របស់​ខ្ញុំ​ក្នុង​បញ្ជី​​​ឈ្មោះ​អ្នក​បោះ​ឆ្នោត​​ផ្លូវ​ការ​ និង​បញ្ជី​ឈ្មោះ​បេក្ខជន​តំណាង​រាស្ត្រ​សម្រាប់​ការ​បោះ​ឆ្នោត​អាណត្តិ​ទី​៥​ នៅ​ថ្ងៃ​ទី​២៨​ ខែ​កក្កដា”។ ​លិខិត​នោះ​ក៏​បាន​ចម្លង​ជូន​ទៅ​លោក​នាយក​រដ្ឋ​មន្ត្រី​ ហ៊ុន សែន និង​ព្រះ​មហា​ក្សត្រ​ ​​​នរោត្តម​ សីហមុនី​ ផង​ដែរ។

លោក ទេព នី​ថា អគ្គលេខាធិការ​គណៈ​​​កម្មាធិការ​ជាតិ​រៀប​ចំ​ការ​បោះ​ឆ្នោត ​បាន​មាន​ប្រសាសន៍​ថា លោក​មិន​ទាន់​បាន​ឃើញ​លិខិត​​​​នោះ​នៅ​ឡើយ​ទេ។​លោក ទេព នីថា បាន​មាន​ប្រសាសន៍​ដោយ​​​​​មិន​លម្អិត​ថា “ ប្រសិន​បើ​គាត់​បាន​ផ្ញើ​លិខិត​ផ្លូវ​ការ​មែន​ គណៈកម្មាធិការ​ជាតិ​រៀប​ចំ​ការ​បោះ​ឆ្នោត​នឹង​អនុវត្តតាម​ច្បាប់​បោះ​ឆ្នោត​”។​​​​​​​​​​​​​

​គួរ​រំឭក​ថា លោក សម រង្ស៊ី ​ត្រូវ​បាន​ហាម​មិន​ឲ្យ​ឈរ​ឈ្មោះ​បោះ​ឆ្នោត​ទេ ហើយ​ឈ្មោះ​​​​របស់​គាត់​ត្រូវ​បាន​លុប​ចេញ​ពី​បញ្ជី​ឈ្មោះ​បោះ​ឆ្នោត​ ដោយ​សារ​តែ​​ទោស​ព្រហ្ម​​​​ទណ្ឌ​របស់​គាត់​ ហើយ​គាត់​​ត្រូវ​បាន​លើក​លែង​ទោស​​​ ប៉ុន្តែ​ គាត់​បាន​អះ​អាង​ថា នេះ​ជា​ហេតុ​ផល​នយោបាយ។ ​បន្ទាប់​ពី​ទទួល​បាន​ព្រះ​រាជ​ទាន​​លើក​លែង​​​​​ទោស​កាល​ពី​ដើម​ខែ​នេះ​ លោក សម រង្ស៊ី បាន​ត្រឡប់​មក​ប្រទេស​កម្ពុជា​វិញ​ ក្រោយ​​​​ពេល​​និរទេស​ខ្លួន​ឯង​អស់​រយៈពេល​បួន​ឆ្នាំ​ទៅ​ទី​ក្រុង​ប៉ារីស៕

ប្រែ​សម្រួល​ដោយ ហម សុផាណ្ណា​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស