នគរបាល និង សាច់ញាតិម្នាក់របស់ជនរងគ្រោះពីរនាក់បានឲ្យដឹងថា អ្នកបើកបររថ យន្តមួយគ្រឿង ម៉ាក រ៉េង រ៉ូវើ (Range Rover ) បានបង្កឲ្យមនុស្សបីនាក់ស្លាប់ និងមនុស្សបីនាក់ផ្សេងទៀតរងរបួសធ្ងន់ កាលពីល្ងាចថ្ងៃសៅរ៍ នៅពេលគាត់បានបាត់បង់ការគ្រប់គ្រងរថយន្តទំនើបរបស់ខ្លួនភ្លាមៗ បន្ទាប់ពីចាកចេញពីពិធីផឹកស៊ីមួយកន្លែងនៅក្នុង ខណ្ឌមានជ័យ រាជធានីភ្នំពេញ ។
នគរបាលបានឲ្យដឹងថា អ្នកបើកបរដែលនគរបាលមិនបញ្ចេញឈ្មោះឲ្យដឹង ប៉ុន្តែ ត្រូវបានគេជឿថាជាកូនប្រុសរបស់មន្ត្រីរដ្ឋាភិ បាលម្នាក់នៅរាជធានីភ្នំពេញ ដែលបានផឹកស៊ីនៅមុនពេលគាត់បុកស្លាប់អ្នកដំណើរមិនស្គាល់ឈ្មោះម្នាក់ជាលើកដំបូង មុនពេលរេចង្កូតទៅបុកម៉ូតូមួយគ្រឿង ដែលបានធ្វើឲ្យស្រ្តីអាយុ៤២ឆ្នាំ និង កូនស្រីអាយុ១៨ឆ្នាំរបស់គាត់ស្លាប់។
លោក ហេង ចាន់គិរី ប្រធានការិយា ល័យនគរបាលចរាចរណ៍រាជធានីបានមានប្រសាសន៍ថា ជនសង្ស័យម្នាក់ ដែលបង្កគ្រោះថ្នាក់ចរាចរណ៍បណ្តាលឲ្យមានមនុស្សស្លាប់នេះត្រូវបានបញ្ជូនទៅសាលាដំបូងរាជធានីរួចហើយ ប៉ុន្តែ មិនអាចនិយាយថា តើគាត់ត្រូវបានចោទប្រកាន់ ឬ ចោទប្រកាន់ពីបទអ្វីនោះទេ។
លោកបានមានប្រសាសន៍បន្តថា “ គាត់បានបង្កឲ្យមានគ្រោះថ្នាក់ចរាចរណ៍ ហើយបានបណ្តាលឲ្យមនុស្សបីនាក់បានស្លាប់និងមនុស្សបីនាក់ផ្សេងទៀតរងរបួសធ្ងន់”។ យោងតាមលោក ចាន់គិរី ដែលបដិសេធមិនព្រមប្រាប់ឈ្មោះជនសង្ស័យនោះបានឲ្យដឹងថា ការធ្វើតេស្តជាតិអាល់កុលបានរកឃើញថា អ្នកបើកបររូបនេះមានកម្រិតជាតិអាល់កុលទាបជាងការកំណត់របស់ច្បាប់ក្នុងការបើកបរ បន្ទាប់ពីការផឹកស្រារួចមក។
លោក ចាន់គីរី បានមានប្រសាសន៍បន្តថា លោកគិតថា អ្នកបើកបររូបនេះព្យាយាមគេចពីអ្នកដំណើរនៅពេលគ្រោះថ្នាក់នេះបានកើតឡើង។ ប្រធាននគរបាលចរាចរណ៍រូបនេះ បានសន្និដ្ឋានថា “ ប្រហែលជាគាត់ព្យាយាមគេចពីអ្នកដំណើរ [ដែលគាត់បានបុកស្លាប់] ពេលដើរឆ្លងកាត់ផ្លូវនោះ ហើយបន្ទាប់មកបានវេចង្កូតទៅបុកអ្នកជិះម៉ូតូទាំងពីរនាក់នេះ”។
លោក កែវ ចន្ធី ដែលប្រពន្ធនិងកូនស្រីរបស់លោក បានស្លាប់នៅក្នុងគ្រោះថ្នាក់ចរាចរណ៍នេះបានប្រាប់ថា អ្នកបើកបរនេះឈ្មោះ ប៊ុន រតនៈ ជាកូនប្រុសរបស់មន្ត្រីម្នាក់នៅសាលារាជធានីភ្នំពេញ។ លោក ចន្ធី បាននិយាយថា “ ម្ចាស់រថយន្តនេះទើបតែចេញពីពិធីផឹកស៊ី”។លោកបានបន្ថែមថា ប្រពន្ធនិងកូនស្រីរបស់លោកទើបតែចេញពីកន្លែងធ្វើការរបស់ខ្លួន ឆ្ពោះទៅផ្ទះ នៅពេលពួកគេត្រូវបុកស្លាប់តែម្តង។ គាត់បាននិយាយថា “ ខ្ញុំមិនដឹងធ្វើដូចម៉្តេចទេ…ពួកគាត់បានស្លាប់ហើយ”៕
ប្រែសម្រួលដោយ ឃិន ណៃ