35 C
Phnom Penh

ក្រុម​​គាំទ្រ​ជា​យុវជន​របស់បក្ស​ប្រជា​ជន និង​បក្ស​សង្គ្រោះ​ជាតិ​​ឌឺដង​ពាក្យ​សម្ដី​ តែ​មិន​ប្រើ​ហិង្សា​

ដោយ ឌឹ ខេមបូឌា ដេលី

បទវិភាគ

នៅ​​​ពេល​​​ក្រុម​​​អ្នក​​​គាំទ្រ​​​របស់​​​គណបក្ស​ប្រជា​​​ជន​កម្ពុជា​និង​គណបក្ស​សង្គ្រោះ​ជាតិ ​​​ប្រមូល​​​ផ្តុំ​​​គ្នា​​​​​​ធ្វើ​​​យុទ្ធនាការ​​​​ឃោសនា​​​ចល័ត​​​​​​​តាម​ដង​ផ្លូវ​នានា​មុន​​​​ការ​បោះ​ឆ្នោត​នៅ​ថ្ងៃ​​​អាទិត្យ​​នោះ​ ការ​​​ប្រឈម​មុខ​ដាក់គ្នា​​​រវាង​​​ភាគី​​​ទាំងពីរ​​​​​​​អាច​និយាយ​​​បាន​​​ថា​​​​​​ មិន​​​ខុស​​​ពី​​​នាដកថា​​​ ក្នុង​​​​នាដកម្ម​​​រឿង​​​​​​ វ៉េសសាយ​​​ ស្តូរី  ​​​(West Side Story) ដែល​​​ពណ៌នា​​​ពី​​​​ការ​​​ប្រឈម​​​មុខ​​​ដាក់គ្នា​​​រវាង​​​ក្រុម​​​​​​ ជែតស៍​​​ (Jets)​​​ និង​​​ក្រុម​​​សាក (Sharks) នោះ​​​ទេ​​​។

ដូចជា​​ក្រុម​ ជែតស៍ ​​​និង​​​ក្រុម​​​ សាក​​​ ដែរ​​​ ​ក្រុម​​​អ្នក​គាំ​ទ្រ​​​​ជា​​​យុវជន​របស់​​​គណបក្ស​ប្រជា​​​ជន​កម្ពុជា​​​​​កំពុង​កាន់​អំណាច​និង​​​​​គណបក្ស​សង្គ្រោះ​ជាតិ​​បាន​សើច​​ចំអក​ឡក​ឡាយ​​ដាក់​គ្នា​ និង​​​ប្រមាថ​​​គ្នា​ទៅ​វិញ​ទៅមក​ ពេល​ពួកគេ​​​ជិះ​​​​ទោចក្រ​​​យាន​​​យន្ត​​​​កាន់​ទង់​គណបក្ស​​​និង​បដា​​​ឃោសនា​​។

អ្នក​​​ចូលរួម​​​ធ្វើ​​​យុទ្ធនាការ​​​​ឃោសនា​ និង​អ្នក​ឃ្លាំ​មើល​ការ​​បោះ​ឆ្នោត​បាន​លើកឡើង​​​​​កាល​ពី​ម្សិលមិញ​ថា​ ការ​​​ប្រមាថ​​​គ្នា​​​​នេះ​​​​​​អាច​​​មាន​​​ភាព​​​ជូរចត់​​​ក៏​​​ពិតមែន​​​ ប៉ុន្តែ​​​វា​​​​​​មិន​​​បាន​​​ឈាន​​​​​​​​​​​​ដល់​​​ការ​​​ប្រើ​​​​អំពើ​ហិង្សា​ទេ​​ ដែល​​​ទិដ្ឋភាព​​​បែប​​​​​​​នេះ​​​​​គឺ​​​ផ្ទុយគ្នា​​​ស្រឡះ​​​ពី​វប្បធម៌​នយោបាយ​របស់​​​អ្នក​​​ធ្វើ​​​​​​យុទ្ធនាការ​​​ឃោសនា​​​​ជំនាន់​មុន។

យុវជន​ ទី ម៉េង អាយុ​១៩ឆ្នាំ ជា​អ្នក​គាំទ្រ​គណបក្ស​ប្រជាជន​កម្ពុជា​ប្រចាំ​នៅ​វត្ត​ភ្នំ​ បាន​និយាយ​អំពី​​​ការ​​​ធ្វើ​​​យុទ្ធនាការ​​​ឃោសនា​​​​​​ឲ្យ​​​​​​​គណបក្ស​ប្រជាជន​កម្ពុជា​ថា​ “ វា​​​សប្បាយ ​​​​​​តែ​​​​​ក៏​​​ពិបាក​​​ដែរ​​​”។

ទី ម៉េង ​និយាយ​ថា ខ្លួន​​​​សប្បាយ​​​នឹង​​​​​​​ការ​ជិះ​​​​ម៉ូតូ​ជុំ​វិញ​​​ក្រុង​ ហើយ​​​ថា​​​ ​​​ការ​​​ឌឺដង​​​គ្នា​​​ជាមួយ​​​​​​ក្រុម​យុវជន​គាំ​ទ្រ​គណបក្ស​សង្គ្រោះ​ជាតិ​​​​​តាម​​​រយៈ​​​ការ​​​ស្រែក​ដាក់គ្នា​​​ថា “ ដូរ​ ​មិន​ដូរ?”​ ​​​ “ អត់ដូរ​​​!”  “ លេខ​៤!” និង​​​​ “ លេខ​៧” ជា​ដើម​ ​​​គឺ​​​ជា​​​រឿង​​​ “ សប្បាយ”។
​ទីម៉េង​បាន​និយាយ​​​ថា “ ​ប៉ុន្តែ ពេលខ្លះ​​​ពូកគេ​​​ក៏​​​ឈ្លើយ​ណាស់​​​​ដែរ​​​ ដូចជា​​ពេល​​​ពួក​​​គេ​ហៅ​យើង​ថា អា​យួន ទោះ​បី​ជា​ពួកគេ​ដឹង​ថា យើង​ជា​​​ខ្មែរ​ក៏ដោយ។ ខ្ញុំ​អន់ចិត្ត​​​បន្តិច​​​ដែរ ​​​ពេល​​​គេ​​​ប្រើ​​​ពាក្យ​​​បែប​​​នេះ​”។​​​ យុវជន​រូប​នេះ​​បាន​​បន្ត​​ថា ទោះ​ជា​យ៉ាង​ណា​ ខ្លួន​​​មិន​​​ដែល​​​មាន​​​​អារម្មណ៍​​​ថា​​​ ​​​​​​​​វា​​​អាច​​​​​​បង្ក​​​គ្រោះថ្នាក់​​​ដល់​​​រាងកាយ​​​​​​​ឡើយ​​​ពេល​មាន​​​ការ​​​ប្រឈម​មុខ​ដាក់​គ្នា​​​​ម្តងៗ​​​នោះ​​។

យុវជន​ ផាត ឌីណា អាយុ​២១ឆ្នាំ ជា​អ្នក​គាំ​ទ្រ​​​គណបក្ស​សង្គ្រោះ​ជាតិ​ បាន​និយាយ​ពី​បទ​ពិសោធរបស់​ខ្លួន​ក្នុងពេល​​​ធ្វើ​​​​យុទ្ធនា​​​ការ​ឃោសនា​រក​សំឡេង​ឆ្នោត​ ក្នុង​​​រយៈ​​​ពេល​​​​​​ប៉ុន្មាន​សប្ដាហ៍​​ចុងក្រោយ​​​នេះ​​ថា ​ការ​​​ប៉ះ​​​ទង្គិច​​​​​​គ្នា​​​តែ​​​ម្យា៉ងគត់​​​​​​ដែល​​​ក្រុម​​​អ្នក​​​​​​គាំទ្រ​​​របស់​​​គណបក្ស​​​​ទាំង​ពីរ​​ធ្លាប់​បាន​​​ជួប​​​ប្រទះ​​​ដោយ​​​ផ្ទាល់​​​​​​ គឺ​​​​​​​​ការ​​​គប់​​​​ដប​ទឹក​ដាក់​គ្នា​ទៅ​​​វិញ​ទៅមក​។

ឌីណា បាន​សារភាព​​​​ថា “ ពេលខ្លះ​​​ ​ខ្ញុំ​មាន​ការ​ភ័យ​ខ្លាច​បន្តិច​បន្តួច​ដែរ” ដោយ​បន្ថែម​ថា អ្នក​​គាំ​ទ្រ​​គណបក្ស​សង្គ្រោះ​ជាតិ​បាន​ចាប់​ផ្ដើម​​​គ្រ​វី​ក្រដាស​ប្រាក់​ដាក់​​​​​ក្រុម​​​អ្នក​​​គាំ​ទ្រ​​គណបក្ស​ប្រជា​ជន​កម្ពុជា​ ដើម្បី​​​ចំអក​​​​ឲ្យ​​​​ពួកគេ​ថា ជា​ជន​ពុក​រលួយ។ “ ហើយ​ពួកគេ​[ក្រុម​​​អ្នក​​​គាំទ្រ​​​គណបក្ស​ប្រជាជន​កម្ពុជា]​ បាន​​​ស្រែក​ដាក់​យើង​វិញ​​​ថា ​​យើង​ជា​មនុស្ស​គ្មាន​ខួរ​ក្បាល​”។

កាលពី​ថ្ងៃ​​​អាទិត្យ​​​​ ក្រុម​​​អ្នក​គាំ​ទ្រ​​​គណ​​​បក្ស​​​​​​​សង្គ្រោះ​ជាតិ​នៅ​​សួន​​​​​ក្បែរ​​​​វត្ត​បទុម​​បាន​គ្រវី​ក្រដាស​ប្រាក់​រៀល​ និង​​ក្រដាស​ប្រាក់​ដុល្លារ​​ដាក់​​​​ក្រុម​​​ដង្ហែក្បួន​ឃោស​នា​របស់​គណបក្ស​ប្រ​ជា​ជន​កម្ពុជា​ នៅ​ពេល​ពួកគេ​ឆ្លង​កាត់​​ទី​នោះ​​​ ដោយ​​​​​​នេះ​ជា​​​​ការ​​​សំដៅ​​​លើ​​​​ពាក្យ​លេច​​​​​​ឮ​​​​​​ដែ​ល​​​ថា​ គណបក្ស​ប្រជាជន​កម្ពុជា​​​​ បាន​ជួល​អ្នក​គាំទ្រ​​​​របស់​ខ្លួន​​ឲ្យ​​​​ចេញធ្វើ​​​យុទ្ធនាការ​​​​ឃោសនា​រក​សំឡេង​​​ឆ្នោត​​។

អ្នក​គាំទ្រ​គណបក្ស​ប្រជាជន​កម្ពុជា​​​​មើល​​​ទៅ​​​គឺ​​​មាន​​​កំហឹង​​​ខ្លាំងណាស់​​​​ ប៉ុន្តែ​​​ ​​​បាន​បន្ត​​​​ដំណើរ​​​ទៅ​មុខ​ទៀត​ ​ដោយ​គ្រាន់​​តែ​បាន​​​​​​​​បោះ​​​ពាក្យ​​​សម្តី​​​ឆ្លើយ​តប​​​​ចំពោះ​​​ការ​​​ឌឺដង​​​របស់​​​ក្រុម​​​អ្នក​គាំទ្រ​គណ​បក្ស​សង្គ្រោះ​ជាតិ​វិញ​​ប៉ុណ្ណោះ​។

គឺ​​​​សកម្មភាព​បែប​នេះ​​​​ហើយ​​​ដែល​​​បាន​ធ្វើ​ឲ្យ​លោក​ ជុំ​ សម្បត្តិ​​ ​​​ជា​អ្នក​គាំ​ទ្រ​គណបក្ស​ប្រ​ជា​ជន​កម្ពុជា​​​​ក្នុង​​​វ័យ​​​៦២​​​ឆ្នាំ​​​​កោត​​​សរសើរ​​​យ៉ាង​ខ្លាំង​​ ហើយ​បាន​និយាយ​កាលពី​ម្សិល​មិញ​ថា ការ​ឃោសនា​រក​សំឡេង​ឆ្នោត​​​​ក្នុង​​​អាណត្តិ​​​នេះ​​គឺ​ “  ល្អ​​​​ជាង​​​ឆ្ងាយណាស់​​​” បើ​​​ធៀប​​​​​​​​​នឹង​​​យុទ្ធនាការ​​​​ឃោសនា​​​កន្លង​មក​។

លោក​​​បាន​​​និយាយ​​​​ថា “ ពី​មុន​មាន​អំពើ​ហិង្សា​ច្រើន​​​​។ឥឡូវ​​​គឺ​​​ខុសគ្នា​​​ ដោយសារ​​​តែ​​​​យុវជន​សម័យ​​​នេះ​មាន​ការ​យល់​ដឹង​ច្រើន​​។​​​ ​អំពើ​ហិង្សា​គឺ​​​កើត​ឡើង​ដោយ​សារ​ប្រជា​​​ពលរដ្ឋ​​​​គ្មាន​​​ការ​អប់​រំ​​​ហ្នឹង​​​ឯង​​​”៕

លោក គល់ បញ្ញា នាយក​ប្រតិបត្តិ​នៃ​គណៈ​​​កម្មាធិការ​សម្រាប់​ការ​បោះ​ឆ្នោត​ដោយ​សេរី​និង​យុត្តិធម៌​នៅ​កម្ពុជា​ ហៅ​កាត់​ថា ខុមហ្វ្រែល បាន​​​​លើកឡើង​​​​ថា ​​ការ​​​មិន​​​​​ភ័យ​ខ្លាច​ ឬ​​​ការ​​​មិន​​​ប្រើ​​​​អំពើ​ហិង្សា​ក្នុង​ចំណោម​​​ក្រុម​​​អ្នក​​​ធ្វើ​​​យុទ្ធនា​​​​​​ការ​​​​​​​​​វ័យក្មេង​​​​​​​​​​គឺ​មិន​មែន​ដោយ​សារ​ការ​អប់​រំ​​​​ ឬ​​​សូម្បី​​​​​ដោយ​សារ​​​​ភាព​​​ក្លាហាន​របស់​ពួកគេ​​​​ទេ​​​ ​​​ផ្ទុយទៅវិញ​​​គឺ​​​ដោយសារ​​​​ពួកគេ​​បាន​ធំ​ដឹង​ក្ដី​ក្នុង​​​​សម័យ​​​ដែល​​​គ្មាន​​​​អំពើ​ហិង្សា​នយោបាយ​​​ដូច​​​​​​សម័យ​​​អតីតកាល​​​​។

លោកបាន​​​មាន​​​ប្រសាសន៍​​​​ថា “ ពួកគេ​មិន​​ដឹង​អំ​ពី​ការ​វិវឌ្ឍនៃ​​នយោបាយ​ក្នុង​ប្រទេស​​កម្ពុជា​ទេ…ពួក​គេ​បាន​ឮ​​អំពី​​[របប​​​វាល​ពិឃាដ​ និង​របប​ខ្មែរក្រហម]​ ពួកគេ​​​បាន​​​សិក្សា​​​​​​​ពី​​​វា​​​​ ប៉ុន្តែ​​​ ពួកគេ​មិន​បាន​ឆ្លង​កាត់​​​ស្ថានភាព​ទាំង​នេះ​​​ដោយ​​​ផ្ទាល់​​​​ឡើយ​​​។ នេះ​ហើយ​​​ជា​មូល​ហេតុ​ដែលធ្វើ​​​​ឲ្យ​ពួកគេ​​​​គ្មាន​​​ការ​​​​ភ័យ​ខ្លាច​ ​​​​​​ហើយ​គ្មាន​​​អារម្មណ៍​ថា នឹង​​​មាន​អំពើ​ហិង្សា​​​កើតឡើង​​​​”៕

ប្រែសម្រួល​ដោយ ឃិន ណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស