32 C
Phnom Penh

គ.ជ.ប.ច្រាន​ចោល​សំណើ​របស់​លោក សម រង្ស៊ី សុំ​​ឈរ​ឈ្មោះ​​នៅ​ក្នុង​ការ​បោះ​ឆ្នោត​ជាតិ​​​នៅ​​​ខែនេះ​​​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​​ គណៈកម្មាធិការ​ជាតិ​រៀប​​​​​​​ចំ​ការ​បោះ​ឆ្នោត​ គ.ជ.ប. បាន​លើក​ឡើង​ថា  លោក​​​​  សម​  រង្ស៊ី  មេដឹកនាំ​គណបក្ស​ប្រឆាំង​​​​នឹង​មិន​អនុញ្ញាត​ឲ្យ​ចូល​រួម​ប្រកួត​ប្រជែង​នៅ​ក្នុង​ការ​បោះ​ឆ្នោត​ជាតិ​នៅ​ថ្ងៃ​អាទិត្យ​នេះ​ទេ​ ដោយ​ធ្វើ​ឲ្យ​ប្រធាន​គណបក្ស​សង្គ្រោះ​ជាតិ​រូប​នេះ ឆ្លើយ​តប​ថា  គណបក្ស​របស់​លោក​ទំនង​ជានឹង​មិន​ទទួល​ស្គាល់​លទ្ធផល​នៃការ​បោះ​ឆ្នោត​នេះ​ទេ​ ហើយ​បាន​ព្រមាន​ថា នឹង​ធ្វើ​ការ​តវ៉ា​។

កាល​ពីថ្ងៃ​អាទិត្យ លោក​ សម​ រង្ស៊ី បាន​ផ្ញើ​​​​​​​​​លិខិត​មួយ​ច្បាប់​ជូន ​ គ.ជ.ប.​​​​ស្នើសុំ​ឲ្យ​លោក​បាន​ឈរ​ឈ្មោះ​ជាបេក្ខ​ជន​តំណាង​រាស្ត្រ​មណ្ឌល​​​​កណ្តាល​។ បន្ទាប់​ពី​កិច្ច​ប្រជុំ​រយៈ​​​ពេល​​​​មួយ​ថ្ងៃ​កាល​ពីម្សិល​មិញ គ.ជ.ប.​បាន​ឆ្លើយ​​​​តប​នៅ​ក្នុង​សេចក្តី​ថ្លែង​ការណ៍​មួយ​ជូន​ទៅលោក សម រង្ស៊ី ថា សមាជិក​ទាំង​ប្រាំបួន​រូប​​​​របស់​គ.ជ.ប.​​មិន​អាច​ទទួល​​យក​សំណើ​​​របស់​លោក​ សម រង្ស៊ី​ បាន​ទេ​។

គ.ជ.ប.​លើក​ឡើង​នៅ​​​ក្នុង​សេចក្តី​ថ្លែង​ការណ៍នោះ​ថា “ គ.ជ.ប.​មិន​អាច​ចុះ​ឈ្មោះ លោក​ សម រង្ស៊ី នៅក្នុង​បញ្ជី​ឈ្មោះ​បេក្ខ​​​​ជន​តំណាង​រាស្ត្រ​សម្រាប់​ការ​បោះ​ឆ្នោត​នេះ​បាន​ទេ ពីព្រោះ​ឯកឧត្តម​មិន​បាន​បំពេញ​តាម​​លក្ខខណ្ឌ​របស់​បេក្ខ​ជន​ឈរ​ឈ្មោះ​សម្រាប់​គណបក្ស​សង្គ្រោះ​ជាតិ​ឲ្យ​ស្រប​តាម​ច្បាប់​បោះឆ្នោត​ឡើយ”។ គ.ជ.ប.​បាន​លុប​​ឈ្មោះ លោក​ សម​ រង្ស៊ី​ ​​​ចេញ​ពី​បញ្ជី​ឈ្មោះ​បោះ​ឆ្នោត​​​​កាល​ពីខែ​វិច្ឆិកា​​​​ ដោយ​លើកឡើ​ងពី​បទ​ប្បញ្ញតិ្ត​មួយ​មិន​អនុញ្ញាត​​​​ឲ្យ​អ្ន​ក​មាន​ទោស​​​​ព្រហ្ម​ទណ្ឌ​ឈរ​ឈ្មោះ​បោះ​​​ឆ្នោត​។

មុន​ពេល​ទទួលបាន​​​​ព្រះ​រាជទាន​លើក​លែង​ទោស​ពីព្រះ​មហាក្សត្រ​  នរោត្តម  សីហ​​​មុនី កាល​ពីថ្ងៃ​ទី​១២ ខែកក្កដា នោះ​ លោក​ សម​ រង្ស៊ី មាន​​ទោស​ជាប់​ពន្ធនាគារ​១១​ឆ្នាំ​​ពីបទ​ចោទ​ប្រកាន់​ជាច្រើន​​ ដែល​លោក​អះអាង​ថា ជា​រឿង​នយោបាយ។

ក្រោយ​ពី​បាន​ទទួល​ព្រះរាជទាន​លើក​លែង​ទោស​ លោក សម រង្ស៊ី ក៏បាន​ស្នើ​សុំ​បោះ​ឆ្នោត​ផង​ដែរ​ ប៉ុន្តែ លោក​ ទេព​ នីថា អគ្គ​​​លេខាធិការ​គ.ជ.ប.​បាន​មាន​ប្រសាសន៍ ថា  កាល​កំណត់​សម្រាប់​ការ​ចុះ​ឈ្មោះ​បោះ​ឆ្នោត​ និង​ការ​ចុះ​ឈ្មោះ​បេក្ខ​ជន​តំណាង​រាស្ត្រ​​​​បាន​កន្លង​ផុត​ជា​យូរ​មក​ហើយ​ ហើយ​ថា បញ្ជី​ឈ្មោះ​បោះ​ឆ្នោត​មិន​អាច​កែប្រែ​ដើម្បី​បញ្ចូល​ឈ្មោះ​មេដឹកនាំ​គណបក្ស​ប្រឆាំង​រូប​នេះ​បាន​ទេ​។

លោក ទេព នីថា បាន​មាន​ប្រសាសន៍​ថា “យើង​បាន​ធ្វើ​បញ្ជី​ឈ្មោះ​បោះ​ឆ្នោត​រួច​ហើយ​ ហើយ​វា​ចូល​ជាធរមាន​ទៅ​ហើយ​ ដូច្នេះ​​​​យើង​មិន​អាច​កែប្រែ​វាបាន​ទេ​។ បញ្ជី​ឈ្មោះ​បេក្ខ​ជន​តំណាង​រាស្ត្រក៏​មិន​អាច​កែប្រែ​បាន​ដែរ”។

កាល​ពីម្សិល​មិញ លោក​ សម រង្ស៊ី បាន​មាន​ប្រសាសន៍ថា លោក​មិន​ភ្ញាក់​ផ្អើល​ទេ ដែល​បាន​ឮសេចក្តីសម្រេច​របស់​គ.ជ.ប.​ ព្រោះ​ពួក​គេ​សុទ្ធ​តែ​ជា​សមាជិក​គណបក្ស​ប្រជាជន​កម្ពុជាដែល​​​កាន់​​​អំណាច​​​​របស់លោក​​​​នាយក​រដ្ឋ​មន្ត្រី ហ៊ុន​ សែន​។

លោក សម រង្ស៊ី បាន​មាន​ប្រសាសន៍​តាម​ទូរស័ព្ទ​ពីខេត្ត​ពោធិ៍​សាត់ កន្លែង​ដែល​លោក​កំពុងតែ​ធ្វើ​យុទ្ធនាការ​ឃោស​នាថា “ ខ្ញុំ​​​​រំពឹង​ថា ទទួល​បាន​​សេចក្តី​សម្រេច​បែប​នេះ​។ ខ្ញុំ​គិត​ថា គណបក្ស​ប្រជាជន​កម្ពុជា​មាន​ការ​ភ័យ​ខ្លាច​។ មនុស្ស​គ្រប់​គ្នា​អាច​មើល​ឃើញ​ការ​កើន​ឡើង​ដោយ​នឹង​ស្មាន​មិន​ដល់​នៃការ​គាំទ្រ​ពី​ប្រជាជន​ចំពោះ​គណបក្ស​ប្រឆាំង​ ដូច្នេះ​ប្រសិន​បើ ពួក​គេ​ប្រកាស​ថា ខ្ញុំ​ជា​បេក្ខ​ជន​ និង​ជា​គូ​ប្រកួត​ផ្លូវការ​របស់​នាយក​រដ្ឋ​​​មន្ត្រី ហ៊ុន​ សែន ដែល​ត្រូវ​ចប់​អាណត្តិ​នោះ​ ពួក​គេដឹងថា  មាន​គ្រោះ​ថ្នាក់  ​ដូច្នេះ​ពួកគេ​ប្រើ​​​​បច្ចេកទេស​ជា​ឧបសគ្គ​ ដើម្បី​រារាំង​ខ្ញុំ​មិន​ឲ្យ​មាន​ប្រជាប្រិយ​ភាព​ខ្លាំង​​ពេក​”។

ការបង្ហាញ​ពីការ​គាំទ្រ​របស់​ប្រជា​ពល​រដ្ឋ​ ដែល​លោក​បាន​លើក​ឡើង​នេះ​បាន​បង្ហាញ​ឲ្យ​ឃើញ​កាល​ពីថ្ងៃ​សុក្រ សប្តាហ៍​មុន​​ពេល​ដែល​មេដឹកនាំ​​គណបក្ស​សង្គ្រោះ​ជាតិ​រូប​នេះ​​បាន​វិល​ត្រឡប់​មក​កម្ពុជា​វិញ​ បន្ទាប់​ពី​ការនិរទេស​ខ្លួន​ឯង​អស់​រយៈពេល​បួន​ឆ្នាំ​។ មនុស្ស​ជាង​១០០.០០០នាក់​បាន​ដើរ​តាម​ផ្លូវ​​ស្វាគមន៍​​ការ​វិល​ត្រឡប់​របស់​​លោក​។

លោក សម រង្ស៊ី បាន​មាន​ប្រសាសន៍​ថា ការបោះ​ឆ្នោត​នេះនឹង​មិន​ត្រូវ​ចាត់​ទុក​ថា សេរី និង​យុត្តិធម៌​នោះ​ទេ ជាពិសេស​ដោយ​សារតែ​សេចក្តី​សម្រេច​របស់​ គ.ជ.ប.​ប្រឆាំង​នឹ​ង​សំណើរ​បស់​លោក សុរិយា ស៊ូ​បេឌី អ្នក​ធ្វើ​របាយការណ៍​ពិសេស​អង្គការ​សហ​​​ប្រជា​​​ជាតិ​ទទួ​លបន្ទុក​សិទ្ធិមនុស្ស​ប្រចាំ​​កម្ពុជា ស្នើ​​​សុំ​​​​​ឲ្យ​គេ​អនុញ្ញាត​​ឲ្យ​លោក ​ សម  រង្ស៊ី បាន​ឈរ​ឈ្មោះ​នៅ​ក្នុង​ការ​បោះ​ឆ្នោត​នេះ​។

លោក​  សម  រង្ស៊ី  បាន​មាន​ប្រសាសន៍​បន្ថែម​​​ទៀត​​​ថា “ ឥឡូវ​នេះ​មិន​មាន​ភាព​ស្រប​ច្បាប់​ទេ​។ដូច្នេះ​យើង​មាន​មូលដ្ឋាន​រឹង​មាំ​ក្នុង​ការ​ច្រាន​ចោល​លទ្ធផល​នៃការ​បោះ​ឆ្នោត​បែប​នេះ​។ ការបោះ​ឆ្នោត​ដែល​គ្មាន​គូប្រកួត​ប្រជែង​ជាមួយ​នាយក​រដ្ឋមន្ត្រី​  គឺ​គ្មាន​ន័យ  និង​គ្មាន​តម្លៃ​។ គ្មាន​នរណាម្នាក់​នឹង​ទទួល​ស្គាល់​ការ​បោះ​ឆ្នោត​បែប​នេះ​ទេ​”។ លោក​បាន​​បន្ថែមថា លោក​រំពឹង​ថា សហ​គមន៍​អន្តរ​​​ជាតិ​នឹង​គាំទ្រ​ការ​ច្រាន​ចោល​របស់​គណបក្ស​ប្រឆាំង​ចំពោះ​លទ្ធ​ផល​បោះ​ឆ្នោត​នេះ​។ លោក​បាន​មាន​ប្រសាសន៍ថា “ យើង​នឹង​ច្រាន​ចោល​លទ្ធផល​នៃការ​បោះ​ឆ្នោ​ត​នេះ។​​​ ប្រសិន​បើ ខ្ញុំ​មិន​អាច​ឈរ​ឈ្មោះ​បាន​ទេ​ វា​គឺ​ជា​​រឿង​មួយ​ទៀត​”។

ទោះ​ជាយ៉ាង​ណា  ​លោកមាន​ប្រសាសន៍​​​ ថា លោក​នឹង​ប៉ុនប៉ង​ជាលើក​ចុង​ក្រោយ​ ដើម្បី​ឲ្យ​​គេ​បញ្ចូល​ឈ្មោះ​របស់​លោក​ទៅ​​​ក្នុង​បញ្ជី​ឈ្មោះ​បេក្ខ​ជន​បោះ​ឆ្នោត​តាម​រយៈ​ការ​ធ្វើ​លិខិត​ជូន​​លោក​ ហេង​ សំរិន​ ប្រធាន​រដ្ឋ​សភា​ ដើម្បី​ស្នើ​សំុ​ឲ្យ​បញ្ចូល​ឈ្មោះ​លោក​​ភ្លាមៗ​ជាស​មាជិក​សភា​វិញ​ ជាតួ​នាទី​​មួយ​ដែល​លោក​អះ​អាង​ថា លោក​បាន​ទទួល​តាម​រយៈ​ព្រះ​រាជ​ទាន​លើក​លែង​ទោស​របស់​ព្រះមហាក្សត្រ​  នរោត្តម ​ សីហមុនី  និង​ជា​​តួនាទី​មួយ​ដែ​លនឹង​អនុញ្ញាត​ឲ្យ​លោក​ឈរ​ឈ្មោះ​នៅ​ក្នុង​ការ​បោះ​ឆ្នោត​នេះ​។

លោក​ស្រី ជា វណ្ណាត អ្នក​វិភាគ​នយោ​​​បាយ​ឯករាជ្យបាន​មាន​ប្រសាសន៍ថា ការ​រារាំ​ង​​​លោក​ សម រង្ស៊ី  មិន​ឲ្យ​​ឈរ​ឈ្មោះ​ជាបេក្ខ​ជន​នឹង​ធ្វើ​ឲ្យ​ប៉ះពាល់​ដល់​កេរ្តិ៍​ឈ្មោះ​របស់​កម្ពុជា​​​​នៅ​ក្នុង​សហ​គមន៍​អន្តរ​ជាតិ​។ លោក​ស្រី​បាន​មាន​ប្រសាសន៍ថា “ បើ​គ្មាន​ការ​ចូល​រួម​ពីលោក​ សម រង្ស៊ី​ ទេ​ យើង​នឹង​មិន​អាច​និយាយ​ថា ជាការ​បោះ​ឆ្នោត​ដោយ​សេរី និង​យុត្តិធម៌ឡើយ​”។

ដោយ​ពិចារណា​ពីការ​តវ៉ា​ដែល​ទំនង​ជា​​​នឹង​កើត​មាន​ឡើង​ព្រម​ទាំង​ការ​រិះគន់​ទាំង​ក្នុង​ស្រុក​ និង​ក្រៅ​ស្រុក​នោះ​ លោកស្រី​ ជា វណ្ណាត បាន​មាន​ប្រសាសន៍​ថា ការ​ច្រាន​ចោល​បេក្ខភាព​របស់​លោក​ សម  រង្ស៊ី គឺ​ជាទង្វើ​មិន​ល្អរបស់​រដ្ឋា​ភិ​បាល​​។

លោក ឈាង​ វុន ដែល​កំពុង​ឈរ​ឈ្មោះ​ជា​តំណាង​រាស្ត្រ​របស់​គណបក្ស​ប្រជា​ជន​កម្ពុជា​ប្រចាំ​មណ្ឌល​បាត់​ដំបង​​​​បាន​អះអាង​ថា សេចក្តី​សម្រេច​របស់​គ.ជ.ប.​មិន​សំខាន់​ទេ​។ លោក​ ឈាង វុន បានមាន​ប្រសាសន៍​ថា លោក​ សម រង្ស៊ី​  នៅ​តែ​អាច​ចូល​រួម​នៅ​ក្នុង​ជីវិត​នយោបាយ​នៅ​កម្ពុជា​បាន​​  ប្រសិន​បើ​​គាត់​អាច​បញ្ចុះបញ្ចូល​សមាជិក​សភា​នៃ​គណ​​​បក្ស​សង្គ្រោះ​ជាតិ​​ដែល​​នឹង​​ជាប់​ឆ្នោត​ថ្មី​ឲ្យ​​លា​ឈប់​ និង​ប្រគល់​តួ​នាទី​នោះ​មក​ឲ្យគាត់។ លោក​បាន​មាន​ប្រសាសន៍បន្ត​​​ទៀត​​​ថា    “វា​​​មិន​សំខាន់​​​​ទេ​សម្រាប់​ការបោះ​ឆ្នោត​នេះ ប្រសិន​​​​បើ លោក​ សម រង្ស៊ី ឈរ​ឈ្មោះ​ជា​​​បេក្ខ​ជន​នោះ​”៕​

ប្រែ​​​សម្រួល​​​ដោយ មូល គឹមហឿន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស