កាលពីម្សិលមិញ អង្គការមិនមែនរដ្ឋាភិបាលចំនួនបួនបានអំពាវនាវឲ្យរដ្ឋាភិបាលបញ្ចប់ការស៊ើបអង្កេតរបស់នគរបាលរកអ្នកប្រឌិតឯកសារស្ទង់មតិការបោះឆ្នោត ដែលបានលើកឡើងថា គណបក្សសង្គ្រោះជាតិនឹងឈ្នះការបោះឆ្នោតជាតិនៅថ្ងៃអាទិត្យខាងមុខនេះ។
កាលពីសប្ដាហ៍មុន រដ្ឋាភិបាលបានអំពាវនាវឲ្យចាប់ខ្លួនអ្នកដែលទទួលខុសត្រូវក្នុងការប្រឌិតឯកសារនេះ ដែលខ្លួនបានអះអាងថា ជាព័ត៌មានមិនពិត និងជាព័ត៌មានដែលអាចនាំឲ្យមានភាពវឹកវរ។ ឯកសារនេះត្រូវបានចងក្រងព័ត៌មាន ដែលដកស្រង់ចេញពីការស្ទង់មតិ ដែលធ្វើឡើងដោយវិទ្យាស្ថានសាធារណរដ្ឋអន្តរជាតិ ដែលមានមូលដ្ឋាននៅទីក្រុងវ៉ាស៊ីនតោន ។
សកម្មជនគណបក្សសង្គ្រោះជាតិពីររូបត្រូវនគរបាលហៅមកសាកសួរពាក់ព័ន្ធឯកសារនេះ កាលពីសប្ដាហ៍មុន។ អង្គការច្បាប់ និងសិទ្ធិមនុស្សចំនួនបួនបានលើកឡើងនៅក្នុងសេចក្ដីថ្លែងការណ៍មួយដែលចេញផ្សាយរួមគ្នាដោយគណៈកម្មាធិការខុមហ្វ្រែល អង្គការលីកាដូ ក្រុមអ្នកច្បាប់ការពារសិទ្ធិកម្ពុជា និងមជ្ឈមណ្ឌលអប់រំច្បាប់សម្រាប់សហគមន៍ថា “ មានតែក្នុងករណីដែលវិទ្យាស្ថានសាធារណរដ្ឋអន្តរជាតិបានដាក់ពាក្យបណ្ដឹងទៅតុលាការប៉ុណ្ណោះ ទើប តុលាការស៊ើបអង្កេតករណីនេះបាន”។
អង្គការទាំងនេះបានលើកឡើងនៅក្នុងសេចក្ដីថ្លែងការណ៍របស់ខ្លួនថា ទោះជាយ៉ាងណា តំណាងវិទ្យាស្ថានសាធារណរដ្ឋអន្តរជាតិមា្នក់បានបញ្ជាក់អះអាងថា វិទ្យាស្ថាននេះមិនបានដាក់ពាក្យបណ្ដឹងប្ដឹងនរណាម្នាក់ទេ”។
សេចក្ដីថ្លែងការណ៍ដដែលនេះក៏បានលើកឡើងផងដែរថា ការអំពាវនាវឲ្យចាប់ខ្លួននេះ ដោយយកលេសថា ឯកសាររបស់គណបក្សសង្គ្រោះជាតិនេះបានបង្កឲ្យមានភាពចលាចលនៅក្នុងដំណើរឆ្ពោះទៅរក ការបោះឆ្នោត ដែលបានរឹតត្បិតសេរីភាព នៃការបញ្ចេញមតិ។
អង្គការនេះបានលើកឡើងទៀតថា “ការអំពាវនាវឲ្យចាប់ខ្លួននេះធ្វើឲ្យប្រជាពលរដ្ឋមានការព្រួយបារម្ភ ហើយបានធ្វើឲ្យបរិយាកាសនៃការបោះឆ្នោតមានភាពជូរចត់។ ប្រជាពលរដ្ឋគ្រប់រូបមានសិទ្ធិបញ្ចេញមតិអំពីលទ្ធផលនៃការស្ទង់មតិការបោះឆ្នោត…។ ការបកស្រាយរបស់ពួកគាត់មិនប៉ះពាល់ដល់ដំណើរការនៃការបោះឆ្នោតឡើយ”៕
ប្រែសម្រួលដោយ សោម សារុន