យោងតាមលទ្ធផលនៃការស្ទាបស្ទង់មួយធ្វើឡើងដោយមូលនិធិអន្តរជាតិសម្រាប់ប្រព័ន្ធបោះឆ្នោត ហៅកាត់ថា IFES ដែលមានមូលដ្ឋាននៅក្រុងវ៉ាស៊ីនតោន បានឲ្យដឹងថា ប្រជាពលរដ្ឋកម្ពុជា តែ១៥ភាគរយប៉ុណ្ណោះដែលស្គាល់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. និង៨៥ភាគរយជឿថា គណបក្សនយោបាយគួរតែលាតត្រដាងហិរញ្ញវត្ថុសម្រាប់ការធ្វើយុទ្ធនាការឃោសនារបស់ខ្លួន។
ការស្ទង់មតិដែលបានធ្វើឡើងកាលពីខែមេសានិងខែឧសភា និងដែលត្រូវបានចេញផ្សាុយកាលពីថ្ងៃសុក្រនេះ ផ្អែកលើបទសម្ភាសជាមួយប្រជាពលរដ្ឋគ្រប់អាយុបោះឆ្នោតចំនួន១.៧៥២នាក់និងក្រុមគោលដៅចំនួន១០នៅក្នុងខេត្តចំនួនប្រាំ។
IFES បានលើកឡើងនៅក្នុងសេចក្តីថ្លែងការណ៍មួយថា “ លទ្ធផលនៃការស្ទាបស្ទង់បង្ហាញថា ប្រជាពលរដ្ឋកម្ពុជា ចាប់អារម្មណ៍លើដំណើរការបោះឆ្នោត ប៉ុន្តែ បានរាយការណ៍ថា ទទួលបានព័ត៌មានតិចតួចស្ដីពីដំណើរការនេះ។ទិន្នន័យក៏បង្ហាញដែរថាប្រជាពលរដ្ឋកម្ពុជា មានការយល់ដឹងខ្លះៗអំពីការបោះឆ្នោត ប៉ុន្តែមួយចំនួនធំបង្ហាញថា ត្រូវការព័ត៌មានបន្ថែម”។ ការស្ទាបស្ទង់នេះបង្ហាញថា មួយផ្នែកដោយសារតែមានប្រជាជនពលរដ្ឋមួយចំនួនតូចប៉ុណ្ណោះ ដែលយល់ដឹងថា គណៈកម្មាធិការជាតិរៀបចំការបោះឆ្នោតជាអ្វី និងធ្វើកិច្ចការអ្វីខ្លះឲ្យប្រាកដ។
“ ប្រជាពលរដ្ឋកម្ពុជាត្រឹមតែ១៥ភាគរយប៉ុណ្ណោះ ដែលស្គាល់ឈ្មោះអង្គការទទួលបន្ទុករៀបចំការបោះឆ្នោត។លទ្ធផលនៃការស្ទាបស្ទង់លើក្រុមគោលដៅបានបញ្ជាក់ជាថ្មីថា នេះដោយសារតែមានការយល់ដឹងតិចតួចពីគណៈកម្មាធិការជាតិរៀបចំការបោះឆ្នោត”។ ការស្ទាបស្ទង់នេះក៏បានរកឃើញដែរថា ក្នុងឆ្នាំកន្លងទៅ ចំនួនប្រជាពលរដ្ឋដែលចង់ឲ្យគណបក្សនយោបាយបង្ហាញព័ត៌មានស្ដីពីហិរញ្ញវត្ថុ មានការកើនឡើង។
ការស្ទាបស្ទង់នេះបានលើកឡើង “ ប្រជាពលរដ្ឋកម្ពុជា ក៏សម្ដែងការគាំទ្រខ្លាំងដែរចំពោះការលាតត្រដាងជាសាធារណៈអំពីការបរិច្ចាគសម្រាប់ធ្វើយុទ្ធនាការឃោសនាបោះឆ្នោត ពោលគឺមានភាគរយខ្ពស់ជាងការស្ទាបស្ទង់មតិរបស់ IFES ក្នុងឆ្នាំ២០១២”។ការស្ទាបស្ទង់នេះបានគូសបញ្ជាក់ថា ចំនួនបានកើនឡើងពី៧៣ភាគរយកាលពីឆ្នាំមុនដល់៨៥ភាគរយក្នុងឆ្នាំនេះ។
កាលពីខែមុន គណបក្សប្រជាជនកម្ពុជាជាគណបក្សមួយក្នុងចំណោមគណបក្សនយោបាយចំនួនបី ដែលបានអវត្តមានក្នុងពិធីចុះហត្ថលេខា ដែលក្នុងនោះអ្នកតំណាងបានសន្យាថា គណបក្សរបស់ខ្លួននឹងស្ម័គ្រចិត្តលាតត្រដាងប្រភព និងចំនួនមូលនិធិរៃអង្គាសសម្រាប់ការបោះឆ្នោត។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបានមានប្រសាសន៍ថា លោកបានឮអំពីរបាយការណ៍នេះ ប៉ុន្តែ មិនបានឃើញវាទេ។ លោកបន្ថែមថា “ ដើម្បីការយល់ដឹង យើងរៀបចំការបោះឆ្នោតធំៗពីររៀងរាល់ប្រាំឆ្នាំម្ដង។កាលពីឆ្នាំមុនយើងមានមន្ត្រីបោះឆ្នោតជាង១១០.០០០នាក់ដែលជាប្រជាពលរដ្ឋនៅក្នុងស្រុក។ហើយសម្រាប់ការបោះឆ្នោតជាតិនៅឆ្នាំនេះ យើងបានជ្រើសរើសមន្ត្រីបោះឆ្នោតជាង១២០.០០០នាក់នៅទូទាំងប្រទេស។ ដូច្នេះមន្ត្រីទាំងនេះត្រូវផ្សព្វផ្សាយការយល់ដឹងអំពីគណៈកម្មាធិការជាតិរៀបចំការបោះឆ្នោតឲ្យបានច្រើនទៅដល់ប្រជាពលរដ្ឋកម្ពុជា”៕
(រាយការណ៍បន្ថែមដោយ គុច ណារ៉េន)
ប្រែសម្រួលដោយ តែម សុខុម