នគរបាលបានឲ្យដឹងកាលពីម្សិលមិញថា ក្មេងស្រីពីរនាក់ បានលង់ទឹកស្លាប់ ខណៈពេលកំពុងហែលទឹកលេងនៅក្នុងស្រះទឹកដ៏ធំមួយនៅស្រុកពាមរក៍ក្នុងខេត្តព្រៃវែង កាលពីថ្ងៃអាទិត្យ ។
យោងតាមលោក ប៉ម សាំម៉ន នាយបុស្ដិ៍នគរបាលឃុំ បានឲ្យដឹងថា ក្មេងស្រីឈ្មោះចិត្រ ម៉ី អាយុ៩ឆ្នាំ និងឈ្មោះ ផន សោភា អាយុ១១ឆ្នាំបានហែលទឹកលេងក្នុងស្រះមួយនៅក្បែរភូមិព្រែកខ្សាយ ក្នុងឃុំព្រែកខ្សាយ “ ខ” ពេលពួកគេទៅឃ្វាលពពែជាមួយក្មេងៗមួយក្រុមទៀត។
លោកមេភូមិ ប្រាក់ សាមុត បានមានប្រសាសន៍ថា ផន សោភា បានហែលទឹកឆ្ងាយពីមាត់ស្រះ ហើយអស់កម្លាំង។លោកបន្ថែមថា “ នាងអស់កម្លាំង ហើយមិនអាចហែលត្រឡប់មកស្រះវិញបាន”។ លោកបានបន្ថែមទៀតថា ចិត្រ ម៉ី បានហុចមែកឈើ ដើម្បីជួយ ផន សោភា ប៉ុន្តែ ផន សោភា ស្រវាចាប់មែកឈើ ហើយទាញ ចិត្រ ម៉ី ទម្លាក់ទឹកដែរ។
លោក ប្រាក់ សាមុត បានមានប្រសាសន៍ថា ក្មេងដទៃទៀតក្នុងក្រុមនេះបានរត់ទៅភូមិដើម្បីហៅឲ្យគេជួយ ប៉ុន្តែរយៈពេលមួយម៉ោងបានកន្លងផុតទៅហើយនៅមុនពេលអ្នកភូមិប្រហែល២០នាក់ ដែលរួមទាំងគ្រួសារក្មេងស្រីទាំងពីរនាក់នេះផង បានមកដល់ស្រះនេះ ប៉ុន្តែ ក្មេងស្រីទាំងពីរនាក់នេះ បានស្លាប់បាត់ទៅហើយ។លោកបន្ថែមថា“ អ្នកភូមិទាំងនេះបានព្យាយាមជួយជីវិតក្មេងស្រីទាំងពីរនាក់នេះតាមរយៈការធ្វើចលនាបេះដូង។ ប៉ុន្តែ ក្មេងស្រីរងគ្រោះទាំងពីរនាក់នេះបានស្លាប់បាត់ទៅហើយ”។
ជារៀងរាល់ឆ្នាំអំឡុងពេលរដូវវស្សាមានក្មេងៗជាច្រើនបានលង់ទឹកស្រះ និងទន្លេស្លាប់នៅក្នុងប្រទេសកម្ពុជា ដោយអង្គការយូនីសេហ្វបានរាយការណ៍ឲ្យដឹងកាលពីឆ្នាំមុនថា ការលង់ទឹកគឺជាដើមហេតុចម្បងនៃការស្លាប់របស់កុមារដែលមានអាយុចន្លោះពី១ឆ្នាំ ដល់៤ឆ្នាំ៕
ប្រែសម្រួលដោយ ស៊ុំ សុខភុំ