អង្គការមិនមែនរដ្ឋាភិបាលក្នុងស្រុកបានចេញសេចក្ដីថ្លែងការណ៍រួមមួយកាលពីម្សិលមិញគាំទ្រអត្ថបទមួយដែលបានចេញផ្សាយតាមទំព័រកាសែតឌឹ ហ្គាឌាន (Guardian) របស់អង់គ្លេសកាលពីពេលថ្មីៗនេះអំពីការដាក់កុមារឲ្យធ្វើការនៅឯចម្ការអំពៅដែលផ្គត់ផ្គង់ទៅឲ្យក្រុមហ៊ុនអង់គ្លេសឈ្មោះ Tate & Tyles។
ក្រុមហ៊ុន Tate & Tyles បានគំរាមថានឹងប្ដឹងកាសែត ឌឹ ហ្គាឌាន ពាក់ព័ន្ធនឹងអត្ថបទរបស់កាសែតនេះកាលពីថ្ងៃទី៩ ខែកក្កដាដែលអះអាងថា មានកម្មករជាកុមារកំពុងធ្វើការនៅឯចម្ការអំពៅរបស់ក្រុមហ៊ុនថៃ ខេ អេស អិល (KSL) នៅក្នុងខេត្តកោះកុង ដែលក្រុមហ៊ុននេះបញ្ជាទិញ ប៉ុន្តែមិនទាន់បានចាត់វិធានការនៅឡើយទេ ក្រុមហ៊ុននេះបានជំទាស់យ៉ាងខ្លាំងនឹងការថតវីដេអូខ្លីមួយជាមួយនឹងអត្ថបទដែលបង្ហាញអំពីកម្មករជាកុមារធ្វើការនៅក្នុងចម្ការអំពៅទាំងនោះ។
លោក អ៊ាង វុទ្ធី នាយកប្រតិបត្តិរបស់អង្គការសមធម៌កម្ពុជា បានលើកឡើងនៅក្នុងសេចក្ដីថ្លែងការណ៍រួមរបស់អង្គការមិនមែនរដ្ឋាភិបាលនេះថា “កាសែតឌឹហ្គាឌាន ទទួលបានព័ត៌មានត្រឹមត្រូវហើយ។ រូបថតរបស់យើងដែលបង្ហាញពីកម្មករជាកុមារនៅក្នុងចម្ការអំពៅរបស់ក្រុមហ៊ុន ខេ អេស អិល គឺមិនអាចបដិសេធបានទេ ហើយយើងរីករាយនឹងបង្ហាញរូបថតទាំងនោះជាភ័ស្តុតាងនៅក្នុងតុលាការប្រសិនបើក្រុមហ៊ុន Tate & Tyles ពិតជាហ៊ានប្ដឹងកាសែតឌឹហ្គាឌាន មែននោះ”។
អង្គការលីកាដូ មជ្ឈមណ្ឌលអប់រំច្បាប់សម្រាប់សហគមន៍ និងអង្គការ Inclusive Development International ក៏បានចុះហត្ថលេខាលើសេចក្ដីថ្លែងការណ៍នេះដែរ។ អ្នកនាំពាក្យកាសែត ឌឹ ហ្គាឌាន បានបញ្ជាក់កាលពីម្សិលមិញថា ក្រុមហ៊ុន Tate & Tyles បានបញ្ជូនពាក្យបណ្ដឹងទៅកាសែតនេះហើយ ប៉ុន្តែ មិនទាន់បានដាក់ពាក្យបណ្តឹងជាផ្លូវការទេ។ប៉ុន្តែ ភាគីខាងកាសែតវិញក៏មិនទាន់ឆ្លើយតមនឹងសំណួរជំុវិញការពិតអំពីវីដេអូឃ្លីបនេះដែរ។
អ្នកនាំពាក្យរបស់ក្រុមហ៊ុន Tate & Tyles ក៏មិនបានឆ្លើយតបភ្លាមៗទៅនឹងសំណើសុំធ្វើអត្ថាធិប្បាយអំពីសេចក្ដីថ្លែងការណ៍របស់អង្គការមិនមែនរដ្ឋាភិបាលនេះដែរ។ ប៉ុន្តែបន្ទាប់ពីសមាជិកភាពរបស់ខ្លួនត្រូវបានព្យួរពីអង្គការដែលមានមូលដ្ឋាននៅក្នុងទីក្រុងឡុងដ៍ដែលផ្សព្វផ្សាយពីប្រភពត្រឹមត្រូវនៃស្ករសនៅក្នុងឧស្សាហកម្មម្ហូបអាហារ និងថាមពលកាលពីដើមខែនេះ ក្រុមហ៊ុន Tate & Tyles បាននិយាយការពារការប្រតិបត្តិការរបស់ខ្លួន។ “យើងមិនខ្វល់ចំពោះវិធីសាស្ត្រថ្មីៗនៅក្នុងយុទ្ធនាការរបស់អង្គការមិនមែនរដ្ឋាភិបាលប្រឆាំងយើងទេ ព្រោះយើងមានទំនុកចិត្តយ៉ាងច្បាស់ថា យើងបានប្រតិបត្តិត្រឹមត្រូវ ទាំងតាមក្រមសីលធម៌ និងតាមផ្លូវច្បាប់”។
ក្រុមហ៊ុននេះក៏កំពុងការពារខ្លួនឯងផងដែរចំពោះប្រជាពលរដ្ឋចំនួន២០០គ្រួសារដែលប្ដឹងខ្លួននៅឯតុលាការយុត្តិធម៌ជាន់ខ្ពស់នៅក្នុងប្រទេសអង់គ្លេសពីបទទាញយកផលប្រយោជន៍ពីដីដែលពួកគេអះអាងថា ត្រូវបានគេដណ្ដើមយកដោយខុសច្បាប់ពីពួកគាត់។
លោក អាន ហាយ៉ា (An Haya) ដើមបណ្ដឹងម្នាក់ក្នុងចំណោមដើមបណ្ដឹងទាំងនោះបានមានប្រសាសន៍កាលពីម្សិលមិញថា ថ្មីៗនេះ លោកបានចាប់ផ្ដើមប្រមូលតួលេខអំពីកុមារដែលកំពុងធ្វើការនៅចម្ការទាំងនោះឲ្យការិយាល័យមេធាវីចាត់ការករណីនេះ គឺក្រុមហ៊ុន ចូន ឌេ (Jones Day)។
លោក ហាយ៉ា បានមានប្រសាសន៍ថា រហូតមកដល់ពេលនេះលោកឃើញមាន កុមារចំនួន៨៥នាក់ជាកូនរបស់ប្រជាពលរដ្ឋនៅក្នុងមូលដ្ឋាននោះដែលមានអាយុចន្លោះពី១១ឆ្នាំទៅ១៧ឆ្នាំកំពុងធ្វើការនៅចម្ការទាំងនោះ។ លោកបានថ្លែងថា “ខ្ញុំមិនមែនជាអ្នកជំនាញផ្នែកច្បាប់ទេ ប៉ុន្តែវាជាការរំលោភច្បាប់ធ្ងន់ណាស់ក្នុងការប្រើកម្មករកុមារបែបនេះឲ្យធ្វើការ។ ក្រុមហ៊ុនចម្ការអំពៅនេះមិនត្រឹមតែរឹបអូសយកស្រែ និងផ្ទះរបស់យើងប៉ុណ្ណោះទេ ពេលនេះពួកគេថែមទាំងកេងប្រវ័ញ្ចកម្លាំងពលកម្មកុមារទៀត”៕
ប្រែសម្រួលដោយ ហម សុផាណ្ណា