បាត់ដំបង/បន្ទាយមានជ័យ-ខណៈលោក សម រង្ស៊ី ថ្លែងទៅកាន់ប្រជាជន និងអ្នកគាំទ្ររាប់រយនាក់នៅក្រុងសិរីសោភ័ណ លោក កឹម សុខា បានឈរថតរូបជាមួយយុវវ័យដែលមានចិត្តរំភើបរីករាយនៅក្បែរគ្នានោះ។
អំឡុងការថ្លែងសុន្ទរកថានៅរង្វង់មូលប្រចាំក្រុងបាត់ដំបង ដោយមានការចូលរួមពីអ្នកគាំទ្រគណបក្សសង្គ្រោះជាតិប្រហែលមួយម៉ឺននាក់ លោក កឹម សុខា បានថ្លែងត្រឹមតែប្រហែលប្រាំនាទីប៉ុណ្ណោះមុនពេលហុចឧគ្ឃោសនសព្ទទៅលោក សម រង្ស៊ី ដែលបានថ្លែងអស់រយៈពេលជិតមួយម៉ោង។
វាជាការផ្លាស់ប្ដូរគួរឲ្យកត់សម្គាល់មួយបើធៀបនឹងសប្ដាហ៍មុន ពេលលោក កឹម សុខា ដែលជាប្រធានស្ដីទីនៃគណបក្សសង្គ្រោះជាតិ មុនការវិលត្រឡប់របស់លោក សម រង្ស៊ី កាលពីថ្ងៃសុក្រ បានដើរតួនាទីស្នូលក្នុងយុទ្ធនាការឃោសនារកសំឡេងឆ្នោត ដោយបានចេញឃោសនានៅទូទាំងប្រទេស និងបានទាក់ទាញប្រជាជនច្រើនគួរសមតាមរយៈសារដែលសំដៅទាក់ទាញប្រជាប្រិយភាព និងការថ្លែងសុន្ទរកថាដែលមានខ្លឹមសារវាយប្រហារគណបក្សប្រជាជនកម្ពុជា។
លោក កឹម សុខា និងមន្ត្រីគណបក្សសង្គ្រោះជាតិផ្សេងៗទៀត បានឲ្យដឹងថា សេចក្ដីសម្រេចក្នុងការឲ្យលោក កឹម សុខា អមដំណើរលោក សម រង្ស៊ី អំឡុងសប្ដាហ៍ចុងក្រោយមុនការបោះឆ្នោតនៅថ្ងៃអាទិត្យនេះ ជាជាងឲ្យលោក កឹម សុខា ធ្វើយុទ្ធនាការដាច់ដោយឡែក គឺជារឿងចាំបាច់ ដើម្បីបង្ហាញប្រាប់អ្នកបោះឆ្នោតថា អ្នកនយោបាយដែលធ្លាប់ជាគូបដិបក្ខយ៉ាងជូរចត់ទាំងពីររូបនេះ គឺពិតជាបានរួបរួមគ្នាជាធ្លុងមួយប្រាកដមែន។
លោក កឹម សុខា បាននិយាយពេលលោកសម រង្ស៊ី កំពុងថ្លែងសុន្ទរកថាថា “ យើងចង់បង្ហាញប្រាប់ប្រជាជនថា យើងមានការរួមគ្នា។ ប្រព័ន្ធផ្សព្វផ្សាយរបស់គណបក្សកាន់អំណាចថា យើងកំពុងឈ្លោះប្រកែកគ្នានៅឡើយ ដូច្នេះយើងចង់ធ្វើឲ្យប្រាកដថា ប្រជាពលរដ្ឋដឹងថា យើងមានការរួបរួមគ្នាជាធ្លុងមួយ។ ប្រសិនបើយើងធ្វើដំណើរទៅកន្លែងផ្សេងៗគ្នា ប្រជាពលរដ្ឋនឹងនិយាយថា កឹម សុខា និយាយផ្សេងនៅទីនេះ ប៉ុន្តែ សម រង្ស៊ី និយាយផ្សឹងនៅទីនោះមិនខាន។ ធ្វើដូច្នេះទើបប្រជាពលរដ្ឋមើលឃើញច្បាស់ថា យើងមានការរួបរួមគ្នាមែន”។
កាលពីជាងមួយឆ្នាំមុននេះ ការច្របាច់បញ្ចូលគ្នាដែលគេបានទន្ទឹងរង់ចាំយ៉ាងយូររវាងគណបក្ស សម រង្ស៊ី និងគណបក្សសិទ្ធិមនុស្សរបស់លោក កឹម សុខា ត្រូវបានសម្រេចជាផ្លូវការអំឡុងកិច្ចប្រជុំមួយនៅក្នុងរដ្ឋធានីម៉ានីលនៃប្រទេសហ្វីលីពីន។ ទោះបីជាយ៉ាងណា វិធីសាស្ត្រមួយក្នុងចំណោមវិធីសាស្ត្រចម្បងៗរបស់គណបក្សប្រជាជនកម្ពុជាក្នុងការវាយប្រហារគណបក្សប្រឆាំងរយៈពេលប៉ុន្មានខែមុនការបោះឆ្នោត គឺការគាស់រំលើងរឿងអតីតកាលជូរចត់រវាងអ្នកនយោបាយទាំងពីរ ដែលឧស្សាហ៍វាយប្រហារគ្នាអំឡុងយុទ្ធនាការឃោសនាមុនការបោះឆ្នោតឆ្នាំ២០០៨ ក្នុងបំណងទទួលបានអាសនៈកាន់តែច្រើនឡើងសម្រាប់គណបក្សរៀងៗខ្លួន។
ក្នុងខែឧសភា អង្គភាពព័ត៌មាននិងប្រតិកម្មរហ័សរបស់ទីស្ដីការគណៈរដ្ឋមន្ត្រី និងប្រព័ន្ធផ្សព្វផ្សាយដែលគាំទ្រគណបក្សប្រជាជនកម្ពុជា បានចាក់ផ្សាយខ្សែអាត់ជាបន្តបន្ទាប់ដែលបង្ហាញពីការវាយប្រហារគ្នារវាងលោក សម រង្ស៊ី និងលោក កឹម សុខា អំឡុងយុទ្ធនាការឃោសនាបោះឆ្នោត។
ការធ្វើឲ្យប្រជាជនយល់ឃើញថា ការរឹតចំណងសាមគ្គីរវាងលោក កឹម សុខា និងលោក សម រង្ស៊ី ដែលមានរូបភាពលើកដៃគ្នាឡើងលើនៅលើផ្ទាំងឃោសនាទូទាំងប្រទេស គឺជាការរឹតចំណងក្លែងក្លាយនោះ គឺជាអាវុធដែលគណបក្សប្រជាជនកម្ពុជាប្រើអំឡុងយុទ្ធនាការឃោសនានេះ។
ក្នុងរយៈពេលមួយខែចុងក្រោយនេះ ប្អូនប្រុសរបស់លោក កឹម សុខា គឺឧត្ដមសេនីយ៍ទោ កឹម សុខុន ដែលបានចុះចូលជាមួយនឹងគណបក្សប្រជាជនកម្ពុជានៅក្នុងឆ្នាំ២០០៩នោះ បាននិងកំពុងធ្វើដំណើរទូទាំងប្រទេស និងលេចមុខប្រាប់ប្រជាពលរដ្ឋតាមកញ្ចក់ទូរទស្សន៍ថា លោក សម រង្ស៊ី និងលោក កឹម សុខា គឺជាអ្នកនយោបាយដែលគិតតែពីផលប្រយោជន៍ផ្ទាល់ខ្លួន។
ខណៈអ្នកមានភក្ដីភាពចំពោះគណបក្សសង្គ្រោះជាតិ បានដង្ហែក្បួនតាមបណ្ដោយផ្លូវនានាពេញស្រុកបន្ទាយមានជ័យកាលពីថ្ងៃម្សិលមិញនោះ ឧបករណ៍បំពងសំឡេងដែលត្រូវបានដំឡើងដោយគណបក្សប្រជាជនកម្ពុជា បានបន្លឺសំណួរទៅកាន់អ្នកជិះកាត់ថា “ពីមុន សម រង្ស៊ី និយាយថា កឹម សុខា គឺជាអាយ៉ងរបស់ ហ៊ុន សែន។ តើឥឡូវគាត់មានអ្វីនិយាយទៀត?”។
នៅចំពោះមុខកិច្ចប្រឹងប្រែងរបស់គណបក្សប្រជាជនក្នុងការធ្វើឲ្យមានការយល់ឃើញពីការបែកបាក់ និងការមិនទុកចិត្តគ្នារវាងមេដឹកនាំគណបក្សប្រឆាំងទាំងពីររូបនេះ លោក សុន ឆ័យ បានលើកឡើងថា វាគឺជារឿងចាំបាច់ដែលគណបក្សសង្គ្រោះជាតិត្រូវបង្ហាញពីការរួបរួមសាមគ្គីគ្នា។
លោកបានមានប្រសាសន៍ថា “ យើងដឹងថា ប្រជាពលរដ្ឋមានការព្រួយបារម្ភណាស់អំពីការសាមគ្គីគ្នាក្នុងជួរគណបក្សនេះ។ នេះហើយជាមូលហេតុដែលអ្នកទាំងពីរបង្ហាញវត្តមានជាមួយគ្នាអំឡុងយុទ្ធនាការរយៈពេលប៉ុន្មានថ្ងៃចុងក្រោយនេះ ដើម្បីផ្ដល់សញ្ញាច្បាស់ៗទៅសាធារណជនថា [ចំណងសាមគ្គី] នេះពុំមានបញ្ហាអ្វីឡើយ”។
ទោះជាយ៉ាងណា លោក ឡៅ ម៉ុងហៃ អ្នកវិភាគនយោបាយឯករាជ្យ បានលើកឡើងថា គណបក្សសង្គ្រោះជាតិនឹងទទួលបានប្រយោជន៍ច្រើនជាង ប្រសិនបើគណបក្សនេះឲ្យលោក កឹម សុខា ចេញធ្វើយុទ្ធនាការដាច់ដោយឡែកពីលោក សម រង្ស៊ី ដើម្បីទាក់ទាញអ្នកបោះឆ្នោតដែលអាចមិនទាន់ធ្វើការសម្រេចចិត្តរយៈពេលប៉ុន្មានថ្ងៃចុងក្រោយដ៏សំខាន់បំផុតមុនពេលបោះឆ្នោត។ លោកបានមានប្រសាសន៍ថា “ ពួកគេគួរតែបំបែកគ្នាចេញធ្វើយុទ្ធនាការ ហើយឲ្យលោក កឹម សុខា ចុះទៅតាមតំបន់ជនបទឲ្យបានកាន់តែច្រើន ហើយឲ្យលោក សម រង្ស៊ី ប្រមូលផ្ដុំកម្លាំងនៅតាមតំបន់ក្រុងវិញ”។
លោក ឡៅ ម៉ុងហៃ បានបន្ថែមថា ការផ្ដោតការយកចិត្តទុកដាក់លើការប្រមូលផ្ដុំ គ្នាទ្រង់ទ្រាយធំនៅតាមតំបន់ក្រុង គឺជាការគិតខុស។ លោកបានមានប្រសាសន៍ថា “ ប្រជាជននៅតាមតំបន់ក្រុងគាំទ្រគណបក្សនេះស្រាប់ទៅហើយ។ ដោយសារគ្មានឱកាសផ្សព្វផ្សាយតាមវិទ្យុ និងទូរទស្សន៍ វាជារឿងសមហេតុផលជាង ប្រសិនបើឲ្យលោក កឹម សុខា ចុះទៅតាមតំបន់ជនបទ និងឲ្យគាត់បញ្ចុះបញ្ចូលអ្នកបោះឆ្នោតថ្មីៗ”។
ប៉ុន្តែ អ្នកស្រី កឹម មុនីវិទ្យា កូនស្រីរបស់លោក កឹម សុខា និងជាអ្នកនាំពាក្យគណបក្សសង្គ្រោះជាតិ បាននិយាយថា សប្ដាហ៍ចុងក្រោយនៃយុទ្ធនាការនេះ គឺជានិមិត្តរូបនៃការច្របាច់បញ្ចូលគ្នាដែលបានជួយឲ្យមានការគាំទ្រកាន់តែច្រើនសម្រាប់គណបក្សប្រឆាំងនេះ។ លោក កឹម សុខា និងលោក សម រង្ស៊ី កំពុងធ្វើយុទ្ធនាការរួមគ្នា “ ដោយសារតែវាគឺជាអ្វីដែលប្រជាពលរដ្ឋចង់ឃើញ។ គណបក្សនេះបានទទួលសន្ទុះខ្លាំងដោយសារការច្របាច់បញ្ចូលគ្នា និងការសាមគ្គីគ្នា មិនមែនដោយសារលោក សម រង្ស៊ី ឬឪពុករបស់ខ្ញុំទេ”៕
ប្រែសម្រួលដោយ ភួន ចាន់សេរីវុធ