29 C
Phnom Penh

យោធា​កម្ពុជាត្រូវ​បាន​ស្នើ​សុំឲ្យ​ធានាចំពោះ​មុខ​សាធារណ​ជន​​ថា​គ្មាន​រដ្ឋប្រហារក្រោយ​បោះ​ឆ្នោត​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ បណ្ដា​អង្គការ​សង្គម​ស៊ីវិល​ និង​គណបក្ស​ប្រឆាំង​ បាន​អំពាវ​នាវ​​ឲ្យ​យោធា​​​ចេញ​សេចក្ដី​ថ្លែង​ការណ៍​មួយ​ច្រាន​ចោល​ការ​អះ​អាង​របស់​​ម្ចាស់​ស្ថានីយ​វិទ្យុ​ដ៏​ពេញ​និយម​មួយដែល​ថា យោធា​នឹង​ធ្វើ​រដ្ឋ​ប្រហារ​ទម្លាក់​​គណបក្ស​ប្រឆាំង​ចេញ​ពី​អំណាច​ ប្រសិន​បើ​គណ​បក្ស​ប្រឆាំង​ទទួល​ជ័យ​ជម្នះ​នៅ​ក្នុង​ការ​បោះ​ឆ្នោត​ជាតិ​​នៅថ្ងៃ​អាទិត្យ​នេះ​។

ការ​អំពាវនាវ​នេះ​ធ្វើ​ឡើង​បន្ទាប់ពី​លោក សេង​ ប៊ុន​វ៉េង​ ហៅ អាចារ្យ​អេ ដែល​បាន​បង្កើត​​វិទ្យុ​អេប៊ីស៊ី ឡើង​កាល​ពី​ឆ្នាំ​២០០៨ បាន​លើក​ឡើង​ម្តង​ទៀត​​ក្នុង​កម្មវិធីផ្សាយ​ពេល​ព្រឹក​ម្សិលមិញ​ នូវ​ការ​ព្រមាន​របស់​លោក​កាល​ពី​ថ្ងៃ​អង្គារ​ថា យោធា​នឹង​ធ្វើ​រដ្ឋ​ប្រហារ​ ប្រសិន​បើ​គណបក្ស​សង្គ្រោះ​ជាតិ​ឈ្នះ​ការ​បោះឆ្នោត​។

លោក​បាន​និយាយ​អំឡុង​កម្មវិធី​ផ្សាយ​ពេល​ព្រឹក​ព្រលឹម​កាល​ពី​ម្សិល​មិញ​ថា“ បីខែ​បន្ទាប់​ពី​ [គណបក្ស​សង្គ្រោះ​ជាតិ​ជាប់​ឆ្នោត​] ឈាម​នឹង​ហូរ​ដាប​ពេញ​ផ្លូវ​។អ្នក​ដែល​តស៊ូ​ដណ្ដើម​អំណាច​នៅ​ក្នុង​ជួរ​រដ្ឋាភិ​បាល​របស់​លោក​ សម រង្ស៊ី [មេដឹកនាំ​គណបក្ស​ប្រឆាំង] អ្នក​ដែល​មិន​ទទួល​បាន​តួនាទី​ នឹង​ចូល​រួម​ជា​ទាហាន​រត់​ចោល​ជួរ​ ដើម្បី​ធ្វើ​រដ្ឋ​ប្រហារ​”។ លោក​បាន​លើក​ឡើង​ទៀតថា “នៅ​ពេល​​នោះ​ខ្ញុំ​នឹង​ចាក​ចេញ​ពី​ប្រទេសនេះ​ ហើយ​វិនិយោគិននឹង​ចាក​ចេញ​ពី​ប្រទេស​របស់​យើង​ ហើយ​ប្រទេស​របស់​យើង​​នឹង​រង​ការ​បំផ្លាញ​ទាំងស្រុង​”។

លោក គល់​ បញ្ញា ប្រធានគណៈកម្មាធិការ​ដើម្បី​ការ​បោះឆ្នោត​​ដោយ​សេរី​ និង​យុត្តធម៌​នៅ​កម្ពុជា​ហៅ​កាត់​ថា ខុមហ្វ្រែល​ បាន​មាន​ប្រសាសន៍ថា ដើម្បី​ធ្វើ​ឲ្យ​ប្រាកដ​ថា​ការ​បោះ​ឆ្នោត​នៅ​ថ្ងៃ​អាទិត្យ​នេះ​មាន​ភាព​ស្រប​ច្បាប់ កងយោធពល​ខេមរភូមិន្ទ​គួរ​តែ​ចេញ​សេចក្ដី​ថ្លែង​ការណ៍​មួយ ដើម្បី​​ធ្វើ​ឲ្យ​​​​អ្ន​ក​បោះ​ឆ្នោត​ស្ងប់​អារម្មណ៍​​ថា ការ​អះ​អាង​របស់​លោក សេង ​ប៊ុនវ៉េង មិន​មែន​ជា​ការ​ពិត​។

លោក​​មាន​ប្រសាសន៍​ថា “ប្រសិន​បើ​មាន​ការ​ចោទ​ប្រកាន់​បែប​នេះ​មែន យោធា​គួរ​តែ​ឆ្លើយ​តប​ដើម្បីធ្វើ​ឲ្យ​អ្នក​បោះឆ្នោត​ស្ងប់​អារម្មណ៍​ និង​ធ្វើ​ឲ្យ​ពួកគាត់​យល់​ថាខ្លួន​មាន​សេរី​ភាព​​ក្នុង​ការ​បញ្ចេញ​មតិ​។ការ​អត្ថាធិ​ប្បាយ​ទាំង​នេះ​បង្ក​ការ​ភ័យ​ខ្លាច​និង​រារាំង​អ្នក​បោះ​ឆ្នោត​មិន​ឲ្យ​បញ្ចេញ​មតិ​ដោយ​សេរី”។

លោក​ សុន ឆ័យ អ្នក​នាំពាក្យ​​គណ​បក្ស​សង្គ្រោះ​ជាតិ​ ក៏​បាន​មាន​ប្រសាសន៍​ដែរ​ថា យោធា​គួរ​តែ​ធានា​អះអាង​ចំពោះ​​​​អ្នក​បោះ​ឆ្នោតជា​សាធារណៈ​​ថា ខ្លួន​នឹង​គោរព​តាម​​លទ្ធ​ផល​​​នៃ​ការ​បោះឆ្នោត​នៅ​ថ្ងៃ​អាទិត្យ​នេះ ហើយ​បម្រើ​រដ្ឋាភិបាល​ មិន​ថា​រដ្ឋាភិបាល​នោះ​​បង្កើត​​ឡើង​ដោយ​គណ​បក្ស​ណាមួយ​ឡើយ​។

លោក​បាន​មាន​ប្រសាសន៍​ថា “យោ​ធា​​មិន​​គួរ​សម្ងំ​នៅ​ស្ងៀម ឬ​នៅក្រោមឥទ្ធិ​ពល​គេ​​តទៅ​ទៀតទេ។ពួក​គេ​ជា​កង​ទ័ព​របស់​ប្រទេស​ មិន​មែន​ជា​កង​ទ័ព​របស់​គណបក្ស​កាន់​អំណាច​​ឡើយ​។ អគ្គ​មេ​បញ្ជាការ​គួរ​តែ​និយាយ​អ្វី​ម្យ៉ាង​។ ប្រសិន​បើ​ក្រសួង​ការពារ​ជាតិ​ជា​ផ្នែក​មួយ​របស់​គណបក្ស​ប្រជាជន​កម្ពុជា​ នោះ​គឺ​ជា​រឿង​មួយ​ ប៉ុន្តែ​អគ្គមេបញ្ជា​ការ​គួរ​តែ​បង្ហាញ​​អព្យាក្រឹត​ភាព​របស់​ខ្លួន​”។

ទោះ​ជា​យ៉ាង​ណា​ លោក​ ប៉ុល សារឿន អគ្គ​មេបញ្ជាការ​កង​យោធពល​ខេមរភូមិន្ទ​បាន​បង្វែរ​សំណួរ​ទៅ​មន្ត្រី​ក្រសួង​ការពារ​ជាតិ​ ប៉ុន្តែ​លោក​បាន​មាន​ប្រសាសន៍​ថា លោក​​បាន​ឮ​ការ​ចាក់ផ្សាយ​បង្ក​រឿងនេះ​​តាម​វិទ្យុ​អេប៊ីស៊ី។

ឧត្តម​សេនីយ៍ទោ​មួយ​រូប​​នៅ​ក្រសួង​ការ​ពារជាតិ​ ដែល​សុំ​មិន​បញ្ចេញ​ឈ្មោះ​បាន​លើក​​ឡើង​ថា ការ​​អត្ថាធិប្បាយ​របស់​លោក​ សេង ប៊ុនវ៉េង មិន​ត្រឹម​ត្រូវ​ទេ ​ហើយ​ទំនង​ជា​ធ្វើ​ឡើង​ក្នុង​បំណង​បម្រើ​ឲ្យ​នយោបាយ​។ ឧត្តម​សេនីយ៍​រូប​នេះ​បាន​លើក​ឡើង​ទៀត​​ថា “នេះគ្រាន់​តែ​​ជា​ទស្សន​របស់​ អាចារ្យ​អេ ​ប៉ុណ្ណោះ។ កង​យោធពល​ខេមរភូមិន្ទ​មិន​អាច​​ធ្វើ​អ្វី​ដូច​គាត់​​​ព្យាករ​ទុក​បាន​នោះ​ទេ​”។

លោក​  ផៃ  សីុផាន  អ្នក​នាំពាក្យ​ទីស្ដី​ការ​គណៈរដ្ឋ​មន្ត្រី​បាន​មាន​ប្រសាសន៍​ថា ការ​អះអាង​របស់​លោក​ សេង  ប៊ុនវ៉េង គ្មាន​ហេតុ​ផល​​ទាល់​តែ​សោះ ហើយ​យោ​ធា​គ្មាន​ហេតុ​ផល​​អ្វី​​ត្រូវ​ឆ្លើយ​តប​នោះ​ទេ​​ ហើយ​បាន​អះ​អាង​ថា  ការ​លើក​ឡើង​បែប​នេះ​គឺ​គ្រាន់​តែ​ជា​ការ​ឃោសនា​ប៉ុណ្ណោះ​។ លោក​ថ្លែង​ថា “យោធា​នៅ​កម្ពុជា ​​គ្មាន​អំណាច​ដូច​យោធា​នៅ​ក្នុង​ប្រទេស​ថៃ​ទេ​។ ខ្ញុំ​​​​គិត​ថា  យោធា​មាន​អារិយធម៌​គ្រប់​គ្រាន់​មិន​​​ទៅ​ធ្វើ​រដ្ឋ​ប្រហារ​ឡើយ​ ហើយ​ខ្ញុំ​គិត​ថា អង្គ​ការ​​​​ក្រៅ​រដ្ឋាភិ​បាល​ទាំង​នោះ​កំពុង​ធ្វើ​ឲ្យ​យោធា​មាន​បញ្ហា ពួកគេចង់​ឃើញ​រដូវ​កាល​នេះ​ជួប​ឧបសគ្គ​ និង​ចង់បង្ខូច​លទ្ធផល​​បោះឆ្នោត​”។ លោក​ថ្លែង​​ទៀត​ថា  “អង្គ​ការ​ក្រៅ​រដ្ឋាភិ​បាល​ទាំង​នោះ​នឹង​​និយាយ​ថា ប្រជាពលរដ្ឋ​ភ័យ​ខ្លាចដល់ថ្នាក់​មិន​ហ៊ាន​ទៅ​បោះឆ្នោត​ ដើម្បី​ឲ្យ​រដ្ឋាភិបាល​ខូច​កេរ្តិ៍​ឈ្មោះ​”។

តែ​ទោះ​ជា​យ៉ាង​ណា​  លើក​ចុង​ក្រោយ​​​បង្អស់​ដែល​រថក្រោះ​របស់​កង​យោធពល​ខេមរភូមិន្ទ​ និង​កង​ទ័ព​វាយ​ប្រយុទ្ធ​គ្នា​តាម​ផ្លូវ​នានា​ក្នុង​រាជធានី​ភ្នំពេញ​ គឺ​កាល​ពី​១៦​ឆ្នាំ​មុន​ ដោយនៅ​ពេល​នោះ​កង​កម្លាំង​ដែល​មាន​ភក្ដីភាព​ចំពោះ​លោក ហ៊ុន សែន​ នាយក​រដ្ឋ​មន្ត្រី​ទី២នាពេល​នោះ ​បាន​ប្រយុទ្ធ​នឹង​កង​កម្លាំង​​ដែល​មាន​ភក្ដី​ភាព​ចំពោះ​​ព្រះ​អង្គម្ចាស់ ​​នរោត្តម​ រណឫទ្ធិ​ នាយក​រដ្ឋ​មន្ត្រី​ទី១​នាពេល​នោះ​ ឈាន​ទៅ​ដល់​ការ​ទម្លាក់​ព្រះ​អង្គម្ចាស់​ចេញ​ពី​អំណាច​ ហើយ​បាន​ធ្វើ​ឲ្យ​លោក​ ហ៊ុន សែន និង​គណបក្ស​ប្រជាជន​កម្ពុជា​​​ដែល​​​ជា​​​បក្ស​​​​កាន់​អំណាច​របស់​លោក​​មាន​ឥទ្ធិ​ពល​កាន់​តែ​ខ្លាំង​ចាប់​តាំង​ពី​ពេល​នោះ​មក។

នៅ​មុន​ពេល​នោះ​ ពោល​គឺ​ក្រោយ​ពី​គណបក្ស​ប្រជាជន​កម្ពុជា ទទួល​​បរាជ័យ​ក្នុង​ការ​បោះ​ឆ្នោត​ក្នុង​ឆ្នាំ​១៩៩៣ មនុស្ស​មួយ​ក្រុមនៅ​ក្នុង​គណ​​​បក្ស​នេះ​បាន​គំរាមវិល​​ត្រឡប់​ទៅ​កាន់​អាវុធ​វិញ និង​បង្កើត​តំបន់​អបគមន៍​មួយ​នៅ​ភូមិភាគ​បូព៌ានៃ​ប្រទេស​កម្ពុជា​។ ការ​គំរាម​នោះ​បាន​ឈាន​ទៅ​ដល់​ការ​បង្កើត​រដ្ឋាភិបាល​មួយ​​​ដែល​​​​មាន​នាយក​រដ្ឋ​មន្ត្រី​ពីររូប​ គឺ​ព្រះ​អង្គម្ចាស់​នរោ​​​ត្តម​ រណឫទ្ធិ​ ជានាយក​រដ្ឋ​មន្ត្រី​ទី១ និង​លោក ហ៊ុន សែន​ ជានាយក​រដ្ឋ​មន្ត្រី​ទី២។

លោក​ មឿន តុលា ប្រធានកម្ម​វិធីការ​ងារ​នៅ​​​​មជ្ឈមណ្ឌល​អប់រំ​ច្បាប់​សម្រាប់​សហ​​​គមន៍​​ បាន​មាន​ប្រសាសន៍​ថា ក្រៅ​ពី​សេចក្ដី​ថ្លែង​ការណ៍​​​​ចេញ​ពី​យោធា​បដិ​សេធ​ការ​​ផ្សាយ​តាម​វិទ្យុ​នេះ​ រដ្ឋាភិបាល​ក៏គួរ​តែ​ចាត់​វិធាន​ការ​បញ្ឈប់​ការ​បំពាន​ច្បាប់​បោះឆ្នោត​ដែរ។ លោក​​បាន​មាន​ប្រសាសន៍​ថា “គ.ជ.ប. និង​ក្រសួង​ព័ត៌មាន​ក៏​គួរ​តែ​ធ្វើ​អ្វី​ម្យ៉ាង​​​ដែរ។ពួក​គេ​បាន​ហាម​ប្រាម​ការ​ចាក់ផ្សាយ​មួយ​ចំនួន​ចេញ​ពី​កម្មវិធី​ផ្សាយ​ជា​ខេមរ​ភាសា​បន្ត​ផ្ទាល់​ពី​វិទ្យុ​បរទេស​រួច​ទៅ​ហើយ​ ដូច្នេះ​ហេតុ​អ្វី​បាន​​​​ជា​បណ្ដោយ​ឲ្យ​មាន​ស្ថានភាព​នេះ​បង្ក​​ភាព​​​​តាន​តឹង​នៅ​ក្នុង​ប្រទេស​នេះទៅ​វិញ​?”។

លោក​បាន​មាន​ប្រសាសន៍​ទៀត​ថា “ខ្ញុំ​សុំ​សួរ​ថា ហេតុអ្វី​បាន​ជា​គ.ជ.ប. ចាត់​វិធាន​ការ​​​យឺត​យ៉ាវម៉្លេះ​។គ.ជ.ប. ត្រូវ​តែ​ចាត់​វិធាន​ការ​លើ​ការ​បំពាន​ច្បាប់ មិន​ថា [ការ​បំពាន​ច្បាប់​ទាំង​នោះ​ធ្វើ​ឡើង​ដោយ​] ស្ថាប័ន​គាំទ្រ​គណ​​​បក្ស​​​​ប្រជាជន​កម្ពុជា​នោះ​ទេ​ [បើ​មិន​ដូច្នោះ​ទេ] វា​មិន​មែន​ជា​រឿង​ល្អ​ឡើយ​សម្រាប់​គ.ជ.ប.​”។

កាលពី​ខែ​មិថុនា​ ក្រសួង​ព័ត៌មាន​បាន​ដាក់​បម្រាម​លើស្ថានីយ​វិទ្យុ​ផ្សាយ​បន្ត​ផ្ទាល់​ពី​វិទ្យុ​បរទេស​ទាំង​អស់​មិន​ឲ្យ​ចាក់​ផ្សាយ​កម្មវិធី​ជា​ខេមរភាសា​ អំឡុង​រដូវ​ធ្វើ​យុទ្ធនាការ​ឃោសនា​​​​បោះឆ្នោត​ ដើម្បី​ធានា​ឲ្យ​បាន​នូវ​អព្យាក្រឹត​ភាព​ ដោយ​គំរាម​ប្ដឹង​ស្ថានីយណា​ដែល​មិន​​​​អនុវត្ត​តាម​ មុន​ពេល​ដក​បម្រាម​នេះ​ចេញ​​​​វិញ​​​​យ៉ាង​រហ័ស​ដោយសារ​មាន​សម្ពាធ​ពី​អន្តរជាតិ​។

បន្ទាប់​ពី​ការ​ចាក់​ផ្សាយ​តាម​វិទ្យុ​អេប៊ី​​​ស៊ី​​​កាលពី​ថ្ងៃ​អង្គារ​ លោក​ ទេព​ នីថា អគ្គ​លេខា​​​ធិការ​នៃ​គណៈកម្មាធិការ​ជាតិ​រៀប​ចំ​ការ​បោះ​​​ឆ្នោត ​បាន​ថ្លែង​​​ថា  គណៈ​​​កម្មាធិការ​ជាតិ​រៀប​ចំ​ការ​បោះ​ឆ្នោត​នឹង​តាម​ឃ្លាំមើល​សកម្មភាព​វិទ្យុ​អេប៊ីស៊ី ដើម្បី​ “បញ្ឈប់​ការ​ចាក់ផ្សាយ​បទ​អត្ថាធិប្បាយ​បែប​នេះ និង​ដើម្បី​បញ្ឈប់​ការ​រំខាន​ដល់​ដំណើរការ​​បោះ​​​ឆ្នោត​”។ លោក​បាន​បញ្ជាក់​ជា​ថ្មី​​ម្តង​ទៀត​កាល​​​ពី​ម្សិលមិញ​ថា មន្ត្រី​របស់​លោក​កំពុង​តាម​ឃ្លាំ​មើល​​សកម្ម​ភាព​ស្ថានីយវិទ្យុ​អេប៊ីស៊ី​នៅ​ឡើយ​។ លោក​បាន​មាន​ប្រសាសន៍​ថា “ពេល​នេះ​យើង​កំពុង​ដោះស្រាយ​ករណី​នេះ​។ ខ្ញុំ​បាន​បញ្ជា​ឲ្យ​មន្ត្រី​គ.ជ.ប. ថតសំឡេង​​អត្ថាធិប្បាយ​ទាំង​អស់​របស់​គាត់​​ដែល​ចាក់​ផ្សាយ​នៅ​ថ្ងៃ​នេះ ហើយ​នៅ​ថ្ងៃ​ស្អែក​យើង​នឹង​ចាត់​វិធាន​​​ការ​ ឬ​ចេញ​សេចក្ដី​ថ្លែង​ការណ៍”។

លោក សុន ឆ័យ បាន​មាន​ប្រសាសន៍​ថា ការ​អះអាង​​របស់​លោក​ សេង ប៊ុន​វ៉េង មាន​គោល​បំណង​ស្រដៀង​គ្នា​ទៅ​នឹង​ការ​គំរាម​កំហែង​របស់​លោក ហ៊ុន​ សែន​ ធ្វើ​ឡើង​​​កាល​​​ពី​ដើម​ឆ្នាំ​នេះ​ថា សង្គ្រាម​ស៊ីវិល​​​​​នឹង​ផ្ទុះ​ឡើង ​ប្រសិន​បើ​គណបក្ស​ប្រឆាំង​ឈ្នះ​ការ​បោះ​​​ឆ្នោត​។លោក​ក៏​បាន​ព្រមាន​ដែរ​ថា  រដ្ឋ​ប្រហារ​​​​ក៏​ជា​ដំណឹង​អាក្រក់​ដែរសម្រាប់​គណបក្ស​កាន់​អំណាច។

លោក​បាន​មាន​ប្រសាសន៍​ថា “រដ្ឋាភិ​បាល​គួរ​តែ​ប្រុង​ប្រយ័ត្ន​ នៅ​ពេល​ពួក​គេ​ព្យាយាម​​​បង្កឲ្យ​មាន​ពាក្យ​ចចាម​អារ៉ាម​បែប​នេះ ​ពី​ព្រោះ​ពួក​គេ​អាច​នឹង​ខាត​បង់ ​ច្រើន​ដោយ​​​សារ​​​​តែ​ពួក​គេ​មាន​ទ្រព្យ​សម្បត្តិ​​យ៉ាង​ច្រើន។តើ​នឹង​មាន​អ្វី​កើត​ឡើង​ នៅ​ពេល​មានបញ្ហា​ទាំង​អស់​នេះ​?​ ប្រសិន​បើ​មាន​រដ្ឋ​ប្រហារ​ ពួក​គេ​នឹង​រង​ការ​បំផ្លិចបំផ្លាញ​ធ្ងន់ធ្ងរ”៕

ប្រែសម្រួល​ដោយ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស