34 C
Phnom Penh

លោក សម រង្ស៊ី ទាក់​​​ទាញ​​​មនុស្សជាង​​​ពីរម៉ឺន​​​នាក់​​​នៅ​​​ខេត្ត​សៀមរាប

ដោយ ឌឹ ខេមបូឌា ដេលី

បទវិភាគ

ក្រុង​​​សៀមរាប​​​/ក្រុងកំពង់ធំ-កាល​​​ពី​​​ថ្ងៃ​​​ម្សិលមិញ​​​ លោក សម រង្ស៊ី និង​​​លោក កឹម សុខា ​​​មេដឹក​​​នាំ​​​គណបក្ស​​​សង្គ្រោះ​​​ជាតិ​​​ បាន​​​ដឹក​​​នាំ​​​ការ​​​ដង្ហែ​​​ក្បួន​​​​​​ឃោស​​​​​​នា​​​បោះ​​​ឆ្នោត​​​ដែល​​​មាន​​​ការ​​​ចូល​​​​​​រួម​​​ពី​​​អ្នក​​​គាំទ្រ​​​ជា​​​ង​​​ពីរម៉ឺន​​​នាក់​​​តាម​​​ដង​​​ផ្លូវ​​​នានា​​​ក្នុង​​​ក្រុង​​​សៀម​​​រាប។ នេះ​​​ជា​​​ការ​​​ដង្ហែ​​​ក្បួន​​​ធំបំផុត​​​ទី២​​​របស់​​​គណបក្ស​​​នេះ​​​ ចាប់​​​តាំង​​​ពី​​​លោក សម រង្ស៊ី បាន​​​វិល​​​មក​​​ដល់​​​ប្រទេស​​​កម្ពុជា​​​វិញ​​​កាល​​​ពី​​​ថ្ងៃ​​​សុក្រ​​​។

លោក សម រង្ស៊ី និង​​​លោក កឹម សុខា មេដឹកនាំ​​​គណបក្ស​​​សង្គ្រោះ​​​ជាតិ​​​ ​​​ដឹក​​​នាំ​​​​​យុទ្ធនាការ​​​ឃោសនា​​​​​​បោះ​​​ឆ្នោត​​​ដែល​​​មាន​​​ការ​ចូលរួម​ពី​អ្នក​​​គាំទ្រ​​​ជាង​​​ពីរ​​​ម៉ឺន​​​នាក់​​​​​​​​​កាត់​​​តាម​ផ្លូវ​​​សំខាន់​​​ៗ​​​មួ​​​យ​​​ចំនួន​​​នៅ​​​កណ្ដាល​​​ក្រុង​​​សៀម​​​រាប​​​ កាល​​​ពី​​​ម្សិលមិញ​​​។ (Lisa Hornak)
លោក សម រង្ស៊ី និង​​​លោក កឹម សុខា មេដឹកនាំ​​​គណបក្ស​​​សង្គ្រោះ​​​ជាតិ​​​ ​​​ដឹក​​​នាំ​​​​​យុទ្ធនាការ​​​ឃោសនា​​​​​​បោះ​​​ឆ្នោត​​​ដែល​​​មាន​​​ការ​ចូលរួម​ពី​អ្នក​​​គាំទ្រ​​​ជាង​​​ពីរ​​​ម៉ឺន​​​នាក់​​​​​​​​​កាត់​​​តាម​ផ្លូវ​​​សំខាន់​​​ៗ​​​មួ​​​យ​​​ចំនួន​​​នៅ​​​កណ្ដាល​​​ក្រុង​​​សៀម​​​រាប​​​ កាល​​​ពី​​​ម្សិលមិញ​​​។ (Lisa Hornak)

ថ្លែង​​​នៅផ្សារ​​​​​​លើ​​​ធំថ្មី​​​ ដែល​​​ជា​​​ផ្សារ​​​ស្ថិត​​​នៅ ចំ​​​កណ្ដាល​​​ក្រុង​​​សៀម​​​រាប​​​ លោក សម រង្ស៊ី បាន​​​ប្រាប់​​​អ្នក​​​ចូល​​​រួម​​​ស្ដាប់​​​ថា ប្រជា​​​ជន​​​ខ្មែរ​​​ចាំ​​​បាច់​​​ត្រូវ​​​យក​​​អង្គរ​​​វត្ត​​​ពី​​​វៀតណាម​​​វិញ។ លោក សម រង្ស៊ី បាន​​​ថ្លែង​​​ថា“ យើង​​​ចាំ បាច់​​​​​​​ត្រូវ​​​តែ​​​លើក​​​តម្កើង​​​​​​ និង​​​ការ​​​ពារ​​​និមិត្ត​​​រូប​​​ជាតិ​​​យើង​​​​​​​​​ នោះ​​គឺ​​​ប្រាសាទ​​​អង្គរ​​​វត្ត​​​។ យើង​​​ចាំ​​​បាច់​​​ត្រូវ​​​យក​​​ប្រាសាទ​​​អង្គរវត្ត​​​ពី​​​វៀតណាម​​​វិញ”។

ក្រោម​​​កិច្ច​​​ព្រមព្រៀង​​​ជាមួយ​​​​​រដ្ឋាភិ​​​បាល​​​កម្ពុជា​​​ ​​ការ​​​លក់​​​សំបុត្រ​​​នៅ​​​បរិវេណ​​​ប្រាសាទ​​​អង្គរវត្ត​​​ គឺ​​​ស្ថិត​​​នៅ​​​ក្រោម​​​ការ​​​គ្រប់​​​គ្រង់​​​របស់​​​ក្រុមហ៊ុន​​​សូគីម៉ិច​​​របស់​​ធុរជន​​​មាន​​​ខ្នង​​​ក្រាស់​​​ម្នាក់​​​ គឺ​​​លោក សុខ គង់។ ​​​សារទូរលេខ​​​ការ​​​ទូត​​​សម្ងាត់​​​មួយ​​ក្នុង​​​ឆ្នាំ​​​២០០៧ដែល​​​ត្រូវ​​​បាន​​​ទម្លាយ​​​ដោយ​​​អង្គការ​​​ប្រឆាំង​​​​​​ការ​​​ណ៍​​​សម្ងាត់​​​​​​​​​ វីគីលីគ (Wikileaks) កាល​​​ពី​​​ឆ្នាំ​​​២០១១ បាន​​​ឲ្យ​​​​​​​​​ដឹងថា លោក សុខ គង់ បាន​​​វិល​​​ត្រឡប់​​​មក​​​ប្រទេស​​​កម្ពុជា​​​វិញ​​​ភ្លាម​​​ៗ​​ បន្ទាប់​​​ពី​​​ខ្មែរ​​​ក្រហម​​​បាន​​​ដួល​​​រលំ​​​ ហើយ​​​លោក​​​បាន​​​ក្លាយ​​​ជា​​​មហា​​​សេដ្ឋី​​​ដោយ​​​សារ​​​ការ​​​មាន​​​ទំនាក់​​​ទំនង​​​ពាណិជ្ជ​​​កម្ម​​​យ៉ាង​​​ជិត​​​ស្និទ្ធ​​​​​​ជា​​​មួយ​​​វៀតណាម​​​។

កាល​​​ពី​​​ថ្ងៃ​​​អង្គារ​​​ លោក សម រង្ស៊ី បាន​​​ទាក់​​​ទាញ​​​អ្នក​​​គាំទ្រ​​​ជាង​​​មួយ​​​ម៉ឺននាក់​​​ក្នុង​​​ការ​​​ប្រមូល​​​ផ្ដុំ​​​គ្នា​​​​​​នៅ​​​ក្រុង​​​បាត់ដំបង​​​។ ប៉ុន្តែ មន្ត្រី​​​គណ​​​បក្ស​​​សង្គ្រោះ​​​ជាតិ​​​បាន​ប៉ាន់​​​ប្រមាណ​​​ថា អ្នក​​​គាំទ្រ​​​បួនម៉ឺន​​​នាក់​​​បាន​​​ចេញ​​​មក​​​ចូល​​​រួម​​​នៅ​​​ក្នុង​​​ខេត្ត​​​បាត់​​​ដំបង​​​ និង​​​ប្រាំពីរ​​​ម៉ឺន​​​នាក់​​​នៅ​​​ក្នុង​​​ខេត្ត​​​សៀម​​​រាប​​​ កាល​​​ពីម្សិលមិញ។ លោក សម រង្ស៊ី​​​ក៏​​​បាន​​​ប្រាប់​​​អ្នក​​​ចូល​​​រួម​​​ស្ដាប់​​​ថា មនុស្ស​​​មួយ​​​លាន​​​នាក់​​​បាន​​​ចូល​​​រួមនៅ​​​​​​ក្នុង​​​ការ​​​ប្រមូល​​​ផ្ដុំគ្នា​​​​​​​​​​​​ក្នុង​​​រាជ​​​ធានី​​​ភ្នំពេញ​​​ កាល​​​ពី​​​ថ្ងៃ​​​សុក្រ​​​​​​ ខណៈ​​​អ្នក​​​សង្កេត​​​ការ​​​ណ៍​​​​​​ភាគ​​​ច្រើន​​​​​​​​​ប៉ាន់​​​ប្រមាណ​​​ថា មាន​​​​​​ចំនួន​​​ប្រហែល​​​១០​​​ម៉ឺននាក់​​​។

ប៉ុន្តែ មិន​​​ថា​​​យ៉ាង​​​ណា​​​ទេ លោក សម រង្ស៊ី ដែល​​​បាន​​​រស់​​​នៅ​​​ដោយ​​​ការ​​​និរទេស​​​ខ្លួន​​​អស់​​​រយៈ​​​ពេល​​​ជិត​​​បួន​​​ឆ្នាំ​​​​​​ដើម្បី​​​គេ​​​ច​​​ពី​​​ទោស​​​ជាប់​​​ពន្ធ​​​នាគារ​​​រយៈ​​​ពេល​​​១១​​​ឆ្នាំ​​​ ដែលរូប​​​លោក​​​អះអាង​​​ថា មាន​​​ហេតុផល​​​នយោបាយនោះ​​​ បាន​​​ទទួល​​​ការ​​​គាំទ្រ​​​យ៉ាង​​​ខ្លាំង​​​ ចាប់​​​តាំង​​​ពី​​​រូប​​​លោក​​​បាន​​​​​​វិល​​​មក​​​ដល់​​​ប្រទេ​​​សកម្ពុជា​​​វិញ​​​ បន្ទាប់​​​ពី​​​បាន​​​ទទួល​​​ការ​​​ព្រះ​​​រាជ​​​ទាន​​​លើក​​​លែង​​​ទោស​​​​​​​​​ពី​​​ព្រះ​​​មហាក្សត្រ​​​។

ពេល​​​នេះ​​​ លោក សម រង្ស៊ី គឺ​​​ជា​​​អ្នក​​​ដឹក​​​នាំ​​​​ការ​​​អំពាវ​​​នាវ​​​ឲ្យ​​​មាន​​​ការ​ផ្លាស់​​​ប្ដូរ​​​រដ្ឋាភិបាល​​​។ លោក​​​បាន​​​ថ្លែង​​​ទៅ​​​កាន់​​​ប្រជា​​​ជន​​​នៅ​​​ក្នុង​​​ក្រុង​​​​​​សៀមរាប​​​ថា “ យើង​​​ឆ្អែត​​​ហើយ​​​។ យើង​​​ហូប​​​​​​សម្ល​​​ម្ជូរ​​​យួន​​​​​​អស់​​​រយៈ​​​ពេល​​​៣០​​​ឆ្នាំ​​​មក​​​ហើយ​​​។ ពេល​​​នេះ​​យើង​​​ចាំ​​​បាច់​​​ត្រូវ​​​​​ហូប​​​សម្ល​​​កកូរ​​​ម្ដង”។ ការ​​​ថ្លែង​​​បែបលេងសើច​​​នេះ​​​​​​ បាន​​​ធ្វើ​​​ឲ្យ​​​អ្នក​​​ចូល​​​រួម​​​ស្ដាប់​​​​​​ផ្ទុះ​​​សំណើច​​​។

ក្រៅ​​​​​​ពី​​​ឈ្មោះ​​​ និង​​​រូប​​​សញ្ញា​​​គណបក្ស​​​ថ្មី​​​អ្នក​​​ចូល​​​រួម​​​ស្ដាប់​​​ដែល​​​មាន​​​ចំនួន​​​កាន់​​​តែ​​​ច្រើន​​​ និង​​​ការ​​​បង្ហាញ​​​​​​ជា​​​ប្រចាំ​​​នូវ​​​​​​សាមគ្គីភា​​​ព​​​​​​ជាមួយ​​​​​​លោក កឹម សុខា នោះ​​​ លោក សម រង្ស៊ី បាន​​​គាស់​​​រំលើង​​​នូវ​​​អ្វី​​​ដែល​​​រូប​​​លោក​​​និយាយ​​​មិន​​​ទាន់​​​ចប់​​​ក្រោយ​​​យុទ្ធនាការ​​​ឃោសនា​​​បោះ​​​ឆ្នោត​​​ឆ្នាំ​​​២០០៨​​​ ពេល​​​គណបក្ស​​​ សម រង្ស៊ី ទទួល​​​បាន​​​អាសនៈ​​​សភាចំនួន​​​២៦​​​។

រាល់​​​ការ​​​ថ្លែង​​​របស់​​​លោក​​​នៅ​​​ក្នុង​​​សប្ដាហ៍​​​នេះ​​​ គឺ​​​ចាប់​​​ផ្ដើម​​​​​​ជាមួយ​​​នឹង​​​ការ​​​ប្រកាស​​​ថា“ ខ្ញុំ គឺជា​​​ សម រង្ស៊ី” និង​​​ការ​​​​​​ប្រើ​​​ភាសា​​​បំផុស​​​ប្រជា​​​​ពល​​​រដ្ឋ​​​ឲ្យ​​​មាន​​​ស្មារតី​​​ជាតិ​​​និយម​​​ ជា​​​ពិសេស​​​​គឺ​​​ភាសា​​​ប្រឆាំង​​​វៀតណាម​​​ដែល​​​លោក​​​ចូល​​​ចិត្ត​​​​​​ប្រើ​​​​​​រាល់​​​ពេល​​​ឃោសនា​​​ម្ដង​​​ៗ​​​។  ប៉ុន្តែ អតីត​​​រដ្ឋ​​​មន្ត្រី​​​ក្រសួង​​​ហិរញ្ញវត្ថុ​​​ក្នុង​​​វ័យ​​​៦៤​​​ឆ្នាំ​​​រូប​​​នេះ ក៏​​​បាន​​​បញ្ចូល​​​បញ្ហា​​​សង្គម​​​ និង​​​បរិស្ថាន​​​គួរ​​​ឲ្យ​​​ព្រួយ​​​បារម្ភ​​​ជា​​​ច្រើន​​​ទៀត​​​​​​ទៅ​​​ក្នុង​​​សុន្ទរកថា​​​របស់​​​ខ្លួន​​​ផង​​​ដែរ​​​។

ជំនួស​​​ឲ្យ​​​ការ​​​និយាយ​​​ពី​​​ការ​​​កាត់​​​ដី​​​នៅ​​​តាម​​​បណ្ដោយ​​​​​​ព្រំដែន​​​​​​វៀតណាម​​​​​​ឲ្យ​​​ទៅ​ប្រទេស​​​​​វៀតណាម​​​ដោយ​​​រដ្ឋាភិបាល​​​​​​លោក ហ៊ុន សែន ដែល​​​ជា​​​​​​​​​លទ្ធផល​​​បាន​​​ធ្វើ​​​ឲ្យ​​​មាន​​​ការ​​​ផ្ដន្ទា​​​ទោស​​​​រូប​​​លោក​​​ ក្នុង​​​ឆ្នាំ​​​២០០៩ និ​​​ង​​​ឆ្នាំ២០១០​​​​​នោះ​​​ លោក សម រង្ស៊ី បាន​​​និង​​​កំពុង​​​​​​រិះ​​​គន់​​​​​​ការ​​​ផ្ដល់​​​សម្បទាន​​​​​​​​​ដី​​​សេដ្ឋកិច្ច​​​​​​ទ្រង់​​​ទ្រាយ​​​ធំ​​​ពី​​​សំណាក់​​​រដ្ឋាភិបាល​​​ និង​​​ការ​​​កាប់​​​បំផ្លាញ​​​ព្រៃ​​​ឈើដែល​​​កំពុង​​​មាន​​​ការ​​​កើន​​​ឡើង​​​យ៉ាង​​​ខ្លាំង​​​​​​។

លោក​​​បាន​​​ថ្លែង​​​ទៅ​​​កាន់​​​​​​អ្នក​​​ចូល​​​រួម​​​ស្ដាប់​​​រាប់​​​រយ​​​នាក់​​​​​​នៅ​​​ក្រុង​​​កំពង់​​​ធំ​​​ កាល​​​ព​​​ី​​​ម្សិលមិញ​​​ថា “ ប្រជា​​​ជន​​​កំពុង​​​បាត់​​​បង់​​​ដី​​​ធ្លី និង​​​ផ្ទះ​​​សម្បែង​​​ ហើយ​​​ប្រសិន​​​បើ​​​យើង​​​ក្រឡេក​​​មើលទៅ​​​​​​ព្រៃ​​​​​​ឈើ​​​​​​វិញ​​​ ឃើញ​​​ថា ពួក​​​គេ​​​បាន​​​កាប់​​​បំផ្លាញ​​​អស់​​​​​​​​​ហើយ”។ អ្នក​​​ចូល​​​រួម​​​ស្ដាប់​​​​​​បាន​​​​​​ហ៊ោ​​​ជាការ​​​សម្ដែង​​​ការ​​​គាំទ្រ​​​ចំពោះ​​​ការ​​​លើក​​​ឡើង​​​នេះ​​​។ លោក សម រង្ស៊ី បាន​​​ថ្លែង​​​បន្ត​​​ថា “ យើង​​​មិន​​​យល់​​​ស្រប​​​នឹង​​​ទង្វើ​​​នេះ​​​ទេ​​​។ យើង​​​ត្រូវ​​​បណ្ដេញ​​​វៀតណាម​​​ចេញ​​​ ហើយ​​​យើង​​​នឹង​​​ប្រមែប្រមូល​​​ទ្រព្យ​​​សម្បត្តិ​​​ទាំង​​​ប៉ុន្មាន​​​របស់​​​យើង​​​មកវិញ”។

ហើយ​​​ដើម្បី​​​លួង​​​ចិត្ត​​​អ្នក​​​បោះ​​​ឆ្នោត​​​វ័យ​​​ក្មេង​​​ដែល​​​កំពុង​​​កើន​​​ឡើង​​​ច្រើន​​​​​​ និង​​​ដែល​​​បាន​​​នាំ​​​គ្នា​​​មក​​​ចូល​​​រួម​​​ដង្ហែ​​​ក្បួន​​​ឃោសនា​​​តាម​​​ទោចក្រ​​​ក្រយាន​​​យន្ត​​​ជាមួយ​​​លោក សម រង្ស៊ី ការ​​​បង្កើត​​​ការ​​​ងារ​​​ក៏​​​ត្រូវ​​​បាន​​​លើក​​​ឡើង​​​ក្នុង​​​សុន្ទរកថា​​​របស់​​​លោក​​​ដែរ​​​។

លោក សម រង្ស៊ី បាន​​​ថ្លែង​​​​​​ទៅ​​​កាន់​​​អ្នក​​​គាំ​​​ទ្រ​​​គណបក្ស​​​សង្គ្រោះ​​​ជាតិ​​​នៅ​​​ក្រុង​​​បាត់​​​ដំបង​​​នៅ​​​​​​ថ្ងៃ​​​អង្គារ​​​ថា “ ខ្ញុំ​​​មើល​​​ឃើញ​​​ថា សេដ្ឋកិច្ច​​​​​​របស់​​​លោក ហ៊ុន សែន កំពុង​​​ស្ថិត​​​នៅ​​​ក្នុង​​​ផ្លូវ​​​ខុស​​​ហើយ​​​​​​​​​​​​​​​​​​​​​។ ប្រជា​​​ជន​​​កម្ពុជា​​​គ្មាន​​​ការ​​​ងារ​​​ធ្វើ​​​ទេ​​​ ហើយ​​​បាន​​​នាំ​​​គ្នា​​​ធ្វើ​​​ចំណាក​​​ស្រុក​​​ទៅ​​​កាន់​​​ប្រទេស​​​ថៃ​​។ ខ្ញុំ​​​បាន​​​​​​ធ្វើ​​​ការ​​​ទំនាក់​​​ទំនង​​​ជា​​​មួយ​​​​​[ធុរជន​] ​​អន្តរជាតិ​​​ជាន់​​​ខ្ពស់​​រួចហើយ ហើយ​​​ខ្ញុំ​​​ធានា​​​ថា ខ្ញុំនឹង​​​នាំ​​​ក្រុមហ៊ុន​​​អន្តរជាតិ​​​ធំៗ​​​ដែល​​​មាន​​​ដើម​​​ទុន​​​ បច្ចេកវិទ្យា និង​​​ជំនាញ​​​ខ្ពស់មក​​​បើក​​​រោង​​​ចក្រ​​​​​​ដើម្បី​​​បង្កើត​​​ការ​​​ងារ​​​សម្រាប់​​​យុវជន​​​ខ្មែរ​​​នៅ​​​ក្នុង​​​ប្រទេស​​​កម្ពុជា”។

លោក សម រង្ស៊ី ដែល​​​មាន​​​សម្បុរខ្មៅ​​​ជាង​​​ពេល​​​​​​លោក​​​មក​​​ដល់​​​កម្ពុជា​​​​​​កាល​​​ពី​​​ប្រាំមួយ​​​ថ្ងៃ​​​មុន​​​ នឹង​​​ធ្វើ​​​យុទ្ធនាការ​​​រយៈ​​​ពេល​​​ពីរថ្ងៃ​​​ទៀត​​​នៅ​​​តាម​​​បណ្ដាខេត្ត​​​ឲ្យ​​​បាន​​​មុន​​​ថ្ងៃ​​​សៅរ៍ ពេល​​​យុទ្ធនាការ​​​ឃោសនា​​​បញ្ចប់​​​រយៈ​​​ពេល​​​មួយ​​​ថ្ងៃ​​​​​​មុន​​​ថ្ងៃ​​​បោះ​​​ឆ្នោត​​​។ ថ្ងៃ​​​នេះ លោក សម រង្ស៊ី និង​​​លោក កឹម សុខា គ្រោង​​​ឈប់​​​សំចត​​​នៅ​​​ខេត្ត​​​ស្វាយរៀង​​​ និង​​​ខេត្ត​​​ព្រៃវែង​​​ ហើយ​​​នឹង​​​បន្ត​​​នៅ​​​ថ្ងៃ​​​សុក្រ​​​ក្នុង​​​ខេត្ត​​​កំពង់​​​ចាម​​​ មុន​​​ពេល​​​វិល​​​ត្រឡប់​​​មក​​​ចូល​​​រួម​​​ក្នុង​​​ការ​​​ប្រមូល​​​ផ្ដុំ​​​គ្នា​​​លើក​​​ចុង​​​ក្រោយ​​​នៅ​​​រាជ​​​ធានី​​​ភ្នំពេញ​​​ក្នុង​​​ថ្ងៃ​​​ដដែល​​​នោះ​​​៕

ប្រែសម្រួលដោយ ភួន ច័ន្ទសេរីវុធ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស