ការនិយាយឡកឡាយដាក់គ្នារវាងអ្នកគាំទ្រគណបក្សប្រជាជនកម្ពុជា និងអ្នកគាំទ្រគណបក្សសង្គ្រោះជាតិបានប្រែក្លាយទៅជាអំពើហិង្សាកាលពីម្សិលមិញ ខណៈអ្នកគាំទ្រមកពីគណបក្សទាំងពីរបានប៉ះទង្គិចគ្នានៅខណ្ឌប្ញស្សីកែវ ដោយបណ្តាលឲ្យមន្ត្រីនគរបាលម្នាក់រងរបួសក្បាលដោយសារគេគប់ដុំថ្មមកត្រូវ។
ការប៉ះទង្គិចគ្នានេះបានកើតឡើងមួយថ្ងៃ បន្ទាប់ពី យុវជន ហែម វុត្ថា អាយុ២១ឆ្នាំ ដែលជាអ្នកគាំទ្រគណបក្សសង្គ្រោះជាតិបានចូលសម្រាកនៅមន្ទីរពេទ្យកាលពីយប់ថ្ងៃអង្គារ បន្ទាប់ពីរូបគេរងការវាយប្រហារដោយដំឥដ្ឋចំក្បាលផ្នែកខាងក្រោយក្នុងហេតុការណ៍ប៉ះទង្គិចគ្នាមួយនៅខណ្ឌមានជ័យ។
លោក ខាំ ហ៊ុន អាយុ៥៣ឆ្នាំ នាយរងប៉ុស្តិ៍បានចាកចេញដោយមានស្នាមរងរបួសនៅលើថ្ងាសកាលពីម្សិលមិញ បន្ទាប់ពីមានការឈ្លោះប្រកែកគ្នាមួយរវាងស្ត្រីវ័យក្មេងពីរនាក់ដែលជាអ្នកគាំទ្រគណបក្សដ៏ស្មោះស្ម័គ្រនៅក្នុងខណ្ឌប្ញស្សីកែវ។
កញ្ញា ស៊ុន ហារ៉ានី អាយុ២៣ឆ្នាំជាស្ត្រីវ័យក្មេងម្នាក់ក្នុងចំណោមស្ត្រីវ័យក្មេងដែលស្មោះស្ម័គ្រនឹងគណបក្សប្រជាជនកម្ពុជានោះ បាននិយាយថា ក្បួនដង្ហែរបស់អ្នកធ្វើយុទ្ធនាការឃោសនារបស់គណបក្សសង្គ្រោះជាតិបានធ្វើដំណើរឆ្លងកាត់សង្កាត់ច្រាំងចម្រេះ២ ដែលជាសង្កាត់ពោរពេញទៅដោយការតុបតែងស្លាកសញ្ញារបស់គណបក្សប្រជាជនកម្ពុជា និងមានបងប្អូនខ្មែរអីុស្លាមជាច្រើនរស់នៅ ហើយនៅពេលនោះអ្នកគាំទ្រគណបក្សប្រឆាំងបានញុះញង់ឲ្យមនុស្សជាច្រើននិយាយពាក្យថា “ យួន” ។
កញ្ញា ស៊ុន ហារ៉ានី បានរៀបរាប់ថា នៅពេលនាង និងអ្នកគាំទ្រគណបក្សសង្គ្រោះជាតិដែលគេមិនស្គាល់ បានឈ្លោះប្រកែកគ្នានៅលើផ្លូវខាងមុខប៉ុស្តិ៍នគរបាលសង្កាត់ច្រាំងចម្រេះ២ នៅពេលនោះមានមនុស្សជាច្រើនបានប្រមូលផ្តុំគ្នា ហើយមានវត្ថុផ្សេងៗបានចាប់ផ្តើមហោះឡើងពាសពេញទីនោះដោយមានវត្ថុមួយបានហោះទៅត្រូវក្បាល លោក ខាំ ហ៊ុន ខណៈលោកមានបំណងចូលទៅជួយធ្វើអន្តរាគមន៍។
លោក ខាំ ហ៊ុន បាននិយាយនៅប៉ុស្ដិ៍នគរបាលសង្កាត់ ខណៈលោកកំពុងព្យាបាលរបួសស្រាលនៅលើក្បាលរបស់លោក កាលពីល្ងាចម្សិលមិញថា “ ខ្ញុំបានព្យាយាមចូលទៅឃាត់ស្ត្រីវ័យក្មេងទាំងពីរនាក់ឲ្យឈប់ឈ្លោះប្រកែកគ្នា ប៉ុន្តែ ពួកគេមិនស្តាប់ឡើយ”។ លោកបាននិយាយបន្ថែមថា “ មានដបទឹកសុទ្ធត្រូវគេគប់មក ហើយបន្ទាប់មកមានដំុថ្មមួយដុំបានហោះមកត្រូវក្បាលខ្ញុំ។ ខ្ញុំមិនដឹងថា ដុំថ្មនោះហោះមកពីទីណានោះទេ”។ បន្ទាប់ពីហេតុការណ៍ប៉ះទង្គិចគ្នាបានកើតឡើង អ្នកគាំទ្រគណបក្សសង្គ្រោះជាតិបានចាកចេញពីកន្លែងកើតហេតុភ្លាមៗ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា លោកមិនដឹងពីហេតុការណ៍ដែលបានកើតឡើងនោះឡើយ ប៉ុន្តែ អ្នកគាំទ្រគណបក្សរបស់លោកត្រូវបានអប់រំយ៉ាងល្អឲ្យដឹងពីគ្រោះថ្នាក់នៃការប្រើពាក្យថា យួន ដែលជាពាក្យរិះគន់ដ៏ធ្ងន់ធ្ងរនោះ។ លោកបានមានប្រសាសន៍ថា “ រាល់ថ្ងៃមុនពេលក្បួនយុទ្ធនាការឃោសនារបស់យើងបានចាប់ផ្តើម យើងបានណែនាំអ្នកគាំទ្ររបស់យើងកំុឲ្យប្រើពាក្យនេះ ពីព្រោះយើងដឹងថា អាចនឹងមានគ្រោះថ្នាក់”។
យុវជន វុត្ថា ដែលឥឡូវមានស្នាមថ្នេរលើក្បាលចំនួនបួនថ្នេរបានអះអាងថា បានចូលរួមជាមួយសកម្មជនរបស់គណបក្សសង្គ្រោះជាតិមួយក្រុមដែលបាននាំគ្នាដង្ហែក្បួនយ៉ាងប្រញាប់ប្រញាល់ទៅកាន់ផ្លូវលេខ២ ក្នុងខណ្ឌមានជ័យ បន្ទាប់ពីបានទទួលដំណឹងថា យុវជនរបស់គណបក្សប្រជាជនកម្ពុជាបានវាយដំអ្នកគាំទ្រគណបក្សប្រឆាំង នៅក្នុងការប៉ះទង្គិចគ្នាកាលពីថ្ងៃអង្គារ។
វុត្ថា បានលើកឡើងថា “ យើងបានជិះម៉ូតូរបស់យើងទៅទីនោះដែលមានអ្នកគាំទ្រសរុបប្រហែល៥០នាក់ ហើយបានឃើញអ្នកគាំទ្ររបស់គណបក្សប្រជាជនកម្ពុជាបួនទៅប្រាំនាក់កំពុងវាយតប់គ្នាជាមួយអ្នកគាំទ្រគណបក្សសង្គ្រោះជាតិចំនួនបីនាក់”។ វុត្ថាបាននិយាយបន្ថែមថា “ យើងបានទៅជួយ ប៉ុន្តែ មានកងរាជអាវុធហត្ថបានឃាត់ពួកយើងមិនឲ្យចូលទៅកាន់កន្លែងប៉ះទង្គិចគ្នានោះឡើយ។ ពួកគេបានឈរជាជួរ ហើយបានរុញយើងឲ្យទៅឆ្ងាយ ប៉ុន្តែ ពួកគេមិនបានបញ្ឈប់ការប៉ះទង្គិចនោះឡើយ”។
យុវជន វុត្ថា បាននិយាយបន្តទៀតថា អ្នកគាំទ្រគណបក្សសង្គ្រោះជាតិចំនួនបីនាក់បានរកផ្លូវរត់ចូលទៅក្នុងវត្ត ដើម្បីសុវត្ថិភាព ប៉ុន្តែ នៅពេលខ្ញុំជិះម៉ូតូបកក្រោយ ដើម្បីចាកចេញ នៅពេលនោះមានដុំថ្មបានហោះមកត្រូវផ្នែកខាងក្រោយក្បាលរបស់ខ្ញុំ ហើយបានធ្វើឲ្យខ្ញុំដួលទៅលើដី។មន្ត្រីកងរាជអាវុធហត្ថ គឺបានតែឈរមើលប៉ុណ្ណោះ”។
លោក ស៊ន ផានិត ជាសន្តិសុខសង្កាត់ចាក់អង្រែលើ ដែលកំពុងបំពេញការងារនៅការិយាល័យរបស់គណបក្សប្រជាជនកម្ពុជា និងដែលបានឃើញការប៉ះទង្គិចគ្នាបាននិយាយថា អ្នកគាំទ្ររបស់គណបក្សសង្គ្រោះជាតិបានចាប់ផ្តើមការវាយប្រហារនេះនៅថ្ងៃអង្គារ។ លោកបាននិយាយថា “ ពួកគេបានជិះម៉ូតូសំដៅមកយើង ហើយបានស្រែកពាក្យថា “ យួន” ។លោកបានបន្តថា “ បន្ទាប់ពីការប៉ះទង្គិចគ្នាបានផ្ទុះឡើងភ្លាមៗនោះ មានអ្នកគាំទ្រគណបក្សសង្គ្រោះជាតិប្រមាណ៤០០ទៅ៥០០នាក់បានជិះម៉ូតូមកដល់”។
លោក ជំុ សាវុធ នាយប៉ុស្តិ៍សង្កាត់ចាក់អង្រែលើដែលបានលើកឡើងពីហេតុការណ៍ស្រដៀងនឹងលោក ផានិត បានលើកឡើងថា ប្រសិនបើគ្មានអន្តរាគមន៍របស់កងរាជអាវុធហត្ថនោះទេ ម៉េ្លះមនុស្សជាច្រើនអាចបាត់បង់ជីវិតទៅហើយ។ លោកមានប្រសាសន៍ថា “ យើងមាននគរបាលប៉ុស្តិ៍តែមួយក្រុមតូចប៉ុណ្ណោះ ហេតុដូច្នេះពួកគេ [ កងរាជអាវុធហត្ថ] ត្រូវតែឃាត់ក្រុមអ្នកគាំទ្ររបស់គណបក្សសង្គ្រោះជាតិមិនឲ្យចូលទៅជួយក្រុមអ្នកគាំទ្រមួយក្រុមតូចនោះ បើមិនដូច្នោះទេនឹងមានអ្នករងរបួស និងអ្នកស្លាប់ជាច្រើនមិនខាន”៕
ប្រែសម្រួលដោយ ស៊ា ស៊ុយឈាង