លោក​ សម រង្ស៊ី មេដឹក​នាំបក្ស​ប្រឆាំងនិយាយ​ពី​យុត្តិធម៌ និង​ការ​បាត់​ប​ង់​ទឹកដី​នៅ​ខេត្ត​ពីរ​ជាប់​ព្រំដែន

ក្រុង​ស្វាយរៀង/ក្រុង​ព្រៃវែង-រយៈ​ពេល​​​​បួន​ឆ្នាំ​ បន្ទាប់ពី​លោក​ត្រូវ​បាន​ផ្ដន្ទា​ទោស​ឲ្យ​ជាប់​ពន្ធនាគារ​ពី​បទ​ដក​បង្គោល​តម្រុយ​ព្រំដែន​​​​ជាមួយ​ប្រទេស​វៀតណាម​នៅ​ក្នុង​ខេត្ត​ស្វាយរៀង​ កាលពី​ម្សិលមិញ​ លោក​ សម រង្ស៊ី ប្រធាន​គណបក្ស​សង្គ្រោះ​ជាតិ​បាន​ត្រឡប់​ទៅ​ធ្វើ​យុទ្ធ​នាការ​ឃោសនា​បោះ​ឆ្នោត​​​នៅ​ក្នុង​ខេត្ត​នេះ​​ដែល​ពី​ដំបូង​​មាន​មនុស្ស​​​​តែ​៤០​នាក់​ ហើយ​បាន​កើន​ឡើង​ជា​បន្ត​បន្ទាប់​រហូត​ដល់​ប្រហែល​៦.០០០​នាក់។

នៅ​ក្នុង​សុន្ទរកថា​របស់​លោកនៅ​ក្នុង​ខេត្ត​​​​​​ដែលគេ​ធ្លាប់​ចាត់​ទុក​ថា ជា​ទឹក​ដី​របស់​គណ​បក្ស​ប្រជាជន​កម្ពុជា​នោះ​ លោក សម រង្ស៊ី​ មេ​ដឹក​នាំ​គណបក្ស​ប្រឆាំង​បាន​និយាយ​ពី​ទោស​ព្រហ្មទណ្ឌ​របស់​លោក​​កាលពី​ឆ្នាំ​២០០៩ ដែល​តុលាការ​បាន​ផ្ដន្ទា​ទោស​លោក​កំបាំង​មុខ​ឲ្យ​ជាប់​ពន្ធនាគារ​រយៈ​​ពេល​១២​ឆ្នាំ​ពី​បទ​ដក​បង្គោល​តម្រុយ​ព្រំដែន​​​​ចំនួន​ប្រាំមួយ​បង្គោល​ ហើយ​ក្នុង​នោះ​បើ​ទោះ​​​ជា​មាន​ព្រះ​រាជ​ទាន​លើក​លែង​ទោស​​​​ពី​ព្រះ​មហា​ក្សត្រ​ក៏​ដោយ​ ក៏​នៅ​តែ​រារាំង​រូប​លោក​មិន​ឲ្យ​ឈរ​ឈ្មោះ​ជា​បេក្ខជននៅ​​ក្នុង​ការ​បោះឆ្នោត​ជាតិ​​នៅ​ថ្ងៃ​អាទិត្យ​បាន​ឡើយ​។
លោក​ សម រង្ស៊ី បាន​និយាយ​ទៅ​កាន់​ក្រុម​អ្នក​គំា​ទ្រ​ថា “ ខ្ញុំ​ដឹង​ថា សាលា​ដំបូង​ខេត្ត​ស្វាយ​​រៀង​មិន​យុត្តិធម៌​ទេ”។​លោក​ក៏​បាន​ទទួល​ស្គាល់​ដែរថា ​កសិករ​ពីរ​នាក់ ត្រូវ​បាន​ផ្ដន្ទាទោស​ឲ្យ​ជាប់​ពន្ធ​នា​គារ​រយៈ​ពេល​ប្រាំបួន​​ខែ​ ពី​បទ​ល្មើស​ដូចគ្នា​នេះ​។

លោក​បាន​មាន​ប្រសាសន៍​ថា “ ប្រជា​ជន​ជា​ទី​ស្រលាញ់​ សូម​ក្រឡេក​មើល​កសិករ​ពីរ​នាក់​ គឺ​អ្នកស្រី មាស ស្រី និង​លោក​ ព្រំ ជា គឺ​ពួក​​​គាត់​គ្មាន​កំហុស​សោះ​។ ពួក​គាត់​គ្រាន់​តែ​ការពារ​ដី​​របស់​ខ្លួន​ប៉ុណ្ណោះ​ ប៉ុន្តែ​តុលាការ​បាន​ផ្តន្ទា​ពួក​គាត់​ឲ្យ​ជាប់​ពន្ធនាគារ​”។

ពេលនោះ​លោក សម រង្ស៊ី បាន​ធ្វើ​ការ​ប្រៀប​ធៀប​ជាមួយ​រឿង​ក្ដី​មួយ​ទៀត​ ដែល​លោក​បាន​ចាត់​ទុក​ថា អយុត្តិធម៌ ប៉ុន្តែ​សម្រាប់​​ហេតុផល​ផ្សេង​ គឺករណី​របស់​លោក​ ឈូក​ បណ្ឌិត​។ ថ្មីៗ​នេះ​អតីត​អភិបាល​ក្រុង​បាវិត​រូប​​​នេះ​ត្រូវ​បាន​ផ្ដន្ទាទោស​កំបាំង​មុខ​ឲ្យ​ជាប់​ពន្ធនា​​គារ​រយៈ​ពេល​១៨​ខែ​ពី​បទ​បាញ់​កម្មការិនី​រោងចក្រ​ ដែល​ធ្វើ​ការ​តវ៉ា​បី​នាក់​ឲ្យ​រង​របួស​កាលពី​ឆ្នាំ​មុន​ ប៉ុន្តែ​នគរបាល​និយាយ​ថា ពួក​គេ​មិន​អាច​ស្វែង​រក​ចាប់​ខ្លួន​គាត់​ដាក់​ពន្ធនា​គារ​បាន​ឡើយ​។

មេដឹកនាំ​គណបក្ស​សង្គ្រោះ​ជាតិ​រូប​នេះ​បាន​មាន​ប្រសាសន៍​ថា“ ប៉ុន្តែ​ ចុះ​លោក​ ឈូក​ បណ្ឌិត​ វិញ​ឬ​មិន​ថា គាត់​ជា​នរណា​ឡើយ​ ដែល​​​បាន​បាញ់​កម្មករ​នោះ​ តែ​គាត់​នៅ​មាន​សេរី​ភាព​។ វា​អយុត្តិធម៌​បែប​នេះ​”។

លោក សម រង្ស៊ី ក៏​បាន​និយាយ​ដូច​មិន​សូវ​មាន​ជំនឿ​ក្នុង​ចិត្ត​​អំពី​ប្រធាន​បទ​មួយ​ក្នុង​ចំណោម​ប្រធាន​បទ​ដែល​លោក​ពេញចិត្ត​ និងជា​ប្រធាន​បទ​មួយ​ដែល​និយាយ​អំពី​​ការ​ផ្តន្ទា​ទោស​​លោក​​ពី​ដំបូង​នៅ​​សាលា​ដំបូង​ខេត្ត​​ស្វាយ​រៀង​​​​នោះ គឺ​ការ​ទន្ទ្រាន​យក​ទឹក​ដី​កម្ពុជា​ពី​សំណាក់​ប្រទេស​វៀតណាម​។

ដោយ​ប្រើ​ពាក្យ​ប្រមាថ​ចំពោះ​ជន​ជាតិ​វៀតណាម​ លោក​​មាន​ប្រសា​សន៍​ថា “ នៅ​​សល់​តែ​បី​ថ្ងៃ​ទៀត​ប៉ុណ្ណោះ​ដល់​ថ្ងៃ​បោះ​ឆ្នោត​​​ហើយ​… ខ្ញុំ​​​នឹង​ប្រមូល​យក​ទ្រព្យ​សម្បត្តិ​​កម្ពុជា​​ ហើយ​ប្រគល់​​ឲ្យ​ប្រទេស​កម្ពុជា​វិញ​។ គេ​បាន​​​និយាយ​ថា យួន​មក​ច្រើន​ណាស់​ ហើយ​ដក​បង្គោល​ព្រំដែន​នៅ​ក្នុង​ទឹក​ដី​របស់​យើង​”។

លោក​បាន​មាន​ប្រសាសន៍​ថា“ បង​ប្អូន​​ដឹង​ថា យួន​បោះឆ្នោត​ឲ្យ​ ហ៊ុន សែន ដូច្នេះ​សូម​កុំ​ធ្វើ​តាម​យួន​បើ​សិន​បងប្អូនបោះ​ឆ្នោត​ឲ្យ​ ហ៊ុន សែន”។

ថ្លែង​ទៅ​កាន់​ប្រជាពលរដ្ឋ ពេល​នោះ​លោក​​បាន​ណែនាំ​កសិករ​ម្នាក់​ក្នុង​ចំណោម​កសិករ​ពីរ​នាក់​ គឺ​អ្នក​ស្រី​ មាស ស្រី ដល់​អ្នក​ចូល​រួម​។ ពេល​​កាន់ដៃ​លោក​យ៉ាង​ណែន អ្នក​ស្រី​បាន​អះអាង​ថា តុលា​ការ​ដែល​បាន​ផ្ដន្ទាទោស​អ្នក​ស្រី​ឲ្យ​ជាប់​ពន្ធនាគារ​នោះ​គឺ​ជា​អំពើ​ពុក​រលួយ ហើយ​ថា អ្នក​ស្រី​គ្រាន់​តែ​ការពារ​ដី​របស់​ខ្លួន​ប៉ុណ្ណោះ​នៅ​ពេល​ដែល​អ្នក​ស្រី​ដក​បង្គោល​តម្រុយ​ព្រំដែន​នោះ​។

គណបក្ស​សង្គ្រោះ​ជាតិ​កំពុង​​ប្រឹង​ប្រែង​ដណ្ដើម​អាសនៈ​ចំនួន​ប្រាំ​​ក្នុង​ខេត្ត​ស្វាយ​រៀង​​​ពី​គណបក្ស​ប្រជាជន​កម្ពុជា​ ដែល​បាន​ឈ្នះ​អាសនៈ​ទាំងអស់​​ក្នុង​ការ​បោះឆ្នោត​អាណត្តិ​មុន​ ហើយ​បើ​ទោះជា​មាន​ការ​ខិត​ខំ​ប្រឹង​ប្រែង​យ៉ាង​ខ្លាំង​ក្លា​ពីសំណាក់​អ្នក​គំាទ្រ​គណបក្ស​ប្រជាជន​កម្ពុជា​រាប់​ពាន់​នាក់​ ដើម្បី​បំបាត់​សំឡេង​​គណបក្ស​ប្រឆាំង​នៅ​ពេល​ដែល​ក្បួន​​របស់​ពួក​គេ​បាន​ឆ្លង​កាត់​យ៉ាង​ណា​ក៏​ដោយ ក៏​កាលពី​ម្សិល​មិញ​ ​ប្រជា​ពល​រដ្ឋ​នៅ​មាន​​ទឹក​ចិត្ត រឹង​មាំ គ្រាន់​តែ​មិន​សូវ​ឮ​សំឡេង​ប៉ុណ្ណោះ​។

នៅ​ក្នុង​ខេត្ត​ព្រៃវែង​ក្បែរ​នោះ​វិញ​ គណ​បក្ស​ប្រជាជន​កម្ពុជា​ទទួល​បាន​អាសនៈ​ប្រាំ​ពីរ​​ក្នុង​ចំណោម​១១ នៅ​ក្នុង​ការ​បោះឆ្នោត​ជាតិ​ឆ្នាំ​២០០៨ ប៉ុន្តែ​ប្រជាប្រិយភាព​របស់​លោក សម រង្ស៊ី នៅ​មាន​នៅ​ទីនោះ​ដែរ​ ដោយ​ប្រជា​​ពលរដ្ឋ​រាប់ពាន់​នាក់​បាន​រង់ចាំ​ការ​មក​ដល់​របស់​លោក​​យ៉ាង​អន្ទះសា​។

អ្នក​ស្រី ខេង គា អាយុ​៤៩​ឆ្នាំ​ជា​អ្នក​គាំទ្រ​​គណបក្ស​សង្គ្រោះ​ជាតិ​ ដែល​គ្មានដីធ្លី និង​​​ការ​​ងារ​ជឿជាក់​យ៉ាង​មុត​មាំ​ថា លោក​ សម រង្ស៊ី អាច​ផ្ដល់​ឲ្យ​នូវ​អ្វី​ ដែល​គណបក្ស​ប្រជាជន​កម្ពុជា​មិន​អាច​ធ្វើ​បាន​ថា “ យើង​ធុញទ្រាន់​ណាស់​”។ អ្នក​ស្រី​បាន​និយាយ​ថា លោក សម រង្ស៊ី អាច​នាំ​មក​នូវ​វិបុលភាព​ដល់​ពួក​យើង​។ យើង​បាន​ឃើញ​ហើយ​ថា ដី​ធ្លី​បាន​បាត់​បង់​ និង​រង​ការ​បំផ្លិច​បំផ្លាញ​”។

អ្នក​ស្រី​ ខេង គា ក៏​ដូច​ជា​អ្នក​គាំទ្រ​ដទៃ​ទៀត​​​ដែរ​ កាលពី​ម្សិលមិញ​មិន​បាន​ដឹង​អំពី​មូលនិធិ​សប្បុរសធម៌​ ដែល​បាន​បង្កើត​ឡើង​នៅ​សប្ដាហ៍​នេះ​ ដោយ​លោក​ឧបនាយក​រដ្ឋ​មន្ត្រី​ ស ខេង​ មក​ពី​គណបក្ស​ប្រជាជន​កម្ពុជា​ ដែល​បាន​សន្យា​ផ្ដល់​ប្រាក់​រាប់​សែន​ដុល្លារ​ដល់​​​​មនុស្ស​ចាស់​ អ្នក​ជំងឺ ស្ត្រី​ទើប​សម្រាល​កូននៅ​​ក្នុង​ខេត្ត​នេះ​ទេ។ អង្គការ​ឃ្លាំមើល​​​​ការ​បោះឆ្នោត​បាន​ហៅ​មូលនិធិ​សប្បុរស​ធម៌​ដោយ​​​​ការ​ផ្តល់​ប្រាក់​នៅ​នាទី​ចុង​ក្រោយ​​នេះ​ថា ស្រដៀង​ទៅ​នឹង​ការ​ទិញ​សន្លឹក​ឆ្នោត​។

ប៉ុន្តែ​អ្នកស្រី​ គា មិនបារម្ភ​ទេ។​អ្នក​ស្រី​បាន​​​និយាយ​ពី​ឱកាស​នៃការ​ធ្វើឲ្យ​​គណបក្ស​ប្រជា​ជន​កម្ពុជា​​ឈ្នះ​ឆ្នោត​​ក្នុង​ខេត្ត​នេះ​តាម​រយៈ​​​​មូល​និធិ​សប្បុរស​ធម៌​នេះ​ថា “ ខ្ញុំ​មិន​គិត​ថា គណបក្ស​នេះ​ឈ្នះ​ទេ​”។

អង្គុយ​នៅ​លើ​ម៉ូតូ​ស្គុប​ពី​ពណ៌​ផ្កាឈូក​​ក្នុង​ចំណោម​ប្រជាជន​រាប់​ពាន់​នាក់​ ដែល​រង់ចាំ​ការ​មក​ដល់​របស់​លោក​ សម រង្ស៊ី នោះ​ ​ ហ៊ុំ សុខ​ហៀង អាយុ​២២​ឆ្នាំ​ជា​កម្មការិនី​រោង​ចក្រ​​កាត់​ដេរ​ ដែល​នាង​នឹង​បោះឆ្នោត​លើក​​ដំបូង​​​ក្នុង​ការ​បោះ​ឆ្នោត​ជាតិ​នេះ ​និយាយ​ថា គណ​បក្ស​សង្គ្រោះ​ជាតិ​គឺ​ជា​ជម្រើស​ច្បាស់​​​លាស់។

កម្មការិនី​រូប​នេះ​បាន​និយាយ​ថា“ ខ្ញុំ​ចង់​ប្ដូរ​មេដឹកនាំ​បច្ចុប្បន្ន​។ បណ្តា​ប្រទេស​ផ្សេងៗ​ទៀត​បាន​អភិវឌ្ឍ​អស់​ហើយ​ ប៉ុន្តែ​ប្រទេស​កម្ពុជា​ខុស​ប្លែក​ពី​គេ​ ហើយ​ថា វា​ជា​កំហុស​របស់​គណ​បក្ស​ប្រជាជន​កម្ពុជា​។

លោក​ ឈឹម​ ប៊ុន​ថុន​ ​អាយុ​៥៨​ឆ្នាំ​ ដែល​មើល​ឃើញ​ច្បាស់​នៅ​ក្នុង​សម្លៀក​បំពាក់​ស៊ីវិល​​ក្នុង​ចំណោម​អាវ​និង​មួក​គណបក្ស​សង្គ្រោះ​ជាតិ​ពណ៌​ស​លាយ​ទឹក​សមុទ្រ​បាន​និយាយ​ថា លោក​មិន​ទាន់​សម្រេច​ចិត្ត​នៅ​ឡើយ​ទេ​។

លោក​បាន​និយាយ​ដល់​ការ​បោះ​ឆ្នោត​​​ជាតិ​ឆ្នាំ២០០៨​ថា“ ខ្ញុំ​បាន​បោះ​ឆ្នោត​ឲ្យ​អ្នក​ឈ្នះ​កាលពី​ពេល​មុន​”។ លោក​បាន​បន្ថែម​ថា “ ប៉ុន្តែ​ខ្ញុំ​ចង់​ស្ដាប់​អ្វី​ដែល​ [លោក ​សម រង្ស៊ី] និយាយ​ ខ្ញុំ​គ្រាន់​តែ​ចង់​បាន​អ្វី​ដែល​ត្រឹម​ត្រូវ​ប៉ុណ្ណោះ​ ខ្ញុំ​ចង់​បាន​យុត្តិធម៌”។

លោក​ សម រង្ស៊ី ​ថ្លែង​សុន្ទរកថា​មួយ​ទៀត​ទៅ​កាន់​ក្រុម​មនុស្ស​ ដែល​មាន​ចិត្ត​សប្បាយ​រីករាយ​នៅ​ក្នុង​សួន​ស្ថិត​នៅ​ចំ​កណ្ដាល​ទី​ប្រជុំ​ជន​ដែល​បន្ទាប់មក​​លោក​ កឹម សុខា ជា​អនុ​ប្រធាន​គណបក្ស​ បាន​ថ្លែង​សុន្ទរ​កថា​ដោយ​មាន​ការ​ទះដៃ​អបអរ​យ៉ាង​កង​រំពង​។ លោក​ សម រង្ស៊ី នឹង​ចំណាយ​ពេល​ថ្ងៃ​ចុង​ក្រោយ​នៃ​ការ​​ធ្វើ​យុទ្ធនាការ​នៅ​ក្នុង​ខេត្ត​កំពង់​ចាម​មុន​ពេល​វិល​ត្រឡប់​មក​កាន់​រាជ​ធានី​​​ភ្នំពេញ​វិញ៕​

ប្រែ​សម្រួល​ដោយ សោម សារុន

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.