អាជ្ញាធររាជធានី បានឲ្យដឹងកាលពីម្សិលមិញថា ត្រូវបង្កើនវិធានការសន្តិសុខដើម្បីធានាថា ការធ្វើយុទ្ធនាការឃោសនារកសំឡេងឆ្នោតនៅដំណាក់កាលចុងក្រោយ នៅថ្ងៃនេះ នឹងប្រព្រឹត្តទៅដោយសន្តិវិធី និងកុំឲ្យមានបញ្ហាធ្ងន់ធ្ងរនៅក្នុងរាជធានីនេះហើយថា ការបោះឆ្នោតជាតិនៅថ្ងៃអាទិត្យ នឹងដំណើការដោយគ្មានឧប្បទវហេតុ ។
លោក ហេង ចាន់ធារី នាយការិយាល័យនគរបាលចរាចររាជធានី បានមានប្រសាសន៍ថា នគរបាល កងរាជអាវុធហត្ថ និងនគរបាលចរាចរនឹងត្រូវ ដាក់ពង្រាយនៅថ្ងៃនេះ នៅក្នុងកិច្ចខិតខំប្រឹងប្រែងរួមគ្នា ដើម្បីថែរក្សាសន្តិសុខ និងសម្រួលចរាចរណ៍ ខណៈពេល គណបក្សនយោបាយនានា ធ្វើការដង្ហែក្បួនអ្នកគាំទ្ររបស់ខ្លួននៅថ្ងៃចុងក្រោយ នៃការធ្វើយុទ្ធនាការឃោសនារកសំឡេងឆ្នោតនេះ។
លោកបានមានប្រសាសន៍ថា “ នគរបាលនឹងធ្វើការយ៉ាងសកម្មដើម្បីការពារសន្តិសុខ ហើយប្រសិនបើការដង្ហែក្បួនទាំងនេះ គោរពច្បាប់នោះ នគរបាល នឹងមិនបិទផ្លូវនោះទេ”។លោកមានប្រសាសន៍បន្ថែមថា នគរបាលចរាចរណ៍ ជាង៥០០នាក់ នឹងត្រូវដាក់ពង្រាយដើម្បីទប់ស្កាត់កុំឲ្យកកស្ទះចរាចរណ៍ និងកំណត់កន្លែងជួបជុំគ្នា។
នគរបាល បានដាក់ពង្រាយដែករបាំងផ្លូវជាច្រើនផ្ទាំងនៅតាមចិញ្ចើមផ្លូវក្នុងសង្កាត់បឹងកេងកង១ កាលពីម្សិល ប៉ុន្តែ លោក គង់ សុផាត នាយប៉ុស្ដិ៍នគរបាលសង្កាត់បានមានប្រសាសន៍ថា រនាំងដែកសម្រាប់បិទផ្លូវទាំងនេះ គឺជាការត្រៀមទុកជាមុនតែ ប៉ុណ្ណោះ។
លោក គង់ សុផាត បានមានប្រសាសន៍ថា “ ដែករបាំងផ្លូវទាំងនេះ គឺគ្រាន់តែដើម្បីបញ្ជៀសកុំឲ្យមានការកកស្ទះចរាចរណ៍ប៉ុណ្ណោះ ប្រសិនបើអ្នកបើកបរមិនគោរពនគរបាលចរាចរណ៍ អំឡុងពេលដង្ហែក្បួនតាមបណ្ដោយមហាវិថីព្រះសីហនុ នៅកែងផ្លូវនានាទេនោះ”។
ទោះជាមានអំពើហិង្សាធ្ងន់ធ្ងរតិចតួចអំឡុងពេល ធ្វើយុទ្ធនាការឃោសនារកសំឡេងឆ្នោតនេះ បើប្រៀបធៀបទៅនឹងការធ្វើយុទ្ធនាការឃោសនាបោះឆ្នោតលើកមុនក៏ដោយ ក៏ការប៉ះទង្គិចគ្នា បានកើតមានឡើង កាលពីសប្ដាហ៍មុនដែរ រវាងយុវជន គណបក្សប្រជាជនកម្ពុជា និងយុវជនគណបក្សសង្គ្រោះជាតិ ។
កាលពីថ្ងៃពុធ អ្នកគាំទ្រមកពីគណបក្សទាំងពីរនេះបានប៉ះទង្គិចគ្នានៅខណ្ឌឬស្សីកែវ ដោយបណ្ដាលឲ្យមន្ត្រីនគរបាលសង្កាត់មួយរូបរងរបួសក្បាល បន្ទាប់ពីលោក ត្រូវបានគេគប់ដុំថ្មត្រូវចំថ្ងាស។ហើយយុវជនម្នាក់ ដែលធ្វើយុទ្ធនាការឃោសនារកសំឡេងឆ្នោតឲ្យគណបក្សសង្គ្រោះជាតិ បានសម្រាកព្យាបាលរយៈពេលមួយយប់ថ្ងៃអង្គារនៅមន្ទីរពេទ្យបន្ទាប់ពីយុវជននេះ ត្រូវគេគប់ដុំឥដ្ឋមួយដុំពីក្រោយត្រូវចំក្បាល អំឡុងពេលប៉ះទង្គិចគ្នាស្រដៀងគ្នានេះ។
លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានមានប្រសាសន៍ថា “ ការប៉ះទង្គិចគ្នានេះ គឺជាការគួឲ្យសោកស្ដាយវាបង្កឲ្យមានគ្រោះថ្នាក់ដល់អ្នកដែលទៅគាំទ្រដោយសេរី ចំពោះគណបក្សណាមួយ ដែលខ្លួនជ្រើសរើសនោះ ដោយហេតុនេះហើយ យើងរៀបចំឲ្យមានការសហការគ្នារវាងកងកម្លាំងនគរបាលយើងទាំងអស់ ដែលរួមមាន កងរាជអាវុធហត្ថ ដើម្បីធានាមិនឲ្យមានឧប្បត្តិហេតុនេះកើតមានឡើងជាថ្មីទៀត”។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាសន៍ថា មន្ត្រីកងរាជអាវុធហត្ថប្រហែល៥០០នាក់ នឹងជួយការពារសន្តិសុខនៅថ្ងៃនេះ ។
សាលារាជធានី បានជូនដំណឹងមួយ កាលពីថ្ងៃពុធ ហាមរថយន្ដដឹកទំនិញ និងរថយន្ដធុនធ្ងន់មិនឲ្យធ្វើដំណើរលើផ្លូវនានានៅក្នុងរាជធានីនៅចន្លោះពីម៉ោង៥ទៀបភ្លឺ ដល់ពេលថ្ងៃត្រង់ដើម្បីជៀសវាងការកកស្ទះចរាចរណ៍រីឯកាលពីដើមខែនេះ បំរាមមិនឲ្យលក់ស្រារយៈពេលពីរថ្ងៃ ត្រូវបានជូនដំណឹងសម្រាប់ថ្ងៃសៅរិ៍ និងថ្ងៃអាទិត្យ ដើម្បីបង្កាកុំឲ្យមានភាពចលាចលអំឡុងពេលបោះឆ្នោតនេះ៕
ប្រែសម្រួលដោយ ស៊ុំ សុខភុំ