មន្ត្រីតុលាការបានឲ្យដឹងកាលពីម្សិលមិញថា កម្មការិនីរោងចក្របីនាក់ ដែលត្រូវបានបាញ់ឲ្យរងរបួសដោយលោក ឈូក បណ្ឌិត អតីតអភិបាលក្រុងបាវិត ដែលពេលនេះកំពុងរត់គេចខ្លួនពីសំណាញ់ច្បាប់នោះ បានដាក់ពាក្យបណ្តឹងឧទ្ធរណ៍តាមរយៈសាលា ដំបូងខេត្តស្វាយរៀង ដោយទាមទារឲ្យអ្នកបាញ់ពួកគេផ្តល់សំណងច្រើនជាងមុន។
លោក លាង សួ ចៅក្រមសាលាដំបូងខេត្ត បានឲ្យដឹងថា ជនរងគ្រោះចំនួនបីនាក់ ឈ្មោះ ប៊ុន ចិន្តា កែវ នា និង នុត សុខុម បានប្តឹងឧទ្ធរណ៍តាមរយៈតុលាការខេត្តនេះកាលពីថ្ងៃពុធ។
ចៅក្រម លាង សួ បានមានប្រសាសន៍ថា “ ជនរងគ្រោះបានប្តឹងឧទ្ធរណ៍ទាមទារសំណងច្រើនជាងមុន”។ គួររំឭកថា កាលពីខែកុម្ភៈឆ្នាំ២០១២ លោក ឈូក បណ្ឌិត បានបាញ់សំដៅលើក្រុមអ្នកតវា៉ជាកម្មករក្នុងតំបន់សេដ្ឋកិច្ចពិសេសមួយនៅក្រុងបាវិត បណ្តាលឲ្យកម្មការិនី
បីនាក់រងរបួស។
សាលាដំបូងខេត្តបានផ្តន្ទាទោសជននេះឲ្យជាប់ពន្ធនាគាររយៈពេល១៨ខែ និងផ្តល់ប្រាក់សំណងសរុប៩.៥០០ដុល្លារដល់ជនរងគ្រោះ។
ទោះជាចៅក្រមរូបនេះបានចេញសេចក្តីបង្គាប់ឲ្យចាប់ខ្លួនអតីតអភិបាលក្រុងនេះជាបន្ទាន់ក៏ពិតមែន ប៉ុន្តែនគរបាលបានឲ្យដឹងថា ឈូក បណ្ឌិត នៅមិនទាន់ចាប់ខ្លួនបាននៅឡើយទេ ហើយក៏មិនដឹងថា តើជននេះលាក់ខ្លួននៅកន្លែងណាដែរ។ មេធាវីរបស់គាត់បានដាក់ពាក្យបណ្តឹងឧទ្ធរណ៍តាមរយៈតុលាការនេះកាលពីដើមខែនេះ។
ចៅក្រម លាង សួ បានថ្លែងថា “ យើងនឹងបញ្ជូនបណ្តឹងឧទ្ធរណ៍របស់ភាគីទាំងពីរទៅសាលាឧទ្ធរណ៍ ក្រោយការបោះឆ្នោត”។
លោក ជិន លីដា មេធាវីរបស់ស្ត្រីរងរបួស បានបញ្ជាក់ថា កូនក្តីរបស់លោកពិតជាបានដាក់ពាក្យបណ្តឹងឧទ្ធរណ៍ពាក់ព័ន្ធនឹងចំនួនប្រាក់សំណងមែន ដោយពន្យល់ថា តាមច្បាប់ ដើមចោទមិនត្រូវបានអនុញ្ញាតឲ្យប្តឹងឧទ្ធរណ៍ជំទាស់សាលក្រមឡើយ។
លោក លីដា មានប្រសាសន៍ថា “ ពួកគេចង់ឲ្យសាលាឧទ្ធរណ៍សម្រេចរឿងចំនួនប្រាក់សំណងរបស់ខ្លួនម្តងទៀត ព្រោះពួកគេមិនពេញចិត្តនឹងសំណងនេះទេ”។ លោកបានបន្ថែមថា ដើមឡើយ ពួកគេបានស្នើសុំប្រាក់សំណងសរុបចំនួន១៤០.០០០ដុល្លារ។
លោកបានបន្តថា “ ខ្ញុំសូមអំពាវនាវឲ្យរដ្ឋាភិបាល និងអាជ្ញាធរអនុវត្តដីកាចាប់ខ្លួនរបស់តុលាការ”។ សហជីពចំនួនបី គឺសហភាពការងារកម្ពុជា (CLC) សហភាពសហជីពកម្ពុជា (CCU) និងសហព័ន្ធសហជីពវាយនៈភ័ណ្ឌកាត់ដេរ (NIFTUC)បានចូលរួមក្នុងការអំពាវនាវរបស់លោក ដោយបានចេញសេចក្តីថ្លែងការណ៍រួមមួយកាលពីម្សិលមិញ ទាមទារឲ្យរដ្ឋាភិបាលចាប់ខ្លួនលោក ឈូក បណ្ឌិត ឲ្យបានមុនការបោះឆ្នោតនៅថ្ងៃអាទិត្យនេះ។
សេចក្តីថ្លែងការណ៍រួមនេះមានខ្លឹមសារថា“ រាជរដ្ឋាភិបាលត្រូវតែបង្ហាញពីឆន្ទៈពិតប្រាកដក្នុងការលប់បំបាត់និទណ្ឌភាពហើយពេលនេះមិនត្រូវបណ្តោយឲ្យអ្នកមានឥទ្ធិពលមានអំណាច ដូចជាលោក ឈូក បណ្ឌិត រួចខ្លួននោះទេ”។ សេចក្តីថ្លែងការណ៍នេះមានខ្លឹមសារបន្ថែមថា “ លោក ឈូក បណ្ឌិត នៅតែមានសេរីភាព។ វាបង្ហាញពីភាពគ្មានឆន្ទៈរបស់រដ្ឋាភិបាលដែលនៅបន្តឲ្យមាននិទណ្ឌភាពចំពោះមន្ត្រីមានអំណាចរបស់រដ្ឋាភិបាលបច្ចុប្បន្ននេះ”៕
ប្រែសម្រួលដោយ ចេវ ប៊ុននី