យោងតាមមន្ត្រីមូលដ្ឋានមួយរូបបានឲ្យដឹងថា បេក្ខជនឈរឈ្មោះជាតំណាងមកពីគណបក្សប្រជាជនកម្ពុជា នៅមណ្ឌលខេត្តសៀមរាបបានប្រកាសជាសាធារណៈថា លោកនឹងផ្តល់ជំនួយមនុស្សធម៌ ក្នុងទឹកប្រាក់ចំនួន៧៥ដុល្លារ ក្នុងម្នាក់ៗ ទៅឲ្យប្រជាពលរដ្ឋដែលជួបការលំបាក នៅក្នុងឃុំ បន្ទាប់ពីការបោះឆ្នោតជាតិនាថ្ងៃអាទិត្យចប់សព្វគ្រប់។
ក្នុងសកម្មភាពមួយ ដែលធ្វើតាមលោក ស ខេង រដ្ឋមន្ត្រីក្រសួងមហាផ្ទៃដែលកាលពីដើមសប្តាហ៍នេះ បានប្រកាសផ្តល់ជំនួយផ្ទាល់ខ្លួន ទៅឲ្យប្រជាពលរដ្ឋដែលជួបការលំបាកទាំងអស់នៅក្នុងខេត្តព្រៃវែង ដោយអ្នកឃ្លាំមើលការបោះឆ្នោតបានចាត់ទុកថាជាការទិញសន្លឹកឆ្នោតនោះ លោក សៀង ណាំ សមាជិកសភា នៅខេត្តសៀមរាប នៅក្នុងសប្តាហ៍នេះ ក៏បានប្រកាសផ្តល់ជំនួយមនុស្សធម៍ផ្ទាល់ខ្លួនទៅឲ្យប្រជាពលរដ្ឋដែលជួបការលំបាកផងដែរ។
លោក សៀង ណាំ មិនអាចទាក់ទងសំធ្វើអត្ថាធិប្បាយបានឡើយ ប៉ុន្តែ មានមន្ត្រីមួយរូបមកពីគណៈកម្មាធិការរៀបចំការឆ្នោតនៅខេត្តសៀមរាប បានបញ្ជាក់ពីការប្រកាសផ្តល់ជំនួយផ្ទាល់ខ្លួននេះ។
យោងតាមលោក សុង ម៉េង នាយរងនគរបាលស្រុក ស្វាយ លើ ដែលបានទៅចូលរួមក្នុងព្រឹត្តិការណ៍ប្រកាសផ្តល់ជំនួយមនុស្សធម៌ផ្ទាល់ខ្លួននេះ កាលពីថ្ងៃអង្គារបានឲ្យដឹងថា លោក គុច លីណា ប្រធានក្រុមការងាររបស់គណបក្សប្រជាជនកម្ពុជានៅក្នុងឃុំខ្នងភ្នំ បានលើកឡើងថា បន្ទាប់ពីការបោះឆ្នោតរួច លោក សៀង ណាំ នឹងផ្តល់ប្រាក់ចំនួន ៣០០.០០០រៀល ឬក៏ស្មើនឹង៧៥ដុល្លារ ទៅឲ្យស្ត្រីដែលទើបតែសម្រាលកូនរួច និងក្រុមគ្រួសារណាដែលមានសមាជិកស្លាប់នៅក្នុងឃុំនេះ។
លោកលើកឡើងថា “ អ្នកក្រោមបង្គាប់របស់លោក សៀង ណាំ បានសន្យាថានឹងផ្តល់ជំនួយមនុស្សធម៌ ហេតុដូច្នេះពួកគេមិនអាចលេបសម្ដីបានឡើយ ពីព្រោះឥឡូវនេះ ប្រជាពលរដ្ឋរាប់រយនាក់ បានដឹងពីដំណឹងនេះហើយ”។ លោកបានមានប្រសាសន៍បន្តថា មានអ្នកភូមិប្រមាណ៣.០០០គ្រួសារ នៅក្្នុងឃុំនេះនឹងត្រូវមកចុះឈ្មោះដើម្បីទទួលបានជំនួយមនុស្សធម៌ ដែលមានចំនួនសរុបគឺ២២៥.០០០ដុល្លារ។
លោក សុង ម៉េង បានបដិសេធ ចំពោះអ្វីដែលបានលើកឡើងថា ជាអំណោយដើម្បីទិញសន្លឹកឆ្នោត។ លោក សុង ម៉េង និយាយបន្តថា “ នេះមិនមែនជាទង្វើទិញសន្លឹកឆ្នោតទេ”។ លោក បានបន្តថា “ លោក [លោក សៀង ណាំ] តែងតែចង់ជួយអ្នកក្រ ហើយលោកមិនដែលគិតចង់ទទួលបានសំឡេងឆ្នោតបន្ថែមពីប្រជាពលរដ្ឋឡើយ។
លោក នុន វណ្ណសំ ប្រធានគណៈកម្មាធិការរៀបចំការបោះប្រចាំខេត្តសៀមរាបបានមានប្រសាសន៍ថា លោកបានដឹងពីការប្រកាសរបស់លោក សៀង ណាំ នេះហើយបានជំទាស់ថា ការផ្តល់នេះគឺស្របច្បាប់។ លោកបានលើកឡើងដោយប្រៀបធៀបពីជំនួយមនុស្សធម៌នេះ ទៅនឹងគោលនយោបាយរបស់គណបក្សសង្គ្រោះជាតិ ដែលនឹងផ្តល់ប្រាក់សោធននិវត្សរ៍ ចំនួន១០ដុល្លារក្នុងមួយខែនៅទូទំាងប្រទេសថា “ នេះមិនមែនជាសកម្មភាពដើម្បីទាក់ទាញអ្នកបោះឆ្នោតឲ្យបានកាន់តែច្រើននោះទេ ប៉ុន្តែវាជាសកម្មភាពមនុស្សធម៌ច្រើនជាង”។
លោក គល់ បញ្ញា ប្រធានគណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ហៅកាត់ថា ខុមហ្វ្រែល បានមានប្រសាសន៍ថា សកម្មភាពនេះគឺជាការទិញសន្លឹកឆ្នោត ហើយបានជំរុញឲ្យគណបក្សផ្សេងៗទៀត ដាក់ពាក្យបណ្តឹង និងទាមទារឲ្យមានការចាត់វិធានការពីគណៈកម្មាធិការជាតិរៀបចំការបោះឆ្នោតហៅកាត់ថាគ.ជ.ប.។
លោកក៏បានចង្អុលបង្ហាញដែរថា ខេត្តសៀមរាប ក៏ដូចជាខេត្តព្រៃវែងដែរ គឺជាខេត្តដែលគណបក្សប្រឆាំងត្រូវគេរំពឹងថា នឹងទទួលសំឡេងគាំទ្រច្រើនជាងគណបក្សប្រជាជនកម្ពុជា។ លោកបានថ្លែងថា “ សព្វថ្ងៃ ព្រឹត្តិការណ៍របស់គណបក្សប្រឆាំងទទួលបានការគាំទ្រច្រើនណាស់[នៅក្នុងខេត្តសៀមរាប]៕
ប្រែសម្រួលដោយ ស៊ា ស៊ុយឈាង