28 C
Phnom Penh

លទ្ធផល​​​ផ្លូវ​​​ការ​​​ចុង​​​ក្រោយ​​​នៃ​​​ការ​​​បោះឆ្នោត​​​នឹង​​​ត្រូវ​​​ចេញ​​​ផ្សាយ​​​នៅ​​​ពីរ​​​សប្ដាហ៍​​​ក្រោយ​​​​​​

ដោយ ឌឹ ខេមបូឌា ដេលី

បទវិភាគ

លោក​​​ ទេព នីថា អគ្គលេខាធិការ​​​គណៈ​​​កម្មាធិការ​​​ជាតិ​​​រៀប​​​ចំការ​​​បោះឆ្នោត​​​​​​ហៅ​​​កាត់​​​ថា គ.ជ.ប.  បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា លទ្ធផល​​​ចុង​​​ក្រោយ​​​​​​នៃ​​​ការ​​​បោះ​​​ឆ្នោត​​​​​​ជាតិ​​​កាលពី​​​ថ្ងៃ​​​អាទិត្យ​​​ នឹង​​​ត្រូវ​​​ប្រកាស​​​នៅ​​​ពាក់​​​កណ្ដាល​​​​​​ខែ​​​សីហា​​​។

លោក​​​បាន​​​មាន​​​ប្រសាសន៍​​​ថា ថ្ងៃ​​​ដែល​​​​​​អាច​​​នឹង​​​ចេញ​​​លទ្ធផល​​​ចុង​​​ក្រោយបំផុត​​​​​​ ប្រហែល​​​ជា​​​នៅ​​​ដើម​​​ខែ​​​កញ្ញា​​​។ លោក​​​បាន​​​បន្ថែម​​​ថា ល្បឿន​​​នៃ​​​ការ​​​ប្រកាស​​​​​​លទ្ធ​​​ផល​​​គឺ​​​អាស្រ័យ​​​លើ​​​ថា​​​ តើ​​​គ.ជ.ប. និង​​​ក្រុម​​​ប្រឹក្សា​​​ធម្មនុញ្ញ​​​កម្ពុជា​​​នឹង​​​​​​ទទួល​​​​​​បាន​​​ពាក្យ​​​បណ្ដឹង​​​ច្រើន​​​ប៉ុណ្ណា​​​​​​ពាក់​​​​​​ព័ន្ធ​​​នឹង​​​ភាព​​​មិន​​​ប្រក្រតី​​​។

កាលពី​​​ម្សិលមិញ​​​ គណបក្ស​​​ប្រឆាំង​​​បាន​​​ច្រាន​​​ចោល​​​លទ្ធផល​​​បឋម​​​នៃ​​​ការ​​​បោះ​​​​​​ឆ្នោត​​​ដែល​​​ខ្លួន​​​ទទួល​​​បាន​​​អាសនៈ​​​សភា​​​ចំនួន​​​៥៥​​​អាសនៈ​​​ទល់​​​នឹង​​​អាសនៈ​​​ចំនួន​​​៦៨ ដែល​​គណ​​​ប​​​​​ក្ស​​​ប្រជាជន​​​កម្ពុជា​​​ទទួល​​​បាន​​​ ដោ​​​យ​​​លើក​​​ឡើង​​​ថា មាន​​​ការ​​​ក្លែង​​​បន្លំ​​​ច្រើន​​​។​ លោក​​​បាន​​​បន្ថែម​​​ថា “គ.ជ.ប. នៅ​​​មិន​​​ទាន់​​​ប្រកាស​​​ពី​​​តួលេខ​​​នៃ​​​សំឡេង​​​គាំទ្រ​​​ដែល​​​គណ​​​បក្ស​​​នីមួយ​​​ៗ​​​​​​ទទួល​​​បាន​​​នៅ​​​ទូទាំង​​​ប្រទេស​​​នៅ​​​ឡើយ​​​ទេ​​​។ សាធារណ​​​ជន​​​អាច​​​វាយ​​​តម្លៃ​​​ដោយ​​ខ្លួន​​​ឯង​​​បាន”​​ តាម​​​រយៈ​​​ការ​​​មើល​​​លទ្ធ​​​ផល​​​ពី​​​ខេត្ត​​​មួយ​​​ទៅ​​​ខេត្ត​​​មួយ​​​ ដែល​​​ប្រកាស​​​តាម​​​កញ្ចក់​​​ទូរទស្សន៍​​​។

លោក​​​បាន​​​មាន​​​ប្រសាសន៍​​​ថា លទ្ធផល​​​ចុង​​​ក្រោយ​​​នៃ​​​ការ​​​បោះឆ្នោត​​​ ក៏​​​នឹង​​​ត្រូវ​​​ប្រកាស​​​ទូទាំង​​​ប្រទេ​​​ស​​​ផង​​​ដែរ​​​។ លោក​​​បាន​​​ថ្លែង​​​ថា “យើង​​​ [​ចាប់​​​ពី​​​ថ្ងៃ​​​បោះឆ្នោត​​​មក​​​] ​​​​នៅ​​​មិន​​​ទាន់​​​ប្រកាស​​​លទ្ធផល​​​បឋម​​​នៅ​​​ឡើយ​​​ទេ​​​ ក្រៅ​​​ពី​​​តាម​​​​​​ទូរទស្សន៍​​​​​​ ហេតុ​​​ដូច្នេះ​​​ហើយ​​​បើ​​​ចង់​​​ដឹង​​​លទ្ធផល​​​ ប្រជា​​​ពល​​​រដ្ឋ​​​ត្រូវ​​​តែ​​​តាម​​​ដាន​​​តាម​​​កញ្ចក់​​​ទូរទស្សន៍​​​”។

យោង​​​តាម​​​លទ្ធផល​​​បឋម​​​នៅ​​​តាម​​​​​​បណ្ដា​​​ខេត្ត​​​នានា​​​ដែល​​​បាន​​​ចុះ​​​ផ្សាយ​​​តាម​​​គេហ​​​ទំព័រ​​​គ.ជ.ប. គណបក្ស​​​ប្រជាជន​​​កម្ពុជា​​​ទទួល​​​បាន​​​សំឡេង​​​គាំទ្រ​​​ ២.៥៥៥.០៣០​​​សំឡេ​​​ង​​​ រី​​​ឯ​​​គណបក្ស​​​សង្គ្រោះជាតិ​​​វិញ​​​ទទួល​​​បាន​​​សំឡេង​​​គាំទ្រ​​​២.២៩៥.០២២​​​សំឡេង​​​។

លោក​​​ យឹម សុវណ្ណ អ្នក​​​នាំពាក្យ​​​គណបក្ស​​​សង្គ្រោះ​​​ជាតិ​​​បាន​​លើក​​​ឡើង​​​កាល​​​ពី​​​ម្សិល​​​មិញ​​​ថា គណបក្ស​​​របស់​​​លោក​​​មិន​​​អាច​​​ទទួល​​​យក​​​លទ្ធផល​​​ ដែ​​​ល​​​គ.ជ.ប. បាន​​​ប្រកាស​រហូត​​​មក​​​ទល់​​​ពេល​​​នេះ​​​​​​​​នោះ​​​ឡើយ​​​ ពីព្រោះ​​​មាន​​​ភាព​​​មិន​​​ប្រក្រតី​​​មួយ​​​ចំនួន​​​បាន​​​កើត​​​ឡើង​​​ដូចជា​​​ ឈ្មោះ​​​របស់​​​អ្នក​​​បោះឆ្នោត​​​​​​បាន​​​បាត់​​​ ឬ​​​ក៏​​​​​​ត្រូវ​​​បាន​​​គេ​​​​​​ចុះ​​​ចំនួន​​​ពីរ​​​លើក​​​ជា​​​ដើម​​​។ លោក​​​បាន​​​មាន​​​ប្រសាសន៍​​​ថា “យើង​​​មិន​​​អាច​​​ទទួល​​​លទ្ធផល ដែល​​​គ.ជ.ប. បាន​​​ប្រកាស​​​ឡើយ​​​ ពីព្រោះ​​​ប្រជាពលរដ្ឋ​​​ជា​​​ច្រើន​​​បាន​​​បាត់​​​ឈ្មោះ​​​របស់​​​ខ្លួន ហើយ​​​មិន​​​អាច​​​បោះ​​​ឆ្នោត​​​បាន​​​រី​​​ឯ​​​បញ្ហា​​​ខុសច្បាប់​​​ផ្សេង​​​ៗ​​​​​​ជា​​​ច្រើន​​​បាន​​​កើត​​​ឡើង​​​អំឡុង​​​ការ​​​បោះឆ្នោត​​​នេះ​​​”។

លោក​​​ ឈាង​​​ វុន​​​ សមាជិក​​​សភា​​​មក​​​ពី​​​គណបក្ស​​​ប្រជាជន​​​កម្ពុជា​​​បាន​​​ការ​​​ពារ​​​លទ្ធ​​​ផល​​​ ដែល​​​គ.ជ.ប. បាន​​​ចេញ​​​ផ្សាយ​​​រហូត​​​មក​​​ទល់​​​ពេល​​​នេះ​​​​​​។ លោក​​​បាន​​​មាន​​​ប្រសាសន៍​​​ថា “ខ្ញុំ​​​គិត​​​ថា អ្វី​​​ដែល​​​គ.ជ.ប.បាន​​​ធ្វើ​​​ គឺ​​​ត្រឹម​​​ត្រូវ​​​”។ គណបក្ស​​​ប្រជាជន​​​កម្ពុជា​​​បាន​​​ចេញ​​​សេចក្ដី​​​​​​ថ្លែង​​​ការណ៍​​​មួយ​​​នៅ​​​លើ​​​គេហទំព័រ​​​របស់​​​ខ្លួន​​​កាលពី​​​យប់​​​ថ្ងៃ​​​អាទិត្យ​​​ ដោយ​​​លើក​​​ឡើង​​​ថា លទ្ធផល​​​ ដែល​​​ប្រកាស​​​តាម​​​ទូរ​​​ទស្សន៍​​​​​​ជាតិ​​​កម្ពុជា​​​បង្ហាញ​​​ថា ខ្លួន​​​ទទួល​​​បាន​​​អាសនៈ​​​គ្រប់​​​គ្រាន់​​​ដើម្បី​​​បង្កើត​​​រដ្ឋាភិបាល​​​នៅ​​​អាណត្តិ​​​ថ្មី​​​។

សេចក្ដី​​​ថ្លែង​​​ការណ៍​​​នេះ​​​បាន​​លើក​​​ឡើង​​​ថា “គណបក្ស​​​ប្រជា​​​ជន​​​កម្ពុជា​​​សូម​​ថ្លែង​​​អំណរ​​​គុណ​​​ដល់​​​ប្រជាពលរដ្ឋ​​​ទាំង​​​អស់​​​ដែល​​​​បាន​​​បោះឆ្នោត​​​ឲ្យ​​​គណបក្ស​​​ប្រជាជន​​​កម្ពុជា​​​ដឹកនាំ​​​​​​រដ្ឋាភិបាល​​​សម្រាប់​​​រយៈ​​​ពេល​​​ប្រាំ​​​ឆ្នាំ​​​បន្ត​​​ទៀត”។​​​ សេចក្ដី​​​ថ្លែង​​​ការណ៍​​​នេះ​​​បន្ត​​​ថា “គណបក្ស​​​ប្រជាជន​​​កម្ពុជា​​​សូម​​​អំពាវ​​​នាវ​​​ដល់​​​ប្រជាពលរដ្ឋ​​​ទាំង​​​អស់​​​ឲ្យ​​​រក្សា​​​ភាព​​​ស្ងប់ស្ងាត់​​​ ខណៈ​​​គ.ជ.ប. កំពុង​​​បន្ត​​​កិច្ច​​​ការ​​​របស់​​​ខ្លួន​​​​​​”៕

ប្រែសម្រួលដោយ ស៊ា សុ៊យឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស