ដោយសារលោកនាយករដ្ឋមន្ត្រី ហ៊ុន សែន បានបាត់មុខចាប់តាំងពីគណបក្សប្រជាជនកម្ពុជារបស់លោកបានឈ្នះការបោះឆ្នោតជាតិកាលពីថ្ងៃអាទិត្យ តែបានបាត់បង់អាសនៈយ៉ាងច្រើននោះ គណបក្សនេះបានស្វះស្វែងច្រានចោលកាលពីម្សិលមិញនូវពាក្យចចាមអារ៉ាមដែលថា លោក ហ៊ុន សែន បានចាកចេញពីប្រទេសកម្ពុជា និងបានលាលែងពីតំណែងរបស់ខ្លួន។
តាមរយៈសេចក្ដីថ្លែងការណ៍មួយដែលបានចេញផ្សាយកាលពីព្រឹកម្សិលមិញ និងដែលត្រូវបានគេចាក់ផ្សាយតាមទូរទស្សន៍បាយ័នពេញមួយថ្ងៃនោះ គណបក្សនេះបានបញ្ជាក់ថា លោក ហ៊ុន សែន នៅតែស្ថិតក្នុងប្រទេសកម្ពុជា និងមុខតំណែងរបស់លោកដដែលទេ ដោយបានត្រៀមខ្លួនរួចជាស្រេចក្នុងការដឹកនាំរដ្ឋាភិបាលក្នុងនាមជានាយករដ្ឋមន្ត្រីនៅអាណត្តិក្រោយនេះ។
គណបក្សប្រជាជនបានលើកឡើងក្នុងសេចក្ដីថ្លែងការណ៍ខ្លីមួយថា “ ថ្មីៗនេះ មានពាក្យចចាមអារ៉ាមថា សម្ដេច ហ៊ុន សែន អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីអាណត្តិទី៤ បានចាកចេញពីប្រទេស ហើយបានធ្វើដំណើរទៅបរទេស និងលាលែងពីតំណែងជានាយករដ្ឋមន្ត្រី”។
សេចក្ដីថ្លែងការណ៍នេះមានខ្លឹមសារថា “ នេះជាសង្គ្រាមយុទ្ធសាស្ត្រដែលជនអគតិមួយចំនួនតែងបានប្រឌិតឡើងដើម្បីបំពុលបរិយាកាសសង្គម។ គណបក្សប្រជាជនកម្ពុជាសូមបំភ្លឺថា សម្ដេច ហ៊ុន សែន បច្ចុប្បន្នកំពុងស្ថិតនៅក្នុងប្រទេស ហើយកំពុងអនុវត្តភារកិច្ចជានាយករដ្ឋមន្ត្រីដូចធម្មតា”។
សេចក្ដីថ្លែងការណ៍នេះក៏មានខ្លឹមសារថ្លែងអំណរគុណប្រជាជនកម្ពុជាចំពោះការផ្ដល់ជ័យជម្នះក្នុងការបោះឆ្នោតមួយអាណត្តិទៀតដល់គណបក្សប្រជាជនកម្ពុជា និងមានការអះអាងថា “ សម្ដេចនាយករដ្ឋមន្ត្រី ហ៊ុន សែន នឹងបន្តស្ថិតនៅក្នុងតំណែងជានាយករដ្ឋមន្ត្រីនៅអាណត្តិទី៥ទៀត”។
គណបក្សប្រជាជនកម្ពុជាអះអាងថា បានឈ្នះ៦៨អាសនៈសភាក្នុងចំណោមអាសនៈទាំង១២៣ គឺតិចជាងឆ្នាំ២០០៨ចំនួន២២អាសនៈ។ តែទោះបីជាយ៉ាងណា គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. មិនទាន់បានប្រកាសលទ្ធផលផ្លូវការនៅឡើយទេ។ គណបក្សសង្គ្រោះជាតិដែលយោងតាមគណបក្សប្រជាជនកម្ពុជាថា បានឈ្នះ៥៥អាសនៈនោះ បានច្រានចោលលទ្ធផលនេះ ហើយបានទាមទារឲ្យមានការស៊ើបអង្កេតដោយឯករាជ្យមួយលើសេចក្ដីរាយការណ៍ស្ដីអំពីភាពមិនប្រក្រតីដែលខ្លួនជឿថា បានធ្វើឲ្យគណបក្សនេះមិនបានទទួលជ័យជម្នះ។
សេចក្ដីថ្លែងការណ៍របស់បក្សប្រជាជនកម្ពុជាកាលពីម្សិលមិញនេះ គ្មានការបញ្ជាក់ពីមូលហេតុនៃភាពស្ងប់ស្ងៀម និងការមិនចេញមុខរបស់លោក ហ៊ុន សែន ដែលធ្លាប់តែសម្បូរវោហារសាស្ត្រនោះទេ ប៉ុន្តែមន្ត្រីបក្សនេះ បានផ្ដល់ការពន្យល់ខ្លះដែរពីមូលហេតុដែលលោកនាយករដ្ឋមន្ត្រី ហ៊ុន សែន បាត់មុខពីសាធារណជន។
លោក ជាម យៀប សមាជិកសភាជាន់ខ្ពស់មកពីគណបក្សប្រជាជនកម្ពុជា អះអាងថា លោក ហ៊ុន សែន នៅកំពុងកាន់ទុក្ខឪពុករបស់លោក គឺលោក ហ៊ុន នាង ដែលបានទទួលអនិច្ចកម្មដោយសារជរាពាធ នៅថ្ងៃទី១២ ខែកក្កដា ក្នុងជន្មាយុ៩០ឆ្នាំនៅឡើយទេ។ លោក ជាម យៀប បានថ្លែងថា “ គាត់កំពុងកាន់ទុក្ខឪពុករបស់ខ្លួននៅឡើយទេ។ គាត់មិនបានទៅណាទេ”។ នៅពេលត្រូវបានសួរពីអវត្តមានរបស់លោក ហ៊ុន សែន នោះ លោក ងួន ញឹល អនុប្រធានរដ្ឋសភា បានឲ្យដឹងថា លោកនាយករដ្ឋមន្ត្រីកំពុងរង់ចាំ គ.ជ.ប. ប្រកាសលទ្ធផលផ្លូវការ។
លោកបានមានប្រសាសន៍ថា “ ទាល់តែគ.ជ.ប. ចេញផ្សាយលទ្ធផលរួច ទើបគណបក្សប្រជាជនកម្ពុជាចេញផ្សាយព័ត៌មាន” ថាតើខ្លួននឹងបង្កើតរដ្ឋាភិបាលថ្មីនៅពេលណា និងដោយរបៀបណា។ គ.ជ.ប. បានឲ្យដឹងកាលពីថ្ងៃច័ន្ទថា ខ្លួននឹងចេញផ្សាយលទ្ធផលផ្លូវការនៅពាក់កណ្ដាលខែសីហា។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានដែលបានចេញផ្សាយលទ្ធផលក្រៅផ្លូវការរយៈពេលត្រឹមតែប៉ុន្មានម៉ោងក្រោយការបោះឆ្នោតបញ្ចប់កាលពីថ្ងៃអាទិត្យនោះ បានបដិសេធមិនធ្វើអត្ថាធិប្បាយពីមូលហេតុនៃការបាត់មុខរបស់លោក ហ៊ុន សែន ពីសាធារណជនទេ ហើយមិនព្រមបញ្ជាក់ថា តើលោកនាយករដ្ឋមន្ត្រីរូបនេះស្ថិតនៅក្នុងរាជធានីភ្នំពេញឬអត់ទេ។
នគរបាលបានបិទផ្លូវនៅជុំវិញភូមិគ្រឹះរបស់លោក ហ៊ុន សែន ក្បែរវិមានឯករាជ្យជាថ្មីម្ដងទៀតកាលពីម្សិលមិញ ដូចដែលពួកគេបានធ្វើរៀងរាល់ពេលរសៀលចាប់តាំងពីថ្ងៃបោះឆ្នោតមកដែរ។ ទោះជាយ៉ាងណា ភូមិគ្រឹះអចិន្ត្រៃយ៍របស់លោកនាយករដ្ឋមន្ត្រីរូបនេះ គឺស្ថិតនៅក្រៅក្រុងតាខ្មៅ ក្នុងខេត្តកណ្ដាល ឯណោះទេ។
កាលពីថ្ងៃច័ន្ទ ឧត្ដមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងថា មន្ត្រីរបស់លោកត្រូវបានដាក់ឲ្យឈរជើងនៅភូមិគ្រឹះរបស់លោក ហ៊ុន សែន ក្នុងរាជធានីភ្នំពេញ នៅក្នុងករណីមានហេតុការណ៍ដែលនៅមិនទាន់ដឹងថា ជាហេតុការណ៍អ្វី។
ក្រោយការបោះឆ្នោតជាតិឆ្នាំ២០០៨ លោក ហ៊ុន សែន មិនបានថ្លែងជាសាធារណៈរហូតដល់គ្រប់រយៈពេល១០ថ្ងៃក្រោយការបោះឆ្នោត ហើយក្រោយមក ក៏បានរិះគន់គណបក្សហ្វ៊ុនស៊ិនប៉ិចដែលជាដៃគូចម្រុះរដ្ឋាភិបាលចំពោះការចូលរួមជាមួយគណបក្សប្រឆាំងក្នុងការអំពាវនាវឲ្យមានការច្រានចោលលទ្ធផលនៃការបោះឆ្នោត។
លោក ហ៊ុន សែន បានបង្ហាញមុខជាសាធារណៈមុននោះប្រាំថ្ងៃ ហើយត្រូវគេឮរិះគន់លោក សម រង្ស៊ី ដែលពេលនោះជាប្រធានគណបក្ស សម រង្ស៊ី ចំពោះការគំរាមធ្វើពហិកាមិនចូលរួមក្នុងការបើកសម័យប្រជុំសភាជាលើកដំបូងក្រោយការបោះឆ្នោត។ ថ្នាក់ដឹកនាំគណបក្សសង្គ្រោះជាតិ បានបង្ហាញមុខជាសាធារណៈជាងថ្នាក់ដឹកនាំគណបក្សប្រជាជនកម្ពុជា ចាប់តាំងពីថ្ងៃចប់បោះឆ្នោតកាលពីថ្ងៃអាទិត្យមក ដោយបានធ្វើសន្និសីទសារព័ត៌មានកាលពីថ្ងៃច័ន្ទ ដើម្បីច្រានចោលលទ្ធផលក្រៅផ្លូវការរបស់គណបក្សប្រជាជនកម្ពុជា៕
ប្រែសម្រួលដោយ ភួន ច័ន្ទសេរីវុធ