ព្រះតេជគុណ ឃឹម សន ព្រះមេគណរាជធានីភ្នំពេញបាននិមន្តទៅមើលវត្តមួយដែលស្ថិតនៅក្នុងខណ្ឌមានជ័យកាលពីម្សិលមិញ កន្លែងដែលមានកុបកម្មកើតឡើងអំឡុងការបោះឆ្នោតកាលពីថ្ងៃអាទិត្យ ហើយព្រះអង្គបានមានសង្ឃដីកាទៅកាន់ព្រះសង្ឃគង់នៅក្នុងវត្តនោះកុំឲ្យចូលរួមក្នុងការតវ៉ាពាក់ព័ន្ធនយោបាយ។
អំពើហិង្សាកើតឡើងនៅខាងក្រៅវត្តនេះបានចាប់ផ្តើមនៅការិយាល័យបោះឆ្នោតនៅសាលាបឋមសិក្សាមួយក្បែរនោះនៅពេលអ្នកបោះឆ្នោតជាច្រើននាក់ដែលមានកំហឹងបានធ្វើការតវ៉ាថា ពួកគេរកឈ្មោះរបស់ខ្លួនមិនឃើញនៅក្នុងបញ្ជីឈ្មោះបោះឆ្នោត ហើយបុគ្គលិករបស់គណៈកម្មាធិការជាតិរៀបចំការបោះឆ្នោត (គ.ជ.ប.) មិនបានជួយដល់បញ្ហានេះឡើយ។
នៅពេលនោះកន្លែងនោះបានក្លាយជាអនាធិបតេយ្យនៅពេលដែលបុរសម្នាក់ ដែលតាមចោទថា បានវាយព្រះសង្ឃមួយអង្គ ដែលស្ថិតក្នុងចំណោមអ្នកតវ៉ា។ មន្ត្រីកងរាជអាវុធហត្ថចំនួន១០០នាក់ ពេលនោះបានបាញ់កាំភ្លើងឡើងលើជាង១០គ្រាប់ដើម្បីបំបែកក្រុមអ្នកតវ៉ា ដែលបានបន្តកាន់តែខ្លាំងឡើងដោយបានវាយកម្ទេចរថយន្តកងរាជអាវុធហត្ថពីរគ្រឿង ហើយដុតចោលទៀត។
ព្រះសង្ឃដែលបាននិមន្តចេញពីប្រជុំជាមួយព្រះតេជគុណ ឃឹម សន កាលពីម្សិលមិញ បានមានសង្ឃដីកាថា ព្រះមេគណរាជធានី បានមានសង្ឃដីកាប្រាប់ព្រះសង្ឃដែលជួបជុំគ្នាថា ព្រះសង្ឃមិនគួរចូលរួមក្នុងការតវ៉ាបែបនេះឡើយ។
ព្រះតេជគុណ ឃួន សារាយ ព្រះជន្ម៣៨ព្រះវស្សា បានមានសង្ឃដីកាថា “ខ្ញុំព្រះករុណាមានការសោកស្តាយណាស់ដែលបានចូលរួមក្នុងការតវ៉ានេះ ប៉ុន្តែ អ្វីដែលខ្ញុំព្រះករុណាព្យាយាមធ្វើនោះ គឺដើម្បីជួយដល់ប្រជាពលរដ្ឋ”។ ព្រះអង្គបានបន្ថែមថា ព្រះតេជគុណ ឃឹម សន បានលើករូបថតស្តីពីការតវ៉ាបង្ហាញដល់ព្រះសង្ឃ។
ព្រះេតជគុណបានមានសង្ឃដីកាថា “ មុនពេលយើងចាកចេញពីបន្ទប់ ព្រះមេគណមានសង្ឃដីកាថា យើងមិនគួរជាប់ពាក់ព័ន្ធ នឹងនយោបាយឡើយ ហើយព្រះអង្គបានបង្ហាញរូបថតស្តីពីការតវ៉ានោះ។ខ្ញុំព្រះ ករុណាបារម្ភអំពីសុវត្ថិភាពខ្លួនឯង ហើយខ្ញុំព្រះករុណាត្រូវការពារខ្លួន”។
ព្រះតេជគុណ ប៊ុន ធឿន ព្រះចៅអធិការវត្តស្ទឹងមានជ័យបានមានសង្ឃដីកាថា ព្រះតេជគុណ ឃឹម សន បាននិមន្តមកមើល មិនមែនមកផ្សឹកព្រះសង្ឃដែលបានចូលរួមក្នុងការតវា៉ និងកុបកម្មនោះឡើយ ប៉ុន្តែបានណែនាំព្រះសង្ឃឲ្យគង់នៅក្នុងនាមជាពុទ្ធ សាសនិកដ៏ល្អ។
នៅពេលត្រូវបានសួរថា តើព្រះសង្ឃគង់នៅវត្តនេះនឹងត្រូវផ្សឹក ឬអត់នោះ ព្រះតេជគុណបានមានសង្ឃដីកាថា “មិនមានគម្រោងធ្វើដូច្នោះទេ ហើយយើងមិនបានលើកឡើងពីបញ្ហានោះឡើយ។ ព្រះមេគណគ្រាន់តែបានរៀបចំកិច្ចប្រជុំមួយ ហើយទូន្មានដល់ព្រះសង្ឃទាំងអស់ឲ្យសូត្រធម៌ និងថ្វាយបង្គំព្រះ”។
ព្រះតេជគុណ យ៉ែន រតនសុធាវី ព្រះជន្ម២៩ព្រះវស្សាជាព្រះសង្ឃដែលត្រូវបានរងការវាយប្រហារ និងព្រះតេជគុណ អ៊ិន វុទ្ធី ព្រះជន្ម២៥ព្រះវស្សា បច្ចុប្បន្ននេះ គង់នៅ ជាមួយអង្គការក្រៅរដ្ឋាភិបាលផ្នែកសិទ្ធិមនុស្សក្នុងស្រុក ពីព្រោះព្រះអង្គបារម្ភពីសុវត្ថិភាពផ្ទាល់ខ្លួន។
មានសង្ឃដីកាតាមទូរស័ព្ទ ព្រះតេជគុណ អ៊ិន វុទ្ធី លើកឡើងថា អាជ្ញាធរមូលដ្ឋានបានឃ្លាំមើលចលនារបស់ព្រះអង្គយ៉ាងជិតស្និទ្ធមួយថ្ងៃក្រោយការបោះឆ្នោត។ ព្រះតេជគុណ អិុន វុទ្ធី បានមានសង្ឃដីកាថា “ អាត្មាស្រឡាញ់ប្រទេសជាតិ ហើយអាត្មាគ្មានបំណងបង្កអំពើហិង្សាទេ។ អាត្មាគ្រាន់តែចង់ឃើញប្រជាពលរដ្ឋខ្មែរចេះសាមគ្គីគ្នាប៉ុណ្ណោះ”។
ព្រះតេជគុណ អ៊ិន វុទ្ធី បានមានសង្ឃដីកាបន្ថែមទៀតថា ព្រះអង្គមិនបានចូលរួមក្នុងកុបកម្មនោះឡើយ។ ក្រុមមន្ត្រីកងរាជវុធហត្ថបានលើកឡើងកាលពីថ្ងៃច័ន្ទថា ពួកគេកំពុងធ្វើការសើុបអង្កេតកុបកម្មនេះ។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថបានលើកឡើងនៅក្នុងបណ្តាញទំនាក់ទំនងសង្គមហ្វេសប៊ុករបស់លោកកាលពីម្សិលមិញថា អ្នកដែលបំផ្លាញទ្រព្យសម្បត្តិសាធារណៈ “ត្រូវផ្តន្ទា ទោស” តាមច្បាប់។ លោកឧត្តមសេនីយ៍ត្រី ខេង ទីតូ ក៏បានមានប្រសាសន៍តាមទូរស័ព្ទផងដែរថា លោកឧត្តមសេនីយ៍ឯក វង្ស ពិសេន មេបញ្ជាការរងកងរាជអាវុធហត្ថលើផ្ទៃប្រទេសត្រូវបានចាត់តាំងឲ្យជួយលោកឧត្តមសេនីយ៍ឯក យ៉ា គឹមអ៊ី មេបញ្ជាការកងរាជអាវុធហត្ថរាជធានី ដើម្បីការពារសណ្តាប់ធ្នាប់ក្នុងរាជធានី។
លោកឧត្តមសេនីយ៍ឯក យ៉ា គឹមអ៊ី បានមានប្រសាសន៍ថា “ ខ្ញុំមិនត្រូវបានជំនួសដោយលោកឧត្តមសេនីយ៍ឯក វង្ស ពិសេន ទេ។ ប៉ុន្តែ ប្រសិនបើមានការរំលោភបំពានណាមួយកើតឡើង ដូចជា អំពើហិង្សានៅការិយាល័យបោះឆ្នោតសង្កាត់ស្ទឹងមានជ័យជាដើមនោះ យើងនឹងសុំជំនួយពីកងរាជអាវុធហត្ថលើផ្ទៃប្រទេស”៕
(រាយការណ៍បន្ថែមដោយ សាំង សុឥន្ទរិទ្ធ)
ប្រែសម្រួលដោយ សោម សារុន