30 C
Phnom Penh

ក្រុម​ប្រឹក្សា​ស្រុក​ដឹកនាំ​ដោយ​គណបក្ស​ប្រជាជន​កម្ពុជា​ដក​សមាជិក​ក្រុម​ប្រឹក្សា​គណបក្ស​ប្រឆាំង​ពីរ​រូប

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​ថា សមា​ជិក​ក្រុម​ប្រឹក្សា​​​​ស្រុក​ពីរ​រូប​មក​ពី​គណបក្ស​ សម រង្ស៊ី​ត្រូវ​បាន​បណ្តេញ​ចេញ​ពី​តួ​នាទី​របស់​ខ្លួន​នៅ​ក្នុង​ខេត្ត​កំពង់​ឆ្នាំង​កាលពី​ម្សិល​មិញ  ​ដោយ​ក្រសួង​មហា​ផ្ទៃ ដែល​បាន​អះ​អាង​ថា សមា​​​ជិក​ក្រុម​ប្រឹក្សា​ទាំងពីរ​រូប​នេះ​បាន​បោះបង់​ចោល​តួនាទី​របស់​ខ្លួន​ដោយ​បាន​ទៅ​ចូលរួម​ក្នុង​យុទ្ធនាការ​ឃោស​នា​បោះ​ឆ្នោត​ឲ្យ​គណ​​​បក្ស​សង្គ្រោះ​ជាតិ។

លោក សៅ​​​ ហន និង​លោក​​​ ឈុន ឈឿន សមាជិក​ក្រុម​ប្រឹក្សា​ស្រុក​សាមគ្គី​មាន​ជ័យ​ត្រូវ​បាន​បណ្តេញ​ចេញ​ពី​តួនាទី​អំឡុង​កិច្ច​ប្រជុំ​ជាមួយ​លោក​ កៅ ហុន ប្រធាន​ក្រុម​ប្រឹក្សា​​​​​​​ស្រុក និង​សមាជិក​ក្រុម​ប្រឹក្សា​១៦រូប​ផ្សេងទៀត​ដែល​សុទ្ធ​តែ​ជា​សមាជិក​គណ​​​បក្ស​​​​​​​ប្រជា​ជន​កម្ពុជា។

គណបក្ស​ សម រង្ស៊ី និង​គណបក្ស​សិទ្ធិ​​​មនុស្ស​បាន​ច្របាច់​បញ្ចូល​គ្នា​កាល​ពី​ខែ​វិច្ឆិកា ដើម្បី​បង្កើត​ជា​គណបក្ស​សង្គ្រោះ​ជាតិ។ លោក កៅ​ ហុន​ បាន​បញ្ជាក់​ពី​ការ​បណ្តេញ​ចេញ​នេះ​ដោយ​លើក​ឡើង​ពី​លិខិត​មួយ​ច្បាប់​ចុះ​ថ្ងៃ​ទី​២ ខែ​កក្កដា និង​ចុះហត្ថលេខា​ដោយ​លោក ស ខេង រដ្ឋមន្ត្រី​ក្រសួង​មហា​​​ផ្ទៃ​មក​ពី​គណបក្ស​ប្រជាជន​កម្ពុជា​មាន​​​ខ្លឹម​​​សារ​ថា សមា​ជិក​ក្រុម​ប្រឹក្សា​ទាំង​ពីរ​រូប​នេះ​នឹង​បោះ​បង់​ចោល​តួ​នាទី​របស់​ខ្លួន​ ប្រសិន​បើ​ពួក​គេ​ក្លាយជា​សមាជិក​គណ​បក្ស​ពីរ​ក្នុង​ពេល​ដំណាលគ្នា។

លិខិត​របស់​លោក​រដ្ឋ​មន្ត្រី​ដែល​និយាយ​ពី​ការ​បន្ត​គោល​​នយោ​បាយ​ដែល​ប្រើប្រាស់​ដោយ​គណបក្ស​ប្រជា​ជន​កម្ពុជា​នៅ​​មុន​ការ​បោះ​ឆ្នោត​នោះ​មាន​ខ្លឹម​សារ​ថា “ ​ទាំង​សមា​​​ជិក​ពេញ​សិទ្ធិ និង​សមាជិក​បម្រុងគណ​​​បក្ស​​ត្រូវ​តែ​ឈប់​ពី​គណបក្ស​ចាស់​នៅ​ពេល​ពួក​​​គេ​ចូលរួម​ជាមួយ​គណបក្ស​នយោ​​​បាយ​ថ្មី”។

កាលពី​ខែ​មិថុនា គណៈកម្មការ​អចិ​ន្ត្រៃ​យ៍​​សភា​ដែល​សុទ្ធតែ​ជា​​សមាជិក​គណបក្ស​ប្រជា​ជន​កម្ពុជានោះ បាន​សម្រេច​ដក​សមា​​​ជិក​សភា​គណបក្ស​ សម រង្ស៊ី និង​គណបក្ស​សង្គ្រោះ​ជាតិ​២៧រូប​ចេញ​ពី​តួនាទី​ និង​ប្រាក់​ខែ​របស់​​សមាជិកសភា​ទាំង​នោះ​​ ពីព្រោះ​ពួកគេ​បាន​រួម​គ្នា​ ដើម្បី​បង្កើត​ជា​គណបក្ស​សង្គ្រោះ​ជាតិ។

លោក សៅ ហន ជា​សមាជិក​ក្រុម​ប្រឹក្សា​មួយ​រូប​ក្នុង​ចំណោម​សមាជិក​ក្រុម​ប្រឹក្សា​ពីរ​រូប​ដែល​ត្រូវ​បាន​បណ្តេញ​ចេញ​នោះ​បាន​មាន​ប្រសាសន៍​ថា លោក​​​​ និង​ លោក​ ឈុន​ ឈឿន គឺ​ជា​ជន​រងគ្រោះ​ដោយ​ភាព​​​អយុត្តិ​​​ធម៌ ហើយ​ត្រូវ​បាន​ដាក់​ទណ្ឌកម្ម​ដោយ​គ្រាន់​តែ​បាន​លើក​ស្លាក​សញ្ញា​គណបក្ស​សង្គ្រោះ​ជាតិ​នៅ​មុខ​ផ្ទះ​របស់​ខ្លួន។ លោក​បាន​មាន​ប្រសាសន៍​ថា “ អាណត្តិ​តាម​រយៈ​ការជាប់ឆ្នោត​របស់​យើង​នឹងបញ្ចប់​​បន្ទាប់ពី​ការ​បោះ​ឆ្នោត​ថ្នាក់​ស្រុក​និង​ថ្នាក់​ខេត្ត​​​​នៅ​ខែ​ឧសភា​ឆ្នាំ​ក្រោយ​ឯណោះ”។

លោក ដួង ចាន់​តារា សមា​ជិក​ក្រុម​ប្រឹក្សា​ខេត្ត​គណបក្ស​​ សម រង្ស៊ី បាន​មាន​ប្រសាសន៍​ថា គណបក្ស​ សម រង្ស៊ី នៅ​ក្នុង​ខេត្ត​កំពង់​ឆ្នាំង​នៅតែ​មាន​សមាជិក​ក្រុម​ប្រឹក្សា​ខេត្ត​បី​រូប ក្រុម​​​ប្រឹក្សា​ស្រុក​២០រូបនៅក្នុង​ស្រុក​ចំនួន​ប្រាំ​បី និង​សមាជិក​ក្រុម​ប្រឹក្សា​ឃុំ​សង្កាត់​៨៧រូបនៅក្នុង​ឃុំ​សង្កាត់​ចំនួន​៦៩ រហូត​ដល់​​ការបោះ​ឆ្នោត​នៅ​ខែ​ឧសភា​ឆ្នាំ​២០១៤។ លោក​ ចាន់​តារា បាន​មាន​ប្រសា​សន៍​ថា  “ ប្រធាន​ក្រុម​ប្រឹក្សា​ស្រុក​ក៏បាន​គំរាម​កំហែង​បណ្តេញ​សមាជិក​ក្រុម​ប្រឹក្សា​ឃុំ​សង្កាត់​គណ​​​បក្ស​ សម រង្ស៊ី ផង​ដែរ ប៉ុន្តែ​ លោក​បាន​ធ្វើ​រឿង​នេះ​នៅ​ថ្នាក់​ស្រុក​មុន”។

លោក​ យឹម សុវណ្ណ អ្នក​នាំ​ពាក្យ​គណបក្ស​សង្គ្រោះ​ជាតិ​បាន​មាន​ប្រសា​សន៍​ថា លោក​បាន​ដឹង​អំពីការ​បណ្តេញ​​ចេញ​នេះ​ ប៉ុន្តែ​ បាន​មាន​ប្រសាសន៍​ថា គណបក្ស​របស់​លោក​មិន​​ទាន់​ដឹង​ថា​ តើ​មាន​សមាជិក​ក្រុម​ប្រឹក្សា​ប៉ុន្មាន​រូប​ត្រូវ​បាន​បណ្តេញ​ចេញ​ពី​តួនាទី​របស់​ខ្លួន​នៅ​ទូទាំង​ប្រទេស​ឡើយ។

លោក​បាន​មាន​ប្រសាសន៍​ថា “ ខ្ញុំ​យល់​ថា គណបក្ស​ប្រជា​ជន​កម្ពុជា​បាន​ប​ណ្តេញ​សមា​​​ជិក​របស់​យើង​ចេញ ដែល​​ផ្ទុយ​ទៅ​នឹង​ច្បាប់​ ពីព្រោះ​តួនាទី​របស់​ខ្លួន​នៅ​មាន​សុពល​ភាព​រហូត​ដល់​ក្រោយ​ការ​បោះ​ឆ្នោត​ថ្នាក់​ស្រុក​និង​ថ្នាក់​ខេត្ត​ឯណោះ”។

លោក កៅ ហុន ប្រធាន​ក្រុម​ប្រឹក្សា​ស្រុក​បាន​បដិសេធ​មិន​ធ្វើ​អត្ថា​ធិប្បាយ​ទេ ចំណែក​ឯ​លោក សោម ម៉េង​ អភិបាល​រង​ស្រុក​បាន​អះ​អាង​ថា សមា​ជិក​ក្រុម​ប្រឹក្សា​ទាំង​នេះ​ត្រូវ​បាន​បណ្តេញ​ចេញ​មែន ប៉ុន្តែ​ បាន​បដិសេធ​មិន​បរិយាយ​លម្អិត​ឡើយ៕

    ប្រែ​សម្រួល​ដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស