អ្នកគាំទ្រគណបក្សសង្គ្រោះជាតិដែលត្រូវបានគេបដិសេធមិនឲ្យបោះឆ្នោតនោះកាលពីម្សិលមិញ ត្រូវបានផ្ដល់វិធីថ្មីមួយ ដើម្បីធ្វើ ពាក្យបណ្ដឹងរបស់ពួកគាត់ជាផ្លូវការ ដោយគណបក្សនេះបានអញ្ជើញប្រជាពលរដ្ឋទាំងអស់មកជួបជុំគ្នានៅទីស្នាក់ការរបស់ខ្លួននៅក្នុងខណ្ឌទួលគោក កាលពីព្រឹកមិញនេះ ដើម្បីចាប់ផ្ដើមធ្វើពាក្យបណ្ដឹងបញ្ជូនទៅគណៈគណៈកម្មាធិការជាតិរៀបចំការបោះឆ្នោត។
លោក សុន ឆ័យ បេក្ខជនតំណាងរាស្ត្រជាន់ខ្ពស់មកពីគណបក្សសង្គ្រោះជាតិបានមានប្រសាសន៍កាលពីម្សិលមិញថា ការស៊ើបអង្កេតបឋមរបស់ខ្លួនបានរកឃើញថា អ្នកគាំទ្រគណបក្សសង្គ្រោះជាតិចំនួន២០០.០០០នាក់ត្រូវបានបដិសេធមិនឲ្យបោះឆ្នោតកាលពីថ្ងៃអាទិត្យ ដោយសារពួកគាត់មិនមានឈ្មោះក្នុងបញ្ជីឈ្មោះបោះឆ្នោត ឬឈ្មោះរបស់ពួកគាត់ត្រូវបានគេបោះជំនួសរួចហើយ។
លោក សុន ឆ័យ ដែលបានអំពាវនាវឲ្យមានការអត់ធ្មត់បន្ទាប់ពីការបោះឆ្នោតកាលពីថ្ងៃអាទិត្យ ហើយរង់ចាំរហូតដល់ចេញលទ្ធផលផ្លូវការណ៍សិននោះ បានមានប្រសាសន៍កាលពីម្សិលមិញថា ការជួបជុំនៅទីស្នាក់ការគណបក្សក្នុងខណ្ឌទួលគោក អាចផ្ដល់ឱកាសដល់អ្នកមិនសុខចិត្តឲ្យសម្តែងការមិនសប្បាយចិត្តរបស់ខ្លួន។
លោកថ្លែងបន្តថា “ មានប្រជាពលរដ្ឋមានកំហឹងជាច្រើនដែលមានសិទ្ធិបោះឆ្នោត ប៉ុន្តែត្រូវគេដកសិទ្ធិមិនឲ្យបោះឆ្នោត ហើយយើងត្រូវតែផ្ដល់ឱកាសឲ្យពួកគាត់លើកឡើងអំពីកង្វល់របស់ខ្លួន”។ លោកបាមានប្រសាសន៍បន្តថា “ វាមានសារៈសំខាន់ខ្លាំងណាស់ដែលយើងត្រូវតែប្រមូលភ័ស្តុតាងជាផ្លូវការហើយបញ្ចូលគ្នាជាមួយភ័ស្តុតាងពីភ្នាក់ងាររបស់យើងនៅតាមការិយាល័យបោះឆ្នោតនានា ដើម្បីដាក់ជូនទៅគណៈកម្មាធិការជាតិរៀបចំការបោះឆ្នោត”។
លោក សុន ឆ័យ ដែល លទ្ធផលបឋមនៃការបោះឆ្នោតកាលពីថ្ងៃអាទិត្យនេះបានទទួលអាសនៈ១នៅក្នុងសភាបន្ទាប់ពីលោកឈរឈ្មោះជាបេក្ខជនលេខរៀងទី៣ សម្រាប់មណ្ឌលរាជធានីភ្នំពេញនោះបានថ្លែងថា ការជួបជុំនេះត្រូវធ្វើឡើងជារៀងរាល់ថ្ងៃរហូតដល់ប្រមូលបានពាក្យបណ្ដឹងទាំងអស់ ហើយបញ្ជូនទៅឲ្យមន្ត្រីនៅតាមបណ្ដាស្ថាប័នពាក់ព័ន្ធនិងក្រុមអ្នកសង្កេតការណ៍។
លោកបន្តទៀតថា “ យើងបានអញ្ជើញគណៈកម្មាធិការជាតិរៀបចំការបោះឆ្នោត អង្គការ ខុមហ្វ្រែល អង្គការ និកហ្វិច ឲ្យមកចូលរួមនិងស្ដាប់នូវការលើកឡើងរបស់ប្រជាពលរដ្ឋ។ជាពិសេស គណៈកម្មាធិការជាតិរៀបចំការបោះឆ្នោតនេះឯងដែលជាអ្នកពាក់ព័ន្ធក្នុងការកេងបន្លំសន្លឹកឆ្នោតនេះមុនគេ”៕
(រាយការបន្ថែមដោយ ម៉ិច ដារ៉ា)
ប្រែសម្រួលដោយ ឃិន ណៃ