28 C
Phnom Penh

បក្ស​ប្រឆាំងកើន​​អាសនៈ​​ដោយសារ​យុទ្ធ​​​សាស្ត្រ​ទំនាក់​ទំនង​សង្គម និងការចុះដល់​មូលដ្ឋាន

ដោយ ឌឹ ខេមបូឌា ដេលី

បទវិភាគ

នៅ​មុន​ការ​បោះ​ឆ្នោត​កាល​ពី​ថ្ងៃ​អាទិត្យ បណ្តា​ស្ថានីយទូរទស្សន៍​ក្នុង​ស្រុក​បាន​ចាក់​ផ្សាយ​​យ៉ាង​ច្រើន​អំពីលោកនាយក​រដ្ឋមន្ត្រី ហ៊ុន សែន​ ដែល​ បង្ហាញពី​ទឹក​មុខ​​​ចង​ចិញ្ចើម​ ឬ​សប្បាយ​រីក​រាយ​របស់​លោក។

កម្ម​វិធី​ផ្សាយ​ផ្សេងៗ​ទៀត​ដែល​យើង​អាច​ទស្សនា​បានរួម​មាន វីដេអូ ខារ៉ា​អូខេ ឬ​ខ្សែ​ភាព​យន្ត​ភាគ​ ប៉ុន្តែ ការ​ចាក់​ផ្សាយ​តែ​មួយ​គត់​អំពី​បក្ស​សង្គ្រោះ​ជាតិ​ បង្ហាញ​ពី​​​​សកម្ម​​​ភាព​​​ក្រុម​យុវជន​ស្លៀក​សម្លៀក​បំពាក់​ធ្វើ​យុទ្ធនា​ការ​ឃោសនា​រាំ ដែល​ទំនង​ជា​ស្រវឹង​ស្រា​។

លោក ហ៊ុន សែន ដឹង​ច្បាស់​ថា គណ​បក្ស​លោក​មាន​ប្រៀប​ផ្នែកប្រព័ន្ធ​ផ្សព្វ​ផ្សាយ​។ លោក​បាន​ឡកឡាយ​ឲ្យ​គណ​បក្ស​ សម​ រង្ស៊ី និង​គណ​បក្ស​សិទ្ធិ​មនុស្ស នៅ​មុន​ការ​បោះ​ឆ្នោត​ជាតិ​ឆ្នាំ​ក្នុង២០០៨​ថា “ អ្នក​ឯង​មាន​មួយ​ប៉ុស្តិ៍ យើងមាន​៣៩​ប៉ុស្តិ៍”។

ប៉ុន្តែ លទ្ធផល​បឋម​នៃ​ការ​បោះ​ឆ្នោត​កាល​​ពី​ថ្ងៃ​អាទិត្យ​ ដែល​បាន​បង្ហាញ​ថា សំឡេង​គាំទ្រ​​ភាគ​ច្រើន​របស់​គណ​បក្ស​កាន់​អំណាច​បាន​ធ្លាក់​ចុះ​ពី​៩០​អាសនៈមក​នៅ​ត្រឹម​៦៨​អាសនៈ​នោះ បាន​បង្ហាញ​ពី​ការ​ភ្ញាក់​ផ្អើលយ៉ាង​ខ្លាំង ហើយ​ថ្វីបើ​គណ​បក្ស​ប្រជា​ជន​កម្ពុជាគ្រប់​គ្រង​ប្រព័ន្ធ​ផ្សព្វ​ផ្សាយ​ស្ទើរ​តែ​ទាំង​ស្រុង​ក៏​ដោយ ក៏​គណ​បក្ស​ប្រឆាំង​នៅ​តែ​អាច​ផ្សព្វ​ផ្សាយ​សារ​របស់​ខ្លួន​បាន​ដដែល។

លោក សុន ឆ័យ ប្រធានក្រុម​តំណាង​រាស្ត្ររបស់គណ​បក្ស​សង្គ្រោះ​ជាតិ​បាន​មាន​ប្រសាសន៍​កាល​ពី​ម្សិល​មិញ​ថា ការ​ប្រែ​ប្រួល​ចំនួន​អាសនៈ​នេះ បាន​កើត​មា​ន​ឡើង​ដោយ​សារ​​តែ​គណ​បក្ស​ប្រជា​ជ​ន​កម្ពុជា​ពឹង​ផ្អែក​ខ្លាំង​​ពេក​ទៅ​លើ​ការ​គ្រប់​គ្រង់​របស់​ខ្លួន​លើ​ប្រព័ន្ធ​​ផ្សព្វ​ផ្សាយ​។

លោក​បាន​មាន​ប្រសាសន៍ថា “ ពួក​គេ​បរា​ជ័យ​នៅ​ក្នុងការ​បោះ​ឆ្នោត​នេះ ដោយ​សារ​តែ​​ពួក​គេ​គិត​ខុស​។ ពួក​គេ​គិត​ថា ប្រសិន​បើ​ពួក​គេ​ប្រើ​ប្រាស់​ស្ថានីយទូរទស្សន៍ ​ពួកគេ​អាច​​ទទួល​បាន​ការគាំទ្រ​​ពី​ប្រជា​ពល​រដ្ឋ​គ្រប់​រូប​ដោយ​មិន​ចាំ​បាច់​មានភាព​ស្មោះ​ត្រង់ ឬ​បង្កើត​​សង្គម​មួយ​ដែល​មាន​យុត្តិ​ធម៌​នោះ​ឡើយ”។​ លោក​​បានមាន​ប្រសាសន៍​បន្ត​ទៀត​ថា “​ដំណោះ​​ស្រាយ​របស់​យើង​ គឺ​ត្រូវ​ចុះ​ជួប​​ប្រជា​​ពលរដ្ឋនៅ​តាម​មូល​ដ្ឋាន​។ យើង​បាន​ចុះ​គ្រប់​ឃំុ​-សង្កាត់ទាំង​អស់​នៅ​ក្នុង​ប្រទេស​​​ ​ដើម្បី​ពន្យល់​ពី​គោល​នយោ​បាយ​របស់​យើង​ និង​ឆ្លើយ​សំណួរ​របស់​ប្រជា​ពល​រដ្ឋ”។

លោក សុន ឆ័យ បាន​មាន​ប្រសាសន៍​ថា លោក​ជឿ​ថា ប្រជា​ពល​រដ្ឋ​កម្ពុជា​ធុញ​ទ្រាន់ នឹង​​​អ្វី​ដែល​លោក​ហៅ​ថា ជាការ​ឃោសនា​របស់​គណ​បក្ស​ប្រជា​ជន​កម្ពុជា។ យោង​តាម​លោកស្រី មូរ សុខហួរ បេក្ខ​ជន​តំណាងរាស្ត្រ​របស់​គណ​បក្ស​សង្គ្រោះជាតិ​បាន​ឲ្យ​​ដឹង​ថា ប្រព័ន្ធ​អីុនធើណិត​ក៏​បាន​ដើរ​តួ​យ៉ាង​​សំខាន់ដែរ នៅ​ក្នុង​ការ​បង្កើន​​ភាព​ជោគ​ជ័យ​នៃ​យុទ្ធសាស្ត្រ​​របស់​គណ​បក្ស​សង្គ្រោះ​ជាតិ​ក្នុង​ការទំនាក់​ទំន​ង​ជាមួយ​ប្រជា​ពលរដ្ឋ​​ពី​ផ្ទះ​មួយ​ទៅ​ផ្ទះ​មួយ។
លោក​ស្រី​បាន​មាន​ប្រសាសន៍​ថា “ នោះ​គឺ​បណ្តាញ​ទំនាក់​ទំនង​សង្គម។ ខ្ញុំ​អាច​និយាយ​បាន​ថា ចន្លោះ​ពី​៨៥​ភាគ​រយ​ទៅ​៩០​ភាគ​រយ​​នៃ​យុវជន​របស់​យើង​នៅ​តាម​តំបន់​ក្រុង អាច​ជួយ​ជំរុញ​ឲ្យ​ប្រជា​ពល​រដ្ឋ​ជួយគាំ​ទ្រ​ជា​រៀង​រាល់​ថ្ងៃ​ ហើយ​ពួក​គេ​សុទ្ធ​តែ​រៀប​ចំ​តាម​ហ្វេសប៊ុក”។

លោក​ ម៉ូញ សារ៉ាត់ អ្នក​ធ្វើ​យុទ្ធនាការ​ឃោស​នាម្នាក់​ក្នុង​ចំណោម​អ្នក​ធ្វើ​យុទ្ធនាការ​ឃោសនារបស់​គណ​បក្ស​សង្គ្រោះ​ជាតិ ដែល​ចុះជួប​ប្រជាពល​រដ្ឋ​ក្នុង​មូលដ្ឋាន​ដោយផ្ទាល់​នៅ​ក្នុង​ស្រុក​សំឡូត​ខេត្ត​បាត់​ដំបង បាន​យល់​ស្រប​ថា លទ្ធ​ផល​នៃ​​ការ​បោះ​ឆ្នោត​បាន​បង្ហាញ​ថា យុទ្ធ​សាស្ត្រ​ទំនាក់​ទំនង​របស់​​បក្ស​សង្គ្រោះ​ជាតិ​ទទួល​​បាន​ជោគ​ជ័យ ប៉ុន្តែ​បាន​លើក​ឡើង​​ថា គណ​បក្ស​ប្រឆាំង​នៅ​តែ​ចាញ់​ប្រៀប​។

លោក​បាន​មាន​ប្រសាសន៍​ថា “ និយាយ​ពី​ប្រសិទ្ធភាព​​នៅ​ក្នុង​ការ​ផ្សាយ​ព័ត៌​មាន​ យើង​មាន​ទំនាក់​ទំនង​មុខ​ពីរ​ ប៉ុន្តែ ក្នុង​មួយ​ថ្ងៃ​​​យើង​​​​អាច​ចុះ​ទៅ​ផ្ទះ​ប្រជា​ពល​រដ្ឋ​បាន​​តិច​តួច​​ប៉ុណ្ណោះ។ ប្រសិនបើ​មាន​ទូរទស្សន៍​ យ៉ាង​ហោច​ណាស់ យើង​អាច​ប្រាប់​ប្រជា​ពល​រដ្ឋ​​ បាន​​​ច្រើន​​​និង​ផ្តល់​ព័ត៌​មានបាន​​​កាន់​តែ​ច្រើន”​​​។

លោក​ សារ៉ាត់ មាន​ប្រសាសន៍​បន្ថែម​ថា ទូរទស្សន៍ក៏​ជួយ​ប្រជា​ពលរដ្ឋ​ដែល​គាំ​ទ្រ​គណ​​បក្ស​សង្គ្រោះជាតិ​ឲ្យ​ជួប​ជំុ​គ្នា​នៅ​តាម​ទី​សាធា​រណ​ដើម្បី​ផ្សព្វ​ផ្សាយ​ពី​គណ​បក្ស​ផង​ដែរ​។ លោក​បានមាន​ប្រសាសន៍​ថា “ នៅ​ពេល​យើង​មើលឃើញ​ការ​វិល​ត្រឡប់​របស់​លោក​ សម រង្ស៊ី ហើយ​យើង​ឃើញ​​ប្រជា​ពល​រដ្ឋ​រាប់​​ម៉ឹន​នាក់​ចេញ​មកទទួលស្វាគមន៍លោក ប្រព័ន្ធ​​ផ្សព្វ​ផ្សាយ​បាន​លើក​ឡើង​ថា មាន​ប្រជា​ពល​រដ្ឋ​ពី​របី​ពាន់​នាក់​​ប៉ុណ្ណោះដែល​បាន​មក​ស្វា​គមន៍ ហើយ​​ប្រជា​ពល​រដ្ឋ​មិន​បាន​ដឹង​ពី​ទំហំ​ពិត​ប្រាកដនេះ​ទេ​”។

លោក​បាន​បន្ត​ថា “ ប្រសិន​បើ​ប្រជា​ពល​រដ្ឋ​បាន​មើល​ឃើញ​រូប​ភាព​ទាំងនោះ ពួក​គាត់​​នឹង​កាន់​តែ​មាន​ការ​ជឿ​ជាក់។ ពួក​គាត់​នឹង​គិត​​ថា “ មិន​មែន​មាន​តែ​ខ្ញុំ​ទេ​ដែល​គាំ​ទ្រ​គណ​បក្ស​​ប្រឆាំង​”  ហើយ​វា​នឹង​​ធ្វើ​ឲ្យ​ប្រជា​ពល​រដ្ឋ​កាន់​​តែ​ចាប់​អារម្មណ៍”។

យោង​តាមលោក កង មាស អនុ​ប្រធាន​ទំព័រ​ព័ត៌​មាន​ទាន់​ហេតុ​ការណ៍​របស់​គណ​បក្ស​សង្គ្រោះ​ជាតិ​ ក្នុង​បណ្តាញ​ទំនាក់​ទំនង​សង្គម​ហ្វេសប៊ុក ដែល​គ្រប់​គ្រង​ចេញ​ពី​ទី​ស្នាក់​កណ្តាល​របស់​គណ​បក្ស​សង្គ្រោះ​ជាតិ ក្នុង​សង្កាត់​ចាក់អង្រែលើ​ ក្នុង​រាជ​ធា​នី​ភ្នំ​ពេញ ​បាន​មាន​ប្រសាសន៍​ថា ប្រព័ន្ធ​អ៊ីនធើណិតជា​មធ្យោ​​បាយ​ទំនាក់​ទំនង​គួរ​ឲ្យ​ទាក់​ទាញ​ជាង​ប្រព័ន្ធផ្សព្វ​ផ្សាយ​សម្រាប់​គណ​បក្ស​សង្គ្រោះ​ជាតិ។​

លោក​មាន​ប្រសាសន៍​ថា “ នេះ​គឺ​ជា​វិធី​តែ​មួយ​គត់​ដែល​យើង​អាចផ្សាយ​ដំណឹង​របស់​យើង​បាន ប៉ុន្តែ​ នៅពេល​យើង​ផ្សាយ វា​បាន​​​​​បន្ត​ពី​មនុស្សម្នាក់ទៅ​មនុស្ស​១០នាក់ ពី​១០​នាក់​ទៅ​រាប់​ពាន់​នាក់”។​ លោក​បាន​មាន​ប្រសាសន៍​បន្ត​ថា “ យើង​គ្មាន​ប្រព័ន្ធ​ផ្សព្វ​ផ្សាយ​ដូច​គណ​បក្ស​កាន់​អំណាច​ទេ ប៉ុន្តែ វា​មាន​ភាព​ងាយ​ស្រួល​ក្នុង​ការ​ផ្សាយ​ដំណឹង​ដោយ​ប្រើ​វិធី​នេះ ពី​ព្រោះ​យើង​មិន​ចាំ​បាច់​ត្រៀម​ទុក​ជាមុន​ឲ្យ​បាន​ល្អ​ដូច​សម្រាប់​ទូរទស្សន៍​ឡើយ​”។

លោក ផៃ ស៊ីផាន អ្នក​នាំ​ពាក្យ​ទី​ស្តី​ការ​គណៈ​រដ្ឋ​មន្ត្រី​បាន​អះ​អាង​ថា ការ​ផ្សព្វ​ផ្សាយ​យ៉ាង​ច្រើនអំពី​គណ​បក្ស​ប្រជា​ជន​កម្ពុជា​នៅ​តាម​ស្ថានីយ​​ទូរទរស្សន៍​នានា មិន​មែន​ជា​គោល​នយោ​បាយ​របស់​រដ្ឋា​ភិបាល​ទេ ពី​ព្រោះ​ម្ចាស់​ស្ថានីយ​ទូរទស្សន៍​អា​ច​ជ្រើស​រើស​ផ្សាយ​នូវ​អ្វី​ដែល​ខ្លួន​ចូល​ចិត្តបាន។

លោក​បាន​មាន​ប្រសាសន៍​ថា “ វា​ដូច​នៅ សហរដ្ឋ​អាមេរិក​ដែរ។ ប្រសិន​បើ​ពួក​គេ​ចូល​ចិត្ត​ពួក​សាធារណ​រដ្ឋ​ ពួក​គេ​គាំ​ទ្រ​ពួក​សាធារណរដ្ឋ​ ប្រសិន​បើពួក​គេ​ចូល​ចិត្ត​ពួក​ប្រជា​ធិបតេយ្យ​​ ពួក​គេ​គាំ​ទ្រ​ពួក​ប្រជា​ធិប​តេយ្យ។ ទៅ​ទី​នេះ​ក៏​ដូច​គ្នា​ ពួក​គេ​មិន​ចូល​ចិត្ត​ [គណ​បក្ស​សង្គ្រោះ​ជាតិ] ទេ”។

លោកថ្លែងថា “ ប៉ុន្តែវា​មិន​ប៉ះ​ពាល់​ខ្លាំង​ដល់​ថ្នាក់​នោះ​ទេ។[គណបក្ស​សង្គ្រោះ​​​​ជាតិ​] ប្រើ​ប្រាស់​កម្ម​វិធី​ផ្សាយ​ដែលទទួល​បាន​មូល​និធិ​ពីសហរដ្ឋអាមេរិក​ ដូច​ជា​វិទ្យុ​អាស៊ី​​​​សេរី​ និង​វិទ្យុ​សំឡេង​សហរ​ដ្ឋ​អាមេរិក ​ជា​ដើម​ ​ជាអ្នក​នាំ​ពាក្យ​របស់​ខ្លួន និង​បណ្តា​អង្គការ​ក្រៅ​រដ្ឋា​ភិបាល​ដែល​មាន​ភាព​លម្អៀង​ដើម្បី​ចេញ​ផ្សាយ​សេចក្តី​ប្រកាស​ព័ត៌មាន​”។

លោក មឿន ឈាន​ណារិទ្ធ​ នាយក​វិទ្យា​ស្ថានកម្ពុជា​សម្រាប់​ការ​សិក្សា​ផ្នែក​ព័ត៌មាន​បាន​មាន​ប្រសាសន៍ថា ​ទោះ​បី​ជា​គណបក្ស​សង្គ្រោះ​ជាតិ​ទទួល​បាន​អត្ថប្រយោជន៍​យ៉ាង​ច្រើន ​​ថ្វី​បើ​ប្រព័ន្ធ​ផ្សព្វ​ផ្សាយ​មាន​ភាព​លម្អៀង​​ក៏​ដោយ​ ក៏ពួកគេ​នៅ​តែ​គួរ​ទទួល​បាន​ការ​ចាក់​​​ផ្សាយ​តាម​ទូរ​ទស្សន៍ដែរ។

លោក​បាន​មាន​ប្រសាសន៍​បន្ត​ថា “ នឹង​មាន​ការ​ចរចា​ផ្នែក​នយោ​បាយ​ មុន​ពេល​រដ្ឋា​ភិបាល​ត្រូវ​បាន​បង្កើត​ឡើង។ លក្ខខណ្ឌមួយ​ក្នុង​ចំណោម​លក្ខខណ្ឌ​ដែល​គណ​បក្ស​ប្រឆាំង​អាច​នឹង​ព្យា​យាម​ចរចា​ជាមួយ​គណ​បក្ស​កាន់​អំណាច​ គឺ​ការទទួល​បាន​ប្រព័ន្ធ​ផ្សព្វ​ផ្សាយ គឺយ៉ាង​​ហោច​ណាស់​ក៏​អាច​បង្កើត​ស្ថានីយ​ទូរ​ទស្សន៍​មួយ​ដោយ​ខ្លួន​ឯងដែរ​”។ វា​ជា​គោល​បំណង​មួយ​ដែល​លោក​ស្រី មូរ សុខហួរ មាន​ប្រសាសន៍​ថា គណ​បក្ស​របស់​​លោក​​នឹង​ផ្តោត​ការ​យក​ចិត្ត​ទុក​ដាក់​​​នៅ​ក្នុង​អាណត្តិ​ខាង​មុខ ប៉ុន្តែ វាជា​គោល​បំណង​មួយ​ដែល​លោក​ ខាលីល ថេយ័រ (Carlyle Thayer) អ្នក​ជំនាញខាង​តំបន់​អាស៊ី​អាគ្នេយ៍​នៅ​រាជ​បណ្ឌិត្យ​សភា​កង​ទ័ពការ​ពារ​ជាតិ​អូស្ត្រាលី​ ​បាន​មាន​ប្រសាសន៍​ថា ប្រហែល​ជា​មិន​សូវ​មាន​សារៈ​សំខាន់​ទេ​នៅ​ក្នុង​ប្រទេស​កម្ពុជា​។

លោក​មាន​ប្រសាសន៍​ថា “​ នៅ​ក្នុង​ប្រទេស​​វៀត​ណាម​ ប្រជា​ជនអាន​កាសែត​របស់​រដ្ឋា​ភិបាល​ពេលនៅ​កន្លែង​ធ្វើ​ការ​ ប៉ុន្តែ នៅ​ផ្ទះ​ពួក​គេ​អាន​ព័ត៌​មាន​តាម​អាយភែត”។លោក​បានមាន​ប្រសាសន៍​បន្ត​ទៀត​ថា “ សម្រាប់​គណ​បក្ស​ប្រឆាំង [របស់​កម្ពុជា] ការ​​បោះ​ឆ្នោត​របស់​យុវជន​សំខាន់​ខ្លាំង​ណាស់​ ហើយ​ដោយ​អ្នក​គ្រប់​គ្នា​ចេញ​ទៅ​ក្រៅ​សុទ្ធ​តែ​កាន់​ទូរ​ស័ព្ទ​ដៃទៅ​ជាមួយ​ អ្នក​ត្រូវ​សួរ​ថា កន្លែង​ណា​ដែល​ពួក​គេ​ទទួល​បាន​ព័ត៌​មានឲ្យ​ប្រាកដ​នៅ​ពេល​នេះ”៕

(រាយការណ៍​បន្ថែម​ដោយ ម៉ិច ដារ៉ា)
ប្រែសម្រួលដោយ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស