30 C
Phnom Penh

គណបក្ស​សង្គ្រោះ​ជាតិ​​អះអាង​ពី​ជ័យ​ជម្នះ​របស់​ខ្លួន​នៅ​ក្នុងការ​បោះ​ឆ្នោត​ជាតិ​

ដោយ ឌឹ ខេមបូឌា ដេលី

បទវិភាគ

​កាលពី​ម្សិលមិញគណបក្ស​សង្គ្រោះ​ជាតិ​បានការ​ពារ​ការ​អះអាង​របស់​ខ្លួន​ដែល​ថា ខ្លួនទទួល​បាន​សំឡេងភាគ​ច្រើន​យ៉ាង​ប្រកិត​ប្រកៀក​​គ្នា​នៃ​ចំនួន​អាសនៈសរុប​១២៣​នៃ​រដ្ឋ​សភា​​នៅ​ក្នុង​ការ​បោះ​ឆ្នោត​ជាតិ​កាល​ពី​ថ្ងៃ​អាទិត្យ គឺ​ល្មម​គ្រប់​គ្រាន់​នឹង​បង្កើត​រដ្ឋា​ភិបាល​អាណត្តិ​ថ្មីរបស់​ប្រទេស​កម្ពុជាបាន​ ប្រសិន​បើ​តួលេខ​របស់​ខ្លួន​នៅ​ដដែលនោះ​។

លោក សម រង្ស៊ី ប្រធាន​គណបក្ស​សង្គ្រោះ​ជាតិ​បានអះអាង​កាលពី​យប់​ថ្ងៃ​អង្គារ​ថា គណបក្ស​របស់​លោក​ទទួល​បាន​៦៣​អាសនៈ​ ហើយ​បាន​អំពាវ​នាវ​ឲ្យ​លោក​នាយក​រដ្ឋ​មន្ត្រី ហ៊ុន សែន ចុះចេញពីអំណាច។ តែ​ទោះ​ជាយ៉ាង​ណា គណបក្ស​ប្រជា​ជន​កម្ពុជា ដែល​កំពុង​កាន់​អំណាច​របស់​លោក​នាយក​រដ្ឋ​មន្ត្រី​រូប​នេះ​ ក៏កំពុង​​អះអាង​ពី​ជ័យ​ជម្នះ​របស់​ខ្លួន​ដែរ ​បន្ទាប់​ពី​ទទួលបាន៦៨​អាសនៈ​។ តួលេខ​របស់​គណបក្ស​សង្គ្រោះ​ជាតិ​ក៏​ខុស​គ្នា​ច្រើន​ដែ​រ​ពី​តួលេខ​របស់​គណៈ​កម្មាធិការ​ដើម្បីការបោះ​ឆ្នោត​ដោយ​សេរីនិងយុត្តិធម៌​នៅ​កម្ពុជា ហៅ​កាត់​ថា ខុមហ្វ្រែល​​ជា​អង្គការ​​​ឯករាជ្យដែល​បាន​បញ្ជាក់​ថា គណ​បក្ស​កាន់​អំណាច​ទទួល​បាន​៦៧​អាសនៈ និង​ជា​អ្នក​ឈ្នះ​ការ​បោះ​ឆ្នោត​។ គណៈកម្មាធិការ​ជាតិ​រៀប​ចំ​ការ​បោះ​ឆ្នោត​ ហៅ​កាត់​ថា គ.ជ.ប. នឹង​ចេញផ្សាយ​លទ្ធ​ផល​ផ្លូវ​ការ​នៅ​ថ្ងៃ​ទី ១០ ខែ​សីហា។

លោក​ស្រី​ ​មូរ សុខហួរ ប្រធាន​​ទទួល​បន្ទុក​​​​​កិច្ច​ការ​សាធា​រ​ណ​ៈ​នៅ​គណ​បក្ស​សង្គ្រោះ​​ជាតិ​ ​មាន​ប្រសា​សន៍​កាល​ពី​ម្សិល​មិញ​ថា គណ​បក្ស​របស់​លោក​​ស្រី​គាំ​ទ្រ​ការ​អះ​អាង​របស់​ខ្លួនដែល​ថា​ ខ្លួន​ទទួល​បាន​៦៣​អាសនៈ។ លោក​ស្រី​បាន​ប្រសាសន៍​ថា “ យើង​​មាន​លទ្ធ​ផល​ទាំង​អស់​ បាន​ពី​គ្រប់ការិយា​ល័យ​បោះ​ឆ្នោត​”។

លោក សម រង្ស៊ី បាន​មាន​ប្រសាសន៍​កាល​​ពី​ថ្ងៃ​អង្គារ​ថា ចំនួន​អាសនៈ​សភា​របស់​ខ្លួន​អាច​នឹង​កើន​ឡើង​ច្រើន​ជាង​នេះ​។ ប៉ុន្តែ លោក​ស្រី​ មូរ សុខហួរ បាន​មាន​ប្រសាសន៍​ថា ពេល​នេះ​ប្រហែល​ជា​មិន​អាច​ទៅ​រួច​ទេ​ ពី​ព្រោះ​ខ្លួន​បាន​រាប់​ទម្រង់​១១០៤​ទាំង​អស់​​ចេញ​ដោយគ.ជ.ប. ដែល​ខ្លួន​បាន​ប្រើ​ប្រាស់​ដើម្បី​ចេញ​តួលេខ​របស់​ខ្លួន។ លោក​ស្រី​មាន​ប្រសាសន៍​ថា ពេល​នេះ​គណ​បក្ស​របស់​លោក​ស្រី​គ្រោងដាក់​ជូន​ភ័ស្តុតាង​របស់​ខ្លួន​ទៅ​គណៈ​កម្មា​ធិការ​មួយ​របស់​អង្គការ​​អាដហុក ដែល​ខ្លួន​សង្ឃឹម​ថា នឹង​បង្កើត​ឡើង​ដើម្បី​ស៊ើប​អង្កេត​ពី​សេចក្តី​​រាយ​ការណ៍​អំពី​ភាព​មិន​ប្រក្រតី​យ៉ាង​ច្រើន​​ដែល​​បានកើត​មាន​ឡើង​នៅក្នុង​ថ្ងៃ​បោះ​ឆ្នោត។

លោក​ស្រី មូរ សុខ​ហួរ បាន​​មាន​ប្រ​សា​សន៍​​ថា តួលេខ​សរុប​របស់​គណ​បក្ស​លោក​ស្រី​ខុស​គ្នាពី​តួលេខ​របស់​អង្គ​ការ​ខុម​ហ្វ្រែល​ ឆ្ងាយ​ណាស់ ពីព្រោះ​អង្គការ​ឃ្លាំ​មើល​ការ​បោះ​ឆ្នោតមួយ​នេះ​​បាន​ប្រើ​ប្រាស់​តែ​តួលេខ​​បាន​ពី​ការិយាល័យ​បោះ​ឆ្នោត​មួយ​ចំនួន​ប៉ុណ្ណោះ។ ក្នុង​ចំណោម​ការិយាល័យ​បោះ​ឆ្នោត​ទាំង​១៩.០០៩​នៅ​ទូ​ទាំង​ប្រទេស លោក​ស្រី គង់ រ៉ាវីន អ្នកសម្រប​សម្រួល​ផ្នែក​អង្កេត​របស់​​អង្គការ​ខុមហ្វ្រែល​ បាន​មាន​ប្រសាសន៍ថា ក្រុម​របស់​លោក​ស្រី​​បាន​យកតួលេខពី​ការិយាល័យ​បោះ​ឆ្នោត​ចំនួន​១.៤៧០​ការិយា​ល័យ​ក្នុង​ចំណោម​ការិយាល័យ​បោះ​ឆ្នោត​​ទាំង​អស់។

លោក​ស្រី​បាន​បដិសេធ​មិន​ធ្វើ​អត្ថា​ធិ​ប្បាយ​ថា តើ​លោក​ស្រី​គិត​ថា តួលេខ​របស់​គណ​បក្ស​សង្គ្រោះ​ជាតិ​អាច​ជឿ​ទុក​ចិត្ត​បាន​ ឬយ៉ាង​ណា​នោះ​ទេ។ លោក​ស្រី​បានមាន​ប្រសាសន៍ថា “ ប្រសិន​​បើ​គណ​បក្ស​សង្គ្រោះ​ជាតិ​មានលទ្ធ​ផល​ផ្សេង​​គ្នា​ពី​គ.ជ.ប. យើង​នឹង​ពិនិត្យ​មើល​ភ័ស្តុតាង​​​ដូច​ជា​ទម្រង់​១១០៤​ជាដើមនៃ​​ការិយា​ល័យ​បោះ​ឆ្នោត​ទាំង​អស់”។

លោក ខៀវ កាញារីទ្ធ រដ្ឋ​មន្ត្រី​ក្រសួង​ព័ត៌​មាន​ ដែល​បាន​ចេញ​ផ្សាយ​តួ​លេខ​របស់​គណ​បក្ស​ប្រជា​ជន​កម្ពុជា កាល​ពី​ល្ងាច​ថ្ងៃ​អាទិត្យ​មិន​ឆ្លើយ​តប​នឹង​សំណើ​សុំការ​បំភ្លឺ​ទេ។

លោក ទេព នីថា អគ្គ​លេខា​ធិការ​នៃ​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត​ មិន​បាន​ធ្វើ​អត្ថា​ធិប្បាយ​អំពី​តួ​លេខ​របស់​គណ​បក្ស​ប្រឆាំង​ទេ​ ប៉ុន្តែ បាន​មាន​ប្រសាសន៍​ថា គណ​បក្ស​ទាំង​អស់​មាន​សិទិ្ធ​សេរី​ភាព​ក្នុង​ការ​អះ​អាងពី​តួលេខ​ណា​មួយ​តាម​តែខ្លួន​ចង់។ លោក​បាន​បន្ត​ថា “ អ្នក​ណា​​ប្រកាស​ក៏​បាន​​ដែរ វា​ជា​រឿង​របស់​ពួក​គេ​ ប៉ុន្តែ យើង​មាន​​តួលេខ​របស់​យើង​ហើយ​។ យើង​នឹង​ចេញ​ផ្សាយ​លទ្ធ​ផល​បឋម​នៅ​ថ្ងៃ​ទី១០ ខែ​សីហា ដើម្បី​ទុក​ពេល​ឲ្យ​គណ​បក្ស​នយោ​បាយ​តវ៉ា”៕

(រាយការណ៍​បន្ថែម​ដោយ ឃី សុវុឌ្ឍី)
ប្រែ​សម្រួល​ដោយ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស