លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) បានលើកឡើងសាជាថ្មីថា គ.ជ.ប. គ្មានអំណាចធ្វើការស៊ើបអង្កេតរួមគ្នាលើការចោទប្រកាន់ពីភាពមិនប្រក្រតីកើតឡើងនៅក្នុងការបោះឆ្នោតជាតិកាលពីថ្ងៃអាទិត្យនោះទេ រីឯលោក សម រង្ស៊ី មេដឹកនាំគណបក្សប្រឆាំងបានមានប្រសាសន៍ថា ឥឡូវនេះលោកនឹងស្វែងរកការស៊ើបអង្កេតនៅខាងក្រៅ គ.ជ.ប. វិញ។
លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីថ្ងៃពុធថា គណបក្សកាន់អំណាចនឹងចូលរួមនៅក្នុងការស៊ើបអង្កេតរួមគ្នាលើភាពមិនប្រក្រតីជាមួយគណបក្សសង្គ្រោះជាតិ ប្រសិនបើ គ.ជ.ប. ធ្វើតាមសំណើសុំបង្កើតគណៈកម្មាធិការរួមនោះ។ លោក ទេព នីថា បានមានប្រសាសន៍ថា គ.ជ.ប. មានអំណាចត្រួតពិនិត្យពាក្យបណ្តឹងអំពីភាពមិនប្រក្រតីនៅក្នុងការបោះឆ្នោតតែម្នាក់ឯងប៉ុណ្ណោះ ហើយថា ខ្លួនគ្មានអំណាចធ្វើការសុំបអង្កេតផ្សេងទៀតទេ។
លោកបានមានប្រសាសន៍ថា “ ដូចយើងបានឆ្លើយតបទៅឯកឧត្តម សម រង្ស៊ី ហើយ សំណើសុំបង្កើតគណៈកម្មាធិការស៊ើបអង្កេតរួមនេះ ហួសពីសិទ្ធិរបស់ គ.ជ.ប.”។ “ រឿងនេះមិនស្ថិតនៅក្រោមសមត្ថកិច្ចរបស់យើងទេ ប៉ុន្តែ យើងនឹងបង្កើតនីតិវិធីមួយសម្រាប់ឲ្យប្រជាពលរដ្ឋគ្រប់រូបដាក់ពាក្យបណ្តឹងអំពីភាពមិនប្រក្រតីមក គ.ជ.ប. និងគណៈកម្មាធិការរៀបចំការបោះឆ្នោតខេត្តក្រុង”។
លោក ទេព នីថា បានមានប្រសាសន៍ថា ពាក្យបណ្តឹងដែល គ.ជ.ប. និងគណៈកម្មាធិការរៀបចំការបោះឆ្នោតខេត្តក្រុងរបស់ខ្លួនទទួលអំឡុងម៉ោងធ្វើការចន្លោះពីថ្ងៃនេះដល់ថ្ងៃអង្គារនោះ នឹងត្រូវស៊ើបអង្កេតមួយករណីម្តងៗ ហើយមានតែពាក្យបណ្តឹងដែលដាក់ក្នុងរង្វង់ពេលបីថ្ងៃនេះប៉ុណ្ណោះនឹងត្រូវយកមកពិចារណាមុនពេល គ.ជ.ប. ប្រកាសលទ្ធផលបឋមនៅថ្ងៃទី១០ ខែសីហា។
លោកបានមានប្រសាសន៍បន្ថែមទៀតថា “ បន្ទាប់ពីពិនិត្យពាក្យបណ្តឹងនីមួយៗរួចហើយ យើងនឹងអញ្ជើញភាគីទាំងអស់ឲ្យមកចូលរួមកិច្ចប្រជុំ”។ លោក សម រង្ស៊ី និង លោក កឹម សុខា អនុប្រធានគណបក្សសង្គ្រោះជាតិ កាលពីថ្ងៃច័ន្ទ បានទាមទារឲ្យមានការស៊ើបអង្កេតដោយឯករាជ្យលើភាពមិនប្រក្រតីក្នុងការបោះឆ្នោត ដែលអ្នកសង្កេតការណ៍បោះឆ្នោតឯករាជ្យបាននិយាយថា មានច្រើនអំឡុងពេលបោះឆ្នោតជាតិ កាលពីថ្ងៃអាទិត្យ។
យោងតាមមេដឹកនាំគណបក្សប្រឆាំងបានឲ្យដឹងថា គណៈកម្មាធិការដែលបានស្នើឡើងនេះនឹងមានសមាសភាពមកពី គ.ជ.ប. គណបក្សនយោបាយធំៗទាំងពីរ អ្នកសង្កេតការណ៍អន្តរជាតិ ដូចជា សហរដ្ឋអាមេរិក ព្រមទាំងអង្គការសង្គមស៊ីវិលក្នុងស្រុក។
ពេលធ្វើការអត្ថាធិប្បាយកាលពីម្សិលមិញ អំពីអសមត្ថភាពរបស់ គ.ជ.ប. ក្នុងការរៀបចំការស៊ើបអង្កេតដោយឯករាជ្យនេះ លោក សម រង្ស៊ី បានមានប្រសាសន៍ថា គណបក្សប្រឆាំងមិនចាំបាច់ពឹងផ្អែកលើ គ.ជ.ប. ឲ្យសម្របសម្រួលលើការស៊ើបអង្កេតនេះទេ ប្រសិនបើគណបក្សប្រជាជនកម្ពុជាយល់ព្រមទទួលសំណើនេះ។
លោកបានមានប្រសាសន៍បញ្ចេញឈ្មោះអង្គការសហប្រជាជាតិចំៗថា “ គ.ជ.ប. និយាយ ថា ខ្លួនគ្មានអំណាចធ្វើអ្វីបានទេ ដូច្នេះសំណើរបស់យើងគឺថា យើងនឹងធ្វើការស៊ើបអង្កេតជាមួយភាគីជាប់ពាក់ព័ន្ធផ្សេងទៀតដូចជា គណបក្សប្រជាជនកម្ពុជា អង្គការសិទ្ធិមនុស្ស និងអង្គការសង្គមស៊ីវិល”។ លោកបានមានប្រសាសន៍ថា “ យើងចង់បង្កើតយន្តការថ្មីមួយនៅក្នុងក្របខណ្ឌថ្មីដែលកើតចេញពីការព្រមព្រៀងផ្នែកនយោបាយ ដើម្បីដោះស្រាយជម្លោះក្នុងការបោះឆ្នោតទាំងនេះ”។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានមានប្រសាសន៍កាលពីម្សិលមិញថា ទោះបីជា លោក ហ៊ុន សែន បានមានប្រសាសន៍ជាសាធារណៈថា លោកនឹងចូលរួមការស៊ើបអង្កេតរួមគ្នានេះក្រោមការជួយជ្រោមជ្រែងពី គ.ជ.ប. ក៏ដោយ ក៏ចុងក្រោយវានៅតែអាស្រ័យលើ គ.ជ.ប. ដដែលក្នុងការសម្រេចថា តើនឹងត្រូវបង្កើតគណៈកម្មាធិការរួម ឬក៏អត់នោះ។
លោក ផៃ ស៊ីផាន បានមានប្រសាសន៍ថា “ សម្តេចនាយករដ្ឋមន្ត្រី ហ៊ុន សែន លើកឡើងពីគំនិតនេះ និងចង់ឲ្យ គ.ជ.ប. ចូលរួមជាមួយគណៈកម្មាធិការរួមនេះ ប៉ុន្តែ សម្តេចគោរព គ.ជ.ប. និងសមត្ថកិច្ចរបស់ គ.ជ.ប.”។ លោកបានបន្ថែមថា “ សម្តេចនឹងមិនបង្ខំ ឲ្យ គ.ជ.ប. ធ្វើការស៊ើបអង្កេតនោះទេ”។
អ្នករិះគន់ គ.ជ.ប. បានចោទស្ថាប័ននេះជាយូរមកហើយថា បានដាក់សុទ្ធតែមន្ត្រីគាំទ្រគណបក្សប្រជាជន និងចោទថា ធ្វើសេចក្តីសម្រេចគាំទ្រតែគណបក្សកាន់អំណាច។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានមានប្រសាសន៍ថា ទោះបីជាគណបក្សប្រជាជនកម្ពុជា និងគណបក្សសង្គ្រោះជាតិអាចធ្វើការស៊ើបអង្កេតដោយខ្លួនឯងក៏ដោយ ក៏ចុងក្រោយវាជាការទទួលខុសត្រូវរបស់ គ.ជ.ប. ក្នុងនាមជាគណៈកម្មាធិការជាតិរៀបចំការបោះឆ្នោត ដើម្បីសម្របសម្រួលការស៊ើបអង្កេតបែបនេះដែរ។
លោក គល់ បញ្ញា មានប្រសាសន៍ថា “ តាមលក្ខណៈបច្ចេកទេស ពួកគេត្រូវការ គ.ជ.ប.។ ពួកគេអាចធ្វើតែឯងបាន ប៉ុន្តែ គ.ជ.ប. គឺជាអ្នកជាប់ពាក់ព័ន្ធដ៏សំខាន់នៅក្នុងបញ្ហានេះ”។ លោកបានបន្ថែមថា “ គ.ជ.ប. គួរតែឆ្លើយតបនឹងភាគីជាប់ពាក់ព័ន្ធ។ គណបក្សសង្គ្រោះជាតិបានធ្វើសំណើ ហើយគណបក្សប្រជាជនកម្ពុជាបានយល់ស្រប ដូច្នេះពួកគេគួរតែព្យាយាមធ្វើការងារនេះ។ឥទ្ធិពលនេះចេញពីសំណើរបស់ភាគីជាប់ពាក់ព័ន្ធ”។
លោក សុន ឆ័យ បេក្ខជនតំណាងរាស្ត្រជាន់ខ្ពស់គណបក្សសង្គ្រោះជាតិបានយល់ស្របថា វាជាការប្រសើរបំផុតប្រសិនបើ គ.ជ.ប. យល់ព្រមសម្របសម្រួលដល់ការសើុបអង្កេតរួមគ្នានេះ។ លោកបានមានប្រសាសន៍ថា “ វាមិនពាក់ព័ន្ធនឹងពួកគេមានអំណាច ឬគ្មានអំណាចចំពោះបញ្ហានេះទេ ព្រោះ គ.ជ.ប. ជាអ្នកទទួលខុសត្រូវចំពោះការធានាឲ្យមានការបោះឆ្នោតដោយសេរី និងយុត្តិធម៌”។
លោកបានមានប្រសាសន៍អំពីគ.ជ.ប. ថា “ ប្រសិនបើ គ.ជ.ប. មិនដោះស្រាយបណ្តឹងរបស់ខ្លួនតាមវិធីដែលធ្វើឲ្យគណបក្សប្រឆាំង អ្នកសង្កេតការណ៍ជាតិ និងអ្នកសង្កេតការណ៍អន្តរជាតិពេញចិត្តទេនោះ ពួកគេធ្វើការងាររបស់ខ្លួនមិនបានត្រឹមត្រូវនោះទេ។
លោក ទេព នីថា បានលើកឡើងក្នុងសេចក្តីថ្លែងការណ៍ដាច់ដោយឡែកមួយចេញកាលពីយប់ថ្ងៃពុធថា គ.ជ.ប. នឹងប្រកាសលទ្ធផលចុងក្រោយមិនឲ្យហួសពីថ្ងៃទី១០ ខែកញ្ញាទេ។ លោកបានមានប្រសាសន៍ថា “ គ.ជ.ប. នឹងប្រកាសលទ្ធផលជាផ្លូវការ និងការបែងចែកអាសនៈសម្រាប់គណបក្សនយោបាយទាំងពីរ បន្ទាប់ពីខ្លួនដោះស្រាយបណ្តឹងទាំងអស់រួចរាល់ហើយ”៕
ប្រែសម្រួលដោយ មូល គឹមហឿន