34 C
Phnom Penh

គណបក្ស​សង្គ្រោះ​ជាតិ​ច្រានចោល​​​​លិខិត​​​​ឲ្យ​​​កម្មករ​​​​​​កម្មការិនី​​​ទៅ​​​បើក​ប្រាក់​ខែ​​​​​​ថាជា​លិខិត​​​​ក្លែង​បន្លំ​­

ដោយ ឌឹ ខេមបូឌា ដេលី

បទវិភាគ

កាល​ពី​ម្សិលមិញ​ គណបក្ស​សង្គ្រោះ​ជាតិ​បាន​ច្រានចោល​​​​ការ​ផ្សព្វ​ផ្សាយ​តាម​អ៊ីន​​​ធើ​​​ណិត​នូវ​​​​លិខិត​ក្លែង​ក្លាយ​ពីរ​ច្បាប់​​ដែល​មាន​បិត​​​រូប​​​​សញ្ញា​គណបក្ស​របស់​ខ្លួន និង​ដែល​អំពាវ​នាវ​ឲ្យ​កម្មករ​កាត់​ដេរ​​​​ទៅ​ការិយាល័យ​គណបក្ស​ប្រឆាំងនេះ​​​​ដើម្បី​ទទួល​ប្រាក់​។

លិខិត​ទី១​​​​ក្នុង​ចំណោម​លិខិត​ទាំង​ពីរ​ដែល​​​​​​​ចុះ​ថ្ងៃ​ទី​៣០ ខែ​កក្កដា មាន​​ហត្ថលេខា​របស់​លោក សម រង្ស៊ី ប្រធាន​គណបក្ស​សង្គ្រោះ​ជាតិ​ និង​មាន​ខ្លឹម​សារ​ថា គណបក្ស​ប្រឆាំង​ចង់​គោរព​តាម​​​ការ​សន្យា​មុន​ការ​បោះ​ឆ្នោត​ដែល​ថា “​គណបក្ស​សង្គ្រោះ​ជាតិ​នឹង​ផ្ដល់​ប្រាក់​ខែ​ដល់​កម្មករ​ម្នាក់​ៗ​ចំនួន​១៦០​ដុល្លារ​”។

ការ​ដំឡើង​ប្រាក់​ខែ​សម្រាប់​កម្មករ​កម្មកា​​​រិនី​​​រោង​ចក្រ​ និង​មន្ត្រី​រាជ​ការ គឺ​ជា​ចំណុច​សំខាន់​មួយ​នៅ​ក្នុង​កម្មវិធី​​នយោបាយ​របស់​​គណបក្ស​សង្គ្រោះ​ជាតិ​មុន​ការ​បោះ​ឆ្នោត​កាល​ពី​ថ្ងៃ​អាទិត្យ​​​។​​​ គណបក្ស​នេះ​ក៏​បាន​សន្យា​​​​ផ្ដល់​ប្រាក់​ឧបត្ថម្ភ​ប្រចាំ​ខែ​ចំនួន​​​១០​ដុល្លារ​ជូន​ដល់​ពល​រដ្ឋ​ចាស់ជរា​​​​ ប្រសិន​បើ​ខ្លួន​ឈ្នះ​ឆ្នោត​ផងដែរ​​​។

លិខិត​ក្លែង​ក្លាយ​នេះ​មាន​​​ខ្លឹមសារ​​​ថា “ដូច​​បាន​ជម្រាប​​​ជូ​ន​​​ខាងលើ​​​​​ សូម​កម្មករ​កម្មការិនី​​​រោង​​ចក្រ​ទាំង​អស់​អញ្ជើញ​មក​​​​ចុះ​ឈ្មោះ​ និង​​​​នាំមក​​​ជាមួយ​​​នូវ​​​​អត្តសញ្ញាណ​ប័ណ្ណ​ និង​កាត​​​បុគ្គលិក​​​មក​​​កាន់​​​​គ្រប់​ការិយាល័យ​របស់​គណ​បក្សសង្គ្រោះ​ជាតិ​នៅ​ទូទាំង​ប្រទេស​”។​

នៅ​ក្នុង​លិខិត​ក្លែង​ក្លាយ​ទី២​ចុះ​ថ្ងៃ​ទី​៣១​ ខែ​កក្កដា និង​ដែល​​​ត្រូវបាន​​​ផ្សព្វ​ផ្សាយ​តាម​អ៊ីនធើណិត​​​ដែរនោះ​​​​ មាន​​​ការ​​​លើកឡើង​​​ថា​​​គណបក្ស​សង្គ្រោះ​ជាតិ​សារភាព​​​ថា ខ្លួន​មិន​អាច​​​អនុវត្ត​តាម​ការ​សន្យា​អំឡុង​យុទ្ធនាការ​ឃោសនា​បោះឆ្នោត​ ដែល​ត្រូវ​បាន​ធ្វើ​ឡើង​​​​​ក្នុង​​​បំណង​​​តែ​​​មួយ​​​ គឺ​​​ដើម្បី​​​ទាក់ទាញ​​​សន្លឹក​​​​​​​ឆ្នោត​​​ទេ​​​​។ លិខិត​នេះ​មាន​ខ្លឹម​សារ​ថា “គណបក្ស​សង្គ្រោះ​ជាតិ​បាន​សន្យា​ដូច្នេះ​មែន​​​ ក៏ប៉ុន្តែ​  វា​គ្រាន់​តែ​ជា​​​​ល្បិចកល​​​​នយោបាយ​ដើម្បី​ទាក់​​​ទាញ​​​សន្លឹក​ឆ្នោត​ប៉ុណ្ណោះ​។ ​គណបក្ស​សង្គ្រោះ​​ជាតិពុំ​​​មាន​សមត្ថភាព​​​​ក្នុង​​​ការ​​​ផ្ដល់​អ្វី​មួយ​ជូន​​​បងប្អូន​​​​សោះ​ឡើយ​”។

គណបក្ស​សង្គ្រោះ​ជាតិ​បាន​ឆ្លើយ​តប​ចំពោះ​​​លិខិត​​​ក្លែងក្លាយ​​​នេះ​​​តាមរយៈ​​​​សេចក្ដី​ថ្លែងការណ៍​​​ជា​លាយ​លក្ខណ៍​អក្សរ​មួយ​កាល​ពី​ម្សិលមិញ​ ដោយ​បញ្ជាក់​ថា លិខិត​ក្លែង​ក្លាយ​នេះ​ត្រូវបាន​​​ផ្សព្វផ្សាយ​​​ក្នុង​​​​បំណង​​​​​បង្ខូច​​​កេរ្តិ៍​​​ឈ្មោះ​​​គណបក្ស​នេះ​ ​ក្រោយ​ការ​បោះឆ្នោត​ដែល​​គណបក្ស​សង្គ្រោះ​ជាតិ និង​គណបក្ស​ប្រជា​ជន​កម្ពុជា​សុទ្ធតែ​​​បាន​​​អះអាង​​​ពី​​​​​​​ជ័យ​ជម្នះ​រៀងៗ​​​ខ្លួន​​​។​​​

សេចក្ដី​ថ្លែងការណ៍​​​របស់​​​គណបក្ស​ប្រឆាំង​នេះ​​​មាន​​​ខ្លឹមសារ​​​ថា “ក្នុង​រយៈពេល​​​ប៉ុន្មាន​ថ្ងៃ​ថ្មីៗ​នេះ មាន​ពាក្យ​ចចាមអារ៉ាម​ និង​លិខិត​អនា​​​​​​មិក​ជា​ច្រើន​ដែល​ប្រើ​ឈ្មោះ​គណបក្ស​សង្គ្រោះ​​​​ជាតិ​ក្នុង​​​បំណង​បំពុល​បរិយាកាស​ដែល​អាច​នាំ​ឲ្យ​មាន​អស្ថិរភាព​ និង​ចលាចល​ក្នុង​សង្គម​​។​​​ គណបក្ស​សង្គ្រោះ​ជាតិ​សូម​​​ច្រាន​​​ចោល​​​​​​​ទាំងស្រុង​​​នូវ​​​ពាក្យ​ចចាមអារ៉ាម​ និង​លិខិត​អនាមិក​ដែល​ប្រើ​ពាក្យ​មួល​បង្កាច់​ និង​ញុះញង់​​ឲ្យ​មាន​ចលាចល​ក្នុង​សង្គម​”។ គណបក្ស​នេះ​​​បាន​បញ្ជាក់​​​​ថា រាល់​​​ឯកសារ​​ផ្លូវ​ការ​​​​​របស់​​​គណបក្ស​​​នេះ​​​ប្រាកដ​​​ជា​​​​ត្រូវ​បង្ហោះ​​លើ​គេហទំព័រ​​​ផ្លូវការ​​​​ និង​​ទំព័រ​​​ហ្វេស​ប៊ុក​​​​​​​​​​របស់​គណបក្ស​​​ ហើយ​​​នឹង​​​ត្រូវបាន​​​ប្រកាស​​​តាម​​​​​​រយៈ​​​កម្មវិធី​វិទ្យុ​សំឡេង​សង្គ្រោះ​ជាតិ​។

លោក​ យ៉ែម បុញ្ញឫទ្ធិ អ្នក​​​នាំពាក្យ​​​គណ​​​បក្ស​សង្គ្រោះ​ជាតិ​​​ បាន​ឲ្យ​​​ដឹង​​​ថា គណបក្ស​​​លោក​​​មិន​ទាន់​មាន​​តម្រុយ​​​ពាក់ព័ន្ធ​​​នឹង​​​អ្នក​​​​​​​ដែល​​​ស្ថិត​នៅ​ពី​ក្រោយ​លិខិត​ក្លែង​ក្លាយ​ទាំង​​​​​​នេះ​​ទេ​។ លោក​បាន​មាន​​​​​​ប្រសាសន៍​​​​​​​ថា “យើង​មិន​ដឹង​ថា នរណា​សរសេរ​លិខិត​ទាំងនោះ​​​​ឡើយ​ ​​​ក៏​ប៉ុន្តែ​យើង​គ្មាន​គម្រោង​​​ប្ដឹង​ទៅ​តុលាការ​ ឬ​អាជ្ញាធរ​ទេ ពី​ព្រោះ​យើង​កំពុង​តែ​ផ្តោត​​​ការ​​​យក​ចិត្ត​ទុក​ដាក់​លើ​​​ការ​បង្កើត​គណៈ​​​កម្មា​​​ធិការ​រួម​មួយ​សម្រាប់​ការ​ស៊ើប​អង្កេត​ពី​​​ភាព​មិន​ប្រក្រតី​ក្នុង​ការ​បោះ​ឆ្នោត​”។

លោក អាត់ ធន់ ប្រធាន​សហព័ន្ធ​សហ​ជីព​ប្រជាធិបតេយ្យ​កម្មករ​កាត់​ដេរ​កម្ពុជា បាន​ឲ្យ​​​ដឹង​​​​ថា ​ការ​កែប្រែ​​​កាំ​​​ប្រាក់​ខែ​បែប​នេះគឺ​​​​អាច​ចូល​ជា​ធរមាន​បាន​​​តែ​​​​នៅ​ពេល​​​ណា​​​​​​​ដែល​គណ​​​បក្ស​ប្រឆាំង​ចូល​កាន់​តួនាទី​របស់​ខ្លួន​នៅ​​​​រដ្ឋ​សភា​​ ដែល​អាច​ប្រើ​ពេល​ខ្លះ​ខណៈ​មាន​​​ការ​​​ព្យាយាម​​សម្រេច​​​កិច្ច​ព្រមព្រៀង​​​ពាក់ព័ន្ធ​​​នឹង​​​រឿង​​​នេះ​​​​​​​​​ប៉ុណ្ណោះ​​​។

លោក អាត់ ធន់ ​បាន​មាន​​​ប្រសាសន៍​​​​​​​ថា “លិខិត​ទាំង​នេះ​ត្រូវ​បាន​​​ប្រឌិត​​​​ឡើង​ដើម្បី​ធ្វើ​ឲ្យ​សាធា​​​រណជន​​​​មាន​​​ការ​​​ភាន់​​​ច្រឡំ​​​ថា ដោយសារ​​​ការ​បោះ​ឆ្នោត​បាន​បញ្ចប់​​​​ទៅ​​​ហើយ​​​នោះ​​​ វា​ដល់​​​​ពេល​​​ដែល​​​​កម្មករ​ក្រោក​ឈរ​ទាម​ទារ​​​​ហើយ​​​។ លិខិត​បែប​នេះ​មិន​ត្រឹម​ត្រូវ​​​​ទាល់​​​តែ​​​សោះ​​​ ព្រោះ​ទោះបី​ជា​គណ​​​បក្ស​ប្រឆាំង​បាន​ទទួល​អាសនៈ​ច្រើន​​​ក៏ដោយ​ ក៏​គណបក្ស​​​នេះ​​​ត្រូវ​​បង្កើត​រដ្ឋាភិបាល​ជា​មុន​សិន​​​ដែរ​​​​”៕

ប្រែ​​​សម្រួល​​​ដោយ ចេវ ប៊ុននី

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស