29 C
Phnom Penh

លោក ហ៊ុន សែន​​​ ក្រើន​​​រំឭក​​​ពី​​​ការ​​​បាក់​​​ច្រាំង​​​ទន្លេ ខណៈ​​​ដែល​​​មាន​​​ទឹក​​​ជំនន់​​​នៅ​​​ខេត្ត​​​ភាគ​​​ឦសាន​​​

ដោយ ឌឹ ខេមបូឌា ដេលី

បទវិភាគ

លោក​​​នាយក​​​រដ្ឋ​​​មន្ត្រី​​​ ហ៊ុន សែន បាន​​​មាន​​​ប្រសាសន៍​​​កាល​​​ពី​​​ថ្ងៃ​​​សុក្រ​​​​​​ថា ប្រជាពល​​​រដ្ឋ​​​ ដែល​​​រស់​​​នៅ​​​តាម​​​បណ្ដោយ​​​ច្រាំង​​​ទន្លេ​​​មេគង្គ ទន្លេ​​​បាសាក់ និង​​​ទន្លេ​​​សាប គួរ​​​ប្រុង​​​ប្រយ័ត្ន​​​នៅ​​​ក្នុង​​​រយៈ​​​ពេល​​​ប៉ុន្មាន​​​ថ្ងៃ​​​ខាង​​​មុខ​​​នេះ​​​ ជា​​​ពិសេស​​​គ្រោះ​​​ថ្នាក់​​​ ដោយ​​​សារ​​​ការ​​​បាក់​​​ច្រាំង​​​ទន្លេ ខណៈ​​​ដែល​​​កម្រិត​​​ទឹក​​​កំពុង​​​កើន​​​ឡើង​​​នៅ​​​ក្នុង​​​ខេត្ត​​​ស្ទឹង​​​ត្រែង និង​​​កន្លែង​​​ផ្សេង​​​ៗ​​​ទៀត​​​នៅ​​​ក្នុង​​​ប្រទេស​​​។

នៅ​​​ក្នុង​​​ពិធី​​​សំណេះ​​​សំណាល​​​រយៈ​​​ពេល​​​ជាង​​​ពីរ​​​ម៉ោង​​​កន្លះ​​​ទៅ​​​កាន់​​​ក្រុម​​​អ្នក​​​ភូមិ​​​នៅ​​​ក្នុង​​​ខេត្ត​​​កណ្ដាល​​​ ដែល​​​ត្រូវ​​​បាន​​​ចាក់​​​ផ្សាយ​​​តាម​​​កញ្ចក់​​​ទូរទស្សន៍​​​ជា​​​ច្រើន​​​នោះ លោក​​​ ហ៊ុន សែន បាន​​​និយាយ​​​ត្រួសៗ​​​អំពី​​​ការ​​​ស្លាប់​​​របស់​​​ឪពុក​​​លោក វិស័យ​​​កសិកម្ម ស្ថានភាព​​​នយោបាយ​​​បច្ចុប្បន្ន ការ​​​អាច​​​កើត​​​មាន​​​អស្ថិរ​​​ភាព​​​ និង​​​កម្រិត​​​ទឹក​​​ទន្លេ​​​មេគង្គ​​​នៅ​​​ក្នុង​​​ខេត្ត​​​ស្ទឹង​​​ត្រែង​​​ ដែល​​​បច្ចុប្បន្ន​​​នេះ​​​មាន​​​កម្ពស់​​​៩,២៤ម៉ែត្រ ប៉ុន្តែ​​​នឹង​​​ឡើង​​​ដល់​​​៩,៩៥​​​ម៉ែត្រ​​​​​​ នៅ​​​ថ្ងៃ​​​ច័ន្ទ ដែល​​​នៅ​​​តែ​​​ស្ថិត​​​នៅ​​​ក្រោម​​​​​​កម្រិត​​​​​​ជន់​​​លិច​​​កម្ពស់​​​១០,៧​​​ម៉ែត្រ​​​ដដែល​​​។

លោក​​​ ហ៊ុន សែន បាន​​​មាន​​​ប្រសាសន៍​​​ថា “ឥឡូវ​​​នេះ​​​យើង​​​មាន​​​ការ​​​ព្រួយ​​​បារម្ភ​​​អំពី​​​ទឹក​​​ជំនន់​​​ ពីព្រោះ​​​ឥឡូវ​​​នេះ​​​ទឹក​​​បាន​​​ហូរ​​​ចាក់​​​ពី​​​ប្រទេស​​​ថៃ​​​មក​​​កាន់​​​​​​ខេត្ត​​​បន្ទាយ​​​មាន​​​ជ័យ​​​”។ លោក​​​បាន​​​មាន​​​ប្រសាសន៍​​​ថា “ប្រជា​​​ពល​​​រដ្ឋ​​​ ដែល​​​រស់​​​នៅ​​​តាម​​​បណ្ដោយ​​​ច្រាំង​​​ទន្លេ​​​មេគង្គ ដែល​​​លាត​​​សន្ធឹង​​​ពី​​​ខេត្ត​​​ស្ទឹង​​​ត្រែង​​​​​​ទៅ​​​កាន់​​​ព្រំ​​​ដែន​​​ជាប់​​​ប្រទេស​​​វៀតណាម​​​រួម​​​ទាំង​​​ប្រជាពល​​​រដ្ឋ​​​ ដែល​​​រស់​​​នៅ​​​តាម​​​បណ្ដោយ​​​ច្រាំង​​​ទន្លេ​​​សាប និង​​​ទន្លេ​​​បាសាក់​​​ត្រូវ​​​យក​​​ចិត្ត​​​ទុក​​​ដាក់​​​ និង​​​ប្រុង​​​ប្រយ័ត្ន​​​អំពី​​​ហានិភ័យ​​​នៃ​​​ការ​​​បាក់​​​ច្រាំង​​​ទន្លេ”។

លោក គង់ សុខ ចៅ​​​សង្កាត់​​​ប៉ោយប៉ែត​​​បាន​​​​​​​​​ថ្លែង​​​កាលពី​​​ថ្ងៃ​​​ព្រហស្បតិ៍​​​ថា  នៅ​​​ក្នុង​​​សង្កាត់​​​​​​ប៉ោយប៉ែត ខេត្ត​​​បន្ទាយ​​​មាន​​​ជ័យ​​​ ភ្លៀង​​​យ៉ាង​​​ខ្លាំង​​​បាន​​​ចាប់​​​ផ្ដើម​​​ធ្លាក់​​​ កាលពី​​​សប្ដាហ៍​​​មុន​​​បាន​​​​​​បង្ក​​​ឲ្យ​​​មាន​​​ការ​​​ជន់​​​លិច​​​ធ្ងន់​​​ធ្ងរ​​​ ដែល​​​បាន​​​លិច​​​ផ្ទះ​​​សំបែ​​​ងប្រជា​​​ពល​​​រដ្ឋ​​​រាប់​​​រយ​​​ខ្នង​​​។ លោក គង់ សុខ​​​ បាន​​​មាន​​​ប្រសាសន៍​​​ថា សាលា រៀន​​​ប្រាំ​​​មួយ​​​ខ្នង វត្ត​​​អារាម​​​ចំនួន​​​បួន​​​ និង​​​ដីស្រែ​​​ទំហំ​​​ពីរ​​​ហិចតា​​​រង​​​ការ​​​ខូច​​​ខាត​​​ដោយ​​​​​​សារ​​​ទឹក​​​ជំនន់​​​នៅ​​​ក្នុង​​​សង្កាត់​​​នេះ។

លោក​​​​​​បាន​​​មាន​​​ប្រសាសន៍​​​បន្ថែម​​​ថា ប្រជា​​​ពលរដ្ឋ​​ភាគ​​​ច្រើន​​​ជាប់​​​ទៅ​​​ណា​​​មិន​​​រួច​​​នៅ​​​ក្នុង​​​ភូមិ​​​របស់​​​ខ្លួន​​​ ដោយ​​​សារ​​​ផ្លូវ​​​ថ្នល់​​​ត្រូវ​​​បាន​​​ជន់​​​លិច។ លោក​​​បាន​​​មាន​​​ប្រសាសន៍​​​ថា “ប្រជា​​​ពល​​​រដ្ឋ​​​លំបាក​​​យ៉ាង​​​ខ្លាំង​​​ក្នុង​​​ការ​​​ធ្វើ​​​ដំណើរ​​​នៅ​​​ក្នុង​​​សង្កាត់​​​។ ពួក​​​គាត់​​​មិន​​​អាច​​​ធ្វើ​​​ដំណើរ​​​ទៅ​​​ផ្សារ​​​ ដើម្បី​​​ទិញ​​​ម្ហូប​​​អាហារ​​​ និង​​​សម្លៀក​​​បំពាក់​​​បាន​​​ទេ​​​ ដោយ​​​សារ​​​តែ​​​ការ​​​ជន់​​​លិច​​​នេះ”។

លោក​​​ គុយ ហេង​​​ ប្រធាន​​​ភូមិ​​​ប៉ាលិលេយ្យ​​១ បាន​​​មាន​​​ប្រសាសន៍​​​ថា ភ្លៀង​​​បាន​​​ចាប់​​​ផ្ដើម​​​ធ្លាក់​​​ កាលពី​​​ថ្ងៃ​​​ទី​​​២៩ ខែ​​​កក្កដា ហើយ​​​មិន​​​ទាន់​​​ឈប់​​​ធ្លាក់​​​នៅ​​​ឡើយ​​​ទេ។ លោក​​​​​​បាន​​​មាន​​​ប្រសាសន៍​​​ថា “ទឹក​​​ជំនន់​​​បាន​​​ហូរ​​​ចូល​​​ផ្ទះ​​​សំបែង​​​របស់​​​អ្នក​​​ភូមិ ហើយ​​​បាន​​​បង្ក​​​ការ​​​លំបាក​​​យ៉ាង​​​ខ្លាំង​​​”។ អាជ្ញាធរ​​​មូលដ្ឋាន​​​បាន​​​ព្យាយាម​​​រំដោះ​​​ទឹក​​​ជំនន់​​​ ដោយ​​​ការ​​​ជីក​​​ប្រព័ន្ធ​​​ធារាសាស្ត្រ​​​ ដែល​​​នឹង​​​ត​​​ភ្ជាប់​​​តំបន់​​​ ដែល​​​ជន់​​​លិច​​​ ទៅ​​​នឹង​​​ស្ទឹង​​​ក្បែរ​​​ព្រំដែន​​​ថៃ ដែល​​​នឹង​​​ជួយ​​​រំដោះ​​​ទឹក​​​ជំនន់​​​៕

ប្រែសម្រួលដោយ សោម សារុន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស