28 C
Phnom Penh

កាសែត​ចិនក្នុងស្រុក​រក្សា​​តុល្យភាព​​ការផ្សាយ​អត្ថបទ​ពាក់​ព័ន្ធ​នឹង​នយោ​បាយ​​

ដោយ ឌឹ ខេមបូឌា ដេលី

បទវិភាគ

នៅ​ពេល​លោក សម រង្ស៊ី ធ្វើ​មាតុភូមិ​និវត្តមកកាន់​ប្រទេស​កម្ពុជា ​វិញ​កាល​ពីខែ​មុន ប្រព័ន្ធ​​ផ្សព្វ​ផ្សាយ​ជា​ភាសា​ខ្មែរ​មិន​បាន​ចុះ​ផ្សាយអំពី​ព្រឹតិ្តការណ៍​នេះ​ទេ។ 

សារព័ត៌មាន​​​​​​ ស៊ីន ចូវ ដេលី ​​​សារព័ត៌មាន​​​ពាណិជ្ជកម្ម ខមមើសល ញូវ  និង​​​​​​សារព័ត៌មាន​​​ ជានហ្វា ដេលី​​​ ​​​​​​ចុះ​​​ផ្សាយ​​​អំពី​​​លោក សម រង្ស៊ី មេដឹក​​​នំា​​​គណបក្ស​​​សង្គ្រោះ​​​ជាតិ​​​ ​​​នៅ​​​លើ​​​ទំព័រ​​​មុខ​​​របស់​​​ខ្លួន​​​ក្នុង​​​រយៈ​​​ពេល​​​បីសប្ដាហ៍​​​ចុង​​​ក្រោយ​​​​​​នេះ។ (lin Meyn)
សារព័ត៌មាន​​​​​​ ស៊ីន ចូវ ដេលី ​​​សារព័ត៌មាន​​​ពាណិជ្ជកម្ម ខមមើសល ញូវ និង​​​​​​សារព័ត៌មាន​​​ ជានហ្វា ដេលី​​​ ​​​​​​ចុះ​​​ផ្សាយ​​​អំពី​​​លោក សម រង្ស៊ី មេដឹក​​​នំា​​​គណបក្ស​​​សង្គ្រោះ​​​ជាតិ​​​ ​​​នៅ​​​លើ​​​ទំព័រ​​​មុខ​​​របស់​​​ខ្លួន​​​ក្នុង​​​រយៈ​​​ពេល​​​បីសប្ដាហ៍​​​ចុង​​​ក្រោយ​​​​​​នេះ។ (lin Meyn)

នៅ​ពេល​​មេ​ដឹក​នាំ​គណ​បក្ស​ប្រឆាំង​រូប​នេះ​បាន​ប្រកាស​​ថា គណ​បក្ស​សង្គ្រោះ​ជាតិ​ជា​អ្នក​ទទួល​បាន​ជ័យ​ជម្នះ​ក្នុង​ការ​បោះ​ឆ្នោត​នោះ ​បណ្តា​​កាសែត​ជា​ភាសាខ្មែរ ​គ្រាន់​តែ​បាន​​ចុះ​ផ្សាយ​ខ្លះៗពី​គណបក្ស​នេះប៉ុណ្ណោះ​។

ប៉ុន្តែ ព្រឹតិ្តការណ៍​ទាំង​ពីរ​នេះបែរ​ជា​ត្រូវ​បាន​ចុះ​ផ្សាយ​នៅ​​ទំព័រ​មុខ​ស្ទើរ​គ្រប់​កាសែត​ទាំង​អស់​​ក្នុង​ចំណោម​កាសែត​ជា​​ភាសាចិន​ចេញ​ផ្សាយ​​ប្រចាំ​ថ្ងៃ​ចំនួន​ប្រាំ​នៅ​កម្ពុជា​។ ក្នុងអត្ថបទ​ចេញ​​ផ្សាយ​របស់​ខ្លួន​ក្រោយ​​​ការ​ធ្វើ​មាតុភូមិ​និវត្តរបស់​លោក សម រង្ស៊ី កាសែត​ជានហ្វា​ ដេលី (Jian Hua Daily) បាន​ចុះ​ផ្សាយ​​កន្លះ​ទំព័រ​អម​ដោយ​រូប​ភាព​​បង្ហាញ​ពី​​ទិដ្ឋ​ភាព​នៃ​ការ​ជួប​ជុំ​របស់​គណ​បក្ស​សង្គ្រោះ​ជាតិ ក្រោម​​ចំណង​ជើង​ថា “ អ្នក​គាំ​ទ្រ​គណ​បក្ស​សង្គ្រោះ​ជាតិ​ប្រហែល​៤០.០០០នាក់​​​​ស្វាគមន៍​លោក​ សម រង្ស៊ី វិលត្រឡប់​មក​ប្រទេស​វិញ”។

នៅ​ពេល​លោក សម រង្ស៊ី ប្រកាស​ថា គណ​បក្ស​សង្គ្រោះ​ជាតិ​មិន​ទទួល​ស្គាល់​លទ្ធ​ផល​​បោះ​ឆ្នោត​ចេញ​ផ្សាយ​ដោយ​គណ​បក្ស​ប្រជា​ជន​កម្ពុជា​នោះ គណ​បក្ស​នេះ​ត្រូវ​បាន​ចុះ​​ផ្សាយ​លើ​ទំព័រ​មុខ​នៃ​កាសែត​ ឌឹ ខុមមើ​ស្សល​ ​ញូស (The Commercial News) ក្រោម​ចំណង​ជើង​ធំៗ​ថា “ សម រង្ស៊ី មិនទទួល​ស្គាល់​ការ​បោះ​ឆ្នោត​​មិន​យុត្តិធម៌​ ចង់​ធ្វើ​មហា​បាតុ​កម្ម​” អម​ដោយ​​​រូប​ថតលោក សម រង្ស៊ី ទំហំ​ប៉ុន​ទទឹងទំព័រ​កាសែតដែល​មាន​បួន​ក្រឡោន លើក​ម្រាម​ដៃ​​ទាំង​​កំហឹង​នៅ​ឯ​សន្និសីទ​សារ​ព័ត៌​មាន​មួយ​។

ខណៈពេល​ដែល​បណ្តា​អ្នកអានកាសែត​ចេញ​ផ្សាយប្រ​ចាំ​ថ្ងៃ​​ជាភាសា​ខ្មែរ​ភាគ​ច្រើន​ទទួល​បាន​ព័ត៌​មាន​ដដែលៗ​ស្តីពី​ទស្សន​របស់​​គណ​បក្ស​ប្រជា​ជន​កម្ពុជា​កំពុង​កាន់​អំណាច​ និង​ពាក្យ​គាំទ្រ​រដ្ឋា​ភិបាល​នោះ​ កាសែត​ជា​ភាសា​ចិន​នានា​នៅក្នុង​ប្រទេស​កម្ពុជា​ចុះ​ផ្សាយ​មាន​តុល្យ​ភាព​ជាង​អំពីអ្វី​ដែលកំពុង​កើត​មាន​ឡើង​ នៅ​ក្នុង​វិស័យ​នយោ​បាយ​នៅ​កម្ពុជា។

យោង​តាម​និពន្ធ​នាយក​មួយ​រូប​នៃ​កាសែត​មួយ​ក្នុង​ចំណោម​កាសែត​​ចិនទាំង​នេះ បានឲ្យ​​ដឹង​ថា ការ​ប្រកាន់​​យកផ្លូវ​កណ្តាល​នៅ​ក្នុង​ការ​​​ចុះ​ផ្សាយ​អំពី​នយោ​បាយ​មាន​សារៈ​សំខាន់​ក្នុង​ការ​ទាក់ទាញ​អ្នកអាន​​ដែល​មាន​ចំណេះ​ដឹងគួរ​សម​ នោះ​គឺ​អ្នក​ជំនួញ​​ជន​ជាតិ​ខ្មែរ​ដើម​កំណើត​ចិន​ និង​បណ្តា​វិនិ​យោគ​ទុន​បរទេស​មកពី​បណ្តា​ប្រទេស​និយាយ​ភាសា​ចិន។

និពន្ធ​នាយក​រូប​នេះ​​ដែល​សុំ​មិន​បញ្ចេញ​ឈ្មោះ​ដោយ​សារ​តែគោលការណ៍​របស់​ក្រុម​​​​ហ៊ុនលោកមិន​អនុញ្ញាតឲ្យ​និយាយ​ជាមួយ​​ស្ថាប័ន​ប្រព័ន្ធ​ផ្សព្វ​ផ្សាយ​ផ្សេងៗ​ទៀត​នោះ បាន​លើក​ឡើង​ថា “ [អ្នក​អាន​របស់​យើង] ចង់​​ដឹង​ឲ្យ​បាន​ច្បាស់​ថា អ្វី​​កើត​ឡើង​មុន​ពេល​ អំឡុង​​ពេល និង​បន្ទាប់​ពី​ការ​បោះ​ឆ្នោត។ យើង​​គ្រាន់​តែ​នាំ​សារ​ប៉ុណ្ណោះ។ ប្រសិន​​បើ​លោក សម រង្ស៊ី វិល​ត្រឡប់​មក​វិញ​ ហើយ​មាន​ប្រជាពលរដ្ឋ​យ៉ាង​ច្រើន​ទៅ​ស្វាគមន៍​គាត់​​ យើង​នឹង​ចុះ​ផ្សាយ​រឿង​នោះ”។

នៅ​ក្នុង​ទី​ផ្សារ​មួយ​ដែល​មាន​អ្នក​អាន​ត្រឹម​​​តែ​ជា​ង១០.០០០​នាក់  ដែល​ត្រូវ​បាន​បែង​ចែក​ស្មើ​គ្នា​រវាង​ជន​ជាតិ​ខ្មែរ​​ដើម​កំណើត​ចិន និង​បណ្តា​វិនិយោគិន​ចិន​ដែល​ជន​បរទេស​នោះ និពន្ធ​នាយក​រូប​នេះ​បាន​លើក​ឡើង​ថា ការ​ចុះ​ផ្សាយ​ដំណឹង​គួរ​ឲ្យ​ជឿ​ទុក​ចិត្ត​បានមាន​សារៈសំខាន់ខ្លាំង​ណាស់ ប្រសិន​បើ​កាសែត​ទាំង​នោះ​សង្ឃឹម​ចង់​បាន​ប្រាក់​ចំណេញ។

លោក​បាន​មាន​ប្រសាសន៍​ថា “​ ប្រសិន​បើ​​យើង​ដាក់​រូប​លោក សម រង្ស៊ី នៅ​លើ​ទំព័រ​​មុខ​ ហើយ​ [កា​សែត​ចិន​​ចេញ​ផ្សាយ​ប្រចាំ​ថ្ងៃ​ផ្សេងៗ​​ទៀត] មិន​ដាក់​នោះ​ ពេលនោះ​នឹង​គ្មាន​​អ្នកទិញ​កាសែត​របស់​ពួកគេ​ឡើយ។ ខ្ញុំ​គិត​ថា [តុល្យ​ភាព​នៅ​ក្នុង​ការ​ធ្វើ​សេចក្តី​រាយ​ការណ៍​អំពី រឿងនយោ​បាយ​] គឺ​ពាក់​ព័ន្ធ​នឹង​ការ​​ប្រកួត​ប្រជែង”។ លោក​បាន​ប្រសាសន៍​បន្ត​ថា ​សារព័ត៌​មាន​​ជា​ភាសាចិន​ “ មាន​អ្នក​ឃ្លាំ​មើល ​និង​ការ​ជ្រៀត​ជ្រែក​ពី​គណ​បក្ស​នយោ​បាយ​”  តិច​ជាង​ប្រព័ន្ធ​ផ្សព្វ​ផ្សាយ​ជា​ភាសា​ខ្មែរ។ ​

ទោះ​ជា​យ៉ាង​ណា និពន្ធ​នាយក​រូប​នេះ​​បាន​​មាន​ប្រសាសន៍​ថា កាសែត​របស់​លោក​ពិត​ជា​​មិន​ចុះ​ផ្សាយ​អត្ថ​បទ​រិះគន់រដ្ឋា​ភិបាល​ទេ។ លោក​មាន​ប្រសាសន៍ថា “ អ្នក​អាច​និយាយ​បាន​​ថា យើង​មិន​ចុះ​ផ្សាយ​​រឿង​រសើប​ឡើយ”។ លោក​បាន​មាន​ប្រសាសន៍​បន្ត​ទៀត​ថា​​​ “ នៅ​ពេល​យើង​សរសេរ​ យើង​ព្យា​យាម​មិន​រិះ​គន់​ខ្លាំង​ពេក​ទេ ពី​ព្រោះ​យើង​ជា​អង្គ​ភាព​បរទេស ហើយ​យើង​មិន​ចង់​ឲ្យ​គេ​​តម្រង់​​គោល​ដៅ​មក​លើ​យើង​ឡើយ​។ យើង​មិន​ចង់​​ឲ្យ​គេ​និយាយ​ថា យើង​ញុះ​ញង់​សង្គម​ទេ​”។

យោង​តាម​លោក​ អ៊ុក សាផាន ជា​អ្នក​យក​​ព័ត៌​មាន​ផ្នែក​នយោ​បាយ​ជាយូរ​មក​ហើយឲ្យ​កាសែត សិុនជូ ដេលី (Sin Chew Daily) ដែល​បាន​លា​ឈប់​​ពី​កាសែត​នេះកាលពី​ឆ្នាំ​មុន បាន​​ឲ្យ​ដឹង​ថា ការ​ធ្វើ​សេចក្តីរាយការណ៍​អំពី​នយោ​​បាយ​ឲ្យ​មាន​តុល្យ​ភាព​ គឺជា​ដំណឹង​ប្លែកពី​គេ​នៅ​ក្នុង​កាសែត​។

លោក​បាន​មាន​ប្រសាសន៍​ថា “ អត្ថ​បទ​មួយ​ចំនួន​ត្រូវ​បាន​សរសេរ​ដោយ​មាន​តុល្យ​ភាព ប៉ុន្តែ ពី​៦០​ទៅ​៧០​ភាគ​រយ​ គឺ​គាំ​ទ្រ​រដ្ឋា​ភិបាល” ដោយ​សារ​តែ​គោល​ដៅ​របស់​កាសែត​នោះ​គឺ​ធ្វើ​យ៉ាង​ណា​ស្វែង​រក​ឱកាស​រក​ស៊ី​នៅ​ក្នុង​ប្រទេស​កម្ពុជា។​ លោក​បានមាន​ប្រសាសន៍​បន្ត​ថា ប៉ុន្តែ​ ជា​ជាង​ការគាំ​ទ្រ​គណ​បក្ស​កាន់​អំណាច​ ឬគណ​បក្ស​ប្រឆាំង​នោះ “ កាសែត​ជា​ភាសាចិន​នានា​​គាំ​ទ្រ​ការ​វិនិយោគ​នៅក្នុង​ប្រទេស​កម្ពុជា”។

នៅ​ក្នុង​ការ​ចុះ​ផ្សាយ​ពេញ​មួយ​ទំព័រ​កាល​ពី​ថ្ងៃ​ទី​២ ខែសីហា កាសែត​ សិុនជូ ដេលី បាន​​ចុះ​​​ផ្សាយ​អត្ថបទ​មួយ​ស្តី​ពី​ប្រតិកម្ម​របស់​បណ្តា​​វិនិយោគិន​ចំពោះ​ការ​បោះ​ឆ្នោត ក្រោម​​ចំណង​​ជើង​ថា “ តើ​វិនិយោគិន​បរទេស​កំពុង​សម្លឹង​មក​កម្ពុជា​បែប​ណា​?”។ នៅ​ក្នុង​លេខ​ចុះ​ផ្សាយ​ដដែល​នោះ អត្ថ​បទ​សំខាន់ក្នុង​កាសែត​នេះ គឺជា​ការ​វិភាគ​អំពី​ការ​​ចរចា​ដែល​អាច​កើត​មាន​រវាង​លោក​នាយក​​រដ្ឋ​មន្ត្រី ហ៊ុន សែន និង​លោក សម រង្ស៊ី ​អម​ដោយ​រូប​ថត​​ដាច់​ដោយ​ឡែកពី​គ្នា​នៃ​អ្នក​នយោ​បាយ​ទាំង​ពីរ​​លើក​ម្រាម​ដៃ​​​របស់​ខ្លួន។

បន្ទាប់​ពី​គណ​បក្ស​កាន់​អំណាច​បាន​ជួប​ស្ថាន​ភាព​អាក្រក់​បំផុត​ក្នុង​រយៈ​ពេល​១៥​ឆ្នាំ​មក​នេះ អត្ថបទ​វិភាគ​នោះ​បាន​លើក​ឡើង​ថា ​“ បណ្តា​អ្នក​វិភាគ​នយោ​បាយ​ជឿថា គណ​បក្ស​​ប្រជាជន​កម្ពុជា​បាន​មក​ដល់​ ‘ ចំណុច​របត់​’ ហើយ ប្រសិន​បើ​លោក​នាយក​រដ្ឋ​មន្ត្រី​ ហ៊ុន សែន​ នៅ​តែ​គ្មាន​ឆន្ទៈ​កែ​ប្រែ​ ឬ​ធ្វើ​ការ​សម្រុះ​​សម្រួល​ផ្នែក​នយោ​បាយ​ចំពោះ​ឥរិយា​បថ​​ប្រកាន់​មាំ​របស់​លោក​ទេ​នោះ វា​នឹង​ប្រឈម​បញ្ហា​ធំ​ផ្នែក​នយោ​បាយ​ជា​មិន​ខាន”។​

អត្ថ​បទ​នោះ​ដក​ស្រង់​សម្តី​របស់​លោក ឡៅ ម៉ុង​ហៃ​ អ្នក​វិភាគ​នយោ​បាយ​ឯករាជ្យ​ដែល​បាន​មាន​ប្រសាសន៍​ថា “ ប្រជាពល​រដ្ឋ​លែង​ជឿ​ទុក​ចិត្ត​ និង​លែង​ចូល​ចិត្ត​លោក​នាយក​រដ្ឋ​មន្ត្រី ហ៊ុន សែន ទៀត​ហើយ ហើយ​ប្រជាប្រិយ​ភាព​ និង​អំណាច​របស់​លោកបាន​ធ្លាក់​ចុះ​​ ជាមូលហេតុ​ដែល​អ្នក​គ្រប់​គ្នា​ស្រែក​ឡើង​ថា ‘ ដូរ! ដូរ! ដូរ!’ ”។

លោក កែន លូ អគ្គ​លេខា​ធិការ​​សមាគម​រោង​ចក្រ​កាត់​ដេរ​នៅ​កម្ពុជា បាន​មាន​ប្រសា​សន៍​​ថា កាសែត​ចិន​ទាំងនេះ​ ជា​ពិសេស​កាសែត​​​ស៊ិនជូ ដេលី របស់​ម៉ាឡេស៊ី នៅ​តែ​ជា​​ប្រភព​ព័ត៌​មាន​ដ៏​សំខាន់​ស្តីពី​កិច្ច​ការ​នា​ពេល​បច្ចុ​ប្បន្ន​​ក្នុង​ប្រ​ទេស​កម្ពុជា សម្រាប់​ក្រុម​វិនិយោគិន​និយាយ​ភាសា​ចិន​ដែល​កាន់​តែ​មាន​ចំនួន​ច្រើន​ឡើង​​។ លោក​បាន​មាន​ប្រសាសន៍​ថា “  យើង​ពិត​ជា​អាន​កាសែត​ចិន​មែន​។ អត្ថ​បទ​ព័ត៌​មាន​នៅ ក្នុង​កាសែត​ចិននិយាយ​ពី​ការ​ពិត​”។
កាសែត​ជា​ភាសា​ចិន​ ក៏​ជា​បណ្តាញ​ដ៏​សំខាន់​មួយ​ដែរ ​ក្នុង​នោះ​គណ​បក្ស​​ប្រជា​ជន​កម្ពុជា​ និង​គណ​បក្ស​សង្គ្រោះ​ជាតិ​បាន​ផ្សព្វ​ផ្សាយ​សារ​របស់​ខ្លួន​​ទៅ​ដល់​សហ​គមន៍​​ពាណិជ្ជ​កម្ម​និយាយ​ភាសា​ចិន​ដ៏​មាន​ឥទ្ធិ​ពល​នៅកម្ពុជា​។

ហើយ​ក្រែង​លោ​មាន​ការ​យល់​ថា លោក​នាយក​​រដ្ឋ​មន្ត្រី​ ហ៊ុន​ សែន មិន​បាន​បង្ហាញ​ជំហរច្បាស់​លាស់​ចំពោះប្រទេស​ចិន​ មុន​ការ​បោះ​ឆ្នោតនោះ នាយក​រដ្ឋ​​មន្ត្រី​រូប​នេះបាន​រំឭកដល់​​ប្រទេស​មហា​អំណាច​មួយ​នេះ​​ថា លោក​អរគុណ​យ៉ាង​ខ្លាំង​ចំពោះ​ជំនួយ​របស់​ប្រទេស​ចិន នៅក្នុង​ការ​ថ្លែង​សុន្ទក​ថា​​ជា​សាធារណៈ​ជាលើកទី​២​របស់​លោក​ បន្ទាប់​​ពី​ការ​បោះ​ឆ្នោត ដែលបានធ្វើ​ឲ្យ​គណ​បក្ស​របស់​លោក​ជួប​ស្ថាន​ភាព​​អាក្រក់​បំផុតចាប់​តាំងពី​ឆ្នាំ​១៩៩៨មក។

យោង​តាមអត្ថបទ​មួយ​ចុះ​ផ្សាយ​ក្នុង​កាសែត​ស៊ិន​ជូ ដេលី កាលពី​ថ្ងៃ​ទី​៣ ខែ​សីហា ​លោក ហ៊ុន សែន​ ​មាន​ប្រសាសន៍​ថា “ លើក​​មុន​ពួកគេ [សហ​រដ្ឋ​អាមេរិក] បានកាត់​ផ្តាច់​ជំនួយរបស់​យើង​ ពួក​គេ​បានត្រឹម​តែ​ត្រៀម​​​ផ្តល់​រថយន្ត​យោធា​ចាស់ៗ​ចំនួន​១០០​គ្រឿង​ប៉ុណ្ណោះ។ ប្រជា​ជន​ចិន​​មិន​អាច​ទ្រាំ​មើល​បែបនេះ​បាន​ ក៏​ផ្តល់​រថយន្ត​យោធា​ចំនួន​​២៥៧​​គ្រឿង​ដល់​យើង”។

គណ​បក្ស​ប្រជា​ជន​​​​បាន​បើកទ្វារ​ស្វាគមន៍​ការ​វិនិយោគ​របស់​ចិន​ដែល​មាន​ទំហំ​ទឹក​ប្រាក់​រាប់​ពាន់​លាន​ដុល្លារ​លើ​ហេដ្ឋា​រចនា​សម្ព័ន្ធ ផលិត​កម្ម​ និង​កសិកម្ម​ ខណៈ​ទទួល​បាន​ជំនួយ​ និង​ឥណ​ទាន​អាទិ​ភាព​រាប់​ពាន់​លាន​ដុល្លារ​ និង​អួត​អំពី​ទំនាក់​ទំនង​​ទ្វេ​ភាគី​ដ៏​រឹង​មាំ។ ប៉ុន្តែ លោក សម រង្ស៊ី ក៏​បានធានា​អះ​អាង​ចំពោះ​សហគមន៍​និយាយ​ភាសាចិន​ផង​ដែរ​ នៅ​ក្នុង​អត្ថ​បទ​មួយ​ក្នុង​កាសែត​ស៊ិន​ជូ​ ដេលី កាល​ពី​ថ្ងៃ​ទី៣ ខែសីហា ថា គណ​បក្ស​របស់​លោក​ក៏​នឹង​គាំ​ទ្រ​ផល​ប្រយោជន៍​របស់​ចិន​នៅក្នុង​ប្រទេស​កម្ពុជា​ដែរ។

លោក​ សម រង្ស៊ី បាន​លើក​ឡើង​ថា “ ក្នុង​នាម​ជា​គណបក្ស​សង្គ្រោះ​ជាតិ​​យើង​​មាន​ជំហរ​ច្បាស់​លាស់​​ចំពោះ​រដ្ឋាភិ​បាល​ចិន​ គឺ​យើង​គាំទ្រ​​គោល​នយោបាយ​ចិន​តែ​មួយ​ ហើយ​ គាំទ្រ​​សិទ្ធិ​របស់​ប្រទេស​ចិន​ក្នុង​ការ​គ្រប់គ្រង​​ប្រជុំ​កោះ​​ណាន​សា (Nan-sha) [ស្ព្រេតលី (Spratlys)] និង​ប្រជុំ​កោះ​ស៊ី​សា (Xisha) [ប៉ារ៉ាស៊ែល (Paracels)]”។

យោង​តាម​អត្ថបទកាសែត​​ស៊ិនជូ​ ដេលី​ លោក​ សម រង្ស៊ី បាន​បន្ថែម​ថា “ខ្ញុំ​​អាច​ធានា​ចំពោះ​រដ្ឋាភិបាល​ចិន​ថា យើង​ចាត់​ទុក​​ចិន​ជា​សម្ពន្ធ​មិត្ត​ដ៏​សំខាន់​បំផុត​សម្រាប់​កម្ពុជា​​”។ ពេល​កំពុង​ពិសា​តែ​​ជាមួយបុរស​​​ជន​ជាតិ​ខ្មែរ​ដើម​កំណើត​​ចិន​​មួយ​ក្រុម​នៅ​ភោជ​នីយ​ដ្ឋាន​មួយ​​​តាម​បណ្ដោយ​មហា​វិថី​កម្ពុជា​ក្រោម​​​ក្នុង​រាជធានី​ភ្នំពេញ​ លោក​ សុខ សេង អាយុ​៦៥​ឆ្នាំ​​ជា​អ្នក​ជំនួញ​ចូល​និវត្តន៍​ម្នាក់​លើក​ឡើង​ថា លោក​ចូល​ចិត្ត​អាន​​​កាសែត​ចេញ​ផ្សាយ​ជា​ភាសា​ចិន​ ពី​ព្រោះ​កាសែត​នេះ​​ចុះ​ផ្សាយ​ទាំង​​ការ​​លើក​ឡើង​​របស់​បក្ស​ប្រជាជន​កម្ពុជា និង​បក្ស​សង្គ្រោះ​ជាតិ​។

លោក​បាននិយាយ​​​ថា “កាសែត​នេះ​មិន​លម្អៀង​​រក​ភាគី​ណា​ទេ​​។ ​នៅ​​ពេល​គណបក្ស​ប្រឆាំង​​និយាយ​ពី​អ្វី​​មួយ​នោះ​ កាសែត​នេះ​នឹង​​ចុះ​ផ្សាយ​​​។ ហើយ​ប្រសិន​បើ​គណ​បក្ស​ប្រជាជន​កម្ពុជា​ធ្វើ​ការ​លើក​ឡើង​​ដែរ​នោះ​ កាសែត​នេះ​ក៏​បាន​ចុះ​ផ្សាយ​ការ​លើក​ឡើង​របស់​​គណបក្ស​ប្រជាជន​​កម្ពុជា​ដែរ”​។​ លោក​​បាន​បន្ថែម​ថា លោក​គិត​​ថា ជន​ជាតិ​ខ្មែរ​ដើម​កំណើត​​ចិន​ភាគ​ច្រើន​ ដែល​រស់​នៅ​ក្នុង​រាជ​ធានី​ភ្នំពេញ​ការពិត​នោះ​មិនសូវ​ជា​មាន​ការ​ចាប់​អារម្មណ៍​លើ​នយោបាយ​ប៉ុន្មាន​ទេ​។

គាត់​បាន​លើក​ឡើង​ថា “យើង​គ្រាន់​តែ​ចង់​ឲ្យ​​ពួក​គេ​ [គណបក្ស​ប្រជាជន​កម្ពុជា​ និង​គណបក្ស​សង្គ្រោះ​ជាតិ] ធ្វើ​ការជាមួយ​គ្នា​​ ហើយ​កុំ​ប្រឆាំង​គ្នា​ ធ្វើ​ដូច្នេះ​យើង​អាច​ប្រកប​​របប​រក​ស៊ី​របស់​យើង​បាន​ស្រួល​”។ នៅ​ពេល​​កំពុង​ទទួល​ទាន​អាហារ​ថ្ងៃ​ត្រង់​នៅ​ឯ​ភោជនីយដ្ឋាន​តៃវ៉ាន់​មួយ​តាម​​មហា​វិថី​ស្សាល ដឺ ហ្គោល លោក​ យូ សេង​ជុន​ អ្នក​គ្រប់​​គ្រង​រោង​ចក្រ​កាត់​ដេរ​មួយ​ក្នុង​ខេត្ត​កំពង់​ស្ពឺ​បាន​លើក​ឡើង​ថា ​ការ​មិ​ន​ពេញ​ចិត្ត​យ៉ាង​ខ្លាំង​របស់​លោក​ចំពោះ​កាសែត​ផ្សាយ​ជា​ភាសាចិន​នេះ​ គឺ​ការ​មិន​ហ៊ាន​រិះគន់​រដ្ឋា​ភិបាល​ ដែល​លោក​គិត​ថា មាន​អំពើ​ពុក​រលួយ​ ហើយ​មិន​ខ្វល់​អំពី​ប្រជាពលរដ្ឋ​របស់​ខ្លួន​។

លោក​និយាយ​ថា “អ្វី​ដែល​កាសែត​នេះ​សរសេរ​ គឺ​មិន​ចេញ​ពី​ចិត្ត​ទាំង​ស្រុង​ទេ។​ ហើយ​អ្វី​ដែល​ពួក​គេ​បាន​ចុះ​ផ្សាយ​ពី​រដ្ឋា​ភិបាល​ គឺ​មិន​សូវ​ជា​ធ្ងន់​នោះទេ​។​ ក៏ប៉ុន្តែ​កាសែត​​នេះ​ត្រូវ​ការ​​រក​ស៊ី​បន្ត​ទៀត​ ដូច្នេះ​​ទើប​មិន​ហ៊ាន​រិះគន់​រដ្ឋាភិបាល​ខ្លាំងៗ”។ លោក​បាន​បន្ថែម​ថា “ទោះបី​ជា​ខ្ញុំ​ដឹង​ថា កាសែត​នេះ​ចុះ​​ផ្សាយ​គ្មាន​ការពិត​ទាំង​ស្រុង​​ក៏​ដោយ​ ក៏​ខ្ញុំ​នៅ​តែ​​ចង់​ដឹង​​ចង់​ឃើញ​ពី​អ្វី​ ដែល​​កំពុងតែ​កើត​ឡើង​ ហើយ​ខ្ញុំ​អាច​ស្វែង​រក​ព័ត៌មាន​មួយ​ចំនួន​ ហេតុ​ដូច្នេះ​ខ្ញុំ​អាច​ធ្វើ​ការ​សន្និដ្ឋាន​ដោយ​ខ្លួន​ឯង​បាន​”៕

(រាយការណ៍​បន្ថែម​ដោយ​ ម៉ិច ដារ៉ា)
ប្រែ​​​សម្រួល​​​ដោយ​​ តែម សុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស