35 C
Phnom Penh

លោ​ក សម រង្ស៊ី ថាមហាបាតុកម្ម​កំពុង​​រង់​ចាំ​ដរាប​ណា​គណបក្ស​ប្រជាជន​​មិនទទួលស្គាល់ការពិត

ដោយ ឌឹ ខេមបូឌា ដេលី

បទវិភាគ

ដោយ​លើក​ឡើង​​ពី​ការ​អះអាង​នៃ​ការ​ឈ្នះ​ការ​បោះឆ្នោត​ជាតិ​ ដែល​មាន​ជម្លោះ​កាលពី​ខែមុន​​ម្ដង​ទៀត​ លោក សម រង្ស៊ី មេដឹកនាំ​គណបក្ស​ប្រឆាំង​ បាន​ប្រាប់ទៅ​កាន់​អ្នក​គាំទ្រ​រាប់​ពាន់​នាក់​​នៅ​ក្នុង​រាជធានី​​ភ្នំពេញ​​ កាលពី​ម្សិលមិញ​ ឲ្យ​ត្រៀម​ខ្លួ​ន​សម្រាប់​ការ​ធ្វើ​បាតុកម្ម​ទ្រង់​ទ្រាយ​ធំ​មួយ​​ប្រឆាំង​គណបក្ស​ប្រជាជន​កម្ពុជា​​កំពុង​កាន់​អំណាច​ ដរាប​ណា​មេដឹក​នាំ​របស់​គណបក្ស​​​នេះមិន​​​លា​​​លែង​​​ពី​​​តំណែង​​​​។

លោក​ សម​ រង្ស៊ី​ មេ​ដឹក​នាំ​គណ​បក្សប្រ​ឆំា​និង​លោក​ គឹម​​ សុខា​​ អនុ​ប្រ​ធាន​ថ្លែង​ទៅកាន់​អ្នក​គំា​ទ្រ​នៅទី​លាន​ប្រជា​ធិប​តេយ្យ​​ក្នុង​ទី​ក្រុងភ្នំ​ពេញ​កាល​ពី​ម្សិ​ល​មិញ​។ (Sive Channa)
លោក​ សម​ រង្ស៊ី​ មេ​ដឹក​នាំ​គណ​បក្សប្រ​ឆំា​និង​លោក​ គឹម​​ សុខា​​ អនុ​ប្រ​ធាន​ថ្លែង​ទៅកាន់​អ្នក​គំា​ទ្រ​នៅទី​លាន​ប្រជា​ធិប​តេយ្យ​​ក្នុង​ទី​ក្រុងភ្នំ​ពេញ​កាល​ពី​ម្សិ​ល​មិញ​។ (Sive Channa)

ថ្លែង​ទៅ​កាន់​​អ្នក​​គាំទ្រ​​​​ជាង​៥.០០០​នាក់​នៅ​សួន​សេរី​ភាព​ លោក សម រង្ស៊ី​ មិន​សូវ​ជា​លើក​​ឡើង​ពី​បញ្ហា​​ស៊ើប​អង្កេត​​ ដែល​លោក​បាន​អំពាវនាវ​ឲ្យ​មាន​ការ​ចាត់​វិធាន​ការ​ចំពោះ​របាយ​ការណ៍​នៃ​ភាព​មិន​ប្រក្រតី​​នៃ​ការ​បោះ​ឆ្នោត​ ដែល​កើត​មាន​ជា​ច្រើន​នោះ​ទេ​ ប៉ុន្តែ​លោក​បាន​លើក​ឡើង​ថា គណបក្ស​ប្រជាជន​កម្ពុជា​ដល់​ពេល​វេលា​​ទទួល​​យក​បរា​ជ័យ​ហើយ​។

លោក សម រង្ស៊ី បាន​ប្រាប់​ទៅ​កាន់​អ្នក​គាំទ្រ​​​ជា​ច្រើន​ថា “យើង​មិន​ចង់​​ធ្វើ​បាតុកម្ម​​នោះ​ទេ​ ហេតុដូច្នេះ​ហើយ​ ខ្ញុំ​ចង់​ផ្ញើ​សារ​នេះ​​​ទៅ​កាន់​ [គណ​បក្ស​ប្រជាជន​កម្ពុជា]”។ លោក​បាន​បន្ត​ថា “ ​គេ​ត្រូវ​តែ​ស្វែង​រក​ដំណោះ​​ស្រាយ​ដ៏​សម​រម្យ​មួយ​សម្រាប់​​​គណបក្ស​សង្គ្រោះ​ជាតិ។ ​ប្រសិន​បើ​ពួក​គេ​មិន​ចង់​ឃើញ​បាតុ​កម្ម​កើត​ឡើង​នោះ​ទេ​ ពួក​គេ​ត្រូវ​តែ​​ជំរាប​ប្រាប់​អង្គ​ការ​សហប្រជាជាតិ​ថា ខ្លួន​​​ចាញ់​ហើយ​ ហើយ​​យើង​នឹង​ទទួល​យក​​ដំណោះ​​​​​​​ស្រាយ​នោះ​​ បន្ទាប់​ពី​ពួក​គេ​លា​​​លែង​​​​​​​ពី​តំណែង​”។

ដោយ​លទ្ធផល​ជា​ផ្លូវ​ការ​​​នៅ​មិន​ទាន់​ប្រកាស​​នៅ​ឡើយ​ គណបក្ស​ទាំងពីរ​សុទ្ធ​តែ​​​​បាន​​លើក​ឡើង​ថា ខ្លួន​ទទួល​បាន​សំឡេង​គាំទ្រ​​ភាគ​ច្រើន​​នៅ​ក្នុង​រដ្ឋសភា​ ដែល​មាន​១២៣​អាសនៈ​នៅ​ក្នុង​ការ​បោះឆ្នោត​ជាតិ​ កាលពី​ថ្ងៃ​ទី​២៨ ខែ​កក្កដា ហើយ​​ដោយ​មាន​សំឡេង​គាំទ្រ​ភាគ​ច្រើន​នេះ​ ខ្លួន​មាន​សិទ្ធិ​បង្កើត​រដ្ឋាភិបាល​ថ្មី​មួយ​។

ការ​ចរចា​ដើម្បី​​បង្កើត​គណៈកម្មាធិការ​​ស៊ើប​អង្កេត​រួម​មួយ ដើម្បី​ស៊ើប​អង្កេត​ពី​ភាព​មិន​ប្រក្រតី​នៃ​ការ​បោះឆ្នោត​ ត្រូវ​បាន​រលាយ​ទៅ​វិញ​ កាលពី​ថ្ងៃ​សៅរ៍​ នៅ​ពេល​គណបក្ស​ប្រជាជន​កម្ពុជា​បាន​លើក​ឡើង​ថា ខ្លួន​នឹង​មិន​អនុញ្ញាត​ឲ្យ​អង្គការ​សហប្រជាជាតិ​​ចូល​​​មក​​​ពាក់ព័ន្ធ​ រីឯ​គណបក្ស​សង្គ្រោះ​ជាតិ​បាន​បដិសេធ​​មិន​ចូល​រួម​ប្រសិន​បើ​គ្មាន​​ការ​ចូល​រួម​ពី​អង្គការ​សហប្រជាជាតិ​នោះ​។

លោក សម រង្ស៊ី បាន​មាន​ប្រសាសន៍​ថា   “ យើង​នឹង​​រៀប​ចំ​បាតុកម្ម​ដ៏​ធំ​មួយ​ ដែល​មានអ្នក​ចូល​រួម​​ច្រើន​ជាង​អ្នក​គាំទ្រ​​​នៅ​ទី​នេះ​ក្នុង​ថ្ងៃ​នេះ​ជាង​ដប់​ដង ដរាប​ណា​គណ​​​បក្ស​ប្រជាជន​កម្ពុជា​​ព្រម​ទទួល​​ការ​ពិត​។ យើង​ត្រូវ​តែ​ងើប​ឈរ​ឡើង​ ដើម្បី​ការពារ​លទ្ធផល​របស់​យើង​”។ ដោយ​​និយាយ​បក​​ទៅ​កាន់​អ្នក​សើច​ចម្អក​វិញ​ ប្រធាន​គណបក្ស​សង្គ្រោះ​ជាតិ​រូប​នេះ​​ បាន​​គូស​បញ្ជាក់​ថា សូម្បី​តែតួលេខ​មិន​ផ្លូវ​ការ​របស់​គណបក្ស​ប្រជាជន​កម្ពុជា​បាន​បង្ហាញ​ឲ្យ​ឃើញ​ថា ​គណបក្ស​សង្គ្រោះ​ជាតិ​​ឈ្នះ​បាន​​អាសនៈ​យ៉ាង​ច្រើន​​​នៅ​ក្នុង​ខេត្ត​ដែល​​​ថ្នាក់​​ដឹកនាំ​កំពូល​ៗ​របស់​គណបក្ស​ប្រជាជន​កម្ពុជា​​ឈរ​​​ឈ្មោះ​​​រួម​មាន​ នៅ​ក្នុង​ខេត្ត​ដែល​​​លោក​នាយក​​រដ្ឋ​មន្ត្រី​ ហ៊ុន សែន លោក​ ជា ស៊ីម​ ប្រធាន​​​​ព្រឹទ្ធ​​សភា លោក​ ហេង​ សំរិន ប្រធាន​រដ្ឋសភា​​​​បាន​​​ឈរ​​​ឈ្មោះ​​​ជា​ដើម​។

លោក​ សម រង្ស៊ី​ បាន​មាន​ប្រសាសន៍​ថា “លោក ជា ស៊ីម បាន​ឈរ​ឈ្មោះ​នៅ​ក្នុង​រាជ​ធានី​ភ្នំពេញ​ ប៉ុន្តែ​លោក​បាន​ចាញ់​គណបក្ស​សង្គ្រោះ​ជាតិ​។​ លោក​ ហ៊ុន សែន​ បាន​ឈរ​ឈ្មោះ​នៅ​ក្នុង​ខេត្ត​កណ្ដាល​ ប៉ុន្តែ​លោក​ក៏​ចាញ់​គណបក្ស​សង្គ្រោះ​ជាតិ​ដែរ។ លោក​ ហេង​ សំរិន ឈរ​ឈ្មោះ​នៅ​ក្នុង​ខេត្ត​កំពង់​ចាម​ ប៉ុន្តែ​លោក​ក៏​ចាញ់​គណបក្ស​សង្គ្រោះ​ជាតិ​ដែរ​”។ លោក​បាន​មាន​ប្រសាសន៍​បន្ត​ថា “គ្មាន​នរណា​ម្នាក់​ជឿ​ជាក់​ថា គណបក្ស​ប្រជាជន​កម្ពុជា​​ឈ្នះ​នោះ​ទេ​”។

ដោយ​​លើក​ឡើង​​បន្ទាប់​ពី​​លោក​ សម រង្ស៊ី លោក​ កឹម សុខា អនុប្រធាន​​គណបក្ស​សង្គ្រោះ​ជាតិ​បាន​អះអាង​ថា គណបក្ស​ប្រឆាំង​​​​ក៏​បាន​ឈ្នះ​សំឡេង​ភាគ​ច្រើន​ក្នុង​ចំណោម​​ទាហាន​ និង​មន្ត្រី​រាជការ​​ ដែល​​ជា​ប្រពៃណី​​​បាន​គំា​ទ្រ​គណបក្ស​ប្រជាជន​កម្ពុជា ដោយ​សារ​តែ​ប្រព័ន្ធ​ប្រកាន់​បក្ស​ពួក​​បាន​ចាក់​ប្ញស​យ៉ាង​ជ្រៅ​​ផង​ដែរ​។

លោក​បាន​មាន​ប្រសាសន៍ថា “​បើ​យោង​តាម​​​ការ​ស្រាវជ្រាវ​ពី​មន្ត្រី​របស់​គណបក្ស​សង្គ្រោះ​ជាតិ​​បាន​បង្ហាញ​ឲ្យ​ឃើញ​ថា កង​កម្លាំង​ប្រដាប់​អាវុធ និង​មន្ត្រី​រាជការ​ជាង​៧០​ភាគ​រយ​បាន​បោះឆ្នោត​ឲ្យ​​គណបក្ស​សង្គ្រោះ​ជាតិ​”។ លោក​បាន​ថ្លែង​ថា “ខ្ញុំ​ជឿជាក់​ថា មន្ត្រី​រាជ​ការ និង​កង​កម្លាំង​ប្រដាប់​អាវុធ​សូម្បី​តែ​អ្នក​ជំនួញ​ និង​អ្នក​លក់​ដូរ​នៅ​តាម​ទីផ្សារ​នានា​សុទ្ធ​​តែ​បោះឆ្នោត​ឲ្យ​គណបក្ស​សង្គ្រោះ​ជាតិ​”។

លោក​ កឹម សុខា បាន​អះអាង​ដោយ​មិន​បញ្ចេញ​ឈ្មោះ​មន្ត្រី​មួយ​រូប​ថា “​មាន​មន្ត្រី​ជាន់​ខ្ពស់​​មក​ពី​គណបក្ស​ប្រជាជន​​​កម្ពុជា​មួយ​រូប​បាន​ផ្ញើ​សារ​មក​ឲ្យ​ខ្ញុំ​ថា គាត់​​ក៏​បាន​​គាំទ្រ​គណបក្ស​សង្គ្រោះ​ជាតិ​ដែរ​ ព្រោះ​គាត់​ចង់​ផ្លាស់ប្ដូរ​មេដឹកនាំ​”។ ដោយ​ផ្ដល់​​ការ​ធានា​ដល់​មន្ត្រី​រាជការ​ លោក​ កឹម សុខា បាន​ធានា​ថា គណបក្ស​សង្គ្រោះ​ជាតិ​​នឹង​មិន​​ដក​មន្ត្រី​រាជការ​ណា​ម្នាក់​ចេញ​ពី​តំណែង​​ឡើយ​។ លោក​បាន​មាន​ប្រសាសន៍​ថា “ បន្ទាប់​ពី​គណបក្ស​ប្រជាជន​កម្ពុជា​​បាន​ប្រកាស​ថា ខ្លួន​ចាញ់​ គណបក្ស​សង្គ្រោះជាតិ​ នឹង​ស្វាគមន៍​ ហើយ​ធ្វើ​ការ​ជា​មួយ​មន្ត្រី​រដ្ឋាភិបាល​​ ដើម្បី​កសាង​ប្រទេស​ជាតិ​រួម​គ្នា”។

ដោយ​ទាក់​ទង​នៅ​ពេល​ក្រោយ​មក​លោក​ ប៉ុល​ សារឿន​ អគ្គមេបញ្ជា​ការ​​កង​យុទ្ធ​ពល​ខេមរភូមិន្ទ​បាន​បដិសេធ​​មិន​ធ្វើ​អត្ថាធិ​ប្បាយ​លើ​ការ​អះអាង​របស់​លោក​ កឹម សុខា​ដែល​ថា គណបក្ស​ប្រឆាំង​​ទទួល​បាន​សំឡេង​គាំទ្រ​ភាគ​ច្រើន​នៅ​ក្នុ​ង​ជួរ​​កង​ទ័ព​នោះ​។ លោក​បាន​មាន​ប្រសាសន៍​ថា “ ខ្ញុំ​មិន​ដឹង​ទេ​​។ ប្រសិន​បើ​​លោក​ សម រង្ស៊ី បាន​និយាយ​ដូច្នេះ​មែន​​​ អ្នក​អាច​និយាយ​​​តាម​​​សំដី​​​របស់​​​គាត់​​​ទៅ​​”។

លោក ផៃ ស៊ី​ផាន​ អ្នក​នាំពាក្យ​ទីស្ដីការ​គណៈរដ្ឋ​មន្ត្រី​បាន​លើក​ឡើង​ថា គណបក្ស​ប្រឆាំង​​មិន​អាច​ដឹង​​​បាន​ទេ​ថា នរណា​​បោះ​ឆ្នោ​ត​ឲ្យ​ខ្លួន​​នោះ។  លោក​បាន​មាន​ប្រសាសន៍​ថា “វា​មិន​ពិត​នោះ​ទេ​ ពីព្រោះ​លោក​ សម រង្ស៊ី គ្មាន​ភ័ស្ដុ​តាង​នោះ​​​ឡើយ​​​ហើយ​ការ​​បោះឆ្នោត​​គឺ​​​​ជា​​​ការ​​​បោះឆ្នោត​​​​​​ដោយ​​​សម្ងាត់​ ហេតុ​ដូច្នេះ​​ គ្មាន​​នរណា​ម្នាក់​ដឹង​ថា នរណា​បោះ​ឆ្នោត​ឲ្យ​គណ​​​បក្ស​ណា​មួយ​នោះ​ទេ​​​”។

ងាក​​​​ត្រឡប់​ទៅ​មើល​ការ​​ប្រមូល​ផ្ដុំ​គ្នា​វិញ​ អ្នក​គាំត្រ​គណបក្ស​សង្គ្រោះ​ជាតិ​​បាន​លើ​ក​ឡើង​ថា ពួកគេ​បាន​ត្រៀម​ខ្លួន​ធ្វើ​តាម​ការ​អំពាវនាវ​​ឲ្យ​មាន​បាតុកម្ម​ទ្រង់ទ្រាយ​ធំ​របស់​មេដឹកនាំ​​ខ្លួន​រួច​ហើយ​។ និស្សិត​​ម្នាក់​ឈ្មោះ​ យុន​ ជិន​ឡា ជា​និស្សិត​ឆ្នាំ​​ទី​៣ ផ្នែក​វិទ្យាសាស្ត្រ​កសិកម្ម​ ដែល​​នៅ​តែ​ស្រែក​ពាក្យ​ស្លោក​របស់​គណបក្ស​​ប្រឆាំងថា ​ “ដូរ” បន្ទាប់ពី​លោក​ សម រង្ស៊ី បាន​ចាក​ចេញ​​ទៅ​ហើយ​​នោះ ​បាន​​និយាយ​ថា ខ្លួន​ត្រៀម​ធ្វើ​​បាតុកម្ម​​រួច​ហើយ​។

និស្សិត​ យុន ជិន​ឡា បាន​និយាយ​ថា “ខ្ញុំ​បាន​ត្រៀម​ខ្លួន​​ចូល​រួម​ការ​ធ្វើ​បាតុកម្ម​រួច​ហើយ​ ប្រសិន​បើ​គេ​ត្រូវ​ការ​យើង​ឲ្យ​ចូល​រួម​នោះ។ ខ្ញុំ​មាន​ឈាម​ជា​ខ្មែរ​ ហេតុ​ដូច្នេះ​ហើយ​​​​ខ្ញុំ​​បាន​ដឹង​ថា មាន​បញ្ហា​កើត​ឡើង​ជា​ច្រើន​​នៅ​ទូទាំង​ប្រទេស​”។  លោក​ ហ៊ុន សែន​ ថ្មី​ៗ​នេះ​បាន​ព្រមាន​គណបក្ស​សង្គ្រោះជាតិ​ថា រាល់​ការ​ធ្វើ​ការ​តវ៉ា​ណា​មួយ​នឹង​​មាន​ការ​ធ្វើ​​ការ​តវ៉ា​ប្រឆាំង​ ពី​​​គណបក្ស​ប្រជាជន​កម្ពុជា​វិញ​ ហើយ​ប្រសិន​​​​បើ​អំពើ​ហិង្សា​ណាមួយ​កើត​ឡើង​នោះ​វា គឺ​ជា​កំហុស​របស់​គណបក្ស​ប្រឆាំង៕

ប្រែសម្រួលដោយ ស៊ា ស៊ុយឈាង​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស