កាលពីម្សិលមិញសាលាឧទ្ធរណ៍បានតម្កល់សេចក្ដីសម្រេចរបស់សាលាដំបូងរាជធានីភ្នំពេញ ដែលបានផ្ដន្ទាទោសជនជាតិចិនពីរនាក់ឲ្យជាប់ពន្ធនាគារក្នុងម្នាក់ៗ១៣ឆ្នាំពីបទប្លន់ និងធ្វើឃាតជនជាតិចិនម្នាក់ទៀតក្នុងខែធ្នូ ឆ្នាំ២០១១។
លោក សាម៉េត សុផល ប្រធានក្រុមប្រឹក្សាជំនុំជម្រះ បានថ្លែងថា “ សាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញ”។ ចៅក្រម សុផល បានទុកពេលឲ្យចុងចោទមួយខែដើម្បីប្ដឹងសារទុក្ខទៅតុលាការកំពូល។ ដំបូងឡើយ សាលាដំបូងរាជធានីភ្នំពេញបានផ្ដន្ទាទោសបុរសជនជាតិចិនពីរនាក់ឈ្មោះ ហ្គ័រ យ៉េនហ្គុយ អាយុ៣២ឆ្នាំ និងឈ្មោះ វ៉ាង ហ្វាងពីង អាយុ៣២ឆ្នាំដាក់ពន្ធនាគារម្នាក់ៗរយៈពេល១៣ឆ្នាំ កាលពីខែកក្កដាឆ្នាំមុន ពីបទចាក់សម្លាប់ឈ្មោះ ជាង យ៉ាតុង ក្នុងខណ្ឌឫស្សីកែវ រាជធានីភ្នំពេញ។ ចុងចោទទាំងពីរនាក់ក៏ត្រូវបានកាត់ឲ្យជាប់ទោសពីបទប្លន់ជនរងគ្រោះរូបនេះបានប្រាក់ជិត៣៩.០០០ដុល្លារផងដែរ។
លោក ហ៊ាន រិទ្ធ ព្រះរាជអាជ្ញាអមសាលាឧទ្ធរណ៍ បានលើកឡើងថា សេចក្តីសម្រេចរបស់សាលាឧទ្ធរណ៍ក្នុងការតម្កល់សាលក្រម គឺជាសេចក្តីសម្រេចដ៏ត្រឹមត្រូវ។ លោកបានមានប្រសាសន៍ថា “ ខ្ញុំគិតថា សេចក្ដីសម្រេចនេះគឺសមស្របហើយ ព្រោះ [ ចុងចោទ] បានសារភាពថា ខ្លួនពិតជាបានប្រព្រឹត្តបទឧក្រិដ្ឋនេះមែន”៕
ប្រែសម្រួលដោយ ចេវ ប៊ុននី