29 C
Phnom Penh

ក្រសួង​សង្គមកិច្ច​ប្រាប់​កម្មករ​រោង​ចក្រ​កាត់ដេរ​ឲ្យ​ត្រឡប់មក​ធ្វើការ​វិញកុំភ័យខ្លាច​ថា មាន​សង្គ្រាម

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ ក្រសួង​សង្គម​កិច្ចបាន​ប្រាប់​កម្មករ​រោងចក្រកាត់​ដេរ​ចំនួន​​​៦០០.០០០ នាក់​នៅ​ក្នុង​ប្រទេស​កម្ពុជា​កុំ​ឲ្យ​ជឿ​ពាក្យចចាម​​​​អារ៉ាម​ថា  មាន​សង្គ្រាម​​ឲ្យ​​​សោះ​ ហើយ​បន្ត​ធ្វើ​​​​ការ​ដូច​ធម្មតា​ បន្ទាប់​ពីការ​បោះ​ឆ្នោត​ជាតិ​ដែល​បង្ហាញ​ឲ្យឃើញ​ថា មាន​លទ្ធផល​ខ្វែង​គំនិត​គ្នា​និង​ការ​គំរាម​កំហែង​បង្ក​អស្ថិរភាព​។

លោក អ៊ិត សំហេង​ រដ្ឋ​មន្ត្រី​ក្រសួង​សង្គម​​​​កិច្ច​បាន​មាន​ប្រសាសន៍​នៅ​ក្នុង​សេច​ក្តី​ថ្លែង​ការណ៍ថា “ រយៈពេល​ពីរ​បី​ថ្ងៃ​ចុង​ក្រោយ​នេះ​​ មាន​ពាក្យ​ចចាម​អារ៉ាម​ថា   មាន​ភាព​ចលា​​​ចល​ និង​មាន​គម្រោង​ធ្វើ​បាតុកម្ម​ដែល​នឹង​នាំឲ្យ​មាន​សង្គ្រាម​បណ្តាល​ឲ្យ​កម្មករ​រោង​ចក្រ​កាត់​ដេរ ក្រុម​ហ៊ុន​ សហជីព និង​សាធារ​​​ណ​​​ជន​មាន​ការ​ភ័យ​ខ្លាច​”។

សេចក្តី​ថ្លែងការ​ណ៍​ដដែល​​​នេះ​បន្តទៀត​​​​ថា “ សូម​និយោជិត​ សហជីព និង​និយោជក​បន្ត​​ប្រកប​អាជីវកម្ម​ បំពេញ​ការ​ងារ​​និង​ប្រកប​របររកស៊ី​​ចិញ្ចឹ​ម​ជីវិតជា​ធម្មតា​។សូម​កុំ​ជឿ​ពាក្យ​ចចាម​​​អារ៉ាម​ដែល​ផ្សព្វផ្សាយ​   តៗ​គ្នា​នោះឡើយ”។

លិខិត​របស់​លោក​រដ្ឋ​មន្ត្រី​ក្រសួង​​​សង្គម​​​កិច្ច​​​ធ្វើ​ឡើង​បន្ទាប់​ពី​គណបក្ស​ប្រជាជន​កម្ពុជា​​​កំពុង​កាន់អំណាច និង​គណ​បក្ស​សង្គ្រោះជាតិ​បាន​​អះអាង​ពី​​​ជ័យ​​​​​​​ជម្នះ​នៅ​ក្នុង​ការ​បោះ​ឆ្នោត​​​​ជាតិ​កាល​ពី​​​ថ្ងៃទី​២៨​ខែកក្កដា ដែល​គណ​​​បក្ស​សង្គ្រោះ​ជាតិ​​​​អះអាង​ថា មាន​ភាពមិន​ប្រក្រតី​ជាច្រើន​។ នៅ​មុន​ការ​បោះឆ្នោត​ និង​ជាថ្មី​ម្តង​ទៀត​កាល​ពីសប្តាហ៍​មុនលោក​នាយក​រដ្ឋ​មន្ត្រី ហ៊ុន សែន បាន​លើ​កឡើង​ពីលទ្ធ​ភាព​ថា អាចមាន​សង្គ្រាម​ប្រសិន​បើ​គណ​បក្ស​ប្រជាជន​កម្ពុជា​របស់​លោក​ចាញ់​ឆ្នោត​។

លោក​ សម រង្ស៊ី មេដឹកនាំគណបក្ស​ប្រឆាំង​​​​បាន​មាន​ប្រសាសន៍ថា គណបក្ស​សង្គ្រោះ​ជាតិ​នឹង​ធ្វើ​ការ​តវ៉ាដ៏ធំ​មួយ​ប្រសិន​បើ​លទ្ធផល​នៃការ​បោះឆ្នោត​មិន​ត្រូវ​បាន​ស៊ើបអង្កេត​ឲ្យ​បាន​ល្អិត​ល្អន់​ទេ​នោះ ហើយ លោក  ស ខេង​​​​ រដ្ឋ​មន្ត្រី​ក្រសួង​មហាផ្ទៃ​បាន​ព្រមាន​ថា មាន​ “បញ្ហា​” ប្រសិនបើ​ការ​ចរចា​ជាមួយ​គណ​បក្ស​ប្រឆាំង​ជាប់​គាំង​អំពី​បញ្ហា​នៃ​ភាព​មិន​ប្រក្រតី​ពេល​បោះឆ្នោតនោះ​។

ប៉ុន្តែ លោក​ អ៊ិត​ សំហេង​ មាន​សុទិដ្ឋិ​និយម​​​​​នៅ​ក្នុង​សេចក្តីថ្លែងការណ៍​របស់​លោក​កាល​ពីម្សិលមិញ​។ លោក​បាន​មាន​ប្រសាសន៍​នៅ​ក្នុង​សេចក្តី​ថ្លែងការណ៍​ដែល​បាន​ផ្ញើ​ទៅ​សហ​ជីព​ និង​រោ​ងចក្រកាត់ដេរនានាថា “ ទី​បញ្ចប់គណ​​​បក្ស​​​​​​​នយោបាយ​ទាំង​អស់​នឹង​ស្វែង​រក​ដំណោះ​​​ស្រាយ​ដើម្បីធ្វើ​ឲ្យ​​សង្គម​មាន​ស្ថិរភាព​”។

លោក​រដ្ឋមន្ត្រី​បាន​មាន​ប្រសាសន៍ថា “ការ​​​​លើក​ឡើង​ពី​​ពាក្យ​ចចាម​អារ៉ាម​គឺគួរ​ឲ្យ​ព្រួយបារម្ភ​ និង​ភ័យ​ខ្លាច ​ហើយ​វា​ជាទង្វើ​ខុស​ច្បាប់​ដែល​បង្ក​ឡើង​ដោយ​ក្រុម​ជ្រុល​និយម​ ហើយ​អាជ្ញាធរ​នឹង​ស្វែង​រកចាប់​ខ្លួន​​ពួក​គេ​​​ និង​ចាត់​វិធាន​ការ​តាម​ផ្លូវ​ច្បាប់”។ គេ​​​មិន​ទាន់​ដឹងនៅ​ឡើង​ទេ​កាល​ពីម្សិល​មិញ​ថា តើ​លោក​រដ្ឋ​មន្ត្រី​និយាយ​ដោយ​ផ្ទាល់​​សំដៅ​ដល់​​ការ​ព្រមាន​របស់​លោក​​ ហ៊ុ​ន សែន​ ឬ​​​យ៉ាង​​​​ណា​នោះ​ឡើយ​។

លោក​រដ្ឋមន្ត្រី​ក្រសួង​​​សង្គម​​​កិច្ច​​​ក៏បាន​សន្យា​​ក្នុង​សេចក្តី​​​ថ្លែងការណ៍​របស់​លោក​ផង​ដែរ​ថារដ្ឋាភិ​​​បាល​​​​​​​នឹង​ពិភាក្សា​ពីការ​ដំឡើង​ប្រាក់​ខែ​ដល់​កម្មករ​រោង​ចក្រ​កាត់​ដេរ​នៅ​ឆ្នាំ​២០១៤​។ ជាផ្នែកមួយ​​​​នៃកម្ម​វិធីនយោបាយ​ក្នុង​ពេល​បោះឆ្នោត​ គណបក្ស​ប្រឆាំង​បាន​សន្យា​ដំឡើង​​​​ប្រាក់​ខែ​អប្បបរមា​ដល់​កម្ម​ករ​រោង​ចក្រ​កាត់​ដេរ​។

លោក​ អ៊ុំ មាន រដ្ឋ​លេខាធិការ​ក្រសួង​ការ​​​ងារ​បាន​ប៉ាន់​ប្រមាណថា កម្មករ​រោង​ចក្រ​កាត់​ដេរ​ប្រហែល​​២០​ភាគ​រយ​មិន​ទាន់​បាន​វិល​​​ត្រឡប់​មក​ធ្វើ​ការ​​វិញនៅ​ឡើយ​ទេ​ចាប់​តាំង​ពីការ​បោះឆ្នោត​មក​។ លោក អ៊ុំ មាន​ បានមាន​ប្រសាសន៍បន្ថែម​​​ទៀត​​​ថា “យើង​ចង់​ឲ្យ​កម្មករ​រោង​ចក្រកាត់​ដេរ​មាន​ចិត្ត​នឹង​នរ​ ហើយថា ​​ នឹង​គ្មាន​រឿង​អាក្រក់​កើត​​​​ឡើង​ទេ​។ យើង​សង្ឃឹម​ថា គណ​​​បក្ស​ធំៗ​​​ទាំង​ពីរ​នឹងធ្វើ​​​ការ​​​​ចរចា​ដើម្បី​ស្វែង​រក​ដំណោះ​ស្រាយ​សម្រាប់​ប្រទេស​ជាតិ​របស់​យើង​”។

លោក​ អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​​កាត់​ដេរ​កម្ពុជា​បាន​មាន​ប្រសាសន៍ថា  ដោយសារ​ការ​ភ័យខ្លាច​ថា មាន​អស្ថិរ​ភាព​  កម្មករ​ភាគច្រើន​ដែល​​ត្រឡប់​មក​ធ្វើ​ការ​វិញនោះ​បាន​ស្នើ​សុំ​បើក​ប្រាក់របស់​​​ខ្លួន​​​​​​​ប្រចាំថ្ងៃ​​ជាជាង​បើក​​រាល់​កន្លះខែ​ម្តង​។ លោក អាត់​ ធន់​ បាន​មាន​ប្រសា​សន៍​ថា    “ កម្មករ​នឹង​​ត្រឡប់​មក​ធ្វើ​ការ​វិញ​ ប៉ុន្តែ ពួកគេ​បារម្ភអំពីស្ថាន​ការណ៍​ដូចជា​ថា នឹង​មាន​បញ្ហា​នៅ​ពេល​បង្កើត​រដ្ឋាភិបាល​ថ្មី​ជាដើម។ ដូច្នេះ​​​​​​​កម្មករ​ស្នើ​សុំ​ឲ្យ​ក្រុម​ហ៊ុន​បើក​ប្រាក់​ខែ​របស់​ខ្លួន​ភ្លាមៗ​”។

យោង​តាម​លោក​ អឿន សំអុល​ អ្នក​គ្រប់​គ្រង​ផ្នែក​អនុវត្តត​ច្បាប់ក្នុង​រោង​ចក្រ​បាន​ឲ្យ​ដឹង​ថា ចំពោះ​រោង​ចក្រ​កាត់​ដេរ​  New Archid Garment នៅ​ក្នុង​ខេត្ត​កណ្តាល​ដែល​មាន​កម្មករ​ប្រហែល​៣.០០០​នាក់​ ប្រតិបត្តិការ​បាន​បន្ត​ឡើង​វិញ​កាល​ពីថ្ងៃទី​៣០​ខែ​កក្កដា​ ហើយ​កំពុង​តែ​ដំណើរការ​ដោយ​រលូន។ លោក អឿន សំអុល​ បាន​មាន​​​ប្រសាសន៍​​​បន្ត​​​ថា  “ យើង​បាន​ឮអំពី​ពាក្យ​ចចាម​អារ៉ាម​​​នេះ​​ ប៉ុន្តែ វាគ្មាន​បញ្ហា​ទេ​ពីព្រោះ​មនុស្ស​គ្រប់​គ្នា​បាន​ត្រឡប់​មក​ធ្វើ​ការ​វិញ​ហើយ​​។ ខ្ញុំ​មិន​គិត​ថា ពួកគេ​ខ្វល់​ខ្វាយ​ច្រើន​ហួសអំពី​បញ្ហា​នេះ​ទេ​”៕

ប្រែសម្រួលដោយ សោម សារុន​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស