35 C
Phnom Penh

ឯកអគ្គ​រដ្ឋ​ទូត​ចិន​លើក​ឡើង​ម្ដង​ទៀត​ពី​ការ​ប្ដេជ្ញា​ពង្រឹង​វិស័យ​ទេសចរណ៍​នៅ​ក្នុង​ប្រទេស​កម្ពុជា

ដោយ ឌឹ ខេមបូឌា ដេលី

បទវិភាគ

លោកឧបនាយក​រដ្ឋ​មន្ត្រី​ សុខ អាន បាន​ជួប​ជាមួយ​លោក​ស្រី ប៊ូ ជាំង​គ័រ ឯកអគ្គ​រដ្ឋ​​ទូត​ចិន​​ទើប​នឹង​តែង​តាំង​ថ្មី​​នៅ​ក្នុង​រាជ​ធានី​ភ្នំពេញ​​​​​កាលពី​​​​​​ថ្ងៃ​​​ច័ន្ទ​​​ ដើម្បី​ពិភាក្សា​​​​​គ្នា​​​អំពី​ផែនការ​លើ​ក​ទឹក​ចិត្ត​ភ្ញៀវ​ទេសចរ​ចិន​កាន់​​​តែ​ច្រើន​ទៀត​​​ឲ្យ​​​​មក​ទស្សនា​​​​កម្ពុជា​។

​ជំនួប​​​នេះ​​​​​​ស្ថិត​​​ក្នុង​​​ចំណោម​​​​ជំនួប​ឯកជន​ក្រោយ​ការ​បោះ​ឆ្នោត​រវាង​​​​មន្ត្រី​គណបក្ស​ប្រជា​ជន​កម្ពុជា​ និងលោក​ស្រី ប៊ូ ដែ​ល​ជា​អ្នក​ការទូត​ម្នាក់​ក្នុង​ចំណោម​អ្នក​ការទូត​ដំបូង​គេ​​​ដែល​​​បាន​​​អប​អរ​សាទរ​គណបក្ស​ប្រជាជន​កម្ពុជា​ បន្ទាប់​ពី​​​​បក្ស​​​នេះ​​​​បាន​អះអាង​អំពី​​​ជ័យ​ជម្នះ​​​​ក្នុង​ការ​បោះ​ឆ្នោត​កាល​​ពីថ្ងៃ​​​​​ទី​​​២៨​ ខែ​​​កក្កដា កន្លង​​​ទៅ​​​នេះ​​​។

​កាសែត​ ស៊ីនហួ របស់​រដ្ឋាភិបាល​​​ចិន​​​ បាន​ឲ្យ​ដឹង​ថា លោក​ស្រី ប៊ូ ​ក៏បាន​​​លើក​ឡើង​ថា លោកស្រី​​​​​​នឹង​​​​ផ្តោត​​​​បេសកកម្ម​ការទូត​រយៈ​ពេល​បី​ឆ្នាំ​របស់​​​​ខ្លួន​​​លើ​​​ការ​​​​ពង្រឹង​ទំនាក់​ទំនង​ចិន​-កម្ពុជា​​​​លើ​​​​គ្រប់​វិស័យ​ទាំង​អស់​ ​​​ក្នុង​​​នោះ​​​​​​មាន​​​ទាំង​ការ​ផ្សព្វ​ផ្សាយ​​​ពី​​​​កម្ពុជា ​ជា​​​គោលដៅ​​​​ទេស​ចរណ៍​​ និង​​​​ការ​​​អភិវឌ្ឍ​​​គម្រោង​​ដែល​នឹង​​​​ផ្ដល់​​​​​ប្រយោជន៍​ដល់​វិស័យ​ទេសចរណ៍​​​​ផង​​​ដែរ​​​។

យោង​តាម​តួលេខ​​​ក្រសួង​​​​​ទេសចរណ៍​ឲ្យ​ដឹង​ថា ​​​​ចិន​ស្ថិត​នៅ​​​ក្នុង​​​លំដាប់​ទី៣ ​បន្ទាប់​​​ពី​​​​​វៀតណាម​ និង​កូរ៉េ​ខាងត្បូង​​​​ បើ​​​និយាយអំ​​​ពី​​​ចំនួន​​​​ភ្ញៀវ​ទេសចរ​មកទស្សនា​ប្រទេស​កម្ពុជា ដោយ​​​​​​​​​​​​ទេសចរ​​​ចិន​​​មាន​​​ចំនួន​​​៣៣៤.០០០​នាក់​ក្នុង​ឆ្នាំ​២០១២ ប៉ុន្តែ​ ចំនួន​​​នេះ​​​​បាន​កើន​​​៣៥​ភាគរយ​​​​គិត​​​ចាប់​តាំង​ពី​ឆ្នាំ​២០១១​​​មក​​​​។ អំឡុង​រយៈ​ពេល​ប្រាំ​ខែ​ដំបូង​នៃឆ្នាំ​នេះ​ ជន​ជាតិចិន​ប្រហែល​២០២​.៤០០​នាក់​បាន​មកទស្សនា​ប្រទេស​កម្ពុជា​  គឺកើន​ឡើង​​៥៣​ភាគ​រយ ​ បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​​​នេះ​​​​។

លោក ជីមមី កៅ​​​ (Jimmy Gao)​​​ ជា​​​ប្រធាន​សភា​​​​ពាណិជ្ជ​កម្ម​ចិន​​ បាន​ថ្លែង​​​​ថា “ កម្ពុជា​គឺ​​​ពិត​ជា​គោលដៅ​ទាក់​ទាញ​មួយ​សម្រាប់​ភ្ញៀវ​​​​ទេសច​រ​ចិន​នាពេល​នេះ​ ពិសេស​គឺ​​​ប្រាសាទ​​អង្គរ​វត្ត​នៅ​ខេត្ត​សៀម​រាប ​​​​ដែល​​​ល្បី​ល្បាញ​បំផុត​នៅ​​​​ប្រទេស​ចិន​ ហើយខ្ញុំ​គិត​ថា ​​ជាមួយ​​​នឹង​​​ជើង​​ហោះ​ហើរ​​​កាន់តែ​​​ច្រើនឡើង​​​ៗ​​​ពី​ទីក្រុង​យ៉ាង​តិច​២០​នៅក្នុង​​​​​​​ប្រទេស​ចិន ​មក​អាកាស​​​​យានដ្ឋាន​អន្តរជាតិ​​សៀម​រាប​​ និង​អាកាស​យានដ្ឋាន​អន្តរជាតិ​ភ្នំពេញ​​​នោះ​​​ភ្ញៀវ​​​ទេសចរ​​​នឹង​បន្ត​កើន​ឡើង​​​​ទៀត​​​”។

កាលពី​​​​ខែ​មិថុនា​ ក្រសួង​ទេសចរណ៍​បាន​បញ្ចេ​ញ​​​​ផែន​ការ​រយៈ​ពេល​ប្រាំ​ឆ្នាំ​​​​ស្តីអំពី​​​ការ​​​ ​​​ទាក់ទាញ​​​ភ្ញៀវ​ទេសចរ​ចិន​​​​ឲ្យ​​​បាន​​​១,៣​លាន​នាក់​​​​ត្រឹម​​​​ឆ្នាំ​២០១៨។ ផែន​ការ​នេះ​មាន​​​​សំណើ​​​សុំ​​​​​ដំឡើង​​​​ស្លាក​សញ្ញា​តាម​ផ្លូវ​ជា​ភាសា​ចិន​ ការ​បង្កើន​ជើង​ហោះហើរ​ ​​​ការ​​​​បង្កើន​​​​ចំនួន​ទីក្រុង​ចិន​ដែល​​​ភ្ជាប់​មក​​​​អាកាស​យានដ្ឋាន​​​​នានា​​​នៅ​​​កម្ពុជា​​ ការ​បំពាក់​ប​ំប៉ន​មគ្គុ​ទេស​ទេសចរណ៍​និយាយ​ភាសា​ចិ​ន​ឲ្យ​បាន​កាន់​តែ​ច្រើន​ឡើង​ និង​ការ​អភិវឌ្ឍ​តំបន់​ឆាយណាថោន​ផ្លូវ​ការ​នៅ​ក្នុង​រាជ​ធានី​ភ្នំពេញ​ សៀម​រាប​ និងនៅក្នុង​​ខេត្ត​ព្រះសី​ហនុ។

លោក កៅ បាន​​​ថ្លែង​​​​ថា “ ​​​យើង​​ស្វាគមន៍​ការ​បង្កើត​តំបន់​ឆាយ​ណា​ថោន​។ជនជាតិ​​​ចិន ​មក​​​ដំបូង​ជា​​​​ភ្ញៀវ​​​ទេស​ចរ​ តែ​​​​​​បន្ទាប់​​​មក​​​ ពួកគេ​​​​អាច​​​ជា​វិនិយោគិន​​​​​ ដូច្នេះ​វា​​បង្កើន​ឱកាស​។ ក៏​​​​ប៉ុន្តែ ទី​ក្រុង​នេះកំពុងតែ​​​​​​​បង្ក​ភាព​ងាយ​ស្រួល​​​​​​សម្រាប់​​ទេសចរ​ចិន​​​ស្រាប់​​​ហើយ​​​ ដោយ​​​មាន​​​​ស្លាក​សញ្ញា​​​ជា​ភាសា​​ចិន​​​ជា​ច្រើន ហើយ​​​​​​​​​ក៏​​​មាន​​​​ការ​​​លក់​​​អាហារ​ចិន​​​​ច្រើន​​​​ដែរ​​​”។

រដ្ឋ​មន្ត្រី​ក្រសួង​ទេស​ចរណ៍​ លោក ថោង ខុន មិន​អាច​ទាក់​ទង​សុំ​ការ​អត្ថាធិប្បាយអំពី​​​រឿង​​​នេះ​​​​បាន​ឡើយ​កាល​ពី​ម្សិលមិញ ខណៈ​​ស្ថាន​​ទូត​ចិន​​​ប្រចាំ​​​នៅក្នុង​​​​​​ប្រទេស​​​កម្ពុជា​​​​បាន​បដិសេធមិន​ធ្វើ​អត្ថាធិប្បាយ​៕

ប្រែ​​​សម្រួល​​​ដោយ ចេវ ប៊ុននី

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស