រយៈពេលត្រឹមតែដប់ថ្ងៃប៉ុណ្ណោះបន្ទាប់ពីគណបក្សប្រជាជនកម្ពុជាកំពុងកាន់អំណាចបានបាត់បង់សំឡេងយ៉ាងច្រើននៅពេលបោះឆ្នោតនោះ កាលពីម្សិលមិញក្រសួងហិរញ្ញវត្ថុ បានប្រកាសថា មន្ត្រីរាជការដែលមានប្រាក់ខែទាបប្រហែល៩០.០០០នាក់អាចនឹងទទួលបានការដំឡើងប្រាក់ខែគោលយ៉ាងហោចណាស់ចំនួន៣០ភាគរយ។
ក្រសួងហិរញ្ញវត្ថុបានលើកឡើងនៅក្នុងសេចក្តីប្រកាសមួយថា មន្ត្រីរាជការដែលបច្ចុប្បន្ននេះមានប្រាក់ខែតិចជាង២៤.៤៤០០រៀលក្នុងមួយខែនោះ អាចទទួលបានប្រាក់ខែ៣២០.០០០រៀលចាប់ពីខែក្រោយតទៅ។ មន្ត្រីរាជការណាដែលបច្ចុប្បន្ននេះ មានប្រាក់ខែលើសពី៦០ដុល្លារក្នុងមួយខែអាចទទួលបានការដំឡើងប្រាក់ខែរបស់ពួកគេយ៉ាងហោចណាស់ដល់៣៤៤.០០០រៀល។
សេចក្ដីប្រកាសដដែលនោះបន្តថា “ការដំឡើងប្រាក់ខែគោលនេះនឹងផ្ដល់ផលប្រយោជន៍ដល់មន្ត្រីរាជការប្រហែល៩០.០០០នាក់”ដោយបន្ថែមថា ប្រាក់ឧបត្ថម្ភផ្សេងទៀតសម្រាប់មន្ត្រីរាជការទាំងនោះក៏ត្រូវពិចារណាផងដែរ។ទោះបីជាមានការដំឡើងប្រាក់ខែជាបន្តបន្ទាប់ក៏ដោយ ក៏ការដំឡើងប្រាក់ខែនេះមានតម្លៃត្រឹមតែ១,៦២លានដុល្លារជាប្រាក់ព្យាករណ៍សម្រាប់មន្ត្រីរាជការចំនួន៩០.០០០នាក់ដោយទទួលបាននូវការដំឡើងប្រាក់ខែចំនួន១៨ដុល្លារ ជាចំនួនតិចតួចនៃថវិកាជាតិសរុបចំនួន៣,១ពាន់លានដុល្លារក្នុងឆ្នាំនេះ។
សេចក្ដីប្រកាសនោះ ឲ្យដឹងទៀតថា “នៅពេលអនាគតរដ្ឋាភិបាលក្នុងនីតិកាលទី៥ នឹងព្យាយាមអស់ពីសមត្ថភាពរបស់ខ្លួនដើម្បីដំឡើងប្រាក់ខែជូនមន្ត្រីរាជការនិងកងកម្លាំងប្រដាប់អាវុធគ្រប់ប្រភេទទាំងអស់”។ លោក ងី តាយី រដ្ឋលេខាធិការក្រសួងហិរញ្ញវត្ថុបានបដិសេធមិនធ្វើអត្ថាធិប្បាយអំពីមូលហេតុនៃការដំឡើងប្រាក់ខែនាពេលបច្ចុប្បន្ន ភ្លាមៗបន្ទាប់ពីការបោះឆ្នោតថ្ងៃទី២៨ ខែកក្កដានេះទេ។
គណបក្សប្រជាជនកម្ពុជាកំពុងកាន់អំណាចដែលលទ្ធផលបឋមរបស់ខ្លួនបានឈ្នះការបោះឆ្នោត ប៉ុន្តែបានបាត់បង់ចំនួន២២អាសនៈទៅគណបក្សសង្គ្រោះជាតិជាគណបក្សប្រឆាំង។ គណបក្សប្រឆាំងបានសន្យាដំឡើងប្រាក់ខែជូនមន្ត្រីរាជការអប្បបរមាចំនួនមួយលានរៀលឬ ប្រហែល២៥០ដុល្លារនៅក្នុងយុទ្ធនាការឃោសនារបស់ខ្លួនជាផ្នែកមួយដើម្បីលើកទឹកចិត្តមន្ត្រីទាំងនោះ ក្នុងការលុបបំបាត់អំពើពុករលួយ។
កាលពីថ្ងៃអង្គារ លោក កឹម សុខា អនុប្រធានគណបក្សសង្គ្រោះជាតិបានប្រាប់ក្រុមអ្នកគាំទ្ររបស់ខ្លួននៅរាជធានីភ្នំពេញថា ការស៊ើបអង្កេតមួយបានរកឃើញថា សមាជិកនៃកងយោធពលខេមរភូមិន្ទជាង៧០ភាគរយ និងមន្ត្រីរាជការ ជាក្រុមមួយដែលគណបក្សប្រជាជនកម្ពុជាគិតថា ជាអ្នកគាំទ្រដ៏ស្មោះត្រង់របស់ខ្លួននោះ បានបោះឆ្នោតឲ្យគណបក្សប្រឆាំង ប៉ុន្តែលោកមិនបានផ្ដល់ភ័ស្តុតាងសម្រាប់ការអះអាងនេះទេ។
លោក កៅ ពឿន ប្រធានសមាគមមន្ត្រីរាជការកម្ពុជាឯករាជ្យបានមានប្រសាសន៍ថា ការសម្រេចចិត្តរបស់រដ្ឋាភិបាល ដើម្បីដំឡើងប្រាក់ខែនេះ ដែលហាក់ដូចជាបន្ថែមទៅលើការដំឡើងប្រចាំឆ្នាំចំនួន២០ភាគរយ ដែលរដ្ឋាភិបាលបានផ្ដល់ឲ្យមន្ត្រីរាជការ កាលពីកន្លងមកនោះ គឺជាប់ពាក់ព័ន្ធនឹងលទ្ធផលនៃការបោះឆ្នោត។
លោក កៅ ពឿន ដែលសមាគមរបស់លោកតំណាងឲ្យមន្ត្រីរាជការដែលមិនត្រូវបានអនុញ្ញាតឲ្យបង្កើតសហជីពបានថ្លែងបន្តថា “បន្ទាប់ពីសំឡេងឆ្នោតរបស់គណបក្សសង្គ្រោះជាតិ មានការកើនឡើងនោះ រដ្ឋាភិបាលបច្ចុប្បន្នកំពុងព្យាយាមដើម្បីធ្វើឲ្យមន្ត្រីរាជការសប្បាយចិត្ត។ គណបក្សសង្គ្រោះជាតិបានសន្យាផ្ដល់ប្រាក់ខែជូនមន្ត្រីរាជការចំនួន២៥០ដុល្លារក្នុងមួយខែ ដែលអាចធ្វើទៅបានដោយផ្អែកលើប្រាក់ចំណូលរបស់ជាតិ”។
លោក កៅ ពឿន មានប្រសាសន៍បន្តថា ប្រាក់ខែគោលថ្មីប្រហែល៧៨ដុល្លារក្នុងមួយខែនេះនៅតែទាបជាងប្រាក់ខែ៨០ដុល្លាររបស់កម្មកររោងចក្រកាត់ដេរនោះ នៅតែមិនគ្រប់គ្រាន់សម្រាប់ការចំណាយប្រចាំថ្ងៃ ដោយសារតម្លៃប្រេង និងអាហារឡើងថ្លៃ។
លោកថ្លែងបន្តថា “ ការដំឡើងប្រាក់ខែនេះ គឺមិនគ្រប់គ្រាន់ទេ ហើយវានៅតែមិនឆ្លើយតបតាមសេចក្ដីត្រូវការរបស់មន្ត្រីរាជការដែលចង់បានការរស់នៅដោយមានជីវភាពសមរម្យ។ យើងត្រូវការយ៉ាងហោចណាស់១៧០ដុល្លារក្នុងមួយខែ សម្រាប់ទ្រទ្រង់មនុស្សម្នាក់ ហើយយើងត្រូវការ៦០០ដុល្លារសម្រាប់មន្ត្រីរាជការម្នាក់ដែលមានសមាជិកគ្រួសារលើសពីបួននាក់”។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីមានប្រសាសន៍ថា ការដំឡើងប្រាក់ខែនេះមិនមានអ្វីចម្លែកទេ ប៉ុន្តែ បានបដិសេធមិនធ្វើអត្ថាធិប្បាយបន្ថែមទៀតទេ។ លោកថ្លែងបន្តថា “ នេះគឺជាអ្វីដែលរដ្ឋាភិបាលធ្វើជារៀងរាល់ឆ្នាំ”៕
ប្រែសម្រួលដោយ ឃិន ណៃ