28 C
Phnom Penh

គ.ជ.ប.​​​កំណត់​​​កាល​​​បរិច្ឆេទ​​​ចេញ​​​ផ្សាយ​​​លទ្ធផល​​​នៃ​​​ការ​​​បោះ​​​ឆ្នោត​

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​​​ជាតិ​​​រៀប​​​ចំ​​​ការ​​​បោះ​​​ឆ្នោត​​​ (គ.ជ.ប.) បាន​​​ឲ្យ​​​ដឹង​​​កាល​​​ពី​​​ម្សិលមិញនេះ​​​​​​ថា ខ្លួន​​​នឹងចេញ​​​ផ្សាយ​​​លទ្ធផល​​​ផ្លូវ​​​ការ​​​នៃ​​​ការ​​​បោះ​​​ឆ្នោត​​​នៅ​​​មុន ឬ​​​ត្រឹម​​​​​​​​​ថ្ងៃ​​​ទី​​​៨ ខែ​​​កញ្ញា ខណៈ​​​គណបក្ស​​​នយោបាយ​​​នានា​​​ និង​​​អាជ្ញា​​​​​​ធរ​​​មូល​​​ដ្ឋាន​​​បាន​​​ដាក់​​​​​​របាយការណ៍​​​​​​ចំនួន​​​១៤​ស្ដីអំ​​​ពី​​​​​​​​ភាព​​​មិន​​​ប្រក្រតី​​​នៅ​​​ក្នុង​​​ថ្ងៃ​​​បោះ​​​ឆ្នោត​តាំង​​​ពី​​​ថ្ងៃ​​​ទី​​​២​​​ ខែ​​​សីហា​​​ មក​​​។

លោក ទេព នីថា អគ្គលេខាធិការ​​​គ.ជ.ប. បាន​​​ឲ្យ​​​ដឹងថា អំឡុង​​​ពេលពី​​​​​​បួន​​​​​​ទៅ​​​ប្រាំ​​​ថ្ងៃ​​​​​​បន្ទាប់​​​នេះ​​​ អនុគណៈកម្មកា​រ​​មួយ​​​របស់​​​គ.ជ.ប.​​​ នឹង​​​ស៊ើប​អង្កេតរបាយការណ៍​​​​​​ទាំង​​​១៤ ​​​ដែល​​​រួម​​​មាន​​​​​​​​​ទាំង​​​ការ​​​ចោទ​​​ប្រកាន់អំពី​​​ការ​​​ប្រព្រឹត្ត​​​ខុស​​​នៅ​​​ថ្ងៃ​​​បោះ​​​ឆ្នោត​​​​​​​​​ផងដែរ​​​។ ការ​​​ស៊ើប​​​អង្កេត​​​នេះ​​​ នឹ​​​ង​​​បណ្ដាល​​​ឲ្យ​​​មាន​​​ការ​​​ពន្យារពេល​​​​​​តិច​​​តួច​​​ប៉ុណ្ណោះ​​​ក្នុង​​​ការ​​​ចេញ​​​ផ្សាយ​​​លទ្ធផល​​​បឋម​​​​​​ ដែល​​​គ្រោង​​​ធ្វើ​​​នៅ​​​ថ្ងៃ​​​ទី​​​១០​​​ ខែ​​​សីហា ខាង​​​មុខ​​​នេះ​​​។

លោក ទេព នីថា បាន​​​មាន​​​ប្រសាសន៍​​​ថា “ ដំណើរ​​​ការ​​​របស់​​​គ.ជ.ប. នៅក្នុង​​​ការ​​​ពិនិត្យ​​​​​​របាយការណ៍​​​​​​ទាំងនេះ​​មាន​​​លក្ខណៈ​​​ស្រដៀង​​​​​​គ្នា​​​​​​​​​នឹង​​​ដំណើរ​​​ការ​​​ដោះ​​​ស្រាយ​​​ពាក្យ​​​​​​បណ្ដឹង​​​ដែរ​​​​​​។ យើង​​​នឹង​​​ធ្វើ​​​ការ​​​សម្រេច​​​ថា តើ​​​របាយ​​​ការណ៍​​​ទាំង​​​នោះ​​​សម​​​នឹង​​​ទទួល​​​បាន​​​ការ​​​ស៊ើប​​​អង្កេត​​​ ឬ​​​ច្រាន​​​ចោល​​​” ដោយ​​​លោក​​​បន្ថែម​​​​​​ថា សេចក្ដី​​​សម្រេច​​​របស់​​​គ.ជ.ប.​​​ ពាក់​​​ព័ន្ធ​​​នឹង​​​សុពលភាព​​​នៃ​​​របាយការណ៍​​​ ឬ​​​លទ្ធ​​​ផល​​​នៃ​​​ការ​ស៊ើប​​​អង្កេត​​​​​​ មិន​​​អាច​​​ត្រូវ​​​បាន​​​ប្ដឹង​​​ជំទាស់​​​ទៅ​​​ស្ថាប័ន​​​ណា​​​ផ្សេង​​​ឡើយ​​​។

លោក​​​ ទេព នីថា បាន​​​ឲ្យ​​​ដឹង​​​ថា ដោយ​​​សារ​​​តែ​​​ពាក្យ​​​បណ្ដឹង​​​ទាំង​​​នោះ​​​ គ.ជ.ប. អាច​​​នឹង​​​​​​លើក​​​ពេល​​​​​​ចេញ​​​ផ្សាយ​​​លទ្ធផល​​​បឋម​​​​​​ដែល​​​គ្រោង​​​ធ្វើ​​​នៅ​​​ថ្ងៃ​​​សៅរ៍  ទៅ​​​ថ្ងៃ​​​អាទិត្យ ឬ​​​ក៏​​​ថ្ងៃ​​​ច័ន្ទ​​​ សប្ដាហ៍​​​ក្រោយ​​​វិញ​​​​​​។ ក្នុង​​​ចំណោម​​​របាយការណ៍​​​ទាំង​​​១៤​​​នោះ​​​ របាយការណ៍​​​ចំនួន​​​ប្រាំពី​​​រ​​​​​​ជា​​​របស់​​​គណបក្ស​​​សង្គ្រោះ​​​ជាតិ​​​ បួន​​​ទៀត​​​គឺ​​​ជារបស់​​​គណបក្ស​​​ប្រជា​​​ជន​​​កម្ពុជា​​​​​​ ពីរ​​​ទៀត​​​ជា​​​របស់​​​គណបក្ស​​​ហ៊្វុន​​​ស៊ិន​​​ប៉ិច​​​ និង​​​មួយ​​​ទៀត​​​ជា​​​របស់​​​អាជ្ញាធរ​​​ថ្នាក់​​​ស្រុក​​​។

អនុគណៈកម្មការ​​​មួយ​​​របស់​​​គ.ជ.ប.​​​ ដែល​​​ត្រូវ​​​បាន​​​បង្កើត​​​ឡើង​​​ដើម្បី​​​ស៊ើប​​​អង្កេត​​​ភាព​​​មិន​​​ប្រក្រតី​​​ក្នុង​​​ការ​​​បោះ​​​ឆ្នោត​​​កាល​​​ពី​​​ថ្ងៃ​​​ទី​​​២៨ ខែ​​​កក្កដា នឹង​​​ពិនិត្យ​​​របាយ​​​ការណ៍​​​នីមួយ​​​ៗ​​​ ហើយ​​​និង​​​ធ្វើ​​​ការ​​​សម្រេច​​​ថា តើ​​​​​​វា​អាច​​​បញ្ចូល​​​គ្នា​​​តែ​​​មួយ មុន​​​ពេល​​​មានការ​​​ពិភាក្សា​​​គ្នា​​​ថា តើ​​​ត្រូវ​​​​​ច្រាន​​​ចោល​​​​​​ ឬ​​​បន្ត​​​ស៊ើប​​​អង្កេត​​​​​​ពាក្យ​​​បណ្ដឹង​​​ទាំង​​​នោះ​​​ ឬយ៉ាង​​​ណា​​​នោះ​​​។

ពេល​​​គ.ជ.ប.​​​ចេញ​​​ផ្សាយ​​​លទ្ធផល​​​បឋម​​​រួច​​​ គណបក្ស​​​នយោបាយ​​​នឹង​មាន​​​ឱកាស​​​ប្ដឹង​​​ជំទាស់​​​នឹង​​​លទ្ធផល​​​នេះ​​​។ ពេល​​​នោះ​​​ គ.ជ.ប. ដែល​​​មាន​​​សមាជិក​​​ជ្រើស​​​តាំង​​​ទាំង​​​ប្រាំបួន​​​រូប នេះ មាន​​​ពេល​​​៤៨​​​ម៉ោង​​​ ដើម្បី​​​ពិចារណា​​​​​​ពី​​​ពាក្យ​​​បណ្ដឹង​​​ទាំង​​​​អស់​​​នោះ​​​ និងដើម្បី​​​​​​ចេញ​​​សេចក្ដី​​​សម្រេច​​​។

លោក ទេព នីថា បាន​​​ឲ្យ​​​ដឹង​​​ថា ក្នុង​​​ករណី​​​លទ្ធផល​​​បឋម​​​របស់​​​ខ្លួន​​​គ្មាន​​​ការ​​​ប្ដឹង​​​ជំទាស់​​​​​​ទេ​​​នោះគ.ជ.ប. នឹង​​​ចេញ​​​ផ្សាយ​​​លទ្ធផល​​​ផ្លូវ​​​ការ​​​នៃ​​​ការ​​​បោះ​​​ឆ្នោត​​​នៅ​​​មុន​​​ ឬ​​​ត្រឹម​​​​​​​​​ថ្ងៃ​​​ទី​​​១៦​​​ខែ​​​សីហា ខាង​​​មុខ​​​​​​នេះ​​​។ ប៉ុន្តែ​​​ វា​​​ស្ទើរ​​​តែ​​​ប្រាកដ​​​ទៅ​​​ហើយ​​​ថា នឹង​​​មាន​​​ការ​​​ប្ដឹង​​​ជំទាស់លទ្ធផល​​​បឋម​​​របស់​​​គ.ជ.ប. ​​​​​​ ហើយ​​​ក្នុង​​​ករណី​​​នេះ​​​ ​​​ពាក្យ​​​បណ្ដឹង​​​ជំទាស់​​​នឹង​​​លទ្ធផល​​​ គឺ​​​អាច​​​ដាក់​​​ទៅ​​​​​​​​​ក្រុម​​​ប្រឹក្សា​​​ធម្មនុញ្ញ​​​កម្ពុជា​​​​​​ ដែល​​​មាន​​​ពេលប្រហែល​​​២០​​​ថ្ងៃ​​​ដើម្បី​​​ចេញ​​​សេចក្ដី​​​សម្រេច​​​ចុង​​​ក្រោយ​​​​​​ពាក់​​​ព័ន្ធ​​​នឹង​​​លទ្ធផល​​​នៃ​​​ការ​​​បោះ​​​ឆ្នោត​​​នេះ​​​។

លោក ទេព នីថា បាន​​​​​​ឲ្យ​​​ដឹង​​​ថា ប្រសិន​​​បើ​​​​​​ពាក្យ​​​បណ្ដឹង​​​​ត្រូវ​​​បាន​​​ដាក់​​​ជូ​​​ន​​​ក្រុម​​​ប្រឹក្សា​​​ធម្មនុញ្ញ​​​ដែល​​​មាន​​​សមាជិក​​​ប្រាំបួន​​​រូប​​នោះ​​​​​​ សេចក្ដី​​​សម្រេច​​​ចុង​​​ក្រោយ​​​របស់​​​ក្រុម​​​ប្រឹក្សា​​​នេះ​​​ត្រូវ​​​ធ្វើ​​​​​​ឡើងយូរ​​​បំផុត​​​នៅ​​​ត្រឹម​​​​​​ថ្ងៃ​​​ទី​​​​​​​​​៨ ខែ​​​កញ្ញា​​​។ នៅ​​​ក្នុង​​​ការ​​​បោះ​​​ឆ្នោត​​​ដែល​​​មាន​​​​​​សំឡេង​​​ប្រកៀក​​​ប្រកិត​​​បំផុត​​​​​​​​​ចាប់​​​តាំង​​​ពី​​​ឆ្នាំ​​​១៩៩៨​​​មក​​​នេះ ទាំង​​​គណបក្ស​​​ប្រជា​​​ជន​​​កម្ពុជា​​​ និង​​​គណបក្ស​​​សង្គ្រោះ​​​ជាតិ​​​សុទ្ធ​​​តែ​​​បាន​​​អះអាង​​​ពី​​​ការ​​​ទទួល​​​បាន​​​ជ័យ​​​ជម្នះ​​​រៀង​​​ៗ​​​ខ្លួន​​​។

នៅ​​​យប់​​​ថ្ងៃ​​​បោះ​​​ឆ្នោត​​​ គណបក្ស​​​ប្រជា​​​ជន​​​កម្ពុជា​​​បាន​​​ប្រកាស​​​ថា ខ្លួន​​​បាន​​​ទទួល​​​ជ័យ​​​ជម្នះ​​​ដោយ​​​ទទួល​​​បាន​​​៦៨​​​អាសនៈ​​​ទល់​​​នឹង​​​៥៥​​​អាសនៈ​​​របស់​​​គណបក្ស​​​សង្គ្រោះ​​​ជាតិ​​​។ ពីរ​​​ថ្ងៃ​​​ក្រោយ​​​មក​​​ លោក​​​ សម រង្ស៊ី ដែល​​​យោង​​​លើ​​​ព័ត៌មាន​​​ប្រមូល​​​​​​ដោយ​​​គណបក្ស​​​របស់​​​លោក​​​នៅ​​​តាម​​​ការិយាល័យ​​​បោះ​​​ឆ្នោត​​​នានា​​​​​​បាន​​​អះអាង​​​ថា គណបក្ស​​​របស​​​់​​​ខ្លួន​​​បាន​​​ទទួល​​​ជ័យ​​​ជម្នះ​​​ ដោយ​​​ទទួល​​​បាន​​​៦៣​​​អាសនៈ​​​ទល់​​​នឹង​​​៦០​​​អាសនៈ​​​របស់​​​គណបក្ស​​​ប្រជា​​​ជន​​​។

​​​យោង​​​តាម​​​លិខិត​​​មួយ​​​ច្បាប់​​​ដែល​​​លោក  សម រង្ស៊ី បាន​​​ផ្ញើ​​​ទៅ​​​គ.ជ.ប. កាល​​​ពី​​​ថ្ងៃ​​​ច័ន្ទ​​​​​​របាយការណ៍​​​របស់​​​គណបក្ស​​​សង្គ្រោះ​​​ជាតិ​​​ គឺ​​​ពាក់​​​ព័ន្ធ​​​នឹង​​​ការ​​​ចោទ​​​ប្រកាន់​​​ដែល​​​ថា ​​​ទី១ ឈ្មោះ​​​អ្នក​​​បោះឆ្នោត​​​​​​រាប់​​​ពាន់​​​នាក់​​​បាន​​​បាត់​​​ដោយ​​​គ្មាន​​​មូល​​​ហេតុ​​​ពី​​​បញ្ជី​​​ឈ្មោះ​​​​​​អ្នក​​​បោះ​​​ឆ្នោត​​​​​​​​​​​​​​​​​​ ទី២ អ្នក​​​បោះ​​​ឆ្នោតបាន​​​​​​គូស​​​សន្លឹក​​​ឆ្នោត​​​​​​លើស​​​ពី​​​មួយ​​​ ទី៣ ឯកសារ​​​បញ្ជាក់​​​អត្ត​​​សញ្ញាណ​​​ក្លែង​​​ក្លាយ​​​ត្រូវ​​​បាន​​​គេ​​​ប្រើ​​​  និង​​​ទី៤ របៀប​​​រាប់​​​សន្លឹក​​​ឆ្នោត​​​ និង​​​ការ​​​កត់​​​ត្រា​​​របស់​​​​​​​គ.ជ.ប. ​​​គឺ​​​ខ្វះ​​​តម្លា​​​ភាព​​​។

លិខិត​​​របស់​​​លោក សម រង្ស៊ី មាន​​​ការ​​​លើក​​​ឡើង​​​ថា គណបក្ស​​​សង្គ្រោះ​​​ជាតិ​​​នឹង​​​ដាក់​​​ជូន​​​ភ័ស្ដុតាង​​​គាំទ្រ​​​អំណះអំណាង​​​របស់​​​ខ្លួន​​​ភ្លាម​​​ ពេល​​​​គ.ជ.ប. បង្កើត​​​គណៈកម្មាធិការ​​​ស៊ើប​​​អង្កេត​​​មួយ​​​ដែល​​​​​​ត្រូវ​​​មាន​​​អង្គការ​​​សហ​​​ប្រជា​​​​​​ជាតិ​​​ជា​​​អ្ន​​​កវិនិច្ឆ័យ​​​ឯករាជ្យ​​​រវាង​​​គណ​​​បក្ស​​​ប្រជា​​​ជន​​​​​​ និង​​​គណបក្ស​​​សង្គ្រោះ​​​ជាតិ​​​។

គណបក្ស​​​សង្គ្រោះ​​​ជាតិ​​​ប្រកាន់​​​ជំហរ​​​ថា ​គ.ជ.ប. ដែល​​​សមាជិ​​​ក​​​ភាគ​​​ច្រើន​​​សុទ្ធ​​​តែ​​​ជា​​​អ្នក​​​ស្មោះ​​​ស្ម័គ្រ​​​នឹង​​​គណបក្ស​​​ប្រជា​​​ជន​​​កម្ពុជា​​​ គឺ​​​ពុំ​​​មាន​​​លទ្ធភាព​​​ធ្វើ​​​ការ​​​ស៊ើប​​​អង្កេត​​​ដោយ​​​ឯក​​​រាជ្យ​​​ពី​​​អ្វី​​​ដែល​​​ខ្លួន​​​ចោទ​​​ថា ជា​​​ការ​​​លួច​​​បន្លំ​​​សន្លឹក​​​ឆ្នោត​​​ទ្រង់​​​ទ្រាយ​​​ធំ​​​ពី​​​សំណាក់​​​គណបក្ស​​​ប្រជា​​​ជន​​​កម្ពុជា​​​ឡើយ​​​។

លោក ឈាង វុន សមាជិក​​​សភា​​​​​​គណបក្ស​​​ប្រជា​​​ជន​​​កម្ពុជា​​​ បាន​​​ឲ្យ​​​ដឹង​​​កាល​​​ពី​​​ម្សិលមិញ​​​​​​ថា លោក​​​មិន​​​ដឹង​​​​​​ថា តើ​​​​​​របាយការណ៍​​​​​​ដែល​​​​​​​​​គណបក្សរបស់​​​លោក​​​បាន​​​ផ្ញើ​​​ទៅ​​​​គ.ជ.ប. ​​​​​​មាន​​​ខ្លឹម​​​សារ​​​​​​អ្វី​​​ឲ្យ​​​ប្រាកដ​​​ទេ​​​ ប៉ុន្តែ​​​​​​បាន​​​បញ្ជាក់​​​ថា លោក​​​បាន​​​ “ ទទួល​​​មួយ​​​គំនរ​​​ធំ​​​” នូវ​​​របាយ ការណ៍​​​ពី​​​ភាព​​​មិន​​​ប្រក្រតី​​​លើ​​​តុ​​​ធ្វើ​​​ការ​​​របស់​​​លោក​​​​​​ក្នុង​​​រយៈ​​​ពេល​​​ប៉ុន្មាន​​​ថ្ងៃ​​​ថ្មី​​ៗនេះ​​​។ នៅ​​​ក្នុង​​​ចំណោម​​​​​​ការ​​​ចោទ​​​ប្រកាន់​​​ដែល​​​លោក ឈាង វុន និយាយ​​​ថា គណបក្ស​​​ប្រជា​​​ជន​​​មាន​​​ភ័ស្តុតាង​​​បញ្ជាក់​​​នោះ​​​ គឺ​​​ថា សមាជិក​​​គណបក្ស​​​សង្គ្រោះ​​​ជាតិ​​​បាន​​​ញុះញង់​​​អ្នក​​​បោះ​​​ឆ្នោត​​​នៅ​​​ក្រៅ​​​ការិយាល័យ​​​បោះ​​​ឆ្នោត​​​មួយ​​​នៅក្នុង​​​ខណ្ឌ​​​មាន​​​ជ័យ​​​ រាជ​​​ធានី​​​ភ្នំពេញឲ្យ​​​បំផ្លិច​​​បំផ្លាញ​​​​​​រថយន្ត​​​ចំនួន​​​ពី​​រ​​​គ្រឿង​​​របស់​​​កង​​​រាជ​​​អាវុធ​​​ហត្ថ​​​។

លោក ឈាង វុន ក៏​​​បាន​​​ឲ្យ​​​ដឹង​​​ផង​​​ដែរ​​​ថា គណបក្ស​​​ប្រជា​​​ជន​​​មាន​​​រូប​​​ភាព​​​ជា​​​ភ័ស្ដុតាង​​​បញ្ជាក់​​​ថា លោក​​ សម រង្ស៊ី បាន​​​ធ្វើ​​​យុទ្ធនាការ​​​ឃោសនា​​​ដោយ​​​ខុសច្បាប់​​​​​​នៅ​​​ថ្ងៃ​​​បោះ​​​ឆ្នោត​​​តាម​​​រយៈ​​​ការ​​​ចុះ​​​​​​តាម​​​ការិយាល័យ​​​បោះ​​​ឆ្នោត​​​ជាមួយ​​​បរិវារ​​​ដែល​​​រួម​​​មាន​​​ទាំង​​​ក្រុម​​​អ្នក​​​គាំទ្រ​​​ដែល​​​ពាក់​​​មួក​​​មាន​​​រូប​​​សញ្ញា​​​​​​របស់​​​គណបក្ស​​​សង្គ្រោះ​​​ជាតិ​​​។

ជា​​​ចុង​​​ក្រោយ ​​​លោក ឈាង វុន បាន​​​ឲ្យ​​​ដឹង​​​ថា គណបក្ស​​​ប្រជា​​​ជន​​​កម្ពុជា​​​បាន​​​ “ ទទួល​​​ព័ត៌មាន​​​ថា ក្រុម​​​សកម្មជន​​​របស់​​​គណបក្ស​​​សង្គ្រោះ​​​ជាតិ​​​បាន​​​រារាំង​​​មនុស្ស​​​មាន​​​សម្បុរ​​​ស​​​ជា​​​ច្រើន​​​​​​ដែលត្រូវ​​​បាន​​​​​​គេ​​​សង្ស័យ​​​ថា ជា​​​ជន​​​ជាតិ​​​វៀតណាម​​​ មិន​​​ឲ្យ​​​បោះ​​​ឆ្នោត​​​”។

លោក ឈាង វុន បាន​​​បន្ថែម​​​ថា “ ខ្ញុំ​​​មិន​​​ចោទ​​​ប្រកាន់​​​អ្ន​​​ក​​​ណា​​​ម្នាក់​​​ទេ​​​ ប៉ុន្តែ​​​យើង​​​បាន​​​ស៊ើប​​​អង្កេត​​​ករណី​​​ទាំង​​​នេះ​​​ ហើយ​​​យើង​​​មាន​​​ភ័ស្ដុតាង​​​បញ្ជាក់​​​​​​”។ មជ្ឈមណ្ឌល​​​សិទ្ធិ​​​មនុស្ស​​​កម្ពុជា​​​បាន​​​ចេញ​​​សេចក្ដី​​​ថ្លែងការណ៍​​​មួយ​​​កាល​​​ពី​​​ម្សិលមិញ​​​ដោយ​​​​​​បាន​​​លើក​​​ឡើង​​​អំ​​​ពី​​​កង្វល់​​​ជុំ​​​វិញ​​​កង្វះ​​​តម្លាភាព​​​ក្នុង​​​ការ​​​រាប់​​​សន្លឹក​​​ឆ្នោត​​​របស់​​​គណៈ​​​កម្មាធិការ​​ជាតិ​​​រៀប​​​ចំ​​​ការ​​​បោះ​​​ឆ្នោត​​​។

​​​សេចក្ដី​​​ថ្លែងការណ៍​​​​​​ដដែល​​​នេះមាន​​​ការ​​​លើក​​​ឡើង​​​ថា​​​ ការ​​​បដិសេធ​​​​​​របស់​​​គ.ជ.ប. មិន​​​ឲ្យ​​​​​​​​ក្រុម​​​អ្នក​​​សង្កេត​​​ការណ៍​​​​​ឯករាជ្យ​​​បាន​​​ឃើញ​​​ទម្រង់​​​១១០២​​​ពិត​​​ប្រាកដ​​​​​​​​​ (ក្រដាស​​​ដែល​​​អ្នក​​​សង្កេតការណ៍​​​កត់​​​ត្រា​​​លទ្ធផល​​​តាម​​​ការិយា​​​ល័យ​​​បោះ​​​ឆ្នោត​​​នីមួយ​​​ៗ​​​​​​នៅ​​​ថ្ងៃ​​​បោះ​​​ឆ្នោត​​​) បាន​​​ធ្វើ​​​ឲ្យ​​​អ្នក​​​សង្កេត​​​ការណ៍​​​ និង​​​គណបក្ស​​​នយោបាយ​​​នានា​​​មិន​​​អាច​​​បញ្ជាក់​​​ពី​​​ភាព​​​ត្រឹម​​​ត្រូវ​​​នៃ​​​តួលេខ​​​ដែល​​​គ.ជ.ប.​​​បាន​​​ចេញ​​​ផ្សាយ​​​នៅ​​​ពេល​​​ក្រោយ​​​មក​​​នោះទេ​​​។

សេចក្ដី​​​ថ្លែង​​​ការ​​​ណ៍​​​េនះ​​​មាន​​​ខ្លឹម​​​សារ​​​ថា   “ គ.ជ.ប.​​​ គួរ​​​តែ​​​ឲ្យ​​​ក្រុម​​​អ្នក​​​សង្កេត​​​ការណ៍​​​អព្យា​​​ក្រឹត្យ​​​បាន​​​ឃើញ​​​ទម្រង់​​​​​​១១០២​​​​​​ដើម្បី​​​បង្កើត​​​ទំនុក​​​ចិត្ត​​​លើ​​​លទ្ធផល​​​នៃ​​​ការ​​​បោះ​​​ឆ្នោត​​​​​​ជំនួស​​​ឲ្យ​​​ការ​​​បង្ក​​​​​​ឲ្យ​​​មាន​​​មន្ទិល​​​សង្ស័យ​​​អំពី​​​ការ​​​លួច​​​បន្លំ​​​សន្លឹក​​​ឆ្នោត​​​”។

គណៈកម្មាធិការ​​​ដើម្បី​​​ការ​​​បោះ​​​ឆ្នោត​​​ដោយ​​​សេរី និង​​​យុត្តិធម៌​​​នៅ​​​កម្ពុជា​​​ ហៅ​​​កាត់​​​ថា ខុមហ្វ្រែល រួម​​​ជាមួយ​​​នឹង​​​ក្រុម​​​អ្នក​​​សង្កេត​​​ការណ៍​​​បោះ​​​ឆ្នោត​​​ ព្រម​​​ទាំងស្ថាប័ន​​​សង្គម​​​ស៊ីវិល​​​​​​ជា​​​ច្រើន​​​ទៀត​​​ធ្លាប់​​​បាន​​​អំពាវ​​​នាវ​​​ឲ្យ​​​គ.ជ.ប.​​​​​​ បញ្ចេញ​​​ទម្រង់​​​១១០២ រួម​​​ជាមួយ​​​នឹង​​​បញ្ជី​​​ឈ្មោះ​​​បោះ​​​ឆ្នោត​​​នៅ​​​តាម​​​ការិយាល័យ​​​បោះ​​​ឆ្នោត​​​ដើម្បី​​​ពិនិត្យ​​​មើល​​​​​​ ក្រែង​​​លោ​​​មាន​​​អ្នក​​​មាន​​​ឈ្មោះ​​​បោះ​​​ឆ្នោត​​​នៅ​​​ច្រើន​​​កន្លែង​​​ផ្សេង​​​គ្នា​​​។

ខុមហ្វ្រែល​​​ ក៏​​​បាន​​​សុំមើល​​​ឯកសារ​​​ដែល​​​គេ​​​ហៅ​​​ថា ប័ណ្ណ​​​បោះ​​​ឆ្នោត ចេញ​​​ដោយ​​​មន្ត្រី​​​​​​មូល​​​ដ្ឋាន​​​​​​​​​ឲ្យ​​​អ្នក​​​បោះ​​​ឆ្នោត​​​​​​​​​ដែលគ្មាន​​​ឯកសារ​​​​​​​​​បញ្ជាក់​​​អត្ត​​​សញ្ញាណ​​ត្រឹម​​​ត្រូវ​​​​​​​​​នា​​​​​​ថ្ងៃ​​​បោះ​​​ឆ្នោត​​​ ដើម្បី​​​ឲ្យ​​​ពួក​​​គេ​​​​​​មាន​​​លទ្ធភាព​​​ស៊ើប​​​អង្កេត​​​អំពី​​​ការ​​​បន្លំ​​​​​​អត្ត​​​សញ្ញាណ​​​​​​​​​​​​ដែល​​​អាច​​​កើត​​​មាន​​​។

លោក គល់ បញ្ញា នាយក​​​ប្រតិបត្តិ​​​របស់​​​អង្គការ​​​ ខុមហ្វ្រែល បាន​​​លើក​​​ឡើង​​​ថា​​​ គ.ជ.ប.​​​​​​​​​ ពុំ​​​មាន​​​​​​លទ្ធភាព​​​គ្រប់​​​គ្រាន់​​​ក្នុង​​​ការ​​​ស៊ើប​​​អង្កេត​​​រាល់​​​ភាព​​​មិន​​​ប្រក្រតី​​​ដែល​​​គេ​​​សង្ស័យ​​​ថា បាន​​​កើត​​​ឡើង​​​អំឡុង​​​ការ​​​បោះ​​​ឆ្នោ​​​ត​​​ទេ​​​។ លោក​​​បាន​​​មាន​​​ប្រសាសន៍​​​ថា “ គ.ជ.ប.​​​​​​ពុំ​​​មាន​​​យន្តការ​​​ស៊ើប​​​អង្កេត​​​សម​​​ស្រប​​​ឡើយ។ ពួក​​​គេ​​​ទទួល​​​ពាក្យ​​​បណ្ដឹង​​​រួច​​​ហើយ​​​ក៏​​​ផ្ញើ​​​វា​​​ទៅ​​​គ.ជ.ប.​​​​​​តែ​​​ម្ដង​​​​​​។ ពួក​​​គេ​​​មិន​​​ដែល​​​ធ្វើ​​​ការ​​​ស៊ើប​​​អង្កេត​​​អំពី​​​ភាព​​​មិន​​​ប្រក្រតី​​​ទេ​​​”។

លោក​​ គល់ បញ្ញា ​បានមាន​​​ប្រសាសន៍​​​​​​បន្ត​​​ថា “ ខ្ញុំ​​​មិនយល់​​​សោះ​​​ថា តើ​​​ពួក​​​គេ​​​អាច​​​ធ្វើ​​​ការ​​​ស៊ើប​​​អង្កេត​​​សម​​​ស្រប​​​ក្នុង​​​រយៈ​​​ពេល​​​ដ៏​​​ខ្លី​​​បែប​​​នេះ​​​ដោយ​​​របៀប​​​ណា​​​។ ពួក​​​គេ​​​គួរ​​​តែ​​​អញ្ជើញ​​​គណបក្ស​​​ទាំង​​​ពីរ​​​ឲ្យ​​​ទៅ​​​ពិភាក្សា​​​គ្នា​​​ស្វែង​​​រក​​​កិច្ច​​​ព្រម​​​ព្រៀង​​​ស្ដី​​​ពី​​​ការ​​​បង្កើត​​​​​​ក្រុម​​​ស៊ើប​​​អង្កេត​​​មួយ​​​”។

កាល​​​ពី​​​ម្សិលមិញ​​​ ព្រះ​​​មហាក្សត្រ នរោត្ដម សីហមុនី បាន​​​អំពាវ​​​នាវ​​​ឲ្យ​​​មាន​​​ការ​​​ស្វែង​​​រក​​​ដំណោះ​​​ស្រាយ​​​ដោយ​​​សន្ដិវិធី​​​​​​សម្រាប់​​​វិវាទ​​​ក្រោយ​​​ការ​​​បោះ​​​ឆ្នោត​​​នេះ​​​។ ព្រះ​​​អង្គ​​​បាន​​​ចេញ​​​ព្រះ​​​រាជសារ​​​មួយ​​​ដែល​​​មាន​​​ខ្លឹម​​​សារ​​​ថា “ លទ្ធផល​​​នៃ​​​កា​​​បោះ ឆ្នោត​​​នឹង​​​ត្រូវគណៈ​​​កម្មាធិការ​​​ជាតិ​​​រៀប​​​ចំ​​​ការ​​​បោះឆ្នោត​​​​​​ប្រកាស​​​ជា​​​ផ្លូវ​​​ការ​​​នៅ​​​ចន្លោះ​​​ថ្ងៃ​​​ទី​​​១៤ ខែ​​​សីហា និង​​​ថ្ងៃ​​​ទី​​​៨ ខែ​​​កញ្ញា​​​។ ដើម្បី​​​​​​ផល​​​ប្រយោជន៍​​​ដ៏ធំ​​​ធេង​​​របស់​​​ប្រទេស​​​ជាតិ​​​ និង​​​ប្រជា​​​ពល​​​រដ្ឋ​​​ និង​​​ដើម្បី​​​រក្សា​​​សន្ដិភាព​​​ និង​​​ស្ថិរភាព​​​ជាតិ​​​ យើង​​​អំពាវ​​​នាវ​​​ឲ្យ​​​គណបក្ស​​​ទាំង​​​ពី​​​រ​​​ដែល​​​ប្រជា​​​ពល​​​រដ្ឋ​​​បាន​​​បោះ​​​ឆ្នោត​​​ឲ្យ​​​ និង​​​ដែល​​​មាន​​​អាសនៈ​​​នៅ​​​ក្នុង​​​រដ្ឋ​​​សភា​​​ជាតិ​​​នីតិកាល​​​ទី៥​​​នេះ​​​ សូម​​​បន្ត​​​​​​ពិភាក្សា​​​គ្នា​​​និង​​​ស្វែង​​​​​​រក​​​ដំណោះ​​​ស្រាយ​​​​​​ដោយ​​​សន្ដិ​​​វិធី​​​​​​សម្រាប់​​​វិវាទ​​​ ឬ​​​បញ្ហា​​​ដែល​​​នៅ​​​សេសសល់”៕

ប្រែ​​​សម្រួល​​​ដោយ ភួន ច័ន្ទសេរីវុធ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស