32 C
Phnom Penh

គ.ជ.ប. អំពាវនាវ​ឲ្យ​សាធារណជន​កុំជឿ​​ប្រព័ន្ធ​ផ្សព្វ​ផ្សាយ​

ដោយ ឌឹ ខេមបូឌា ដេលី

បទវិភាគ

នៅ​ម៉ោង​៨​យប់​ថ្ងៃ​បោះ​ឆ្នោត​ ទី​២៨​កក្កដា លោក​ ខៀវ កាញារីទ្ធ​ រដ្ឋ​មន្ត្រី​ក្រសួង​ព័ត៌​មាន​បាន​ប្រកាស​ជ័យ​ជម្នះ​​សម្រាប់​គណ​បក្ស​ប្រជា​ជន​កម្ពុជារបស់​លោក​នាយក​រដ្ឋ​មន្ត្រី ហ៊ុន សែន ថា​​ គណបក្ស​កាន់អំណាច​ទទួល​បាន​៦៨​អាសនៈ​ រីឯ​គណ​បក្ស​ប្រឆាំង​ទទួល​បាន​៥៥​អាសនៈ​។ 

រយៈ​ពេល​ប៉ុន្មាន​ថ្ងៃ​ក្រោយ​មក ​លទ្ធផល​បឋម​ចេញ​ផ្សាយ​ដោយ​គណៈ​កម្មា​ធិការ​ជាតិ​រៀប​ចំ​ការ​បោះ​ឆ្នោត ​ហៅ​កាត់​ថា គ.ជ.ប. ​នៅ​​​ដដែល​ ពោលគឺ​៦៨​អាសនៈ ទល់​នឹង​៥៥​អាសនៈ ប៉ុន្តែ ពេល​នេះ​គ.ជ.ប. កំពុង​អង្វរករ​​ឲ្យសាធារណជន​កុំ​យក​ចិត្ត​ទុក​ដាក់​ចំពោះ​ការ​ជជែក​ណា​មួយ​អំពី​លទ្ធ​ផល​សរុប​ទាំង​នោះ​ ដោយ​សារ​ខ្លាច​បង្ក​​អស្ថិរភាព​ក្នុង​សង្គម។

កាល​ពី​ថ្ងៃ​ច័ន្ទ​ គ.ជ.ប. បានចេញ​សេចក្ដី​ថ្លែងការណ៍​មួយ​ព្រមាន​បណ្ដា​គណបក្ស​នយោបាយ​ និង​ស្ថាប័ន​ប្រព័ន្ធ​ផ្សព្វផ្សាយ​ចំពោះ​ការ​​ចុះ​ផ្សាយ​​លទ្ធផល​បោះឆ្នោត​មិន​ផ្លូវ​ការ​ ហើយ​បាន​​​លើក​ឡើង​ថា ទង្វើ​បែប​នេះ​អាច​នាំ​ឲ្យ​មាន​អស្ថិរភាព​​ក្នុងសង្គម​។​

តែ​ទោះ​ជា​យ៉ាង​ណា​ គ.ជ.ប.​ មិន​បាន​​លើក​​ឡើងពី​​ការ​ព្រមាន​​​របស់​នាយក​រដ្ឋ​មន្ត្រី​ ហ៊ុន សែន​ ក្នុង​ពេល​ថ្មី​ៗ​នេះ​ថា​នឹង​មាន​​ចលាចល​សង្គម​​ ប្រសិន​បើ​គណបក្ស​ប្រឆាំង​ធ្វើ​បាតុ​កម្ម​​​ជំទាស់​​លទ្ធផលបោះឆ្នោត​នោះ​ទេ​។​ គ.ជ.ប. បាន​លើក​ឡើង​ថា “គណៈកម្មាធិ​ការ​ជាតិ​រៀប​ចំ​ការ​បោះឆ្នោត​សូម​ជូន​ដំណឹង​​ដល់​សាធារណ​ជន​​ឲ្យ​បាន​ជ្រាប​ថា ក្នុង​ពេល​ថ្មី​ៗ​នេះ​ បណ្ដា​គណបក្ស​នយោបាយ​​ ប្រព័ន្ធ​ផ្សព្វ​ផ្សាយ​ និង​បណ្ដាញទំនាក់​ទំនង​សង្គម​មួយ​ចំនួន​បាន​ចុះ​​ផ្សាយ​លទ្ធផល​បោះឆ្នោត​​ជ្រើស​តាំង​​តំណាង​រាស្ត្រ​នីតិកាល​ទី​​៥​ដោយ​មិន​ត្រឹម​ត្រូវ​ ​​និង​ដោយ​គ្មាន​មូលដ្ឋាន​​ច្បាស់​លាស់​។​ ការ​ផ្សព្វផ្សាយ​ព័ត៌មាន​មិន​ពិត​នោះ​អាច​​បណ្ដាល​ឲ្យ​មាន​ការ​​យល់​ច្រឡំ​ ដែល​បង្ក​ការ​បំពុល​​បរិយាកាស​សង្គម​​ឲ្យ​បាត់​បង់​​សណ្ដាប់​ធ្នាប់​ និង​បង្កអសន្ដិសុខ​​”។​

គ.ជ.ប. បាន​លើក​ឡើង​ទៀត​ថា​ “ គ.ជ.ប. សូម​អំពាវ​នាវ​ដល់​សាធារណជន​ទាំង​អស់​​កុំ​ឲ្យ​យក​ចិត្តទុក​ដាក់​ ឬ​ជឿ​​ការ​ផ្សព្វផ្សាយ​ព័ត៌​មាន​មិន​ពិត​នោះ​។​ សូម​​រង់ចាំ​ព័ត៌មាន​​អំពី​​លទ្ធផល​​នៃ​ការ​បោះឆ្នោត​​ជ្រើស​តាំង​តំណាង​រាស្ត្រ​នីតិកាល​ទី​៥ ដែល​គ.ជ.ប. នឹង​ប្រកាស​​បន្ទាប់​ពី​មាន​ការ​បញ្ជាក់​ច្បាស់​លាស់​​ និង​បន្ទាប់​ពី​ពាក្យ​បណ្ដឹង​​ និង​សេចក្ដី​រាយការណ៍​អំពី​​ភាព​មិន​ប្រក្រតី​​កើត​មាន​អំឡុង​ពេល​បោះ​ឆ្នោត​ទាំង​អស់​ត្រូវ​បាន​ដោះ​ស្រាយ​”។

បច្ចុប្បន្ន​គណបក្ស​ទាំង​ពីរ​កំពុង​ស្ថិត​​ក្នុង​ស្ថាន​ភាព​ជាប់​គាំង​ទាក់​ទិន​នឹង​​លទ្ធផល​​នៃ​ការ​បោះឆ្នោត​។​ ការ​ចរចា​ឲ្យ​មាន​ការ​ស៊ើប​អង្កេត​ពីភា​ព​មិន​ប្រក្រតី​​កើត​មាន​គ្រប់​ទីកន្លែង​នៅ​ថ្ងៃ​បោះឆ្នោត​​ក៏​បាន​ជាប់​គាំង​​ដែរ​ បន្ទាប់ពី​គណ​បក្ស​ប្រជាជន​កម្ពុជា​ និង​គ.ជ.ប. បាន​ច្រាន​ចោល​សំណើ​របស់​គណបក្ស​សង្គ្រោះ​ជាតិ​ ដែល​សុំ​ឲ្យ​អង្គការ​សហប្រជាជាតិ​​ធ្វើ​ជា​​អ្នក​សម្របសម្រួល​ក្នុង​ការ​ស៊ើប​អង្កេតបែប​នេះ​។

លោក​ ទេព​ នីថា អគ្គលេខាធិការ​គ.ជ.ប.​ បាន​មាន​ប្រសាសន៍​ថា សេចក្ដី​ប្រកាស​នេះ​ធ្វើ​ឡើង​​ ដើម្បី​លុប​បំបាត់​ការ​យល់​ច្រឡំ​។​ លោក​​បាន​មាន​ប្រសាសន៍​ថា “ជា​ការ​ពិត​​គណបក្ស​នយោបាយ​​ ប្រព័ន្ធ​ផ្សព្វផ្សាយ និង​សង្គម​ស៊ីវិល​ មាន​សិទ្ធិ​​ចុះ​ផ្សាយ​​​សេចក្ដី​រាយ​ការណ៍​ទាំង​នេះ​ អំពី​ការ​បោះឆ្នោត​ ដែល​ពួក​គេ​ទទួល​បាន​ ប៉ុន្តែ​តួលេខ​នេះ​ខុសគ្នា​​ទាំង​ស្រុង​។​ ដូច្នេះ​​វា​បង្ក​ឲ្យ​សាធារណជន​មាន​ការ​ភាន់​ច្រឡំ​​ និង​បង្ក​ឲ្យ​មាន​មន្ទិល​​ចំពោះ​​មូលហេតុ​ ដែល​គ.ជ.ប.​ មិន​ទាន់​ចេញ​ផ្សាយតួលេខ​​នៅ​ឡើយ​”។

ពេល​សាក​សួរថា ហេតុ​អ្វី​​បាន​ជា​​សេចក្ដី​ថ្លែង​ការណ៍​​នេះ​មិន​សំដៅ​ចំៗ​លើ​កា​រគំរាម​កំហែង​របស់​លោក​ ហ៊ុន​ សែន​ ក្នុង​ពេល​ថ្មី​ៗ​នេះ​ថា នឹង​មាន​អស្ថិរភាព​ក្នុង​សង្គម​នោះ​ លោក​ ទេព​ នីថា បាន​មាន​ប្រសាសន៍​ថា លោក​ មិន​ចង់​​បញ្ចេញ​ឈ្មោះ​នរណា​ម្នាក់​ឲ្យ​ចំៗ​ទេ​។​ លោក​បាន​មាន​ប្រសាសន៍​បន្ថែម​តាម​ក្រោយ​​ថា “វា​មិន​មែន​ជា​ដែន​សមត្ថកិច្ច​របស់​គ.ជ.ប.  ដែល​ត្រូវ​​ធ្វើ​អត្ថាធិប្បាយ​អំពី​បញ្ហា​នេះ​ទេ​”។

លោ​ក​ស្រី ជា វណ្ណាត​ អ្នក​វិភាគ​នយោ​បាយ​ឯ​ករាជ្យ​បានថ្លែង​ថា ប្រទេស​កម្ពុជា​នៅ​មិន​ទាន់​ជា​សង្គម​ប្រជា​ធិបតេយ្យ​​ពេញ​លេញ​នៅ​ឡើយ​ទេ​ “ ដូច្នេះ​​របៀប​នៃ​ការ​ធ្វើ​អ្វីៗ​ គឺ​ខុស​គ្នា​ពី​បណ្ដា​ប្រទេស​ប្រជា​ធិ​ប​តេយ្យ​ភាគ​ច្រើនផ្សេង​ទៀត។តែងតែ​មាន​ភាព​លម្អៀង​ នោះ​ហើយ​​ជា​មូលហេតុ​​ ដែល​​​ការ​បោះឆ្នោត​​នេះ​មាន​សារៈ​សំខាន់​​ខ្លាំង​”។

លោក​ស្រី​​បាន​មាន​ប្រសាសន៍​បន្ត​ទៀត​ថា “វាជាសារ​ពញ្ញាក់​ស្មារតី ប៉ុន្តែ​ប្រជា​ពល​​រដ្ឋ​ដឹង​​​ថា មាន​ភាព​លម្អៀង​ ហើយ​ពួក​គាត់​មិន​ចង់​បាន​​ភាព​លម្អៀង​នោះ​ឡើយ​។ ខ្ញុំ​គិត​ថា ស្ថាប័ន និង​​បណ្ដា​អ្នក​នយោបាយ​​ចាំ​បាច់​ត្រូវ​សិក្សា​ពី​រឿង​នោះ​ឲ្យ​បាន​ច្រើន។ ប្រព័ន្ធ​ដឹកនាំ​ប្រទេស​​ ដែល​ផ្អែក​លើ​អំណាច​ទឹក​ប្រាក់​ ឬ​ការ​ទិញ​ទឹក​ចិត្ត​លែង​ស័ក្តិ​សម​​នឹង​​​អនុវត្ត​នៅ​ក្នុង​ប្រទេស​កម្ពុជា​ទៀត​ហើយ​”៕

ប្រែសម្រួលដោយ តែម សុខុម​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស