រដ្ឋមន្ត្រីក្រសួងពាណិជ្ជកម្មលោក ចម ប្រសិទ្ធ កាលពីម្សិលមិញបានព្រមានថា ការធ្វើបាតុកម្មណាមួយប្រឆាំងនឹងលទ្ធផលនៃការបោះឆ្នោតនៅប៉ុន្មានសប្ដាហ៍ខាងមុខនេះ អាចបណ្ដាលឲ្យមានការលួចទ្រព្យសម្បត្តិ និងនាំឲ្យមានបញ្ហាអសន្តិសុខសង្គម ដែលអាចធ្វើឲ្យកំណើនសេដ្ឋកិច្ចប្រទេសកម្ពុជាគ្មានស្ថិរភាព។
ការលើកឡើងរបស់លោក ចម ប្រសិទ្ធដែលបានធ្វើឡើងនៅក្នុងពិធីតាំងពិព័រណ៍ ឧស្សាហកម្មគ្រឿងយន្តអន្តរជាតិលើកទី៣នៅក្នុងសាលសន្និសីទនិងមជ្ឈមណ្ឌលតាំងពិព័រណ៍កោះពេជ្រ ក្នុងរាជធានីភ្នំពេញ គឺមានការផ្ទុយគ្នាយ៉ាងខ្លាំងពីអ្វីដែលលោកបានថ្លែងនៅមុនការបោះឆ្នោត កាលពីខែមិថុនា ដែលនៅពេលនោះលោកបានធានាចំពោះវិនិយោគិនអន្តរជាតិថា ពួកគេគួរតែមានទំនុកចិត្តលើសេដ្ឋកិច្ចរបស់ប្រទេសកម្ពុជា ដោយធានាថា គណបក្សប្រជាជនកម្ពុជាកំពុងកាន់អំណាច នឹងឈ្នះការបោះឆ្នោត។
ទោះបីជាគណបក្សប្រជាជនកម្ពុជាបានប្រកាសថា ខ្លួនជាអ្នកឈ្នះការបោះឆ្នោតបន្ទាប់ពីការបោះឆ្នោតកាលពីថ្ងៃទី២៨ ខែកក្កដា ក៏ដោយ ក៏គណបក្សសង្គ្រោះជាតិជាគណបក្សប្រឆាំងបានជំទាស់ នឹងលទ្ធផលនេះដែរ ដោយចោទប្រកាន់ថា មានការលួចបន្លំសន្លឹកឆ្នោតធ្ងន់ធ្ងរនៅទូទាំងប្រទេស ហើយគណបក្សសង្គ្រោះជាតិបានលើកឡើងថា តាមពិតខ្លួនបានឈ្នះសំឡេងភាគច្រើននៅក្នុងសភា។ គណបក្សប្រឆាំងក៏បានលើកឡើងថា នឹងមានមហាបាតុកម្មកើតឡើងប្រសិនបើមានការជាប់គាំងផ្នែកនយោបាយ ហើយថា នេះគឺជាជម្រើសចុងក្រោយ។
លោក ចម ប្រសិទ្ធ បានថ្លែងដោយមិនសំដៅដល់អ្នកណាមួយជាក់លាក់កាលពីម្សិលមិញថា “ប្រសិនបើពួកគេចង់បំផ្លាញសេដ្ឋកិច្ចពួកគេត្រូវតែធ្វើមហាបាតុកម្ម។យើងមិនអាចព្យាករបានទេថា នឹងមានអ្វីកើតឡើង ប្រសិនបើមានមហាបាតុកម្មនោះ។ លោកថ្លែងបន្តថា “ពេលណាមានបាតុកម្មផ្ទុះឡើង នឹងមានមនុស្សទៅលួចប្លន់ទំនិញនៅតាមហាងទំនិញនានា ហើយប្រជាពលរដ្ឋពិតជានឹងមានការភ័យខ្លាចជាពុំខាន តើពួកគេចង់បានបែបនេះឬ?” លោកបានកត់សម្គាល់ថារដ្ឋាភិបាលចង់ឲ្យបាតុកម្មនេះធ្វើដោយសន្តិវិធី។
លោក ចម ប្រសិទ្ធ ក៏បានថ្លែងផងដែរថា បរិយាកាសនៃការភ័យខ្លាចនៅក្រោយការបោះឆ្នោតរារាំងប្រជាពលរដ្ឋមិនឲ្យវិលត្រឡប់មកធ្វើការងារវិញ ដែលកត្តានេះអាចធ្វើឲ្យប៉ះពាល់សេដ្ឋកិច្ច ប៉ុន្តែលោកបានបន្ថែមថា ការនាំចេញមិនមានការប៉ះពាល់ដោយសារការមិនមកធ្វើការនោះទេ។
លោកថ្លែងនៅមុនពេលអំពាវនាវឲ្យប្រជាកសិករ និងកម្មកររោងចក្រកាត់ដេរវិលត្រឡប់មកធ្វើការរបស់ខ្លួនវិញ ខណៈដែលអ្នកនយោបាយធ្វើការដើម្បីដោះស្រាយបញ្ហាដែលកើតចេញពីការតវ៉ានឹងលទ្ធផលនៃការបោះឆ្នោតនេះថា “ទោះជាយ៉ាងណាស្ថានភាពនយោបាយនៅមានស្ថិរភាពនៅពេលនេះ ហើយកម្មករកាត់ដេរប្រហែល៨០ភាគរយបានវិលត្រឡប់មកធ្វើការវិញហើយ ហើយកម្មករកាត់ដេរប្រហែល២០ភាគរយទៀតនៅតែភ័យខ្លាចមិនហ៊ានវិលត្រឡប់មកធ្វើការវិញទេ”។
លោកថ្លែងបន្ថែមទៀតថា “អ្នកទាំងអស់គ្នាត្រូវតែយល់ថា យើងទាំងអស់គ្នាជាខ្មែរ ហើយការបោះឆ្នោតនេះគឺសម្រាប់ប្រជាពលរដ្ឋខ្មែរ ដូច្នេះដំណោះស្រាយគឺត្រូវតែដោះស្រាយរវាងខ្មែរ និងខ្មែរ”។ លោកបានបន្ថែមទៀតថា “លទ្ធផលបឋមបានបង្ហាញថា គណបក្សប្រជាជនកម្ពុជាទទួលបាន៦៨អាសនៈ ហើយគណបក្សសង្គ្រោះជាតិទទួលបាន៥៥អាសនៈ។ ដូច្នេះប្រសិនបើយើងដឹងលទ្ធផលច្បាស់ហើយហេតុអ្វីយើងត្រូវធ្វើការតវ៉ា”៕
ប្រែសម្រួលដោយ ឃិន ណៃ