កាលពីថ្ងៃសៅរ៍ គណបក្សសង្គ្រោះជាតិបានបដិសេធការអត្ថាធិប្បាយរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលថា គណបក្សប្រជាជនកម្ពុជានិងគណបក្សសង្គ្រោះជាតិ បានជួបគ្នាកាលពីថ្ងៃសុក្រ មួយផ្នែកគឺដើម្បីពិភាក្សាអំពីការបែងចែកអំណាចក្នុងរដ្ឋសភានីតិកាលក្រោយនេះ។
លោក ខៀវ កាញារីទ្ធ បានអះអាងកាលពីថ្ងៃសៅរ៍ថា ក្រៅពីការពិភាក្សាអំពីវិធីដោះស្រាយបញ្ហាពាក់ព័ន្ធនឹងភាពមិនប្រក្រតីក្នុងការបោះឆ្នោត ភាគីទាំងពីរក៏បាន “ពិភាក្សាគ្នាអំពីការបែងចែកអាសនៈនៅក្នុងរដ្ឋសភាដើម្បីកំណត់ថា តើអ្នកណានឹងទទួលបន្ទុកលើគណៈកម្មាធិការ [សភា] ណា” ផងដែរ។
ថ្លែងទៅក្រុមអ្នកយកព័ត៌មានក្រោយពិធីបិទវគ្គបណ្ដុះបណ្ដាលមួយផ្នែកសារព័ត៌មានក្នុងរាជធានីភ្នំពេញ លោក ខៀវ កាញារីទ្ធ ក៏បានអះអាងផងដែរថា ភាគីទាំងពីរបានព្រមព្រៀងគ្នាអនុញ្ញាតឲ្យគណៈកម្មាធិការជាតិរៀបចំការបោះឆ្នោត (គ.ជ.ប.) ដឹកនាំការស៊ើបអង្កេតលើភាពមិនប្រក្រតីក្នុងការបោះឆ្នោត និងអ្វីដែលគណបក្សសង្គ្រោះជាតិអះអាង ជាការលួចបន្លំសន្លឹកឆ្នោតជាទូទៅពីសំណាក់គណបក្សប្រជាជនកម្ពុជា។
លោក កាញារីទ្ធ ដែលជាអ្នកអះអាងមុនគេអំពីជ័យជម្នះរបស់គណបក្សប្រជាជនកម្ពុជា ក្នុងការបោះឆ្នោតកាលពីខែមុននោះ បានលើកឡើងថា “រដ្ឋាភិបាលកម្ពុជាមិនអនុញ្ញាតឲ្យអង្គការសហប្រជាជាតិដឹកនាំគណៈកម្មាធិការនេះទេ… គ.ជ.ប. នឹងដឹកនាំគណៈកម្មាធិការនេះ ហើយអង្គការសហប្រជាជាតិអាចធ្វើជាអ្នកសង្កេតការណ៍បាន”។
ការអត្ថាធិប្បាយទាំងពីរលើកនេះគឺផ្ទុយពីជំហរចរចារបស់គណបក្សសង្គ្រោះជាតិ។គណបក្សប្រឆាំងនេះបានបញ្ជាក់ច្បាស់ហើយថា ខ្លួននឹងមិនទទួលយកការស៊ើបអង្កេតណាមួយដែលដឹកនាំដោយ គ.ជ.ប.ទេ ហើយថា ខ្លួននឹងមិនពិភាក្សាអំពីការរៀបចំរចនាសម្ព័ន្ធសភាឡើយ លុះត្រាតែការស៊ើបអង្កេតឥតលម្អៀងពីភាពមិនប្រក្រតីក្នុងការបោះឆ្នោតនេះត្រូវបានធ្វើឡើង។
ក្នុងសេចក្ដីថ្លែងការណ៍មួយចេញកាលពីរសៀលថ្ងៃសៅរ៍ គណបក្សសង្គ្រោះជាតិបានលើកឡើងថា ការពិភាក្សាពិតប្រាកដគឺ “ផ្ទុយពីការអត្ថាធិប្បាយរបស់ [លោក] កាញារីទ្ធ” ដែលគណបក្សនេះលើកឡើងថាជា “ការបំផ្លើសនិងញុះញង់ដើម្បីកេងចំណេញនយោបាយ”។
សេចក្តីថ្លែងការណ៍នេះមានខ្លឹមសារថា “ក្រុមការងាររបស់គណបក្សសង្គ្រោះជាតិនិងគណបក្សប្រជាជនកម្ពុជា បានជួបគ្នាកាលពីថ្ងៃទី៩ ខែសីហា ឆ្នាំ២០១៣ នៅវិមានរដ្ឋសភា ដើម្បីពិភាក្សាតែអំពីការបង្កើតក្រុមជំនាញមួយដើម្បីស៊ើបអង្កេតពីភាពមិនប្រក្រតីក្នុងការបោះឆ្នោតប៉ុណ្ណោះ”។
លោក ជាម យៀប សមាជិកសភាគណបក្សប្រជាជនកម្ពុជា ដែលស្ថិតក្នុងចំណោមសមាជិកទាំងបីរូបរបស់គណបក្សកាន់អំណាច ដែលបានចូលរួមក្នុងការពិភាក្សានេះដែរនោះ ក៏ថ្លែងកាលពីម្សិលមិញដែរថា ការអត្ថាធិប្បាយរបស់លោក កាញារីទ្ធ អំពីការពិភាក្សានេះគឺមិនត្រឹមត្រូវទេ។ លោក ជាម យៀប បានមានប្រសាសន៍ថា “យើងមិនបានពិភាក្សាអំពីអាសនៈនៅក្នុងរដ្ឋសភាទេ។ យើងគ្រាន់តែពិភាក្សាអំពីគណៈកម្មាធិការពិសេសប៉ុណ្ណោះ”៕
ប្រែសម្រួលដោយ ចេវ ប៊ុននី