34 C
Phnom Penh

ព្រះ​​​មហាក្សត្រ​​​ នរោត្ដម សីហមុនី យាងពី​​​កម្ពុជា​​​​​​ទៅ​​​រដ្ឋ​​​ធានីប៉េកាំង​​​​​​​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​ម្នាក់​​​​​​បាន​​​បញ្ជាក់​​​ថា ព្រះ​​​មហា​​​ក្សត្រ​​​ នរោត្តម សីហមុនី នឹង​​​យាង​​​ទៅ​​​រដ្ឋធានី​​​ប៉េកាំង នៅ​​​ថ្ងៃនេះ​​​។ លោក ហេង ចាន់​​​ធារី ប្រធាន​​​ការិយា​​​ល័យ​​​នគរ​​​បាល​​​ចរចរណ៍​​​រាជធានីភ្នំពេញ ដែល​​​ត្រូវ​​​បាន​​​ជូន​​​ដំណឹង​​​អំពីការ​​​​​​យាង​​​ទៅ​​​ក្រុង​​​ប៉េកាំង​​​ ដើម្បី​​​សម្រួល​​​ចរាចរណ៍​​​ជាមុននោះ​​​​​​ បាន​​​មាន​​​ប្រ​​​សា​​​សន៍​​​ថា “ ព្រះ​​​មហា​​​ក្សត្រនឹង​​​យាង​​​ទៅ​​​ក្រុង​​​ប៉េកាំង​​​ នៅ​​​ថ្ងៃ​​​ស្អែក​​​ ចន្លោះពីម៉ោង​​​៧​​​ព្រឹក​​​ទៅ​​​ម៉ោង​​​៨​​​ព្រឹក​​​”។

អង្គរក្សនៅ​​​​​​ព្រះ​​​បរម​​​រាជវាំង​​​ម្នាក់​​​​​​ ដែល​​​បាន​​​និយាយ​​​ក្នុង​​​លក្ខខណ្ឌ​​​អនាមិ​​​ក​​​ដោយ​​​សារ​​​​ខ្លួន​​​មិន​​​ត្រូវ​​​បាន​​​អនុញ្ញាត​​​ឲ្យ​​​និយាយ​​​ជា​​​សាធា​​​រណៈ​​​នោះ ក៏​​​បាន​​​បញ្ជាក់​​​អំពី​​​ការ​​​យាង​​​ចាក​​​ចេញ​​​របស់​​​ព្រះមហាក្សត្រ​​​ដែរ ហើយ​​​បាន​​​ឲ្យ​​​ដឹង​​​ថា ​​ព្រះ​​​មហាក្សត្រ​​​នឹង​​​យាង​​​ចេញ​​​នៅ​​​ម៉ោង​​​ប្រហែល​​​៨​​​ព្រឹក ជាមួយ​​​ព្រះ​​​មាតា​​​របស់​​​ទ្រង់ គឺ​​​​​​សម្ដេច​​​ម៉ែ ន រោត្តម មុនីនាថ ។ សមាជិក​​​​​​រាជ​​​វង្សានុវង្ស​​​មួយ​​​អង្គ​​​ដែល​​​បាន​​​មាន​​​បន្ទូល​​​ក្នុង​​​លក្ខខណ្ឌ​​​អនាមិក​​​ បាន​​​ឲ្យ​​​ដឹង​​​ថា ព្រះ​​​មហា​​​ក្សត្រ នរោត្តម សីហមុនី យាង​​​ទៅ​​​ទីក្រុង​​​ប៉េកាំង ដើម្បី​​​ពិនិត្យ​​​ព្រះ​​​រាជ​​​សុខភាព​​​។

ការ​​​យាង​​​របស់​​​ព្រះមហាក្សត្រ​​​ នរោត្តម សីហមុនី ធ្វើ​​​ឡើង​​​ត្រឹម​​​រយៈ​​​ពេល​​​ពីរ​​​សប្ដាហ៍​​​ប៉ុណ្ណោះ​​​ក្រោយ​​​ការ​​​បោះឆ្នោត​​​ ដែល​​​គណ​​​បក្ស​​​ធំៗ​​​ទាំង​​​ពីរ​​​បាន​​​អះអាង​​​ពី​​​ជ័យ​​​ជម្នះ​​​រៀង​​​ៗ​​​ខ្លួន​​​ និង​​​ដែល​​​បាន​​​បណ្ដាល​​​ឲ្យ​​​មាន​​​ការ​​​ជាប់​​​គាំង​​​ផ្នែក​​​នយោបាយ​​​។ ក្រោម​​​រដ្ឋធម្មនុញ្ញ​​​​​​កម្ពុជា​​​ ព្រះ​​​មហាក្សត្រ ត្រូវ​​​កោះ​​​ប្រជុំ​​​សភា​​​​​​លើក​​​ដំបូង​​​អំឡុង​​​រយៈ​​​ពេល​​​៦០​​​ថ្ងៃ​​​ ក្រោយ​​​ការ​​​បោះ​​​ឆ្នោត​​​។

លោក គល់ បញ្ញា នាយក​​​ប្រតិបត្តិ​​​គណៈ​​​កម្មាធិការ​​​ដើម្បីការ​​​បោះឆ្នោត​​​ដោយ​​​សេរី និង​​​យុត្តិធម៌​​​នៅ​​​កម្ពុជា​​​ (ខុម​​​ហ្វ្រែល)​​​ បាន​​​មាន​​​ប្រសាសន៍​​​ថា “ ព្រះ​​​មហា​​​ក្សត្រ​​​ត្រូវ​​​កោះ​​​ប្រជុំ​​​សភា​​​លើក​​​ដំបូង​​​ និង​​​តែង​​​តាំង​​​បេក្ខ​​​ជន​​​នាយក​​​រដ្ឋមន្ត្រី​​​ដែល​​​ស្នើ​​​ដោយ​​​គណ​​​បក្ស​​​ឈ្នះឆ្នោត​​​”។

គិត​​​ត្រឹម​​​ថ្ងៃ​​​ម្សិលមិញ​​​នេះ គេ​​​មិន​​​ច្បាស់​​​ថា តើព្រះ​​​មហាក្សត្រ​​​ នរោត្តម សីហមុនី នឹង​​​គង់​​​នៅ​​​ក្នុង​​​ប្រទេស​​​ចិន​​​រយៈ​​​ពេល​​​យូរ​​​ប៉ុណ្ណា​​​ទេ។ ទោះជា​​​យ៉ាង​​​ណា​​​  លោក  គល់ បញ្ញា បាន​​​ឲ្យ​​​ដឹង​​​ថា ប្រសិន​​​បើ​​​ព្រះ​​​មហាក្សត្រ​​​​​​អវត្ត​​​មាន​​​ក្នុង​​​ខែកញ្ញា ពេល​​​បើក​​​សម័យ​​​ប្រជុំ​​​សភា​​​លើក​​​ដំបូង​​​នោះ ទ្រង់​​​អាច​​​ត្រូវ​​​បាន​​​ជំនួស​​​ដោយ​​​ប្រធាន​​​ព្រឹទ្ធសភា​​​ស្ដីទី​​​។

លោកបាន​​​មាន​​​ប្រសាសន៍​​​ថា “ តាម​​​បទ​​​ពិសោធន៍​​​កន្លង​​​មក​​​ សម័យ​​​ប្រជុំ​​​នៅ​​​តែ​​​ដំណើរ​​​ការ​​​ជា​​​ធម្មតា…​​​ប្រធាន​​​ព្រឹទ្ធសភា​​​ស្ដីទី​​​អាច​​​ដើរ​​​តួនាទី​​​នោះ​​​” ដោយ​​​លោក​​​បាន​​​សំដៅ​​​លើ​​​ការ​​​ជាប់​​​គាំង​​​​​​រយៈ​​​ពេល​​​មួយ​​​ឆ្នាំ​​​​​​ក្រោយ​​​ការ​​​បោះ​​​ឆ្នោត​​​ឆ្នាំ​​​២០០៣។

នៅ​​​ពេល​​​នោះ ​​​គណបក្ស​​​ប្រជា​​​ជន​​​កម្ពុជា​​​បាន​​​ឈ្នះ​​​អាសនៈ​​​ភាគ​​​ច្រើន​​​ ប៉ុន្តែ​​​មិន​​​គ្រប់​​​២​​​ភាគ​​​៣ ដែល​​​ចាំ​​​បាច​​​់​​​សម្រាប់ការ​​​បង្កើត​​​រដ្ឋា​​​ភិបាល​​​តែ​​​ម្នាក់​​​ឯង​​​ទេ។ ទី​​​បំផុត ​​​គណបក្ស​​​ប្រជា​​​ជន​​​បាន​​​បង្កើត​​​កិច្ច​​​ព្រម​​​ព្រៀង​​​ជាមួ​​យ​​​គណបក្ស​​​ហ្វុ៊ន​​​ស៊ិន​​​ប៉ិច ដើម្បី​​​បង្កើត​​​រដ្ឋាភិបាល​​​ចម្រុះ​​​ ដែល​​​តម្រូវ​​​ឲ្យ​​​មានការ​​​ធ្វើ​​​វិសោធនកម្ម​​​រដ្ឋធម្មនុញ្ញ​​​ និង​​​តម្រូវ​​​ឲ្យ​​​ព្រះ​​​បរម​​​សព​​​សម្ដេច​​​ឪ នរោត្តម សីហនុ ឡាយ​​​ព្រះហស្ត​​​លេខា​​​​​​លើ​​​វិសោធនកម្មនោះ​​​។

ទោះ​​​ជាយ៉ាង​​​ណា​​​ សម្ដេច​​​ឪ​​​បាន​​​យាង​​​ទៅ​​​ប្រទេស​​​ចិន​​​ ដើម្បី​​​ពិនិត្យ​​​ព្រះ​​​រាជ​​​សុខ​​​ភាព​​​ ហើយ​​​ការ​​​ទទួល​​​ខុស​​​ត្រូវ​​​បាន​​​ធ្លាក់​​​លើ​​​ប្រធាន​​​ព្រឹទ្ធសភា​​​​​​ ជា​​​ ស៊ីម ក្នុង​​​នាម​​​ជា​​​ប្រមុខ​​​រដ្ឋស្ដីទី​​​។ ប៉ុន្តែ​​​លោក​​​ ជា ស៊ីម ខ្លួន​​​ឯង​​​បាន​​​ចាក​​​ចេញ​​​ពី​​​ប្រទេស​​​ដែរ​​​ ដោយ​​​អះអាង​​​ថា លោក​​​ត្រូវ​​​ពិនិត្យ​​​សុខ​​​ភាព​​​នៅ​​​ក្នុង​​​ប្រទេស​​​ថៃ ប៉ុន្តែ​​​គេ​​​ជឿ​​​ថា លោក​​​បាន​​​បដិសេធ​​​មិន​​​ចុះ​​​ហត្ថលេខា​​​លើ​​​វិសោធនកម្ម​​​នោះ។ ការ​​​ទទួល​​​ខុស​​​ត្រូវ​​​​​​ទី​​​បំផុត​​​បាន​​​ធ្លាក់​​​ទៅ​​​លើ​​​អតី​​​ត​​​អនុ​​​ប្រធាន​​​​​​ព្រឹទ្ធ​​​សភា​​​ ញឹក ប៊ុនឆៃ។

គណបក្ស​​​ប្រជា​​​ជន​​​កម្ពុជា​​​ អះអាង​​​ថា ខ្លួន​​​​​​បាន​​​ទទួល​​​ជ័យ​​​ជម្នះ​​​ក្នុងការ​​​បោះ​​​ឆ្នោត​​​ថ្ងៃ​​​ទី​​​២៨​​​ ខែកក្កដា ដោយ​​​​​​ទទួល​​​បាន​​​៦៨​​​អាសនៈ​​​ទល់​​​នឹង​​​៥៥​​​អាសនៈ​​​របស់​​​គណបក្ស​​​ប្រឆាំង​​​ ប៉ុន្តែ​​​គណបក្ស​​​ប្រឆាំង​​​បាន​​​ឆ្លើយ​​​តប​​​ថា ខ្លួន​​​ទើប​​​ជា​​​អ្នក​​​ទទួល​​​បាន​​​ជ័យ​​​ជម្នះ​​​ ដោយ​​​​​​ទទួល​​​បាន​​​៦៣​​​អាសនៈ ដែល​​​ជា​​​សំឡេង​​​ភាគ​​​ច្រើន​​​ដាច់​​​ខាត​​​។

គណបក្ស​​​សង្គ្រោះ​​​​​​ជាតិ​​​បាន​​​បញ្ជាក់​​​ថា ខ្លួន​​​អាច​​​នឹង​​​ធ្វើ​​​ពហិការ​​​សម័យ​​​ប្រជុំ​​​សភា​​​លើកដំបូង​​​ក្នុង​​​ខែកញ្ញា ប្រសិន​​​បើ​​​ពុំមាន​​​ការ​​​ស៊ើប​​​អង្កេត​​​ពី​​​ភាព​​​មិន​​​ប្រក្រតីអំឡុង​​​ពេល​​​​​​បោះ​​​ឆ្នោត​​​ទេ​​​នោះ។ ​​​លោក​​​នាយក​​​រដ្ឋមន្ត្រី​​​ ហ៊ុន សែន បាន​​​ឆ្លើយ​​​តប​​​ការ​​​ពី​​​ប្រហែល​​​មួយ​​​សប្ដាហ៍​​​មុន​​​ថា ​​​ប្រសិន​​​​​​បើ​​​គណបក្ស​​​សង្គ្រោះ​​​ជាតិ​​​ធ្វើ​​​ពហិការ​​​មែន​​​នោះ​​​ វា​​​នឹ​​​ងត្រូវ​​​បាន​​​ចាត់​​​ទុក​​​ថាជា​​​ទង្វើ​​​ក្បត់​​​ជាតិ​​​។ លោក​​​​​​ថ្លែង​​​នៅ​​​ពេល​​​នោះ​​​ថា “ ពេល​​​ព្រះ​​​មហាក្សត្រ​​​​​​កោះ​​​ហៅ​​​អស​​​់​​​លោក​​​ ហើយ​​​អស់​​​លោក​​​បដិសេធ​​​មិន​​​ចូល​​​រួម​​​នោះ វា​​​មាន​​​ន័យ​​​ថា អស់​​​លោកទាំង​​​អស់​​​គ្នា​​​​​​ប្រឆាំង​​​នឹង​​​ព្រះ​​​មហាក្សត្រ​​​ហើយ​​​”៕

(រាយការណ៍​​​បន្ថែម​​​ដោយ Kate Bartlett)
ប្រែ​​​សម្រួល​​​ដោយ ភួន ច័ន្ទសេរីវុធ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស