មន្ត្រីនគរបាលម្នាក់បានឲ្យដឹងថា កាលពីថ្ងៃសៅរ៍ សាលាដំបូងរាជធានីភ្នំពេញបានបើកផ្លូវសម្រាប់ការធ្វើបត្យាប័នបុរសជនជាតិអាមេរិកាំងម្នាក់ ដែលត្រូវបានចាប់ខ្លួននៅកម្ពុជាកាលពីថ្ងៃព្រហស្បតិ៍ និងដែលកំពុងត្រូវបានតាមចាប់ខ្លួននៅសហរដ្ឋអាមេរិក តាមការចោទប្រកាន់ពីបទជួញដូរគ្រឿងញៀន។
លោក អ៊ិន សុង អនុប្រធាននាយកដ្ឋានប្រឆាំងគ្រឿងញៀននៃក្រសួងមហាផ្ទៃបានឲ្យដឹងថា តុលាការបានសម្រេចយល់ព្រមធ្វើបត្យាប័នឈ្មោះ គ្រីស្តូហ្វ័រ ចេមស៍ ភីតធើសេន (Christopher James Petersen) អាយុ៣៨ឆ្នាំ កាលពីថ្ងៃសៅរ៍ ហើយថា គាត់អាចនឹងត្រូវបញ្ជូនចេញពីកម្ពុជានៅថ្ងៃនេះ។
លោកបានបន្តថា “ ពេលនេះ យើងកំពុងរង់ចាំការសម្រេចពីថ្នាក់លើដើម្បីបញ្ជូនលោក ចេមស៍ ទៅការិយាល័យនគរបាលអន្តោប្រវេស្តនៅទល់មុខអាកាសយានដ្ឋានអន្តរជាតិភ្នំពេញ និងប្រគល់ខ្លួនគាត់ឲ្យស្ថានទូតអាមេរិកដើម្បីធ្វើបត្យាប័ន”។
កាលពីថ្ងៃព្រហស្បតិ៍ លោក អ៊ិន សុង ក៏បានចោទប្រកាន់លោក ភីតធើសេន ថាបានចូលក្នុងប្រទេសកម្ពុជាដោយខុសច្បាប់តាមរយៈលិខិតឆ្លងដែនអាមេរិក ដែលត្រូវបានតុលាការអាមេរិកទុកជាមោឃៈផងដែរ។
មន្ត្រីតុលាការដែលកាន់សំណុំរឿងនេះមិនអាចទាក់ទង សុំការអត្ថាធិប្បាយបានទេកាលពីម្សិលមិញនេះ។ យោងតាមសេចក្តីរាយការណ៍ព័ត៌មាននៅអាមេរិកបានឲ្យដឹងថា ជននេះក៏ត្រូវបានចោទប្រកាន់ពីបទសមគំនិតចែកចាយថ្នាំញៀនមេតំហ្វេតាមីននៅក្នុងរដ្ឋចំនួនបីផ្សេងទៀតផងដែរ៕
ប្រែសម្រួលដោយ ចេវ ប៊ុននី