គណបក្សប្រឆំាងបានបដិសេធមិនទទួលយកលទ្ធផលបឋមជាផ្លូវការដំបូង ដែលគណៈកម្មាធិការជាតិរៀបចំការបោះឆ្នោត (គ.ជ.ប.) បានប្រកាសកាលពីព្រឹកថ្ងៃចន្ទ័នេះ។
គណបក្សសង្គ្រោះជាតិបានធ្វើសន្និសីទកាសែតមួយនៅឯទីស្នាក់ការបក្សនេះក្នុងទីក្រុងភ្នំពេញភ្លាមៗ ដោយមិនទទួលស្គាល់លទ្ធផលដែល គ.ជ.ប. បានប្រកាសកាលពីព្រឹកមិញនេះ ហើយលើកឡើងថា គ.ជ.ប. មិនគួរប្រកាសលទ្ធផលមុនពេលដែលភាពមិនប្រក្រតីមិនទាន់ត្រូវបានដោះស្រាយនៅឡើយទេ ហើយថាគណៈកម្មាធិការនេះត្រូវតែទទួលខុសត្រូវទាំងស្រុងចំពោះភាពចលាចលណាមួយដែលនឹងកើតមានឡើងថ្ងៃអនាគត។
គណៈកម្មាធិការជាតិរៀបចំការបោះឆ្នោត (គ.ជ.ប.) កាលពីព្រឹកថ្ងៃចន្ទ័នេះបានប្រកាសលទ្ធផលបោះឆ្នោតជាផ្លូវការលើកដំបូង ហើយនេះវាមិនខុសគ្នាប៉ុន្មាននោះទេទៅនឹងលទ្ធផលក្រៅផ្លូវការ ដែលបង្ហាញដោយ គ.ជ.ប. បន្ទាប់ពីការបោះឆ្នោតនៅថ្ងៃទី ២៨ កក្កដា គឺគណបក្សប្រជាជនកម្ពុជាជាអ្នកទទួលជ័យជម្នះ។
លទ្ធផល បឋមជាផ្លូវការបង្ហាញថាមានការកើនឡើងតិចតួចនៃសន្លឹកឆ្នោតសរុប សម្រាប់គណបក្សសង្គ្រោះជាតិ និងគណបក្សប្រជាជនកម្ពុជា។ យោងតាម គ.ជ.ប. បានឲ្យដឹងថា គណបក្សប្រជាជនទទួលបាន ៣.២៣៥.៩៦៩ សំឡេងទូទាំងប្រទេស ចំណែកឯគណបក្សសង្គ្រោះជាតិទទួលបាន ២.៩៤៦.១៧៦សំឡេង។
គណបក្សប្រឆាំងទទួលបានជ័យជម្នះតាមបណ្តាខេត្តក្រុងធំៗចំនួនបួន គឺខេត្តកំពង់ចាម ក្រុងភ្នំពេញ ព្រៃវែង និងខេត្តកណ្តាល ខណ:ដែលគណបក្សកាន់អំណាចទទួលជ័យជម្នះតាមបណ្តាខេត្តផ្សេងៗទៀត។
លទ្ធផលបឋមរបស់ គ.ជ.ប. បានបង្ហាញថាគណបក្សកាន់អំណាចជាអ្នកទទួលបានជ័យជម្នះ ពោលគឺទទួលបាន ៦៨ អាសនៈ រីឯគណបក្សសង្គ្រោះជាតិទទួលបាន ៥៥ អាសន:។ ប៉ុន្តែគណបក្សសង្គ្រោះជាតិបានអះអាងថាខ្លួនទទួលបាន ៦៣ អាសនៈហើយគណបក្សប្រជាជនកម្ពុជាទទួលបានត្រឹមតែ ៦០ អាសន: ប៉ុណ្នោះ៕
សូមអានព័ត៌មានលម្អិតនៅថ្ងៃស្អែក។