កាសែត ហ្វ្រ៊ែងហ្វើតធើ អាល់ហ្សឺម៉ែន ហ្សេទុង (Frankfurter Allgemeine Zeitung) ដ៏មានឥទ្ធិពលរបស់អាល្លឺម៉ង់ បានរិះគន់ឯកអគ្គរដ្ឋទូតអាល្លឺម៉ង់ប្រចាំប្រទេសកម្ពុជាថា ជាអ្នកនាំពាក្យរបស់លោកនាយករដ្ឋមន្ត្រី ហ៊ុន សែន បន្ទាប់ពីលោកបានបកស្រាយខ្លឹមសារនៃជំនួបនាពេលថ្មីៗរវាងអ្នកទាំងពីរ ដែលអំឡុងពេលនោះ មានការពិភាក្សាអំពីការបែងចែកអាសនៈនៅរដ្ឋសភាជាតិ។
កាលពីថ្ងៃសុក្រ កាសែតនេះបានចុះផ្សាយអត្ថបទមួយក្រោមចំណងជើងថា “ មេដឹកនាំផ្តាច់ការ និងអ្នកការទូត” ដែលពណ៌នាពីជំនួបរវាងឯកអគ្គរដ្ឋទូត វ៉ូលហ្គាំង ម៉ូស័រ (Wolfgang Moser) និង លោក ហ៊ុន សែន ដែលបានផ្ញើសារព្រមានថា លោកនឹងបែងចែកអាសនៈរបស់គណបក្សសង្គ្រោះជាតិឲ្យគណបក្សតូចៗប្រសិនបើគណបក្សប្រឆាំងនេះបដិសេធមិនទទួលយកអាសនៈនៅសភា។
កាសែតនេះបានលើកឡើងថា “ តើគាត់ត្រូវបានគេប្រើប្រាស់ឬ?តើដោយសារតែកាលៈទេសៈតម្រូវឬ? ឬក៏មានរឿងផ្សេងនៅពីក្រោយឆាក?” ។ កាសែតនេះអះអាងថា ខណៈលទ្ធផលនៃការបោះឆ្នោតមិនទាន់ត្រូវបានប្រកាសជាផ្លូវការ ហើយគណបក្សទាំងពីរសុទ្ធតែបានអះអាងពីជ័យជម្នះរៀងៗខ្លួន ទៀតនោះ លោក ម៉ូស័រ បែរជាអបអរសាទរលោក ហ៊ុន សែន ចំពោះជ័យជម្នះក្នុងការបោះឆ្នោតទៅវិញ។
អត្ថបទនេះមានខ្លឹមសារថា “ ស្ថានភាពកាន់តែមានភាពស្មុគស្មាញឡើងដោយសារតែគណបក្សកាន់អំណាចបានធ្វើឲ្យគេមើលមកដូចជាតំណាងប្រទេសអាល្លឺម៉ង់រូបនេះ អបអរសាទរ ហ៊ុន សែន ចំពោះជ័យជម្នះក្នុងការបោះឆ្នោត។ វាធ្វើឲ្យប្រទេសអាល្លឺម៉ង់មើលទៅមិនខុសពីប្រទេសចិនដែលស្ថិតនៅក្នុងចំណោមឆ្អឹងខ្នងសំខាន់បំផុតនៃរបប ហ៊ុន សែន ឡើយ”។
លោក ម៉ូស័រ ដែលចប់អាណត្តិក្នុងខែនេះ បានបដិសេធកាលពីម្សិលមិញថា លោកមិនមែនជាអ្នកនាំពាក្យលោក ហ៊ុន សែន ទេ។ លោក ម៉ូស័រ បានឆ្លើយតបតាមអីុម៉េលជាភាសាអាល្លឺម៉ង់ថា “ ខ្ញុំត្រូវតែបំភ្លឺថា ខ្ញុំមិនបានពាំនាំសារពីលោក ហ៊ុន សែន ឡើយ”។
កាសែតអាល្លឺម៉ង់នេះ ក៏បានដកស្រង់សម្តីរបស់លោកស្រី ណាលី ពីឡូក នាយិកាអង្គការសិទ្ធិមនុស្សលីកាដូ ដែលបានរិះគន់លោក ម៉ូស័រ និងបានពណ៌នាពីទង្វើរបស់ឯកអគ្គរដ្ឋទូតរូបនេះថា “ គួរឲ្យភ្ញាក់ផ្អើល” និង “ គួរឲ្យសង្ស័យ”។ លោក ម៉ូស័រ បានឆ្លើយតបថា “ អ្វីៗប្រាកដជាមិនបានទាក់ទាញចំណាប់អារម្មណ៍របស់អ្នកណាម្នាក់ទេ ប្រសិនបើអង្គការក្រៅរដ្ឋាភិបាល លីកាដូ នេះមិនបានលើកឡើងពីភាពជិតស្និទ្ធជាមួយលោក ហ៊ុន សែន ដែលតាម ពិតគឺគ្មានសោះនោះ។ ពេលខ្លះ មនុស្សម្នាក់ចង់ឲ្យគេសួរយោបល់ភាគីម្ខាងទៀតសិន មុនពេលធ្វើការរិះគន់”៕
ប្រែសម្រួលដោយ ភួន ច័ន្ទសេរីវុធ