ប្រជាពលរដ្ឋជាង៧០០គ្រួសាររស់នៅក្នុងស្រុកសៀមប៉ាង ខេត្តស្ទឹងត្រែង បានអំពាវនាវឲ្យអាជ្ញាធរមូលដ្ឋានធ្វើអន្តរាគមន៍បញ្ឈប់សកម្មភាពជីកយករ៉ែមាសរបស់ក្រុមហ៊ុនចិនមួយនៅជិតផ្ទះរបស់ពួកគាត់។
លោក ស៊ិន ដន មេឃុំថ្មកែវ បានមានប្រសាសន៍ថា លោកបានដាក់ញត្តិទៅមន្ត្រីថ្នាក់ស្រុក និងមន្ត្រីថ្នាក់ខេត្តកាលពីថ្ងៃអាទិត្យ ហើយកាលពីម្សិលមិញបានលើកឡើងពីក្ដីបារម្ភរបស់ប្រជាពលរដ្ឋថា សកម្មភាពជីកយករ៉ែនេះអាចធ្វើឲ្យប៉ះពាល់ដល់បរិស្ថានក្នុងមូលដ្ឋាន និងជីវភាពរបស់ពួកគាត់។
ក្រុមហ៊ុនខ្មែរហ្វើស (Khmer First) របស់ចិន និងក្រុមហ៊ុនក្នុងស្រុកឈ្មោះឃុនសៀ សុទ្ធតែជាក្រុមហ៊ុនដែលពាក់ព័ន្ធនៅក្នុងសកម្មភាពជីកយករ៉ែមាសនេះ។ លោក ស៊ិន ដន បានមានប្រសាសន៍ថា “ ក្រុមហ៊ុនចិនបានមកជីកយករ៉ែនៅក្នុងតំបន់នេះម្តងម្កាល ចាប់តាំងពីខែតុលាឆ្នាំ២០១២មក។ ប៉ុន្តែពួកគេបានយកម៉ាស៊ីនពីរគ្រឿងបន្ថែមទៀតមកជីកយករ៉ែនៅក្នុងតំបន់នេះចាប់តាំងពីថ្ងៃទី៣ ខែសីហាមក”។
លោកបានមានប្រសាសន៍ថា ប្រជាពលរដ្ឋចំនួន៧១០គ្រួសាររស់នៅក្នុងឃុំថ្មកែវ ព្រមទាំងអ្នកភូមិនៅក្នុងឃុំសន្ដិភាព ឃុំស្រែសំបូរ និងឃុំសេកុង ដែលក្នុងចំណោមពួកគាត់គ្មាននរណាម្នាក់ត្រូវបានពិគ្រោះយោបល់អំពីគម្រោងនេះព្រួយបារម្ភថា ពួកគាត់អាចនឹងរងផលប៉ះពាល់ដោយសារការជីកយករ៉ែនេះដែលកំពុងធ្វើឡើងនៅលើផ្ទៃដីទទឹង២០០ម៉ែត្រ និងបណ្ដោយប្រវែងមួយគីឡូម៉ែត្រ។
លោកបានលើកឡើងពីការប្រើប្រាស់សារធាតុគីមីដ៏គួរឲ្យព្រួយបារម្ភនៅក្នុងដំណើរការជីកយករ៉ែនេះថា “ យើងមិនទាន់ឮប្រតិកម្មណាមួយ [ពីអាជ្ញាធរ] នៅឡើយទេ។ ប៉ុន្តែ យើងសង្ឃឹមថា ពួកគេនឹងចាត់វិធានការដើម្បីជួយអ្នកភូមិក្នុងពេលឆាប់ៗនេះ។ ប្រសិនបើពួកគេមិនជួយទេនោះ វានឹងជះផលប៉ះពាល់លើសុខភាពរបស់អ្នកភូមិ និងជីវចម្រុះរបស់ធម្មជាតិ”។
លោក ស៊ិន ដន បានមានប្រសាសន៍ថា នៅក្នុងមូលដ្ឋានគេដឹងថា ក្រុមហ៊ុននេះជារបស់លោក ឃុន សៀ ពាណិជ្ជករមួយរូបដែលយោងតាមឯកសាររបស់ក្រសួងពាណិជ្ជកម្មបញ្ជាក់ថា លោកមានក្រុមហ៊ុននាំចូលនាំចេញ និងក្រុមហ៊ុនអភិវឌ្ឍន៍មួយចំនួនចុះបញ្ជីដោយដាក់ឈ្មោះរបស់លោក។
លោក ស៊ី សួន អភិបាលស្រុកសៀមប៉ាង ថ្លែងថា ក្រសួងឧស្សាហកម្ម រ៉ែ និងថាមពលបានចេញអាជ្ញាប័ណ្ណជីកយករ៉ែដល់ក្រុមហ៊ុនមួយរបស់ចិនឈ្មោះ Khmer First ដែលរកស៊ីរួមគ្នាជាមួយក្រុមហ៊ុនក្នុងស្រុកមួយ។ លោក ស៊ី សួន បានថ្លែងមុនពេលបដិសេធមិនផ្ដល់ព័ត៌មានលម្អិតថា “ ក្រុមហ៊ុនទើបតែចាប់ផ្ដើមជីកយករ៉ែនៅក្នុងទីតាំងនេះបានពីរបីថ្ងៃប៉ុណ្ណោះ។ យើងមិនទាន់ទទួលបានញត្តិពីឃុំនេះនៅឡើយទេ។ ប្រសិនបើមានបញ្ហា យើងនឹងពិគ្រោះជាមួយថ្នាក់លើ”។
ក្រុមហ៊ុនមួយដែលមានឈ្មោះថា Khmer First Gold Holding Co.Ltd. ត្រូវបានចុះបញ្ជីនៅក្រសួងពាណិជ្ជកម្មក្រោមឈ្មោះរបស់លោកស្រី ពៅ ថាវរី។ ក្រុមហ៊ុន Khmer First Gold Mining Group ក្រុមហ៊ុន Khmer First Gold Mining Trading Exim Co. ក្រុមហ៊ុន Khmer First Investment Holding Group ក្រុមហ៊ុន Khmer First Mining Development Group និងក្រុមហ៊ុន Khmer First Wealth Holding Group ត្រូវបានចុះបញ្ជីក្រោមឈ្មោះបុគ្គលផ្សេងៗទៀត រួមទាំងលោក កាវ យុនទ័រ (Cao Yunde) ដែលជាជនជាតិចិនផងដែរ។
លោក កាវ យុនទ័រ ប្រធានក្រុមហ៊ុន Khmer Holding មិនអាចទាក់ទងបានទេកាលពី ម្សិលមិញ ប៉ុន្តែបានលើកឡើងកាលពីខែមករាថា លោកមានផែនការមហិច្ឆតាចង់ជីកយករ៉ែនៅទូទាំងប្រទេសកម្ពុជា រួមទាំងរ៉ែមាស និងរ៉ែស្ពាន់នៅក្នុងខេត្តសៀមរាបផងដែរ៕
(រាយការណ៍បន្ថែមដោយ Simon Lewis)
ប្រែសម្រួលដោយ តែម សុខុម