28 C
Phnom Penh

មនុស្ស​​ប្រាំ​​ពីរ​នាក់​ស្លាប់ ​និងរា​ប់​​​រយ​​គ្រួសារ​​ចាក​​​ចោល​​​ផ្ទះ​​​សំបែង​​​​​ដោ​យ​សារទឹក​​​ជំនន់

ដោយ ឌឹ ខេមបូឌា ដេលី

បទវិភាគ

យោង​តាម​គណៈ​កម្មា​ធិការ​ជាតិ​គ្រប់​គ្រង​​គ្រោះ​មហន្ត​រាយ​បាន​​​ឲ្យ​ដឹងថា ទឹក​ជំនន់​នៅ​ក្នុង​ខេត្ត​បន្ទាយ​មាន​ជ័យ​​បាន​ឆក់​យក​ជីវិត​មនុស្ស​ប្រាំពីរ​នាក់និង​បាន​​​ធ្វើ​ឲ្យ​ប្រ​ជា​​​​​​ពល​រដ្ឋ​ចំនួន​២០០​គ្រួសារ​​ចាកចោល​​​ផ្ទះ​​​សម្បែង​​​​របស់​​​​ខ្លួន​​​ក្នុង​​​​រយៈពេល​​​​​​មួយ​​​សប្តាហ៍ចុង​​​ក្រោយ​​​នេះ​ ​ដោយសារ​​​ភ្លៀង​ធ្លាក់​ខ្លាំង​ និង​​​ទឹក​ឡើង​ បាន​​​ធ្វើ​​​​​​ឲ្យ​​​តំបន់​​​ភាគ​ពាយព្យ​​​​រងការ​​​លិច​លង់​​​​​​។

លោក កែវ វី អនុ​ប្រធាន​នាយក​ដ្ឋាន​​ព័ត៌​មាន​របស់​គណៈ​កម្មា​ធិការ​នេះ​បាន​ឲ្យ​​​ដឹង​​​​ថា ខេត្ត​កំពង់​ធំ​ បាត់​ដំបង​ ក្រចេះ​ ស្ទឹង​ត្រែង និង​ខេត្ត​ពោធិ៍សាត់ សុទ្ធតែ​​​បាន​រង​ការ​​​ប៉ះ​ពាល់​ដោយ​​សារ​ភ្លៀង​ធ្លាក់​ខ្លាំង​នេះ​​​ ប៉ុន្តែ ខេត្ត​បន្ទាយ​​មាន​ជ័យ​​​​បាន​​​រង​​​​​​ការ​​​ប៉ះ​ពាល់ធ្ងន់​ជាង​គេ។

លោក​បាន​ថ្លែងថា “ខេត្ត​​​បន្ទាយ​​មាន​​ជ័យ​​​​រង​​​​ការ​​​ប៉ះ​ពាល់​ធ្ងន់​បំផុត ដោយ​សារ​ទឹក​ជំនន់​​​​នេះ​​​។ ប្រជាពល​រដ្ឋ​ប្រហែល​២.៥៩២​គ្រួសារ​​​បាន​រង​​​ការ​​​​ប៉ះ​ពាល់ ផ្ទះ​ចំនួន​១៩២​ខ្នង​​ត្រូវ​ទឹក​ជន់​លិច ហើយ​​​វាល​ស្រែ​ និង​ផល​ដំណាំ​​​​​​​​ផ្សេងៗ​​​ជា​ច្រើន​ហិកតា​​​ទៀត​​​​​​ត្រូវ​បាន​បំផ្លាញ”។ លោក​បាន​បន្ត​ថា “មនុស្ស​ចំនួន​ប្រាំពីរ​នាក់​បាន​ស្លាប់​នៅ​ទី​នោះ ​​​ក្នុង​​​នោះ​​​រាប់​ទាំង​ក្មេង​​បី​នាក់​ផង​ ហើយ​ប្រជា​ពល​រដ្ឋ​ចំនួន​២០០​​គ្រួសារ​ត្រូវ​បាន​ជម្លៀស​ទៅ​កាន់​​​ទី​ទួល​​​​មាន​​​សុវត្ថិភាព​​​ហើយ​​​”។

លោក អ៊ុយ សំអាត ប្រធាន​ផ្នែក​គ្រប់​គ្រង​​គ្រោះ​មហន្តរាយ​នៅ​កាកបាទក្រហម​កម្ពុជា ដែល​បាន​សាង​សង់​កន្លែង​ស្នាក់​នៅ​បណ្តោះ​អាសន្ន​ សម្រាប់​អ្នក​ដែល​ត្រូវ​បាន​​​ជម្លៀស​ចេញ​ដោយ​សារ​ទឹក​ជំនន់នេះ​​​ បាន​ឲ្យ​​​ដឹង​​​ថា លោក​មិន​បាន​ដឹង​អំពី​ការ​ស្លាប់​នេះ​​​ទេ​​​​។ លោក​បាន​មាន​ប្រសាសន៍​ពី​ការិយា​ល័យ​របស់​ខ្លួន​​​​ ក្នុង​រាជ​ធានី​ភ្នំ​ពេញ​ថា “ខ្ញុំ​បាន​ទទួល​សេចក្តី​រាយ​ការណ៍ពីរលើក​ក្នុង​មួយថ្ងៃ​ ពី​មនុស្ស​​​​​របស់​យើង​នៅ​​​ទី​​​នោះ​​​ហើយ​គ្មាន​សេចក្តី​រាយ​ការណ៍​ណា​មួយ​អំពី​ការ​​​បាត់បង់​​​ជីវិត​​​ឡើយ​​​។ ប្រជា​ជន​ត្រូវ​បាន​ជម្លៀស​ចេញ​​​​​មែន​​​ ​ប៉ុន្តែ វា​គ្រាន់​តែ​ជា​ស្ថានភាព​បណ្តោះ​អាសន្ន​ប៉ុណ្ណោះ។ កម្រិត​ទឹក​​​​នា​​​ពេល​​​នេះ​​​គឺ​​​​​​ស្ថិត​នៅ​​​ក្រោម​​​ការ​​​​គ្រប់​​គ្រង​​​​ហើយ​​​”។

នៅ​​​​ខេត្ត​​​​​​ព្រះ​វិ​ហារ​​​​​មាន​​​ការ​​ប្រ​កាស​​អា​សន្ន​​​​កាល​​ពីថ្ងៃ​​អា​ទិត្យ​ បន្ទាប់​​ពី​​ស្ទឹ​ងសែន​​បា​ន​​ឡើង​លើស​​​កម្រិត​​​​១១​​​ម៉ែត្រ​ ហើយ​ប្រជា​​ពល​រដ្ឋ​​ចំ​នួន​​៣៥៦​គ្រួសារត្រូ​វ​បា​ន​​ជម្លៀស​​​​ទៅ​កាន់​​ជម្រក​​បណ្តោះ​​អា​សន្ន​​​​របស់​​កាក​​បាទ​ក្រហម​កម្ពុជា​​​នៅ​​​លើ​​​ទី​ទួល​​​​មាន​​​សុវត្ថិភាព​។

​លោក នុត សោភ័ណ ​​អភិ​បា​ល​ក្រុង​​​បា​ន​ឲ្យ​​​ដឹង​​​ថា លោក​កំ​​ពុ​ង​​រង់​ចាំ​​​​ជំនួ​យ​​​របស់​​អ​ង្គ​ការ​ទស្សន​​ពិភព​លោក ​(World Vision)។ ​លោក​​​បាន​​​មាន​​​ប្រសាសន៍​​​ថា “ អង្គការ​ទស្សន​​​ពិ​ភព​លោក​​​​នឹ​ង​​មក​ដល់ ​[ថ្ងៃនេះ] ដោ​យ​​​​​នាំ​​​មក​​​​ជាមួយ​​​នូ​វ​អំ​ណោយ​​​ជា​​​អង្ករ ​ស្ករស ​​អំ​បិល ​​ទឹក​ត្រី ទឹកស៊ី​​​អ៊ីវ ​និង​ប្រេង​ឆា​​” ដោ​យ​លោក​​​បាន​​​បន្ថែ​ម​​​ថា ទឹក​នៅ​តែឡើង​នៅ​ក្នុ​ង​សង្កាត់​​ដែល​​​បាន​​​រងការ​​​​ជន់​លិច​​​ទាំង​​​ពីរ​ គឺ​សង្កាត់ ប៉ាលហាល និ​ង​សង្កាត់កំ​ពង់​ប្រណាក​។

លោក​មាន​ប្រសាសន៍បន្ត​ថា​ “ ប្រសិ​​ន​បើ​យើង​វាស់​កម្រិត​ទឹក​ជា​មធ្យម​នៅ​​សង្កាត់​​ទាំ​ង​​​ពីរ​នេះ​ យើង​​​​ឃើញ​​​ថា​​​ កម្រិត​​ទឹក​​គឺ​​​ឡើង​​​​​ពី​​២០​ទៅ​២៥​សង់​ទី​ម៉ែត្រ​​រាល់ថ្ងៃ​។​ពេល​​​នេះ​​​ ​ផ្ទះ​​​យ៉ាង​​តិច​២២៧​ខ្នង​​​ត្រូ​វ​បា​ន​​ទឹក​​ជន់​លិច”។

​លោក កែវ វី នៃ​គ​ណៈ​កម្មាធិ​កា​រ​ជាតិ​​​គ្រប់​គ្រង​គ្រោះ​មហន្តរាយ​ ​បា​ន​ឲ្យ​​​ដឹង​​​​ថា នៅ​​​ក្នុង​ឆ្នាំ​​​២០១២ មនុស្ស​​ចំ​នួន​​២៧​នាក់​​​បា​ន​ស្លាប់​​​ក្នុ​ង​ទឹក​​​ជំ​នន់​​ ហើយ​ថា នៅ​​​ក្នុង​ឆ្នាំ​​២០១១ ​ដែល​​​កម្ពុជា​​​បាន​​​ជួប​​​គ្រោះ​​​​​​ទឹក​​​ជំ​នន់​ធ្ងន់​​បំ​ផុត​​ក្នុ​ង​រយៈពេល​មួ​យ​ទសវត្សរ៍នេះ​​​ មនុស្ស​​ចំ​នួ​ន​​​២៥០​នាក់​​បា​ន​ស្លាប់​៕

ប្រែសម្រួលដោយ ​ចេវ ប៊ុននី​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស