យោងតាមតំណាងសហជីព និងមន្ត្រីថ្នាក់ខេត្តបានឲ្យដឹងថា សិក្ខាកាមជាង១៧០នាក់ នៅឯរោងចក្រថាមពលអគ្គិសនីគ្រប់គ្រងដោយចិន ដែលកំពុងសាងសង់នៅខេត្តព្រះសីហនុ បានបញ្ចប់ការតវ៉ារយៈពេលប្រាំថ្ងៃកាលពីថ្ងៃច័ន្ទ បន្ទាប់ពីនិយោជករបស់ពួកគេបានយល់ព្រមដំឡើងប្រាក់ខែឲ្យ។
លោក ជ័យ សុវណ្ណ ប្រធានសម្ព័ន្ធសហជីពអំណាចកម្មករខ្មែរ ដែលចរចាជួសមុខឲ្យសិក្ខាកាមជាមួយតំណាងក្រុមហ៊ុនថាមពលអគ្គិសនី CIIDG Erdos Honqjun Electric Power Co. ដែលគ្រប់គ្រងដោយកម្ពុជា-ចិន បានលើកឡើងថា អ្នកតវ៉ាចំនួន១៧៣នាក់បានបន្តការហាត់រៀនរបស់ខ្លួនឡើងវិញហើយកាលពីម្សិលមិញ បន្ទាប់ពីការទាមទារមួយចំនួនរបស់ពួកគេត្រូវបានដោះស្រាយកាលពីថ្ងៃច័ន្ទ។
លោកបានមានប្រសាសន៍ថា ក្រុមហ៊ុនថាមពលអគ្គិសនីនេះ បានយល់ព្រមដំឡើងប្រាក់ខែរបស់សិក្ខាកាមដែលទទួលបានប្រាក់ខែទាបពី១១០ ដល់១២៥ដុល្លារ និងសិក្ខាកាម ដែលទទួលបានប្រាក់ខែខ្ពស់ពី ១៣០ ដល់១៤០ដុល្លារ។ ក្រុមហ៊ុនថាមពលអគ្គិសនីនេះក៏យល់ព្រមដំឡើងប្រាក់ខែរបស់ពួកគេដល់៣៥០ដុល្លារក្នុងមួយខែផងដែរ បន្ទាប់ពីសិក្ខាកាមទាំងអស់បានជាប់ការប្រឡងនៅក្នុងខែធ្នូ។
លោក សុវណ្ណ បានលើកឡើងបន្តថា “សិក្ខាកាមទាំងអស់បានវិលត្រឡប់ទៅហាត់រៀនវិញហើយ ពីព្រោះម្ចាស់ក្រុមហ៊ុនបានយល់ព្រមតាមការទាមទាររបស់អ្នកតវ៉ា រីឯបញ្ហាសេសសល់ផ្សេងៗទៀតនឹងត្រូវដោះស្រាយពេលក្រោយនៅក្រុមប្រឹក្សាអាជ្ញាកណ្ដាល”។
លោក លី ហានឃៀង អគ្គនាយករងក្រុមហ៊ុនថាមពលអគ្គិសនី CIIDG Erdos Honqjun Electric Power Co. បានបញ្ជាក់ថា លោកបានចូលរួមនៅក្នុងការចរចានេះដែរ ប៉ុន្តែបានបដិសេធមិនធ្វើអត្ថាធិប្បាយបន្ថែមឡើយ។ ក្រុមហ៊ុនថាមពលអគ្គិសនីនេះកំពុងតែសាងសង់រោងចក្រថាមពលអគ្គិសនីដើរដោយធ្យូងថ្មកម្លាំង៤០៥មេហ្គាវ៉ាត់។
លោក កែ ឧត្តម អនុប្រធានមន្ទីរការងារខេត្តព្រះសីហនុ ដែលបានចូលរួមនៅក្នុងការចរចានេះដែរ បានលើកឡើងថា ក្រុមហ៊ុននេះបានយល់ព្រមតាមសំណើទាំអស់ប្រាំមួយចំណុច មានដូចជា ដំឡើងប្រាក់ខែ អនុញ្ញាតឲ្យកម្មករបង្កើតសហជីព អនុវត្តតាមច្បាប់ការងារក្នុងប្រទេសកម្ពុជាទាំងអស់ មិនចាត់វិធានការដាក់ទោសទណ្ឌលើអ្នកតវ៉ាណាមួយ មិនដាក់ទោសលើកំហុសឆ្គងតិចតួច និងអនុញ្ញាតឲ្យកម្មករឈប់សម្រាកនៅពេលបុណ្យជាតិទាំងអស់។
លោក កែ ឧត្តម បានលើកឡើងថា សំណើសុំប្រាក់បន្ថែមមួយដុល្លារសម្រាប់អាហារថ្ងៃត្រង់ និងប្រាក់ឧបត្ថម្ភលើកទឹកចិត្ត១៥ដុល្លារក្នុងមួយខែកំពុងស្ថិតក្រោមការពិចារណានៅឡើយ។ លោកបានមានប្រសាសន៍ថា “យើងបានស្នើឲ្យអ្នកតវ៉ាទាំងអស់វិលត្រឡប់ទៅហាត់រៀនវិញ ហើយយើងនឹងបន្តព្យាយាមដោះស្រាយបញ្ហាសេសសល់ទាំងនេះនៅក្រុមប្រឹក្សាអាជ្ញាកណ្ដាល”។
លោក ប៊ុត ចំរុង អ្នកតវ៉ាម្នាក់ក្នុងចំណោមអ្នកតវ៉ាទាំងអស់បាននិយាយថា ក្រុមហ៊ុនជារឿយៗតែងតែមិនធ្វើតាមច្បាប់ការងារក្នុងប្រទេសកម្ពុជាឡើយ ហើយបានចែកកូនសៀវភៅស្ដីពីច្បាប់ការងារក្នុងប្រទេសចិន ដែលសរសេរជាភាសាចិន ដើម្បីឲ្យពួកគេអនុវត្តជំនួសវិញ។ លោកបានបន្ថែមថា “យើងតវ៉ា ដើម្បីទាមទារឲ្យក្រុមហ៊ុនគោរពតាមច្បាប់ការងាររបស់ប្រទេសកម្ពុជា ពីព្រោះក្រុមហ៊ុនបានអនុវត្តច្បាប់ការងារក្នុងប្រទេសចិន ដើម្បីដាក់សម្ពាធមកលើយើងតាំងពីយូរមកហើយ”៕
ប្រែសម្រួលដោយ ស៊ា ស៊ុយឈាង